هويدا
الجزء السادس عشر
صرخت هويدا صرخه أخرى كادت روحها تخرج معها
نظرت عزه الى المولود لتجده ولد
ارتفع صوت عزه بالزغاريد و تهلل وجهها قائله
مبروك يا هويدا مبروك الولد يا حبيبتى
انتهت سعديه من هويدا و البست الطفلين الملابس و قامت بتغيير ملابس هويدا بعد تنظيفها
خرجت لحمدى لتتلقى أجرتها و حلاوه المولودين
يتربوا فى عزك يا أبو هويدا
يتربوا فى عز ابوهم
و عزك انت كمان ...انت بقيت جد اهو
اه و الله بقيت جد بسرعه كدا
يلا فين اجرتى بقا و الحلاوه قبل اجرتى
اجرتك مع ام هويدا
طب فين الحلاوه ؟؟
الحلاوه معاها برده ...انا مستعجل و لازم اروح ع الغيط دلوقتى
الحلاوه يا ام هويدا و اجره الولاده
خدى يا حبيبتى شويه الرز دول
ايه دول ؟؟
اجرتك
اجرتى رز ؟؟؟ هو ايه الكلام دا ؟؟ و بعدين دا انتى المفروض تدينى حق ولادتين ...انتى جايلك جوز يا اختى و انا تعبت مع بنتك بقالى تلات ايام رايحه جايه
معلش يا حبيبتى انتى عارفه الحال ازاى و البت جوزها سيبها مبيبعتش لها جنيه
طب و انا مالى و مال الكلام دا ؟ انا عاوزه اجرتى دلوقتى و مش هتحرك من هنا الا اما تحبيها
طب هزود لك كيله دره و دا اكتر حاجه ممكن اديهالك
هاتى يا اختى ...احسن منكم ...متبقيش تنادينى بقا اعملها السبوع لانى مش هاجى
محناش مسبعين اصلا
كمان ؟؟؟ الله يعينكم
ارتدت سعديه عبائتها السوداء و حملت الارز و الذره و ذهبت بهم إلى بيتها
وضعتهم بحجره الخزين و انطلقت مسرعه الى بيت زهيره
أقبلت على زهيره متهلله الوجه
انا عاوزه الحلاوه يا حاجه ...مش هتنازل عن خمسين جنيه
حلاوة ايه يا مره ؟ و خمسين ايه اللى جايه تقولى عليها
حلاوه انى ولدت مرات ابنك
طب و احنا مالنا ....روحى خدى من امها و الا من ابوها
امها و الا ابوها ؟؟ دول عالم كحيانه بيكحوا تراب و القرش يطلع منهم بالضالين و بعدين انا جايبالك بشاره السعد و الهنا
بشاره ايه ؟ هى البت جابت واد؟؟؟
لا لا يمكن انطق الا اما تدينى الحلاوه الاول
خلاص مش عاوزه اعرف ...ال يا خبر انهارده بفلوس بكرا يبقى ببلاش
راضينى يا حاجه الله يرضى عليكى يا شيخه
طب ما تنطقى يا مره
و هتراضينى ؟؟؟
ايوه يا ستى ...قولى يلا البت جابت ايه ؟
البت جابت واد و بت
يا لهوى ...جايبه جوز
ايوا يا حاجه جوز زى العسل فين الحلاوه بقا
جايه تتشطرى عليا ...متشطرطيش على عزه ليه و خدتى منها ؟
هما دول حيلتهم حاجه ؟ دى عاوزه تدينى شويه رز قلت لها خلهوملك يا اختى انا هروح لست الناس اخد منها اجرتى و حلاوتى و عارفه انها مش هتستخسر فيا اى حاجه
و قالت لك ايه لما قلتى لها كدا ؟
قالت لى روحى يا اختى ابقى قابلينى لو ادتك حاجه
بقا هى قالت كدا ؟؟؟ شوف المرا ؟؟ خدى يا بت بالغيظه فيها
ايه دول يا حاجه انا عاوزه خمسين جنيه
ياك خمسين عفريت لما يلهفوكى ...لو مش عاجبينك هاتيهم
لا لا خلاص اى حاجه من ايدك حلوه يا حجه
انصرفت سعديه و دخلت زهيره لابنها صلاح ايقظته من النوم
قوم يا ولا ...مراتك ولدت
قام صلاح و هو يهرش برأسه و يتثائب
ولدت ؟؟ جابت ايه يا اما ؟
جابت واد و بت يا ولا
جابت ولد ؟؟ ولد يا اما ؟؟
ايوا يا واد ...مالك كدا هتتهبل و الا ايه ؟
انا فرحان اوى يا اما ...من زمان و انا نفسي فى ولد انتى عارفه أن نجلاء مراتى جابت لى تلات بنات بنتين ماتوا و فضلت البت اللى معاها دى ...كان نفسي يكون عندى ولد يحمل أسمى و اسم العيله اوى
و اهو جالك الولد اهو و هتسميه على اسم ابويا الله يرحمه
اسم ابوكى ازاى يا اما ...دا اسم قديم اوى
لو مسمتوش على اسم ابويا مش رايحه اصالح لك مراتك
يا اما ابوكى اسمه سباعى هسمى ابنى سباعى ؟؟
و ماله يا واد سباعى يعنى سبع حد يطول ابنه يبقى سبع ؟؟
طب ما اسميه على اسم جدى مصطفى اسم جميل و سهل
هو سباعى يعنى سباعى قلت ايه ؟؟ والبت زهيره طبعا
خلاص سباعى سباعى ...هنروح نجيبه امتى ؟
اهدى يا منيل
أهدى ايه بس يا اما مراتى بقالها اكتر من سبع شهور بعيد عنى يعنى اتجوزت و متجوزتش ...حرام كدا يا اما
حرمت عليك عيشتك يا واد انت ...انا كمان شويه رايحه لهم عشان يطمر فيك بس
صحيح يا اما ؟؟ هتروحى و هشوف ابنى
و بنتك كمان ؟؟
اه و بنتى كمان ..طب ما تقومى يلا
يا واد اصبر لما ابوك يجى اخده و اروح
هو ابويا فين ؟؟
ابوك بيحلق و زمانه جاى
اتاخر اوى هروح اشوفه مجاش ليه لحد دلوقتى
يا واد اتهد يا ولا ....احنا كدا كدا هنروح نزورهم ونصلح بس مش هنجيبها معانا
و ليه يا اما بس ؟ ما انتى قلتى هتجبيلى ابنى
هجبهولك يا ابن المسروعه بس لو جبت مرتك دلوقتى و هى والده كدا مين هيخدمها يا ناصح ؟
امها تيجى تخدمها هنا
امها هتسيب دارها و عيالها الصغيره و تجيلك ؟؟ اصبر البت تشد حيلها كدا و اجيبهالك
امال انتى هتروحى ليه دلوقتى بقا يا اما ؟
هروح قبل ما يتهبلوا و يكتبوا العيال على مزاجهم ...رايحه اقولهم انى هاخد العيال بكرا و اسجلهم فى الصحه
طب هاجى معاكى بكرا الصحه
ماشي هبقى اخدك معايا
فى المساء ذهبت زهيره و زوجها و هى تحمل معها قفص من الدجاج البلدى الصغير ، كيله من الأرز و كيله من الذره بطاطس و طماطم و مكرونه
تهللت عزه و شعرت بالفرح الشديد لحضور زهيره اخيرا
و بعد السلامات و تقديم واجب الضيافه و كأن شئ لم يكن طلبت زهيره رؤيه الاطفال و لم تطلب رؤيه امهم
ما تجيبي العيال لجدهم يشوفهم يا ام هويدا
عنيا حاضر يا حاجه
دخلت زهيره على ابنتها و حملت الاطفال على كلتى يديها
رايحه بالعيال فين يا اما ؟؟
حماتك جت بره و عاوزه تشوفهم
تشوفهم ليه ؟ هى كانت سألت عليا طول الشهور دى كلها ؟؟
خلاص بقا يا هويدا ...عفا الله عما سلف
طب و حقى يا اما
حقك عند الله يا بنتى
و ابويا رأيه كدا برده ؟
ابوكى مش هنا ...بس برده اكيد ابوكى مش هيمانع ...انتى عاجبك كدا عيالك يتربوا من غير اب و تطلقى و انتى ملحقتيش تتجوزى ؟
اه يا اما انا عاوزه اتطلق
و مين يا اختى هيصرف عليكى و على ولادك ؟؟ بقولك ايه يا اختى عاوزه تطلقى يبقى ترمى عيالك لابوهم هى المشرحه مش ناقصه قتلى
عيالى لا ...مقدرش اسيب عيالى
يبقى تتلمى يا روح امك و تخرسي خالص على ما نرجعك لجوزك
بس لازم نستنى ابويا و هو اللى يقول
ابوكى دا مش نافع فى حاجه خالص ...سبت له الموضوع معرفش لا يحل و لا يربط فيه ...انا بقا اللى هتصرف
خرجت عزه بالطفلين
اخذت زهيره منها الولد و أخذ زوجها البنت
يتربوا فى عزك يا حاجه
يتربوا فى عز ابوهم يا اختى
و ماله عزك و عز ابوهم واحد ...
احنا بكرا هنيجى ناخد العيال نكتبهم فى الصحه
و ماله يا حاجه العيال عيالكم برده و على ما تكتبوهم و تيجوا اكون جهزت لكم هويدا عشان تروح معاكم
لا هويدا خليها شويه على ما تشم نفسها يعنى على الأربعين كدا تبقى تجبيها و تيجى ...مش دى الأصول برده ؟
اه ...اه طبعا الأصول
يلا احنا قايمين
طب مش هتطلوا على هويدا ؟؟ دى نفسها تشوفكم
لا سبيها مرتاحه نبقى نشوفها فى وقت تانى
انصرفت زهيره و زوجها و دخلت عزه بالاولاد لبنتها لتجدها تبكى
بتقوقى ليه يا ام قويق ؟؟
انتى يا اما معملتليش اى كرامه انا سامعه كل الكلام و الست جايه تبيع و تشترى فينا
تبيع ايه و تشترى ايه يا هبله انتى ...انا بس مرضتش اقلب فى اللى حصل عشان الموضوع ميكبرش مدام النيه خير
و اولادى يا اما ؟
مالهم يا اختى؟
ازاى هتديها ولادى تكتبهم ؟
و هى هتعمل بيهم ايه ؟ و بعدين العيال عيالهم برده و هيتكتبوا على اسمهم
ما يمكن تخطفهم و متورهمش ليا تانى
بطلى يا اختى شغل الافلام دا تخطفهم تعمل بيهم ايه ؟...و ع العموم هبعت ابوكى معاهم الصحه ...ارتاحتى كدا يا اختى ؟
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق