هويدا
الجزء الرابع عشر
تساقطت الدموع من عينا هويدا فهى كالمشلوله قليلة الحيله لا تستطيع رفع يدها أو صوتها ....ليس هناك من ينقذها فأبوها يثق ثقه عمياء بالشيخ و لا يمكن يخيل له خياله أنه يفعل ذلك
دعت الله و توسلت الا يلمسها ذلك الكلب الحقير ....
اقترب سلامه إلى هويدا كشف شعرها و اخذ يتحسسه ..و عندما حاول الاقتراب منها لكى يقبلها ....
انفتح الباب و دخلت عزه
ازيك يا سيدنا الشيخ
اضطرب الشيخ بشده و قفز واقفا
الله يسلمك يا ست ...انتى مين و ايه دخلك هنا ؟
انا امها ...يا لهوى هى البت عامله كدا ليه ؟؟
انا بحضر على بنتك و انتى دخلتى بوظتيلى شغلى
شغل ايه دا ؟؟ البت مسخسخه و ايديها بارده زى التلج
منا عارف يا ست ...اللى حاضر عليها هو اللى مخليها مش فى وعيها كدا
هو مين اللى حاضر عليها يا راجل يا قفه ؟؟ انت عملت فى البت ايه ؟ الله يخربيت اللى جابك
اسرع حمدى و الشيخ عبدالعال بالدخول عندما سمعوا صوت عزه
فى ايه يا جماعه ؟؟ مالك يا ام هويدا ؟
مالى ايه يا شيخ البلد ؟؟ انت جايبلنا الراجل ده من أنهى داهيه؟؟
لا عيب عليكى تقولى كدا
و هو مش عيب عليه؟؟؟ كاشف شعر البت و دخلت لقيته حاطط ايده على شعرها
كنت برقيها يا حج عبدالعال
و هى الرقيه قالت لك تكشف شعرها برده ؟؟
هنا انتبه حمدى لحال ابنته و غلى الدم بعروقه و امسك بعنق الشيخ سلامه
انت عملت فى البت ايه ؟؟؟ و ليه كاشف شعرها و صدرها كدا ؟؟ اه يا ابن الكلب يا انجس من خنزير
صدم شيخ البلد و لم يستطع النطق و حاول تخليص سلامه من يد حمدى و هو يردد
صلوا على النبى يا جماعه صلوا على النبى ...خلاص يا حمدى حصل خير ...
هرب سلامه سريعا من أمام حمدى و هو يتعثر فى ملابسه كالجرذ الهارب
حاولت عزه افاقة هويدا و التى فقدت الوعى تماما
احضرت بصله كبيره و حاولت وضعها أمام انف هويدا و لكنها لم تفيق
البت مش راضيه تفوق يا حمدى هنعمل ايه دلوقتى ؟؟
هناخدها الوحده الصحيه يشوفوا مالها
وحدة ايه بس دلوقتى ؟؟ هو انت هتلاقى الوحده فاتحه ؟
اكيد فى غفير و الا ممرضين و الا اى حد يساعدنا امال هنسكت و نسيب البت تروح منا ؟
حمل حمدى ابنته و وضعها على عربته الكارو و اخرج الحمار من الحظيره و ذهب بها هو امها الى الوحده الصحيه
و لكنه وجدها مغلقه و لم يجد بها اى انسان ... فقرر أن يكمل إلى المركز بالرغم انها مسافه كبيره و لا يعرف هل يصمد حماره لمثل هذه المسافه و لكنه الحل الوحيد لديه فقد تأخر الوقت و لم يعد هناك أى عربه تسير على الطريق
وصل حمدى و زوجته و ابنته إلى مستشفى المركز فى اذان الفجر ...و كانت هويدا لازالت فاقده للوعى
حملها والدها و ادخلها الى الاستقبال
الحقونى يا ناس ...الحقوا بنتى الله يخليكوا
قامت ممرضه من الممرضات بثقل كبير ، ألقت نظره على هويدا قائله
مالها دى ؟؟
مغمى عليها
مغمى عليها و الا نايمه ؟؟
لا مش نايمه و حاولنا نفوقها مفاقتش
طب استنى نصحيلك الدكتور
بسرعه الله يرضى عليكى
حطها على السرير دا
انتظرت عزه بجانب ابنتها بينما ذهب حمدى ليتفقد عربته خوفا عليها من السرقه
نزل الطبيب و سال عزه عن ما حدث فاخبرته بما رأت و هى لا تعرف ما الذى أفقد ابنتها الوعى و ما الذى حدث معاها
شيخ ايه اللى جايبينوا لبنتكم ؟؟ الناس مش هتبطل جهل بقا ؟؟؟ البت دى متخدره بس كمان ضعيفه جدا لدرجه انها مش قادره تفوق ...احنا هنركب لها محاليل
و هتفوق يا دكتور ؟؟
ايوا هتفوق باذن الله كمان شويه
طب عاوزه اقولك على حاجه كمان يا دكتور
عاوزه ايه ؟؟
البت تقريبا كدا حامل
حامل ؟؟؟ البت الصغيره دى متجوزه ؟؟
ايوا متجوزه امال ايه ؟؟
امال ايه ؟؟ الله يخربيت الجهل ...دى بنتك دى متجبش ١٥ سنه
ايوا هى ١٣ و نص
يا خبر ....حرام عليكم و الله.... عيله زى دى لما تحمل فى السن دا يبقى الحال ازاى يا عالم يا جهله ؟
كلنا اتجوزنا صغيرين يا دكتور ...لا هى أول واحده و لا اخر واحده تتجوز صغيره
و انتى يا ست عاوزه تعملى فيها اللى اتعمل فيكى ؟؟
و احنا اتعمل فينا ايه بس ؟؟ ما احنا اتجوزنا و بقى عندنا بيت و عيال اهو
اسكتى يا وليه انتى مش عاوز اسمع صوتك
يوووه هو انا قلت حاجه ؟؟
اطلعى بره يا ست خلينا نشوف شغلنا
لا مقدرش أخرج و اسيب بنتى
ليه فاكرانى الدجال اللى كنتوا جايبينه لها ؟؟؟ اخرجى يا ست انا مبهزرش
خرجت عزه لتقف بجانب حمدى خارج المشفى
ايه خرجك يا عزه ؟؟
الدكتور طردنى
طردك ليه ؟؟
انا عارفه ؟ بيقول عاوز يشوف شغله
مكنتيش سبتيها يا عزه ...انتى شفتى الزفت اللى عامل نفسه شيخ عمل فيها ايه ؟
بس دا داكتور مش زى المخفى التانى
إلا انتى ايه اللى جابك ؟ مش كنتى غضبانه عند اخوكى ؟؟
اتخانقت مع مرات اخويا ....ال ايه لاويه بوزها من اول ما دخلت عليها و كأنه مش دار ابويا و ليا حق فيه
و انتى رايحه تتخانقى و تثبتى ملكيه؟؟
امال اسيبها تبرطع فى الدار و تفتكرها دارها ؟؟
لا ازاى ؟؟ لازم تعلميها الادب
ايوا علمتها الادب و بعدها قلت فى نفسي و انا اشمت واحده زى دى فيا ليه ؟؟ انا لازمن و لابد ارجع دارى ...رحت واخده طرحتى و رجعت و دخلت ع الدار زى الصاروخ و انت مش دارى و عمال تشرب الشاى مع شيخ البلد ...دخلت و فتحت الباب فجاه على المخفى عشان اشوفه بيعمل مع بنتى ايه ؟ لقيته ال حاطط ايده ع البت قلعت شبشبى و كنت لسه هضربه على دماغه لولا دخلتك انت و شيخ البلد
الحمد لله انك جيتى ...احنا متعرفش الكلب دا كان هيعمل فيها ايه ؟
الكلب دا كان مخدر بنتك
مخدرها ازاى ؟ مين قالك كدا ؟؟
الدكتور اللى قالى
اه يا ابن الكلب لو مسكتك دلوقتى مش هسيبك إلا و زمارة رقبتك فى ايدى ...
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق