هويدا
الجزء الثاني
رأى ايه اللى للبت الرأى رايك و الشورى
شورتك ...هى البت هتفهم مصلحتها اكتر منك ؟
عندك حق يا عزه ...خلاص هرد عليهم بكرا و اقولهم أننا موافقين
لا متتدلقش كدا اصبر عليهم يومين تلاته كدا و بعد كدا نرد
عندك حق برده ...كمان تلات ايام هرد عليهم ...
دلفت هويدا الى الغرفه التى تنام بها هى و اخوانها الصغار
انزوت بجانب اختها تبكى حظها
و ياله من حظ ....كانت تعتقد أنها ستسعد كباقى البنات و أنها ستتزوج شاب صغير كصديقتها حنان التى تزوجت ابن عمها الذى يكبرها بثلاث سنوات فقط
كانت تظن أنها ستصبح امراه ولها بيتها المستقل كجارتها سعاد و التى تتصرف فيه كيف تشاء
ضاعت أحلامها على عتبه الحقيقه المؤلمه و اصبح من الصعب تغيير الواقع
فى اليوم التالى ايقظتها أمها و هى تنادى عليها
قومى يا عروسه ...عشان تحلبى الجاموسه و تلمى الجله و تغسلى الوعى ...انتى خلاص هتبقى صاحبه بيت
شعرت هويدا بالضجر الشديد و قامت و هى تربط رأسها برباط رأس مهترئ
اخذت الإناء و ذهبت إلى الحظيره لحلب اللبن
تذكرت خيبة أملها و اخذت تبكى
دخلت عليها امها لتراها بهذا الوضع فأخذت تصرخ بوجهها
بتعوى ليه ع الصبح يا حزينه ؟؟؟ ايه يا اختى امك ماتت ؟؟
مبعيطش يا اما
بتستعمينى يا بنت العاميه ؟؟ بتعيطى ليه يا بت انطقى ؟؟؟
مش عاوزه اتجوز العريس اللى جه امبارح دا
نعم يا اختى ؟؟ و ليه بقا أن شاء الله ؟؟
دا كبير اوى يا اما و كان متجوز قبل كدا
و ماله لما يكون متجوز ؟؟ ايه مراته القديمه خدت منه حته ؟؟
طب و ليه دا يا اما ؟؟ انا صغيره و بكرا يجيلى شاب صغير. فى سنى
اقولك يا روح امك ليه دا بالذات ....عشان دا مش هيكلفنا لا ابيض و لا اسود لكن الشاب إلى بتقولى عليه دا مش محتاج جهاز ؟؟؟ حلل و ملايات و رفايع و بلاوى سودا ؟؟؟ هنجيب لك منين يا اختى ؟ و لسه ورانا غيرك خمس عيال عاوزين يتربوا و يتعلموا
طب خلاص يا اما بلاش جواز خالص و هقعد اخدمك انتى و ابويا و اخواتى
مينفعش يا اختى ...عاوزه الناس تاكل وشي و تقول بنتك بايره ؟؟؟ و بعدين احنا ما هنصدق نخف من على قفانا ما انتى شايفه الحال
حالنا حلو يا اما و عندنا ارض و جموستين اهم و انتى محوشه فلوس كتير.
فلوس ايه دى يا بت اللى بتتكلمى عليها ؟؟؟ هقطع لسانك لو جبتى سيرة الفلوس دى تانى ...انتى فاهمه ؟؟
خلاص خلاص يا اما
هتتجوزى صلاح يعنى هتتجوزيه و هخلى ابوكى يستعجل الفرح كمان مش ناقصين زن
مرت الأحداث بعد ذلك بسرعه فالعريس جاهز و يمتلك غرفه بها سرير و دولاب و موقد و بعض الحلل و الاطباق و المعالق التى استولى عليها من زوجته السابقه
تحدد موعد الزفاف فى خلال اسبوعين
جرت الايام بسرعه لتجد هويدا نفسها عروسا تلبس الابيض
كان الحزن يغطى وجهها ، لم تستطع منع دموعها
حاولت أن تخفيها حتى لا تشمت بها بنات شارعها فيها
البنات من حولها يغنون و يرقصون و هويدا فى عالم اخر
تشعر بالخوف الشديد من ذلك الزوج الذى لم تحفظ ملامحه بعد ...فقد رأته مرتين فقط و لم تستطع أن تحقق به و لا أن تحدثه
تنتظر هويدا عريسها ليأخذها إلى بيته وسط تبريكات من البنات و قرص بركبتها لاعتقادهم أنهم سيلحقوها فى جمعتها
انقطع تفكير هويدا على صوت امها و هى تنادى عليها من وسط البنات
قومى يا هويدا اقلعى الفستان دا و تعالى احلبى الجاموسه ...الجاموسه مش راضيه تقف الا لكى هى متعوده عليكى انتى
اقلع ايه يا اما ؟؟
ايه هتخشي الزريبه بالفستان دا ؟؟ قومى فزى يلا قبل ما عريسك يجى
يا اما ازاى بس ؟؟
زى الناس يا اختى ...ايه هنسيب الجاموسه من غير حليب ؟؟ خلاص بقيتى ست و الا ايه قومى يلا بسرعه
حاضر ....حاضر يا اما
قامت هويدا و ارتدت جلباب قديم و دخلت للحظيره لتحلب الجاموسه
و ما إن انتهت هويدا من حلب الجاموسه وجدت الزغاريط اتيه من الخارج فقد حضر العريس و معه أهله
أسرعت هويدا الى الغرفه لترتدى ثوبها الابيض قبل أن يراها أهل العريس
وضعت امها الطرحه سريعا على رأسها و اخرجتها من الغرفه و كأن شيئ لم يحدث
استقبلها صلاح بوجه باسم اخذها فى يده و توجه بها إلى السياره
ذهبت هويدا مع عريسها وسط الزغاريط و المزمار البلدى و الطبل إلى أن وصلت إلى بيته و الذى تراه لاول مره
وقف الجميع أمام الباب يغنون و يصفقون لبعض الوقت
أشارت ام صلاح لابنها بالتوجه إلى غرفته
جذب صلاح يد هويدا بعنف و توجه بها إلى داخل الدار
توجه الى غرفه من اربع غرف موجوده بالدار
لتجد هويدا أن حماتها سبقتهم و وقفت أمام الغرفه ... ترفع رجلها لتمر هويدا من تحتها كنوع من إخضاعها و جعلها تحت امرها
مرت هويدا و هى لا تفهم معنى الحركه
دخلت فوجدت أمها بالداخل و معها ثلاث نساء و التحقت بهم ام صلاح و أغلقت الباب من خلفها
أصيبت هويدا بالرعب الشديد عندما رأت النساء يقتربوا منها و يمسكوا بها
ايه. انتوا بتعملوا ايه ؟؟
مفيش يا عروسه ... متخافيش عريسك هيدخل عليكى دخله بلدى عشان ترفعى راس ابوكى
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق