هويدا
الجزء الثامن عشر
وصلت هويدا ووالدها إلى المشفى تاركه اولادها الصغار مع امها
دخلت الاستقبال ...سأل الطبيب والدها عن ما تعانيه فأخبره حمدى
فزع الطبيب و طلب من التمريض نقلها بسرعه إلى إحدى الغرف و قياس درجه حرارتها و أمر باعطائها مسكن و خافض للحراره
لم تجف دموع هويدا من الألم النفسي و الجسدى...كانت تتمنى الموت و أن تقضى عليها هذه الحمى لتتخلص من حياتها البائسه
و لكن للقدر قول آخر ....
فى الصباح حضرت زهيره و صلاح لاصطحاب الاطفال لكتابتهم بالصحه
دق صلاح على الباب تاركا زهيره بالعربه، استقبلته عزه
يا اهلا يا صلاح مش تسلم عليا ؟؟ مش انا حماتك برده ؟ و الا نسيتنا
اهلا بيكى يا ام هويدا ؟؟ امال فين عيالى عاوز اخدهم اكتبهم و ارجعهم لكم تانى
طب و مراتك مش تسأل عليها ؟هو ينفع تسيبها كل المده دى من غير مصاريف كدا و لا حتى سؤال عليها ؟
مراتى انا مزعلتهاش و هى اللى سابت البيت من غير إذنى....و المفروض كنتوا رجعتوها تانى و كنتوا تقولولها عيب كدا تسيبي بيت جوزك ....دا لو مش عاوزين تخربوا عليها يعنى
مش وقته الكلام ده دلوقتى ....مراتك فى المستشفى عندها حمى شديده
ربنا يشفيها أن شاء الله.....هاتى العيال يلا عشان نلحق الصحه
بقولك مراتك تعبانه تقول هاتى العيال ؟؟ دا بدل ما تروح تشوف فيها ايه ؟ مش دى مراتك برده و انت مسؤل عنها ؟؟؟
بقولك ايه انتى عاوزه تتخانقى و الا ايه ؟؟ قلت لك هاتى العيال نلحق الصحه و بعدين نبقى نشوف الموضوع دا و انا جايبهم لك
لا و اتخانق ليه ؟ هدخل اجيب لك عيالك بس خليهم عندك بقا لحد ما مراتك تخرج
و ماله..هاتيهم ...انتى فاكره انك هتلوى دراعى و الا ايه ؟
لا ابدا بس كل حى اولى بعياله
دخلت عزه و أحضرت الطفلين و اعطتهم لصلاح
حمل صلاح اولاده و ذهب إلى والدته و أخبرها بما قالته عزه
توعدت زهيره لعزه و ابنتها قائله
بقا كدا يا عزه ؟؟؟ و الله لاحرق قلبك و قلب بنتك عليهم إن مكنتش اخليها تيجى تبوس رجلى قبل ايدى عشان تشوف ولادها مبقاش انا زهيره ؟
طب و هنرضعهم منين يا اما ؟؟
هو احنا هنغلب ؟؟ نشوف واحده ترضعهم و الا نجيب لهم لبن صناعى و لو غلبنا خالص نشتريلهم معزه ...متخافش
انقضى النهار و عاد حمدى إلى داره
سلام عليكم
و عليكم السلام...البت عامله ايه يا حمدى ؟
البت تعبانه يا عزه ...كل ما الحراره تنزل شويه ترجع ترفع تانى ...و الدكتور قال لو فضلت كدا لبكرا ممكن يدخلوها العنايه
يا ستار يا رب الشر بره و بعيد
انا بس جاى اتحمم و اغير هدومى و هرد تانى للمستشفى عشان ابات جنب المستشفى لو احتاجوا حاجه
طب مش هتاكل ؟؟؟
و الله ما ليا نفس للاكل
لا مينفعش ..هجيب لك حته جبنه و عليها معلقتين قشطه و إقليلك بتنجانايه تتقوت بيهم
طب بسرعه على ما استحمى
وضعت عزه الطعام ...جلس حمدى ليأكل و سألها عن اولاد هويدا
امال عيال هويدا عاملين ايه ؟؟ رضعتيهم ازاى ؟
مرضعتهمش
ازاى ؟؟ العيال مكلتش من الصبح ؟؟
معرفش
متعرفيش ايه يا وليه ؟؟ ما تردى عدل
ما هو العيال مش هنا
امال العيال فين ....انطقى
ابوهم خدهم
خدهم ازاى يا وليه انتى ؟؟
ما انت عارف أنه جاى ياخدهم عشان يكتبهم فى الصحه
اه و بعدين ؟؟
بعدين مجبهمش
مجابهمش دا ايه ؟؟ و مرحتيش معاهم ليه ؟ ازاى تسبيله العيال ياخدهم ؟؟
الله مالك هبيت فيا زى البابور كدا ؟؟ مش ابوهم ؟؟ و بعدين كنت هاخد بالى منهم ازاى و عاوزه اروح لبنتى فى المستشفى برده اقعد جنبها
بنتك ايه يا مصيبه انتى ؟؟ دا بنتك لو عرفت و هى تعبانه كدا ممكن تموت فيها
تموت ليه يعنى ؟؟ ما هم صلحوها خلاص يعنى كدا كدا العيال رايحين له
الله يخربيتك يا بعيده يا ام مخ تخين
قايم ليه ؟؟كمل أكلك
مش طافح ...سديتى نفسي الله يسد نفسك و يغمك زى ما غمتينى
و انا اعرف منين إنه مش هيرجعهم ؟؟
مكنتيش ادتهمله الا اما اكون موجود ...هو انا مت ؟؟
بعد الشر عنك يا اخويا
شر لما يلهفك يا بعيده
رايح على فين ؟
رايح لبنتى المستشفى
طب استنى البس و اجى معاك
حسك عينك تهوبى ناحيه المستشفى ...البت لو عرفت أن العيال مش معاكى هتروح فيها
خلاص زى ما تشوف ...
تماثلت هويدا للشفاء بعد انقضاء اسبوعين ، كانت هويدا تسأل خلالها والدها عن أطفالها فيخبرها أنهم مع والدتها و أنهم بخير و يطمئنها الا تقلق عليهم
كانت هويدا تشعر بغصه داخل قلبها لا تجد لها مبرر و لكنها كانت تصدق والدها فهو لم يكذب عليها قط
خرجت هويدا من المشفى و ذهبت إلى بيت أبيها
سلمت على امها ....وحشتينى يا اما
حمد الله على السلامه يا هويدا
الله يسلمك ...فين عيالى
صمتت عزه و نظرت الى زوجها
اقعدى ارتاحى الاول بس يا هويدا انتى جايه من مشوار يا بنتى
عيالى جرالهم حاجه يا أبا ؟؟
لا بعد الشر عنهم عيالك زى الفل
اسرعت هويدا الى غرفتها لتبحث عن اولادها و لكنها لم تجدهم
نادت امها
فين عيالى يا اما ؟؟ عيالى جرالهم ايه ؟؟
عيالك كويسين متخافيش
امال هما فين ؟؟
ابوهم جه خدهم
خدهم ازاى ؟؟ ازاى تديله ولادى ؟؟
الله ما هم ولاده هو كمان
ولاده منين ؟؟ و هو يعرف عنهم ايه ؟؟
هو كان سأل فيهم و هما فى بطنى ؟؟ جاى ياخدهم على الجاهز كدا ؟
كدا كدا كان هياخدهم امال انتى فاكره انك لسه هتقعدى هنا تانى ؟؟
عارفه يا اما ...انتى ظالمه زيك زى زهيره بالظبط ...متفرقيش عنها ...بالعكس انت ظالمه اكتر منها
انا ظالمه يا بت يا قليلة الادب ؟؟
ايوا انتى ظالمه ...منك لله يا ظالمه منك لله ...حسبي الله ونعم الوكيل فيه
صرخت هويدا بشده و هى تلطم خدها إلى أن وقعت على الأرض فاقدة الوعى
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
جميلة بجد تسلم ايدك وقلمك مالوش حل الرواية تحفه
ردحذف