هويدا
الجزء الاول
بت يا هويدا
نعم يا اما
روحى يا بت هاتيلك غيار و ادخلى استحمى و غيري هدومك المطينه دى و البسي جلابيه العيد
ليه يا اما ؟؟ هو احنا رايحين فين ؟
مش رايحين يا بت ...فى جماعه جايين يزورونا انهارده
جماعه مين دول ؟؟
انتى مالك يا بت انتى ...اعملى اللى بقولك عليه و بس
🌷🌷🌷🌷🌷🌷
كانت هذه الكلمات هى بدايه الحكايه منذ عشرين عاما ...حكايه هويدا الفتاه ذات الثلاث عشر ربيعا
هويدا فتاه بملامح شرقيه سمراء اللون شعرها اسود طويل عيونها عسليه واسعه
لم تكمل تعليمها فقد خرجت من التعليم من الصف الرابع الابتدائي
تقضى هويدا يومها بين الحقل بقطعه الأرض التى يمتلكها والدها و التى ورثها عن ابوه و بين بيتها و خدمة أمها و اخوانها الصغار
هويدا لم تفلح فى التعليم و لكن امها كانت توكل لها بيع الخضار الذى يحضره والدها من أرضه و كانت تحاسبها على كل قرش تبيع به
الام كانت حريصه جدا على النقود و لم تكن تضع فى يد هويدا أو اخواتها القرش الا بخروج الروح
فى اليوم الموعود ارتدت هويدا جلباب العيد و قامت بتمشيط شعرها الطويل و عمل ضفيره طويله تمتد بطول ظهرها
بعد اذان المغرب مباشره حضر الضيوف المنتظرين
طلبت الام خروج هويدا بالشربات إلى الضيوف
دخلت هويدا على الضىوف فوجدت والدها يجلس مع رجلين أحدهما عمره فوق الستين و الآخر عمره حوالى ثلاثين عام
ووجدت امها تجلس فى الغرفه المقابله مع ثلاث نساء لا تعرفهم
نادت الام على هويدا
تعالى يا عروسه ؟؟
اندهشت هويدا ....من كلمة عروس ؟؟ و شعرت بقليل من الفرح فهى كأى فتاه طبيعيه تتمنى أن تتزوج و تلبس الرداء الابيض و تعامل كملكه متوجه
جلست هويدا بجانب والدتها بخجل شديد و لاحظت أن الثلاث نساء ينظروا إليها من أسفل إلى أعلى
بينهم امراه كبيره فى السن يظهر عليها السيطره من خلال نظراتها ....
تعالى يا عروسه اقعدى جنبى هنا ...نطقت العجوز
أشارت الام لهويدا أن تمتثل لكلام العجوز و تذهب للجلوس بجانبها
قامت هويدا بخجل شديد واضعه وجهها فى الارض و جلست بجانب العجوز
وضعت العجوز يدها على ضهر الفتاه كأنها تطبطب عليها ولكنها كانت فى الحقيقه تعاين البضاعه و ترى هل هى هزيله الجسد أم لا
شفتى عريسك يا عروسه ؟؟
عريسي ؟؟ لا مشفتوش
ليه مش دخلتى لهم الشربات ؟؟
اه بس مشفتش حد
شكلك بتتكسفى ما شاء الله عليكى ...مش دخلتى و شفتى اتنين قاعدين مع ابوكى ؟
ايوا شفت اتنين كبار كدا و مفيش معاهم عريس
كبار ازاى ؟؟ اللى قاعدين عبدالحميد جوزى و صلاح عريسك
عريسي ؟؟؟
ايوا ...هو دا عريسك
توقفت الكلمات على شفتى هويدا فهى لم تظن ابدا أن هذا الشخص هو العريس فهو مقارب من عمر والدها يظهر على وجهه علامات الزمن و القليل من الشعر الابيض .، كما أن ملامحه قاسيه بعض الشئ و يداه غليظتان و تظهر عليهم القذاره .....شعرت هويدا انها بكابوس قطع أفكارها صوت العجوز و هى تقول
ايه مش عاجبك صلاح ابنى ؟؟ دا بيشتغل فى مزرعه مواشي كبيره اوى و الراجل مسلمه كل حاجه عشان عارف و متاكد من امانه ابنى
هنا نطقت الام
بس متاخذنيش يا ست ام صلاح ايه يا اختى اللى آخره فى الجواز لحد السن دا ؟
لا هو متأخرش و لا حاجه احنا جوزناه من كام سنه
جوزتوه ؟؟؟ امال فين مراته ؟؟
طلقها يا حبيبتى
و طلقها ليه بقى ؟
مكنتش بتاعه عيشه ...عاوزه تتذوق و تعمل ست و طبعا دا مينفعش
ايوا طبعا ....و اسم الله عليه عنده عيال ؟؟
اه عيله بس مع امها يعنى ابنى خالص مخلص لوحده متخفيش من الحته دى
لا هخاف من ايه يعنى ؟؟ احنا اتشرفنا يا حاجه
حاجه ايه يا اختى شايفانى جايلك على جمل ؟؟
لا مش قصدى
طيب قولتوا ايه ؟؟
و الله يا ام صلاح القوله قولة ابوها
لا منا عارفه ...بس عاوزه اعرف رايكم انتوا الاول
احنا مش هنلاقى احسن منكم نناسبه
شالله خليكى ...و بنتك هتبقى بنتى و فى عنيا و ابنى عنده اوضه مفروشه من مجاميعه مش هنكلفكم اى حاجه هتيجى بالجلابيه اللى عليها
عداكوا العيب يا حبيبتى
💮💮💮💮💮
يا ام صلاح
ابو صلاح بينادى هستنى تيعتيلى و تقوليلي وافقتوا و الا لا مع انى عارفه أن صلاح ابنى عريس لقطه ميترفضش ابدا
طبعا طبعا كفايه أنه ابنك
تسلمى يا حبيبتى يلا اشوف وشكم بخير
مع السلامه يا ام صلاح
الله يسلمك يا غاليه
انصرف الضيوف و ظلت هويدا جالسه بمكانها لم تنطق بكلمه
سمعت ابوها يتحدث مع امها
بس العريس دا كبير اوى يا عزه و كمان كان متجوز قبل كدا
و ماله الراجل ميعبوش الا جيبه و بعدين دول لا هيكلفونا و لا ابيض و لا اسود هياخدوها بالجلابيه اللى عليها يعنى جوازه ببلاش
مش عارف و الله ...طب البت رأيها ايه؟
رأى ايه اللى للبت الرأى رايك و الشورى
شورتك ...هى البت هتفهم مصلحتها اكتر منك ؟
عندك حق يا عزه ...خلاص هرد عليهم بكرا و اقولهم أننا موافقين
لا متتدلقش كدا اصبر عليهم يومين تلاته و بعد كدا نرد
عندك حق برده ...كمان تلات ايام هرد عليهم ...
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق