هويدا
الجزء السابع عشر
ازاى هتديها ولادى تكتبهم ؟
و هى هتعمل بيهم ايه ؟ و بعدين العيال عيالهم برده و هيتكتبوا على اسمهم
ما يمكن تخطفهم و متورهمش ليا تانى
بطلى يا اختى شغل الافلام دا تخطفهم تعمل بيهم ايه ؟...و ع العموم هبعت ابوكى معاهم الصحه ...ارتاحتى كدا يا اختى ؟
لا مرتحتش و ابويا هو اللى له الكلمه فى الموضوع دا
بقولك ايه يا روح امك كلمتين و تحطيهم حلقه فى ودنك انا مش هربى ولاد غيري و انتى ملكيش قاعده هنا اكتر من كدا ...انا قرفت منك و ما صدقت تجيبي الواد عشان تغورى من هنا
نفسي اعرف انتى بتعاملينى كدا ليه ؟؟ هو انا مش بنتك ؟؟ ليه بتعملى معايا كدا ؟
انا بكرهه البنات و خلفة البنات مبيجيش من وراهم الا الهم و الغم ....و دينى و ما أعبد لو نطقتى بكلمه و الا قلتى لابوكى حاجه لأكون واخده عيالك دول رمياهم لزهيره و هوريكى السواد اللى عمرك ما شفتيه فى حياتك ...انتى حره بقا يا عين امك عقلك فى راسك تعرفى خلاصك
خرجت عزه من الغرفه و هى تسب و تلعن خلفة البنات
اخذت هويدا تبكى بحرقه على بختها المائل فليس لها إلا الله و ابوها المتعاطف معها ....و لكنها لا تستطيع الان اخباره بما قالته لها امها لأنها تعلم أنها ستنفذ تهديدها
بكت هويدا إلى أن تورمت عيناها و اصبحت بلون الدم
عاد حمدى الى الدار و أخبرته زوجته أن زهيره احضرت زياره و جاءت لاصلاح هويدا
تعجب حمدى و تسائل
طب و حق البت فين ؟؟ مش المفروض يكون فى قعده و نشوف مين الغلطان و سيبانهم للبت طول الشهور دى من غير و لا سؤال و لا مليم كل دا بالساهل كدا ؟؟ اول ما عرفوا أن البت خلفت جايين و كأن مفيش حاجه حصلت ؟؟
بقولك ايه يا راجل احنا مش عاوزين دوشه و الا انت عاجبك بنتك تطلق لنا بعيلين كدا ؟؟ هتصرف عليهم منين ؟؟ اذا كان احنا ما صدقنا نخلص من بنت يقوم تجيب لنا تلاته ؟؟
انتى اتهبلتى يا وليه دا ربك هو اللى بيرزق و اكيد ربنا هيبعت رزقهم
انت عاوز تخرب على بنتك ليه بس ؟؟ ما البت كانت قاعده و فرحت أنهم جم يصلحوها
فرحت ؟؟ صحيح يا عزه ؟
ايوا صحيح و أن مكنتش مصدقنى ادخل اسالها ...بالاماره قالت لى خلى ابويا يروح مع الجماعه بكرا عشان تكتبوا العيال فى الصحه
انا مش هعمل اى حاجه الا اما اسمع الكلام دا منها
و ماله ...هو انا هكدب عليك يعنى ؟
دخل حمدى على ابنته فوجدها تحضن ولديها ووجهها منتفخ و عيونها حمراء
مالك يا بنتى فيكى ايه ؟؟
مفيش حاجه يا أبا
مفيش ازاى ؟؟ دا انتى زى ما يكون معيطه
لا مش معيطه و لا حاجه بس دماغى وجعنى شويه
طب انتى موافقه تروحى بيت جوزك ؟؟
ايوا يا أبا ...مش عاوزه اتقل عليكم اكتر من كدا
تتقلى ايه بس يا بت يا هبله ؟ انتى لو قعدتى العمر كله عمرنا ما نتقل منك ابدا
ربنا يخليك ليا يا أبا
اقترب حمدى ليأخذ هويدا فى حضنه استشعر خروج حراره شديده منها
وضع يده على جبهتها وجدها ساخنه جداا
ايه دا انتى سخنه اوى يا بنتى ؟؟ انتى حاسه بأيه ؟؟
مفيش يا أبا حاسه انى سقعانه شويه و جسمى مزفزف
يا عزه ...يا عزه تعالى شوفى البت مالها ؟
مالها يا اخويا ما كانت زى العفريت من شويه
عفريت لما يلهفك البت سخنه مولعه يا وليه يا بارده شوفى اعمليلها كمادات و الا اى حاجه تنزل السخونيه دى
حاضر ...ما احنا ماورناش الا بنتك
بتبرطمى تقولى ايه سمعينى ؟؟
مبقولش رايحه اجيب مايه و كمادات
اخذ حمدى اطفال هويدا من يديها و هى ترتعش وضعهم بجانبها و القى عليها لحاف اخر غير الذى تتغطى به
احضرت عزه الكمادات و جلست بجانب ابنتها و هى متضرره و تتثائب
قومى نامى انتى انا هقعد جنب بنتى
طب ما تيجى تريح شويه انت من الصبح فى الغيط
روحى نامى يا عزه متطلعيش زرابينى
مضى الليل بأكمله و لم تنخفض الحراره بل ازدادت حاله هويدا سوء و بدأت ترتعد بشده و تخرف
قلق حمدى كثيرا و أيقظ عزه
قومى يا وليه البت تعبانه اوى
طب و انا هعملها ايه دلوقتى ...الفجر لسه مأدن
روحى نادي لها سعديه يمكن تعرف تعملها حاجه
سعديه الفجر ؟؟
دا ظرف يا وليه ؟؟ البت هتروح منا
طيب خلاص هروح ...ما هى عزه مكتوب عليها الشقا
ذهبت عزه الى سعديه و بعد محاولات و رجاء منها قبلت سعديه أن تحضر معها
حضرت سعديه و وضعت يدها على رأس هويدا
يا لهوى البت سخنه مولعه ...دى شكلها حمى نفاس
حمى نفاس ؟؟ تفى من بوقك يا اختى
و لا اتف و لا حاجه يا اختى ...انا مليش تصريفه فى الموضوع دا ...انتوا لازم تاخدوا البت دى دلوقتى حالا و تودوها على الاستباليه انا مش مسؤله لو اتاخرتوا ...بنتكم ممكن تروح فيها
يا ستار يا رب ...لا انا هروح اشوف لها عربيه بالاجره و اوديها ....
ربنا يشفيهالك يا أبو هويدا
يارب يا رب يا ست سعديه ...و انتى لبسيها على ما اجى يا عزه
خرج حمدى مسرعا يبحث عن سياره ...اتجه إلى موقف القريه ليجد عربه داتسون طلب من صاحبها الحضور معه لداره لنقل ابنته إلى المشفى
وصلت هويدا ووالدها إلى المشفى تاركه اولادها الصغار مع امها
دخلت الاستقبال ...سأل الطبيب والدها عن ما تعانيه فأخبره حمدى
فزع الطبيب و طلب من التمريض نقلها بسرعه إلى إحدى الغرف و قياس درجه حرارتها و أمر باعطائها مسكن و خافض للحراره
لم تجف دموع هويدا من الألم النفسي و الجسدى...كانت تتمنى الموت و أن تقضى عليها هذه الحمى لتتخلص من حياتها البائسه
و لكن للقدر قول آخر ....
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق