هويدا
الجزء الخامس عشر
الحمد لله انك جيتى ...احنا متعرفش الكلب دا كان هيعمل فيها ايه ؟
الكلب دا كان مخدر بنتك
مخدرها ازاى ؟ مين قالك كدا ؟؟
الدكتور اللى قالى
اه يا ابن الكلب لو مسكتك دلوقتى مش هسيبك إلا و زمارة رقبتك فى ايدى ...
بعد عدة دقائق فتحت هويدا عينيهاا لتجد الطبيب يقف بجانب سريرها و معه صفاء الممرضه
حمدالله على السلامه
انكمشت هويدا على نفسها و ظهر عليها الفزع الشديد
متخافيش متخافيش
انا فين ؟ و انت مين ؟
احنا فى المستشفى و انا دكتور احمد الدكتور النباطشي...اهلك جابوكى هنا و انتى متخدره و انا فوقتك
و فين اهلى ؟ فين ابويا ؟؟
ابوكى و امك بره مستنينك
عاوزه امى ...نادولى امى
حاضر حاضر ...روحى يا صفاء ناديها
حاضر يا دكتور
عادت صفاء بعد دقيقتين و معها عزه تهرول من خلفها
امسكت هويدا بيد امها كأنها طفله صغيره ترى العالم لاول مره
متسبنيش يا اما ...انا خايفه
متخافيش يا هويدا انا جنبك اهو ..متخافيش
استطاعت هويدا على العاشره صباحا الوقوف على قدميها بعد أن أخذت عدة محاليل و طلب الطبيب منها عمل تحاليل لمتابعه الحمل
عادت هويدا الى الدار تشعر بالانكسار فقد تعرضت للظلم و الضرب و التحرش بسبب ام زوجها
اخذت تحدث نفسها أن لولا أن زوجها عديم الشخصيه عديم القيمه لما حدث لها كل ذلك
شعرت أنها تكرهه و تكره امه و تكره كل الناس
كبر الخوف بداخلها و اصبح كالوحش يهاجمها كل ليله عند نومها
انتابتها الكوابيس كل ليله ... تحلم برجال تجرى ورائها ، تحلم بزهيره تريد قتلها ، تحلم انها تقع فى بئر عميق و تستنجد بصلاح و لا ينقذها
بعض الأحيان تحلم أن أمها من تلقيها بالبئر و تستعطفها بألا تفعل دون جدوى
احلام كثيره مرعبه تجعلها يوميا تقوم مفزوعه
عندما رآها والدها على هذا الحال قرر أن يذهب إلى شيخ المسجد ليقص عليه حكايه ابنته و يستشيره فيما يفعل
استمع الشيخ عبدالله إلى حمدى و أخبره أن ابنته تعانى من حاله صدمه و أزمة نفسيه و أنه يجب أن يذهب بها إلى طبيب نفسي
طبيب نفسي ايه اللى بتقول عليه يا شيخ عبدالله ؟؟؟ انت عاوزهم يقولوا عليها مجنونه ؟؟
مجنونه ايه بس ؟ هو اى حد يروح لدكتور نفسي يكون مجنون ؟
ايوا امال ايه ....انا جايلك تعملها حجاب و الا اي حاجه عشان ربنا يهديها و تبطل تحلم بالكوابيس اللى بتحلم بيها دى
حجاب ايه اللى بتقول عليه دا ؟ و من امتى انا بعمل احجبه ؟ انا راجل حافظ كتاب الله و لا يمكن اعمل الكلام دا
مش قصدى حجاب يعنى ...قصدى تحصينه
و لا تحصينه و لا حجاب انت متعرفش أن الرسول عليه الصلاة والسلام قال( من تعلق تميمه فلا أتم الله له ) و أن دا يعتبر شرك بالله عز و جل
اعوذ بالله ...لا لا خلاص
يبقى لازم نشوف العلم بيقولنا ايه ...البنت صغيره و بتقول حامل و اهل جوزها بهدلوها يبقى دى محتاجه تتعالج
خلاص يا شيخ عبدالله هاخدها اوديها و امرى لله
عاد حمدى إلى زوجته و التى كانت تنتظره بفارغ الصبر
ها ...الشيخ قالك ايه ؟
الشيخ بيقولى اوديها لدكتور نفساوى
نعم نعم نفساوى دا ايه دا ؟ و بعدين هو احنا هنأكلها و الا هنصرف على دكاتره ؟؟
امال نسيب البت تروح مننا ؟؟ البت عمال تضعف يوم عن يوم
خلاص يا اخويا أن كان معاك وديها
ما انتى عارفه اللى فيها ...انا عاوز منك اى فلوس معاكى عشان اكشف ع البت و اول ما ربنا يفرجها هردهالك على طول
كان على عينى ...اجيب لك منين ؟
انتى مش لسه بايعه محصول الرز و الدره ؟
ايوه بعت بس اللى جه يدوب على اد الكيماوى و القمح اللى هنشتريه عشان نزرع الأرض تانى و الباقى صرفته عليك و على اولادك
يعنى مش كاسره معاكى اى مبلغ كدا ؟
مكنش يتعز يا حبيبي
امال احنا هنولد البت ازاى ؟ ما لازم يكون معانا فلوس
هنبقى نجيب لها سعديه الدايه تولدها و ابقى اديها شويه رز و خلاص
سعديه تانى ؟؟ انتى عارفه أن بنتك مبتقبلهاش
خلاص يا اخويا وديها انت للدكاتره يولدوها ...اللى فى مقدرتى قلت لك عليه غير كدا مقدرش ...مفروض المعدول جوزها هو اللى بولدها على حسابه إنما اقول ايه بس
تانى يا وليه ؟؟ هو انتى مبتزهفيش
طب بقولك ايه ؟ ما تخلى الشيخ عبدالله يتدخل فى الموضوع و يبعت له يمكن يصالحها
لا مش باعتين تانى و لو هو عاوز مرته يجى لحد هنا هو و أمه و ابوه كمان
يا خيبتى عليك راجل ...خلاص انت حر
مضت شهور الحمل على هويدا ثقيله و مع كلمات عزه التى تشبه الرصاص ساءت حالتها النفسيه أكثر و أكثر
إلى أن أتى يوم الولاده
شعرت هويدا بآلام مبرحه بظهرها و بطنها ،
علمت عزه انها الام الولاده
بعثت إلى سعديه لتحضر مع ابنتها
كشفت سعديه على هويدا ثم قالت
لسه بدرى البت بكريه و لسه قدامها شويه
شويه اد ايه كدا يا سعديه ؟؟
يعنى ممكن تولد بكرا الصبح أو ع الضهر كدا
انقضت الليله على هويدا و هى تتألم و جاء الصباح و لديها أمل أن يكون كلام سعديه صحيح و تتخلص من ذلك الالم الرهيب
مضى الصباح و انقضى النهار بأكمله و لم تلد هويدا
استدعت عزه سعديه مره اخرى و التى بدورها كشفت عليها قائله
لسه برده الرحم مفتحش
انتى مش قلتى هتولد الصبح أو الضهر اهو بقينا بالليل اهو و البت لسه مولدتش
طب و انا هعملها ايه بس ؟؟ لازم نستنى لحد ما الرحم يفتح
قضت هويدا ليله أخرى فى العذاب
كانت تتالم الم مضاعف فهى بعد وقت قليل ستنجب طفل بدون اب ، تخلى عنه ابوه و لم يسأل فيها أو فيه
أصبح الصباح و جاء موعد الولاده
هاتيلى حله مايه سخنه يا ام هويدا و حضرى لبس العيل
اللبس اهو شاحتاه من ام محمد جارتنا و الميه ع الباجور
طب همى شويه انا شايفه الرأس اهى...يعنى طلقه واحده و العيل هينزل
حاضر ...هجيب الميه هوا
يلا يا هويدا ...يلا ساعدى ابنك يا حبيبتى
احزقى يا بت ...خلاص اهو ابنك جاى
صرخت هويدا و اصطحب صرختها صوت طفلها يبكى
اللهم صلى على النبى ...اللهم صلى على النبى
دخلت عزه بالماء متلهفه ....جابت ايه يا اختى ؟؟
بت زى القمر اهى
بت ؟؟؟ يا أدى المصيبه
مصيبه ايه يا مرا ؟؟ دا بدل ما تحمدى ربنا ؟؟ بنتك كانت هتموت فيها
انا مقلتش حاجه بس كان نفسي يجى واد
طب سبينى يا اختى خلينى اقطع السره و انضف البت
بس هى البت لسه بتتوجع ليه ؟؟ مش ولدت خلاص
بتتوجع ؟؟؟ استنى يا وليه لهوجتينى ......الله اكبر ...دا فى عيل تانى فيها
عيل تانى ؟؟؟ يا لهوى
يا لهوك دا ايه ؟؟ أخص عليكى و على الفاظك ...الملافظ سعد يا اختى.... امشي يا عزه اطلعى مش عاوزاكى تقفى جنبى
لا و الله هقف مش هنطق
يلا يا هويدا يا حبيبتى احزقى ...جايلك كمان عيل ...يلا يا حبيبتى ساعدى صغيرك
صرخت هويدا صرخه أخرى كادت روحها تخرج معها
نظرت عزه الى المولود لتجده ولد
ارتفع صوت عزه بالزغاريد و تهلل وجهها قائله
مبروك يا هويدا مبروك الولد يا حبيبتى
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق