تلا كامله

#تلا 

#الجزء_الاول

انا تلا كتير منكم يعرفنى و كتير برده ميعرفنيش 

انا جنيه من الجن الاحمر امى الملكه كهرمانه بنت الملك الاحمر 

ابويا الملك أصفهان حكيم الجن و ملك الزمان 

انا عمرى 120 عام و ده فى اعمار الجن مش كتير 

انا يعتبر لسه صغيره زى شابه عندكم فى أول حياتها 

ليا من الاخوات عدد كبير يعدى ال120

بس انا اصغر اخواتى و اللى بيقولوا عليها الدلوعه 

احنا ساكنين الجبال ...بعيد اوى عن اى تواجد بشرى 

عالمنا زى عالم الإنسان بالظبط عندنا كل الديانات و كل الوظايف 

عندنا الطيب و غير الطيب 

عندنا الملتزم و غير الملتزم

زيكم بالظبط

امى من و انا صغيره بتعاملنى معامله مختلفه يمكن عشان انا أشبهها اوى فى كل حاجه من حيث الشكل و الطباع 

ابويا كمان بيحبنى اوى و دايما يستشيرنى فى حاجات بتخص المملكه 

عالم الانس كان بالنسبالى عالم ساحر 

كان نفسي اعرف عنهم كل حاجه و كان بيستهوينى اوى انى اقرب منهم و اسمعهم و هما بيتكلموا و يتصرفوا 

و كنت استغرب اوى على حاجات بيعملوها غير منطقية 

زى مثلا لما طفل يكون ماشي مع أمه و يقع منها فى الارض كانت تقومه و تضربه 

كنت استغرب اوى ليه التصرف ده ؟

ساعات كنت اشوف ناس قاعده تضحك و الاقيهم بيقولوا خير اللهم اجعله خير الضحك الكتير بيجى وراه نكد ؟

حاجات كتير معقوله و مش معقوله كنت أشوف و اراقب من بعيد ...

كل ده و مفيش حد من اهلى يعرف انى بقرب من عالم الانس لحد ما فى يوم لقيت امى داخله عليا و كنت لسه راجعه من رحلتى لعالم الانس و حاسه بالتعب الشديد

كنتى فين يا تلا ؟؟

غريبه ؟ اول مره تسالينى يا ماما 

ردى عليا يا تلا ...كنتى فين ؟؟ 

كنت فى مكان ...ليه بتسألى ؟

كنتى قريبه من عالم الإنس صح ؟؟

مين قالك ؟؟ 

محدش قالى 

لا انا عارفه هو ميمون ابن خالتى ....انا هوريله شغله 

متهربيش من السؤال ...كنتى هناك ؟؟

ايوا كنت هناك ...انا مبحبش اكدب

و ايه اللى وداكى هناك ؟؟ 

يا ماما انا مش صغيره على الاسئله دى كلها ؟

لا انتى صغيره و هتفضلى صغيره فى نظرى ...انا خايفه عليكى يا بنتى

متخافيش عليا ..انا عارفه انا بعمل ايه كويس اوى 

هنا دخل ابويا الملك أصفهان 

مالكم صوتكم جايب لآخر القصر ؟

مفيش يا بابا 

فى ايه يا كهرمانه ؟؟ 

أسأل بنتك 

فى ايه يا بنتى ؟؟ 

مفيش يا بابا 

امى بصت لى بغيظ شديد و رفعت طرف فستانها المدلدل على الأرض و مشيت 

ابويا بص لى و ابتسم و قالى 

انا مش هسألك تانى ..وقت ما تحبى تيجى تتكلمى معايا تعالى 

هزيت راسي و قلت له حاضر يا بابا 

بعد ما بابا خرج كنت متغاظه من ميمون الزفت ده 

ميمون ده واد خايب عمره يتجاوز المتين عام و كان عاوز يتجوزنى بس انا مرضتش و ساعتها قامت مشكله كبيره بين خالتى و امى 

و من ساعتها ميمون مش سايبنى فى حالى و كل شويه يمشي ورايا 

مش قادر يقتنع انى مقدرش اتجوز غير اللى بحبه و بس 

قعدت اكلم نفسي و قلت انا لازم احط له حد ميمون الزفت ده 

خرجت طايره من شباك اوضتى و رحت على قصر خالتى لقيته قاعد فى حديقة القصر 

اول ما شافنى قام وقف بودانه الطويله و قرعته الباينه 

انت عاوز منى ايه يا ميمون ؟

انتى عارفه انا عاوز منك ايه يا تلا 

هو انت رزيل ؟؟؟ لا قولى بصراحه انت رزيل ؟؟ جواز مش هتجوزك ريح نفسك يا اخى 

و انا هستناكى لآخر عمرى 

يووووو ...مشفتش فى تقل دمك يا شيخ

انا بقا مشفتش فى خفة دمك يا بنت خالتى 

هما كلمتين يا ميمون ملكش دعوه بيا و بطل تمشي ورايا احسن مش هيحصل لك طيب 

هتعملى ايه يعنى ؟

هشتكيك لمجلس الحكما

مش ههون عليكى انا عارف 

يووووو ...على غلاستك ..انا حذرتك و انت حر 

سبت ميمون و هو واقف زى العبيط و مسبلى عنيه و مشيت و انا متغاظه من تناحته و بقيت اقول لنفسي المره الجايه مش هسيبك و قد أعذر من أنذر 😠

يتبع

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ..

#تلا 

#الجزء_الثانى

سبت ميمون و هو واقف زى العبيط و مسبلى عنيه و مشيت و انا متغاظه من تناحته و بقيت اقول لنفسي المره الجايه مش هسيبك و قد أعذر من أنذر 😠

رجعت القصر  و لقيت الوصيفه بتاعتى سلافه قاعده فى اوضتى مستنيانى 

ازيك يا سلافه 

سلمك الله مولاتى 

ماما اللى قالت لك تستنينى هنا صح ؟؟ 

مولاتى خايفه عليكى 

بقولك ايه يا سلافه انا عاوزه اسالك سؤال 

اتفضلى يا مولاتى 

انتى عندك كام سنه الاول؟؟؟

ابلغ ثلاثمائه عام

حلو ...كنت عاوزه اسالك على حاجه 

اتفضلى 

بحكم انك اكبر منى سنا ...ايه اللى بيخلى أبى الملك و امى الملكه بيخافوا اوى أننا نقترب من البشر؟

لان عالمهم مختلف عن عالمنا 

طب و افرضى أنهم مختلفين ليه نخاف منهم برده ؟

لان فيهم اشرار ممكن يؤذونا

و ليه يؤذونا ؟؟ ليه منعشش معاهم ؟؟

اولا هما ميقدروش يشوفونا و ممكن يضرونا و هما مش عارفين 

ازاى يعنى ؟؟ 

يعنى ممكن حد منهم يوقع حاجه على حد منا يموته او يتسبب فى حريقه 

طب ما انتى بتقولى أنهم ممكن يأذونا و هما مش قاصدين 

لا و ممكن يقصدوا بردوا ...البشر بشكل عام بيكرهونا و بيكرهوا وجودنا قريبين منهم و بعدين اذا كان هما بيضروا بعضهم البعض يبقوا مش هيضرونا ؟؟؟ دا  فى منهم اللى بيقتل صاحبه عشان شويه فلوس ، فى منهم اللى بتقتل زوجها عشان خانها ، فى منهم اللى مفيش فى قلبه رحمه و بمجرد أنه ينفصل عن زوجته بينسي أولاده و ميرضاش يصرف عليهم 

ايه دا ؟؟ هما بينفصلوا ؟؟؟ 

ايوه الانفصال مشرع فى الدين و هم بيستخدموا حقهم ده 

طب ما احنا الشرع بيسمح لنا بالانفصال بس انا عمرى ما شفت حد فينا أو سمعت أنه انفصل عن زوجته

علشان هما واخدين الدين بالشكل و بالمظهر مبيهمش الواحد منهم أو الواحده الجوهر ربنا قال عن الزواج أنه ميثاق غليظ و أنه موده و رحمه و للاسف فى كتير منهم لا يعرف الموده و لا حتى الرحمه 

انتى بتصوريهم كأنهم شياطين مع انى شفتهم غير كدا خالص 

ايه دا ؟؟ انتى اقتربتى منهم ؟؟ 

ايوا و دى فيها ايه ؟؟ 

احذرى يا مولاتى الاقتراب من عالمهم ممكن يكون فيه دمارك 

انتى بتقولى دمارى ووالدتى بتقول نفس الكلام و مفيش حد فيكم عاوز يفهمنى دمارى ازاى ؟؟

انا لسه قايله لكى أنهم مضرين و هيأذوكى 

و ان كنت مقتنعتش بكلامك يبقى الحل ايه ؟؟ 

الحل انك تبعدى و تسمعى كلام اللى اكبر منك هما اكيد ادرى منك 

انتى بتتكلمى زيهم بالظبط ...مش لاقيه حد يفهمني ابدا و لا يحس بشعور المغامره اللى بحسه و انا طايره فى وسط شوارعهم أو وانا قاعده على أعلى مبنى عندهم 

شعور جميل لما الاقى طفله جايه جنبى فاكرانى فراشه و عاوزه تلعب معايا 

شعور محدش فيكم هيحسه علشان مدتوش نفسكم فرصه انكم تعيشوه 

مولاتى كلامك ده لانك صغيره لسه و معرفتيش الحياه كويس ، صدقينى بكرا لما تكبرى و تتجوزى هتعرفى أن كل دى اوهام و احلام فى خيالك 

انا يا ستى عاوزه اعيش فى الاحلام 

طب انتى عندك خبر أن لو مجلس الحكما عرف ممكن يحبسوكى 

ايه ؟؟ يحبسونى ليه ؟؟ هو انا عملت ايه ؟؟ 

مجلس الحكما له السلطه أنه يحكم باللى يحفظ حياتك و له مطلق الحريه أنه يحميكى من نفسك 

ههههههههه ايه الكلام الفارغ اللى بتقوليه ده ؟؟ 

كلامى مش فارغ يا مولاتى و بكرا تشوفى 

خلاص يا سلافه انصرفى انتى 

دخلت سريرى و كل تفكيري فى كلام سلافه و ازاى بتقول أن البشر مؤذى و انا قربت منهم و شفتهم لطاف جدا 

انا لازم اطير بكرا تانى لعالمهم بس المره دى لازم اخد حذرى و مخليش حد يشوفنى 

لازم ابحث اكتر و ادور يمكن افهم 

نمت ليلتى و دماغى مشغول و حلمت انى متواجده فى عالمهم و بتمشي فى أرضهم 

تانى يوم طرت لعالم البشر و بدأت أتجول و احاول الاحظ تصرفات الناس

لفيت كتير و نظرتى متغيرتش عنهم و كنت على وشك انى ارجع ارضى بس لاحظت شاب واقف على كورنيش النيل و دموعه نازله على وشه زى المطر ...بعد شويه لقيته  قام واقف على سور الكورنيش وراح رامى نفسه فى النيل 

بصيت حواليا ملقتش اى حد فى المكان الشاب كان مختار مكان مفيهوش ناس ..كانت سكه عربيات و كانت قليله لأن الساعه كانت عدت اتنين بالليل 

الشاب اما وقع فى الميه بقا يرتفع و ينخفض و كان مستسلم جدا لمصيره و باقى له ثوانى و يموت 

فكرت بسرعه انى احاول أنقذه 

بس هنقذه ازاى 

و فجأه جتلى فكره جميله فى دماغى 

اتمثلت فى شكل شاب و نطيت فى الميه و اخدت بايده و عمت لحد ما وصلته للشط 

الشاب من اللى حصله اغمى عليه بدأت اعمله اسعافات اوليه و احاول انى أخرج الميه اللى دخلت فى رئته 

الشاب فاق و قام قعد و هو منكس رأسه و بيعيط ...بعدها رفع عنيه ليا و كانت اجمل عيون شفتها فى حياتى ...عيون زرقا زى السما و شعر اصفر زى شعاع الشمس 

ليه انقذتنى ...كنت سبنى اموت 

ليه كدا يا اخويا انت متعرفش أن الانتحار حرام ؟ انت مش مسلم و موحد بالله ؟؟ 

ايوا طبعا و نعم بالله بس انا تعبت تعبت يا .......

انا ..انا أسمى عبدالله 

و انا فارس 

اهلا يا فارس ...قولى بقا ايه اللى يخليك تضحى بحياتك و تحاول تنتحر 

انا حكايتى صعبه و ملهاش حل 

مفيش مشكله ملهاش حل ...احكيلى يمكن اعرف احلها معاك 

حكايتى يا عبدالله ......

 

يتبع

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..

#تلا 

#الجزء_الثالث

اهلا يا فارس ...قولى بقا ايه اللى يخليك تضحى بحياتك و تحاول تنتحر 

انا حكايتى صعبه و ملهاش حل 

مفيش مشكله ملهاش حل ...احكيلى يمكن اعرف احلها معاك 

حكايتى يا عبدالله انى اتولدت يتيم ابويا مات و انا فى بطن امى 

و امى حصلته بعدها بسنه و نص ...الكل اتهرب منى و فى الاخر رسيت انى اترمى فى ملجأ أو دار زى ما بيقولوا عليها 

شفت فى الملجأ العذاب الوان و مكنوش بينادونا الا يا اولاد الحرام 

و مع انى ليا اب و ام و مكنتش ابن حرام و لا حاجه بس ده مفرقش كتير ...هناك التعامل واحد للكل 

كبرت فى وسط اخواتى فى الملجأ و اتعرضنا لكل انواع الاهانه اللى تتخيلها 

فى ناس كانوا بيجوا الملجأ يسبولنا اكل و هدوم و ساعات لعب كانوا المشرفين و العمال ياخدوها بيوتهم و ميسبوش لنا الا اكل الملجأ الغير أدمى و الهدوم كانوا بيتصرفوا فيها و يلبسونا الهلاهيل علشان نفضل صعبانين على الناس اللى جايه تزورنا

 

و مفيش حد من اهلك زارك خالص ؟؟ 

انا معرفش اى حد فيهم و لا اعرف اوصلهم ازاى اصلا بس هما رمونى و انا صغير تفتكر هيفتكرونى و انا كبير ؟؟ 

اكيد مش كلهم كانوا عايزين يرموك 

الله اعلم 

طب محاولتش تدور عليهم ؟؟ 

حاولت كتير ..بس حتى العنوان اللى اخدته من الدار لما رحت اسال فيه  الناس قالوا لى أنهم عزلوا و محدش يعرف لهم مكان 

طيب كمل يا فارس حكايتك 

الدار كانت ظروفها مش كويسه زى ما قلت لك بس وزارة الشؤون الاجتماعية كانت بتجبرهم أنهم يدخلونا مدارس و يفتحوا لكل طفل حساب فى البنك زى وديعه كدا ياخدها و هو خارج علشان يبدا بيها حياته 

انا كنت بحب التعليم اوى و كان حلمى انى ابقى مهندس و بالفعل جبت مجموع كبير فى الثانويه العامه يدخلنى الكليه اللى بحلم بيها 

طب عظيم ...حلو اوى 

لا و لا عظيم و لا حاجه ...يا ريتنى ما جبت المجموع ده 

ليه كدا ؟؟ 

لان حلمى انتهى لما مدير الدار قالى مش هنقدر ندخلك كلية الهندسه لأنها مكلفه 

 طيب دخلنى و اصرف عليا من الوديعه اللى باسمى 

 ‏

 لا مقدرش و لا ليا الصلاحيه انى اعمل كدا اصلا ...كل اللى اقدر اعمله معاك لانك متفوق انى ادخلك معهد سنتين انا المفروض بعد الثانوى مليش دعوه بيك 

 ‏

و دخلت المعهد و لقيت نفسي منبوذ من اى حد يعرف انى متربى فى ملجأ 

حتى البنت الوحيده اللى حبتها قالت لى احنا اخوات لنفس السبب 

خلصت دراستى و بقى لازم اسيب الدار 

كنت فاكر انى هاخد مبلغ كويس ابدا بيه حياتى و مدير الدار مضانى على شوية اوراق على أنها اوراق خروجى من الدار 

و لما سألته على فلوسي قالى ما انت اخدتها 

اخدتها ازاى ؟؟ انا مأخدتش حاجه 

لا انت ماضى اهو انك اخدتها 

و طلعت من الدار يا مولاى كما خلقتنى لا ليا مكان و لا حد راضى يشغلنى و لا اقدر افكر فى جواز زى اى شاب عادى 

بقالى شهر فى الشارع باكل من الزباله و انام على الرصيف لما خلاص ضاقت بيا الدنيا و بقت اصغر من خرم الابره و ساعتها شيطانى قالى اسلم حل انك تتخلص من حياتك 

هى دى مشكلتك يا فارس ؟؟ 

ايوا 

بس دى مشكله عاديه جدا و فى زيك آلاف و حكايتهم شبه حكايتك و أسوأ كمان ...لو كل واحد اتعرض لأزمه انتحر كانت نص الناس دى ماتت 

عندك حق يا عبدالله بس يمكن اللى بيهون الدنيا شويه على الناس هو  وجود أهل حواليهم 

إن كان على اهلك انا هساعدك توصل لهم 

صحيح ؟؟ ازاى ؟؟ 

انا ليا حد قريبي بيشتغل فى وزاره الداخليه و ممكن يساعدني بس انت ادينى الاسم و العنوان القديم اللى بتقول عليه 

حاضر هديهملك 

و حاجه كمان يا فارس ...اوعدنى انك متفكرش فى الانتحار مره تانيه 

اوعدك يا عبدالله 

طيب انا هروح مشوار نص ساعه كدا عقبال ما هدومك تنشف خليك هنا و هرجع لك باذن الله 

هتروح فين ؟؟ 

كان فى اوضه كدا جنبى كنت سامع أن صاحب البيت عاوز يأجرها ...انا لولا اختى ساكنه معايا كنت اخدتك بت عندى بس مش هينفع 

لا كتر خيرك انا هدبر حالى 

اخص عليك هو انت مش بتعتبرنى زى اخوك و الا ايه ؟؟ 

طبعا و اكتر و الله انت اول حد يحن عليا كدا ....بس هتروح لصاحب البيت ازاى دلوقتى دا الفجر قرب يأذن 

اه صحيح ...طيب خلاص نروح نصلى و نقعد فى الجامع للصبح و اروح اقابل صاحب البيت و ارجع لك 

طب و اختك مش هتقلق عليك ؟؟

لا اختى عارفه انى ببات مع اصحابى كتير وواخده على كدا 

و فعلا سبت فارس بعد ما صلينا الفجر و النهار طلع و رحت على اقرب سمسار و طلبت منه اوضتين جنب بعض و دفعت له ايجار الاوضتين لمدة سنه 

و رجعت لفارس اخدته و رحنا الاوضه 

الاوضه كانت صغيره بس مفروشه و نضيفه اوى و الفرش فيها مترتب و فيها حمام صغير و حوض وش و بوتجاز مسطح و سرير و كرسيين و مكتب 

فارس مكنش مصدق نفسه من الفرحه و قعد يشكرنى اوى 

عيب بقا متشكرنيش ...انا هروح اصحى اختى نور تجيب لك لقمه تاكلها و هدخل انام لانى بقالى يومين منمتش 

متشكر اوى يا عبدالله كتر خيرك 

و دخلت الاوضه التانيه و تمثلت فى شكل بنت حلوه و عملت لفارس صينيه اكل معتبر و رحت اخبط على الباب

اتفضل 

لا مؤاخذه يا استاذ.... اخويا باعت لك الاكل ده 

اتفضلى يا انسه . ...هو فين عبدالله ؟ مش هياكل معايا و الا ايه ؟ 

لا عبدالله نام و مش هيصحى دلوقتى خالص 

الله يعينه ...متشكر اوى يا انسه 

أسمى نور ....نور العيون 

تشرفنا يا اختى 

عاوز حاجه تانى ؟ 

لا كتر الف خيرك 

خرجت من عند فارس و كنت مستعجله اوى انى ارجع المملكه ...انا غبت اوى و تبقى كارثه لو حد اخد باله 

استرها يا رب 

و رجعت اوضتى و الحمد لله محدش خد باله انى خرجت منها و لقيت ماما داخله تصبح عليا .... 

 

يتبع

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..

#تلا 

#الجزء_الرابع

و رجعت اوضتى و الحمد لله محدش خد باله انى خرجت منها و لقيت ماما داخله تصبح عليا 

صباح الخير يا حبيبتى 

صباح النور يا ماما 

نمتى كويس ؟؟

الحمد لله 

طيب كنت عاوزه اكلمك فى موضوع كدا 

خير يا ماما 

جايلك عريس 

لأ يا ماما 

طب مش لما تعرفى مين الاول ؟؟

المبدأ مرفوض يا ماما و انا قلت لك انى لازم احب اللى هتجوزه 

طب ما تدى نفسك فرصه تشوفيه يمكن تحبيه

لا مش عاوزه اشوف حد 

و بعدين بقا فى دلعك ده ؟؟  انتى فى حد فى دماغك ؟؟؟

لأ طبعا 

امال ايه بس ؟؟؟ انا زهقت منك انا هنادى لك ابوكى يشوف حل معاكى 

خرجت ماما و مفيش دقايق لقيت بابا دخل عليا 

صباح الياسمين امورتى الحلوه 

صباح الورد يا بابا 

مزعله ماما ليه ؟؟ 

يا بابا انا مزعلتهاش بس انت عارف رايى فى الموضوع ده كويس 

عارف بس انا عاوزك تدى نفسك فرصه العريس اللى متقدم لك المره دى كويس اوى مش زى ميمون ابن خالتك 

مين العريس دا يا والدى ؟؟ 

الامير مارو ابن الملك بشنان 

اسمع عن الملك بشنان بس مسمعتش عن ابنه قبل كدا 

دا شاب وسيم و أخلاقه عاليه و متعلم 

بس يا بابا ...

شوفيه يا تلا و بعدين لو عاوزه ترفضى ارفضى 

حاضر يا بابا 

مع انى متأكد أنه هيعجبك 

ماشي يا بابا هشوفه هو هيجى امتى ؟

اول جمعه فى الشهر الجديد 

اه يعنى بعد تلات اسابيع ؟

ايوه بالظبط كدا 

خلاص يا بابا نستنى نشوفه و ربنا يقدم الخير 

باذن الله يا بنتى

بابا خرج من الاوضه و حسيت بخطفه فى قلبى ...عقلى كان بيقولى و ماله ما يمكن كويس إنما قلبى بيقول حاجه تانيه خالص

نمت شويه و قمت علشان ارجع لفارس و اكمل اللى بدأته معاه

اتسللت بالراحه علشان أخرج من القصر من غير ما حد يشوفنى 

ببص لقيت ميمون قدامى 

تلا 

عاوز ايه يا ميمون ؟؟ 

انتى صحيح متقدم لك عريس غيري ؟؟ 

و انت مالك 

جاوبى ...صحيح الكلام ده ؟؟ 

ايوه ...عرفت منين ؟

مفيش حاجه تستخبى على ميمون ابدا 

طب اوعى من وشي يا ناصح 

انتى مش هتتجوزيه صح ؟؟ 

و انت مالك ؟؟ دا شئ ميخصكش 

لا يخصنى ...مدام يخصك يبقى يخصنى 

و الله عمرى ما شفت غلاسه كدا ؟؟ يا باى عليك 

انتى ليا يا تلا ...عمرى ما هسيبك تروحى لغيري 

طرت و سبته و بقيت ابص ورايا كل شويه عشان اتأكد أنه مش طاير ورايا 

قربت من عالم الانس ...حاجه غريبه اوى بحس بيها لما بقرب للعالم ده 

بحس انى روحى عندهم ...بحس بكيانى فى وسطهم ...بحس انى واحده منهم 

معرفش الاحساس ده جايلى منين ...بس مبحسش اى غربه معاهم  

المهم رحت على السكن و اتمثلت فى شكل عبدالله و رحت خبطت على فارس 

فارس فتح لى و كان باين عليه أنه لسه نايم 

تعالى يا عبدالله 

ايه يا ابنى انت لسه نايم ؟؟ 

امال هعمل ايه غير النوم يعنى ؟؟ 

تدور على شغل 

منا قلت لك يا عبدالله محدش بيرضى يشغلنى أما بيعرف انى طالع من ملجأ 

خلاص متقولش و بعدين انت متعلمتش اى حرفه فى الدار دى ؟؟ انا اعرف انهم بيعلموكم حرف هناك 

ايوا اتعلمت بس شغله ملهاش لازمه كدا

اتعلمت ايه ؟؟ 

عارف شغل الارابيسك ؟؟ 

ايوا دا هايل 

بس زباينه قليلين و شغله قليل 

بس مطلوب برده و مش اى حد بيطلبه 

ايوه لانه مكلف جدا و متلاقيش غير الناس اللى معاها فلوس هى اللى بتطلبه 

طب ما حلو ...اكيد فى حتت بتسوق للكلام ده 

اه فى جاليرهات فى المناطق الراقيه 

طب انت ممكن تعمل ايه يعنى ؟؟ 

انا بعمل كل حاجه بدءاا من مجسمات صغيره بالارابيسك لحد اطقم انتريه و فواصل ارابيسك ..اى حليات

طيب عظيم اوى كدا مفيش مشكله ممكن تبدأ بالموضوع ده 

ازاى مفيش مشكله يا عبدالله ؟؟ 

انت ممكن تعمل مجسمات صغيره و تروح تبيعها أو حتى تسوق لها على الانترنت 

ههههههههه انت غلبان اوى يا عبدالله ...هجيب راس المال اللى هجيب بيه الخامات منين ؟؟

ملكش دعوه بالفلوس انا محوش قرشين انا و اختى هندخل بيهم معاك ...انت بالمجهود و احنا براس المال 

انت بتقول ايه ؟؟ ازاى هتحط فلوسك فى حاجه متعرفش عنها حاجه ؟و مع واحد متعرفوش ؟؟

ملكش دعوه يا اخى أنا متأكد انك هتنجح و هتكسبنا معاك كمان 

انا مش عارف اشكرك ازاى يا عبدالله 

يوووو ....تانى يا فارس ؟؟ ما قلنا احنا اخوات 

طب انت وعدتنى انك هتخلى قريبك يشوفلى حكايه قرايبي دى 

ايوه و انا عند وعدى اكتب لى كل البيانات اللى تعرفها عنهم بس فى ورقه و ان شاء الله خير 

اهو كاتبهالك و محضرها من بدرى 

طيب همشي بقا و ابعت لك نور عشان تجيب لك الغدا 

لا متتعبهاش انا مش جعان 

هنكدب بقا ؟؟؟ يلا سلام 

رجعت الاوضه و اتمثلت فى نور و جهزت صنيه الاكل و الفلوس و رحت لفارس 

خبطت على الباب 

تعالى يا نور 

اتفضل الاكل و اخويا باعت لك الفلوس دى و بيقولك تتغدى و تنزل تجيب الخامات عشان تبدأ شغل انهارده 

هو مش هيجى معايا ؟؟ 

لا هو راح الشغل 

اه صحيح هو بيشتغل ايه ؟؟ 

بيشتغل شفت من الساعه خمسه للساعه واحده بالليل كاشير فى هايبر 

اه يعنى لما قابلنى امبارح كان راجع من شغله ؟؟

بالظبط كدا 

طيب مش هتاكلى معايا عشان تفتحى نفسي 

لا سبقتك ...بالف هنا و شفا 

سبت فارس و قلبى بيدق اوى ...ايه دا فى ايه يا تلا ؟؟ مالك ؟؟ ايه اللى حصلك 😍🙄🙄؟؟؟ 

 

يتبع

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..

#تلا 

#الجزء_الخامس

سبت فارس و قلبى بيدق اوى ...ايه دا فى ايه يا تلا ؟؟ مالك ؟؟ ايه اللى حصلك 😍🙄🙄؟؟؟ 

فارس اكل و نزل يشترى الخامات ، و انا كنت طايره جنب منه و مرافقاه فى كل خطوه من غير ما ياخد باله 

لف كتير و دور و بقى يسأل على الأسعار فى كذا مكان و يشوف الخامه الحلوه و السعر الاقل 

كنت مبهوره بطريقه كلامه مع الناس و ثقته فى الكلام كأنه صنايعى شاطر بقاله عشرين سنه فى المهنه 

ازاى هو كدا و معاه عمل زى ده و فكر فى الانتحار ؟؟ 

ساعات مبنقدرش النعم اللى فى ادينا و بنبقى محتاجين اللى يوجهنا او ياخد بايدنا بس...الحمد لله أن ربنا وقفنى فى طريقك يا فارس علشان اساعدك و أقرب من عالمكم اكتر و اقدر افهمكم كويس 

رجع فارس بالشغل و كان فرحان اوى 

عملت له كوبايه شاى و قعد يشتغل قدام الاوضه فى الهوا 

الاوضه فوق سطوح و فى مكان مرتفع تقدر تشوف القاهره كلها منه 

وقفت شويه مع فارس اراقبه و هو بيشتغل بكل إتقان و همه و اتكلمت معاه فى مواضيع كتير و حسيت اد ايه هو انسان جميل من جواه 

لما لقيت أن ميعاد عبدالله قرب كان لازم استأذن منه 

انا هدخل انام انا يا سي فارس عاوز حاجه منى تانى ؟

كتر خيرك يا نور ادخلى انتى انا هستنى عبدالله علشان اوريله انا عملت ايه 

على الساعه واحده اتمثلت فى صوره عبدالله و طلعت لفارس كأنى لسه راجع من شغلى ... و كان خلص اول قطعه فعلا

سلام عليكم 

و عليكم السلام يا عبدالله ...تعالى قولى ايه رايك ؟؟ 

تحفه يا فارس ... ايه الحلاوه دى ؟؟؟ مكنتش متخيل انها هتكون بالجمال ده 

لا دا تسخين بس انا ممكن اعمل حاجات احلى من كدا بكتير و بعدين دى اول قطعه بس القطعه دى بيتعمل منها طقم باختلافات معينه كدا و بيتباع على بعضه

 حلو اوى ....ربنا يوفقك يا فارس ...انت بقا تخلص الطقم اللى بتقول عليه ده  و نبقى نروح سوا  لجاليرى شفته قرب الاهرام ...اكيد الأجانب هيعجبهم الشغل ده اوى ...بس بعد ما ارجع من السفر باذن الله

 ‏ 

ايه دا ؟؟ انت مسافر يا عبدالله ؟

 

ايوا يومين كدا هنزل البلد ليا مصلحه هناك و هرجع على طول

 

طب و نور ؟ هتنزل معاك ؟؟ 

لا نور هتفضل هنا ...انت هنا بدالى بقا يا فارس 

طبعا يا اخويا و لا يكون عندك فكر 

طيب هدخل انام انا اصلى تعبان اوى 

ماشي يا حبيبي 

تصبح على خير 

و انت من اهل الخير 

دخلت الاوضه قدام فارس و استنيت لما اطمنت أنه دخل ينام و طرت على المملكه 

دخلت اوضتى لقيت هدايا كتير اوى محطوطه فى الاوضه 

فساتين اشكال و الوان دهب و الماظ فى علب ، حراير بالاتواب 

اول ما شفت الحاجات دى قلبى اتخلع ...اكيد عرفوا انى مكنتش فى اوضتى و دلوقتى يعملولى مشكله كبيره 

قعدت على سريري و انا خايفه لقيت سلافه داخله عليا 

مولاتى 

تعالى يا سلافه ... ايه الحاجات دى ؟؟ 

دى هدايا خطيبك يا مولاتى 

خطيبي مين ؟؟؟ 

انتى نسيتى و الا ايه ؟؟ 

ااه افتكرت ...و طبعا ماما عرفت انى خرجت 

محدش عرف حاجه ...انا اللى دخلت الهدايا دى هنا و محدش دخل غيري 

يعنى مقلتيش لماما يا سلافه 

لا يا مولاتى 

شاطره يا سلافه 

بس انا خايفه عليكى يا مولاتى 

متخفيش عليا انا عارفه انا بعمل ايه كويس

 

المره دى ربنا سترها يا تلا المره الجايه الله اعلم ايه ممكن يحصل 

مش هيحصل حاجه يا سلافه متبقيش قلوقه كدا ....بقولك ايه يا سلافه 

نعم يا مولاتى 

انتى حبيتى قبل كدا ؟؟ 

مش فاهمه 

هو ايه اللى مش فاهمه ؟؟ حبيتى و الا لا ؟

 

ايه لزومه السؤال ده دلوقتى ؟؟

سؤال جه فى دماغى 

اللى زينا ملوش أنه يحب يا مولاتى 

اللى زيكم ازاى ؟؟ ليه ملكيش قلب ؟

مولاتى ...احنا بنتولد و بنبقى محجوزين لولاد عمنا ...مفيش حد فينا عنده رفاهية الاختيار 

يعنى انتى متجوزه ابن عمك يا سلافه ؟

ايوا يا مولاتى 

و على كدا سعيده بقا ؟؟ 

الحمد لله 

يعنى حبتيه ؟؟ 

و ليه محبوش و هو أبو اولادى ؟ 

يعنى انتى بتحبيه عشان ابو اولادك بس ؟؟

 

فى حاجه اسمها العشره ...انا بقالى مع تان اكتر من 150 عام

ربنا يهنيكى يا سلافه ...طب ممكن أسأل سؤال تانى؟؟

طبعا يا مولاتى 

لو حصل أن حد من بنات الجان حبت واحد من الانس يكون الحال ازاى ؟؟ 

لا دى مصيبه 

مصيبه ازاى بقا ؟؟ 

ممنوع طبعا 

هو حصل قبل كدا ؟؟ 

حصل زمان مع  روفان بنت الملك تاتوس ملك ملوك الجن و من يومها اتحرم علينا أننا نقرب لعالمهم 

و ليه كدا ؟؟ ايه اللى حصل لروفان دى ؟؟ 

مولاتى الوقت أتأخر و لازم تنامى و بعدين ملوش لازمه نتكلم فى حكايات مضت و عدت خلاص 

ليه هو ممنوع الكلام فيها ؟؟ 

لا مش ممنوع بس غير مستحب 

خلاص يا سلافه روحى انتى مش عاوزه اعرف حاجه 

مولاتى متزعليش منى 

لا مش زعلانه و لا حاجه ...اخرجى يلا عشان انام 

خرجت سلافه و قلبى زاد قبضته لما عرفت سبب تحريمنا أننا نقرب من عالم الانس 

بس يا ترى روفان دى حصلها ايه ؟؟ 

ايوه انا عرفت هجيب الحكايه كلها منين ؟؟ 

آنه ديدي ....عارفه أن آنه ديدى مش هتخبى عليا حاجه ابدا و لو سألتها على روفان بنت ملك ملوك الجان هتقولى على حكايتها 

بكرا من بدرى اروحلها باذن الله و اعرف كل الحكايه 😍

 

يتبع

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..

#تلا 

#الجزء_السادس

بس يا ترى روفان دى حصلها ايه ؟؟ 

ايوه انا عرفت هجيب الحكايه كلها منين ؟؟ 

آنه ديدي ....عارفه أن آنه ديدى مش هتخبى عليا حاجه ابدا و لو سألتها على روفان بنت ملك ملوك الجان هتقولى على حكايتها 

بكرا من بدرى اروحلها باذن الله و اعرف كل الحكايه 😍

و فعلا تانى يوم رحت لآنه ديدى و اللى لقيتها قاعده بتتشمس فى الجنينه و بتلعب يوجا 

صباح الخير يا آنه ...صباح النشاط و الحيويه

صباح النور يا روح آنه 

عامله ايه يا حبيبتى ؟؟وحشتينى اوى

حبيبتك ايه يا بكاشه انتى ؟؟ انتى يا بنت اخر مره جتيلى هنا امتا ؟؟ 

اممممم من خمس سنين يا آنه 

شفتى ؟؟ و لا انا حبيبتك و لا حاجه لو حبيبتك مكنتيش تغيبي عليا كل ده 

انا اسفه يا آنه ...هاتى بوسه عشان اصالحك

 اخ منك انتى ..لولا بس انى بحبك

 ‏

آنه 

نعم يا روح آنه 

كنت عاوزه أسألك على حاجه كدا 

أسألى يا تلا 

هى ايه حكايه روفان بنت ملك ملوك الجان ؟

و انتى عاوزه تعرفى حكايتها ليه ؟؟ 

ابدا ....سمعت أن حكايتها سبب حرمنا من أننا نقرب من عالم الانس 

و انتى مالك و مال الانس ؟؟ الانس دول مؤذيين لنفسهم و لغيرهم حتى الكوكب اللى عايشين عليه مسلمش منهم 

بس اكيد فيهم طيبين يا آنه ؟

اكيد بس احنا مش هنجرب بقا و نحط نفسنا فى مشاكل احنا فى غنى عنها 

طب قوليلى حكايه روفان 

لما تقوليلى عاوزه تعرفيها ليه الاول ؟

فضول يا آنه ...مجرد فضول 

انتى متأكده يا تلا أنه مجرد فضول ؟؟ 

ايوه يا آنه امال هيكون ايه يعنى ؟؟

طيب انا هحيلك للعظه و العبره بس 

روفان كانت بنت جميله رقيقه ..خطابها كتير و دا طبعا علشان جمالها و نسبها و أصلها و تعليمها العالى

لكن ابوها الملك تاتوس  كان مديها حق الاختيار و كان دايما يقولها انا مربيكى كويس و عارف إن اختيارك هيكون جيد 

و مرت الايام و كل يوم يتقدم لها امير من مملكه و هى ترفضه 

و فى يوم وقع فى أيدها كتاب عن الانس جابها فضولها انها تتعرف على العالم ده و اللى كان بعيد اوى عن مملكتها 

روفان انتقلت فى لمح البصر لأقرب مدينه للانس و كانت مدينه ساحليه يعنى فيها بحر 

اول ما نزلت على شط الميه لقت صياد غلبان قاعد يعيط 

رق لحاله قلبها و قربت منه و عرفت حكايته و  ان ظروفه وحشه و انه مش لاقى يعالج امه 

البنت كانت بريئه اوى و ابتدت تساعده

و للاسف حبته 

و ليه بتقولى للاسف ؟؟ 

لان الحب ده كان سبب نهايتها

ازاى ؟؟

لما عرف انها جنيه و دى كانت غلطتها

و ليه بتقولى غلطه ؟؟

هى اعترفت له فى تانى لقاء على طول و  ابتدى بقا يطمع و يطلب منها حاجات كتير ...

حاجات زى ايه ؟؟

فلوس و جواهر كأنها مصباح علاء الدين بتاعهم اللى بيحكوه فى حواديتهم

و هى عملت ايه ؟؟ 

البنت بقت تاخد من جواهرها و تديله و ساعدته كتير اوى و كانت فاكره أنه حبها زى ما حبته 

بس طلع خسيس وواطى و مش عاوز الا فلوسها و لكن بعد ايه ؟ بعد ما اشترى مركب كبير و عمل شقه ضخمه و بقى عنده فلوس كتير 

و كانت منتظره منه كلمه و كانت بترسم لنفسها انها هتاخده من ايده و تروح لوالدها و تقوله دا اللى اختاره قلبى و عاوزه اكمل معاه عمرى

 للاسف رجعت فى يوم لقيته خطب غيرها وجاب لها اغلى الجواهر 

لدرجة أن جوهرة التاج اللى كانت معاها و ادتهاله لقته أهداها لخطيبته دى 

و لما واجهته و الدموع فى عينيها

قالها انا عمرى ما وعدتك بحاجه انتى عرضتى المساعده و انا قبلتها لا قلت لك اتجوزك و لا طلبت منك جواز 

بس كل كلامك كان معناه انك بتحبنى ...نظرة عينك كانت بتقول بحبك 

و الله انا مش مسؤل انك تترجمى أو تفهمى كلامى معاكى على أنه حب.... و بعدين مظنش أن عشان ساعدتينى تبقى عاوزه مقابل لده انى اتجوزك ؟...دا حتى عيب عليكى و انتى بتقولى انك اميره بنت ملك 

بس انا بحبك 

وانا بحب خطيبتى و هتجوزها الخميس الجاى 

كسر قلبها منه لله 

طب اسمحيلى يا آنه هو فعلا و لا صارحها و لا  طلب منها جواز ؟؟

يا بنتى انتى صغيره ...اللى زى ده كلامه و حركاته كانت توحى لها أنه بيحبها و دا عشان ايه ؟؟

ايه ؟؟ 

عشان يسحب منها على اد ما يقدر اللى عاوزه 

اه ...طب و ايه اللى حصل بعد كدا ؟؟

حصل أن البنت اتصدمت و رجعت مملكتها حزينه يائسه من حياتها

امها عرفت الحكايه منها و راحت قالت لوالدها 

والدها غضب جدا لانه كان واضع ثقته فيها و لكنها مأحسنتش استخدام الحريه اللى إدهالها و لا كانت اد الثقه دى ...و قرر ساعتها أنه ميكلمهاش الا فى الصباح لانه كان عارف انها حساسه و إن قلبها مكسور

البنت صحيوا الصبح لقوها ماتت من قهرها و لأنها لاول مره تتعرض للخداع ده 

ابوها حلف أنه ينتقم من الشخص ده و اللى كان سبب فى قهرة بنته و موتها 

و انتقم منه  ؟؟

ايوه انتقم اشد انتقام ....حرق له كل حاجه عملها من ورى سرقته لبنته و استغلاله لها 

حرق المركب و البيت حتى الحاجات اللى جابها لخطيبته حرقها و استرجع جوهرة التاج و رجعها لتاج روفان و دفنها بيها 

و من اليوم ده صدر فرمان أن مفيش بنت من بنات الجان تقرب من عالم الانس و اللى هيخالف هيكون جزائه عظيم 

جزائه ايه يا آنه ؟؟؟  

لا الجزاء و الحكم ده بيرجع لمجلس الحكماء هما اللى بيقرروا 

ياااا ...معقول حصل كدا ؟؟ 

امال انتى فاكره ايه ؟؟ اوعى يا تلا تقربيلهم و لا لسانك يخاطب لسانهم 

متخافيش يا آنه

 

مشيت من عند آنه و انا محتاره و خايفه 

مش قادره اصدق أنه خدعها ما يمكن هى فهمت غلط او هو مكنش قصده تفهمه بالطريقه دى ؟؟ 

و خايفه أن يحصل معايا نفس الموقف 

طب ما يمكن غلطتها انها قالت له انها جنيه ...و عشان كدا مفكرش فيها كزوجه 

يمكن لو كانت خلته يحبها فى الاول كان محصلش اللى حصل 

انا هتعلم من غلطتها و لا يمكن اصارح فارس بأى حاجه الا اما يحبنى و يقولى أنه بيحبنى 

أما مجلس الحكما بقا فأنا لازم اكون حريصه اكتر من كدا علشان ميكونش مصيري السجن أو النفى

ربنا يسترها 

لما اروح اجهز نفسي علشان اروح لفارس و اعرف عمل ايه ؟؟؟؟ .... 

يتبع

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..

#تلا 

#الجزء_السابع

أما مجلس الحكما بقا فأنا لازم اكون حريصه اكتر من كدا علشان ميكونش مصيري السجن أو النفى

ربنا يسترها 

لما اروح اجهز نفسي علشان اروح لفارس و اعرف عمل ايه ؟؟؟؟ .... 

احنا عندنا خاصيه نقدر نتحرك و احنا مختفين ...قررت انى بعد كدا مش هتحرك و لا اقرب من عالم الانس إلا و انا مختفيه عن العيون .. و بالفعل عملت كدا 

و رحت لفارس و دخلت عليه و انا متمثله فى صوره عبدالله 

فارس لما شافنى رحب بيا وورانى الشغل اللى اشتغله

اهلا عبدالله .. وحشتنى يا اخويا يا رب تكون اتوفقت فى سفريتك

الله يكرمك يا فارس ...دول هما تلات ايام اللى غبتهم عنك 

انت خلاص بقيت انت و نور اخواتى و فعلا بتوحشونى و لو حتى يوم واحد

ليه انت مشفتش نور من ساعه ما مشيت ؟

انا اتحرجت اخبط عليها و هى لوحدها متأخذنيش ميصحش اعمل كدا و قلت لو هى احتاجت اى حاجه اكيد هكون فى خدمتها 

ماشي يا فارس ورينى الشغل بقا 

اتفضل يا سيدى 

الله الله ايه الجمال ده كله ؟؟ 

بجد ؟؟ عاجبينك ؟؟ 

حلوين جدا ...انت فنان بجد 

ربنا يخليك يا عبدالله

يلا بينا بقا على المحل اللى قلت لك عليه اكيد هيخطف منك الحاجات دى خطف 

انا مش عارف اشكرك ازاي ؟؟ لو قعدت عمرى كله مش هوفيك حقك عليا

 

عيب عليك متقولش كدا و بعدين مش احنا شركا و الا ايه ؟؟

ايوه طبعا 

يبقى خلاص دا شغل مفيش حاجه اسمها شكر ما بينا 

صح عندك حق 

طب يلا بينا بقا علشان نلحق المحل قبل ما يقفل 

و رحنا المحل اللى قلت لفارس عليه و الراجل رحب بينا جدا و اخد الشغل من فارس بمبلغ كويس اوى 

فارس كان فرحان اوى و انا كنت فرحانه لفرحه بس معرفش ليه كانت حكايه روفان منغصه عليا عيشتى و حاسه انى بكررها بحذافيرها و المفروض ربنا ادانى اشاره و لكن تجاهلتها ...بس غصب عنى انا بقيت عاوزه اقعد معاه على طول مفرقهوش لحظه عينى متتشالش من عليه معرفش دا اللى بيسموه الحب و الا ايه ؟؟ 

بس اللى اعرفه انى مش قادره ابعد عنه 

طلعنا من المحل و معانا مبلغ محترم 

لقيت فارس بيعد الفلوس و بيدينى نصها 

انت بتعمل ايه يا فارس ؟؟

حقك يا عبدالله 

لا انا مش هاخد منك اى حاجه 

و ليه بقا ؟؟ 

الفلوس دى كلها هنجيب بيها خامات علشان شغلك يكبر اكتر 

بقولك ايه يا عبدالله ما تسيبك من موضوع الكاشير ده و تيجى اعلمك شغل الارابيسك على الأقل نشتغل سوا و ننجز شغل اكتر 

لا يا عم انا مليش فى الكلام ده بس ممكن تشغل نور معاك 

لا نور ايه ؟؟ الشغل ده مينفعش البنات تشتغل فيه 

لا يبقى انت متعرفش نور بقا ...نور اختى تقدر تشتغل شغل الرجاله و كمان عندها لمسه فنيه و اظن ان ده هيكون مفيد فى شغلك أوى 

خلاص نجرب مش هنخسر حاجه 

رحنا جبنا خامات تانيه و فارس دخل اوضته و انا سافرت لمملكه الجان قبل ما حد يكشف امرى 

تانى يوم رحتله فى صوره نور 

الف مبروك يا سي فارس ...عبدالله قالى انكم بعتوا الشغل بمبلغ حلو اوى

ايوه الحمد لله يا نور ...وشك حلو عليا 

تسلملى يا رب ...بقول ايه يا سي فارس 

ايوا يا نور 

عبدالله قالى انك محتاجنى فى شغلك ..صحيح الكلام ده ؟؟ 

هو انا فعلا محتاج حد معايا فى شغلى بس معرفش انتى تقدرى تعملى اللى هقولك عليه و الا لأ ؟؟

جربنى لو نفعت نفعت منفعتش يبقى خلاص 

اجربك و ماله ....شايفه قطعه الخشب دى ؟؟ 

ايوا شايفاها 

دى بقا اسمها صنفره و بنستخدمها بأننا نصنفر قطعه الخشب دى علشان تبقى ناعم و شكلها حلو فى الشغل 

ايوه انا شفتك بتصنفر بيها قبل كدا ...دى حاجه سهله اوى 

لا هى مش اى حاجه ...الصنفره بتكون بإحساس برده علشان المعجون اللى انا ملقطه ده ميطلعش 

طب ورينى بتصنفر ازاى و انا اعمل زيك 

بصى كدا ....متتكيش اوى على الصنفره و تفضلى تصنفرى لحد ما الخشب ينعم خالص 

فهمت خلاص تسمح لى اصنفر اى حاجه تقولى عليها ؟؟

طب خدى جربى فى الحته دى و لما نشوف هتعملى ايه 

طبعا احنا عندنا التعليم سريع جدا و بمجرد ما بنشوف الحاجه قدام عنينا بنتعلمها 

و بالفعل كنت فى دقيقه صنفرت الخشبه و خليتها زى الحرير 

ايه رايك يا سى فارس

عظيم جدا هايله مكنتش متخيل انك تعمليها بالشكل ده و بالنضافه دى ...شكلى هعتمد عليكى صحيح فى حاجات كتير 

اللى عاوزه اعملهولك 

طب تعرفى تصنفرى القطع دى ؟؟ هدخل بس اعمل كوبيتين شاى و اطلع اصنفر معاكى 

طب خليك انت و انا اعمل الشاى 

لا خليكى انا عاوز اعمله بنفسي المره دى 

فارس دخل و فى ظرف دقيقتين كنت مخلصه كل الشغل و قاعده استناه

فارس خرج مبقاش مصدق نفسه 

معقول خلصتيهم كلهم فى الوقت الصغير ده ؟؟ 

ايوا امال ايه ؟ انا لهلوبه

يا ريتك كنتى تقدرى تنشرى معايا الخشب كمان .... كانت هتبقى فل اوى 

طب و ماله انشر 

ههههههههه لا دى حاجه مرهقه ليا انا شخصيا ...متقدريش عليها 

طب و مفيش حاجه تريحك اكتر من المنشار ده ؟؟؟

فى طبعا.....المنشار الكهربى بس غالى اوى 

غالى بكام يعنى ؟؟ 

معرفش و الله بس اسمع أنه غالى 

طيب ما نشتريه مدام هيساعدنا فى شغلنا 

بقولك غالى يا نور هنشتريه منين ده ؟

عندى شويه دهب ابيعه و تجيب الأدوات اللى ناقصاك كلها مره واحده   

لا طبعا انا ماخدش دهبك ابدا 

طب ما انت اخدت فلوس من عبدالله قبل كدا ؟؟؟

عبدالله راجل زى زيه و الفلوس اللى اخدتها دى شراكه بينى و بينه إنما انتى لامؤاخذه واحده ست و الراجل اللى يمد ايده لحرمه ميبقاش راجل 

تصدق انك كبرت فى نظرى اوى يا فارس 

و انتى كمان يا نور ...عمر ما شفت واحده فى حنيتك ...عمر ما حد عاملنى كدا 

فات اسبوع على الموقف ده 

و كل يوم فارس بيثبت لى أنه إنسان كويس جدا و أمين جدا و مش زى الشخص اللى عرفته روفان 

يوم عن يوم كنت بحبه اكتر و اكتر و هو كمان كانت نظرة عينه ليا بتقول أنه بيحبنى ... بقى ملهوف عليا لو اتأخرت عنه و كان بيخاف عليا اوى 

نفسي احقق له أمنياته نفسي اساعده 

هو امنيه حياته يلاقى أهله و انا هدور له عليهم لحد ما الاقيهم 

و بالفعل اخدت العنوان اللى كتبهولى فارس و طرت للمكان 

قعدت ادور ادور لحد ما لاقيت حد من الجيران عارف عنوان عمه لانه صاحبه 

و اخدت العنوان و رقم التليفون و انا فرحانه جدا 

و عشان ازود فرحته جبت له المنشار الكهربى اللى كان نفسه فيه 

رحت له على صوره عبدالله و خبطت على بابه 

ادخل 

ازيك يا ابو الفوارس 

اللى يسلمك يا عبدالله تعالى اتفضل 

لا مش هقدر لانى ورايا شغل كمان شويه ...تعالى عاوزك تشوف حاجه بره 

حاجة ايه دى ؟؟ 

تعالى بس هتعرف حالا 

اول ما فارس طلع و شاف المنشار مصدقش عنيه 

ايه دا يا عبدالله ؟؟

دا المنشار اللى كنت عاوزه 

يا خبر ...انا مش مصدق عنيا ... هى نور قالت لك ؟؟؟ ...انت اكيد مش بشر انت ملاك ...انت متعرفش المنشار ده هيوفر عليا اد ايه يا عبدالله

و كمان عندى لك خبر حلو تانى 

كمان ؟؟ خبر ايه دا ؟؟ 

انا جبت عنوان عمك و رقم تليفونه 

بجد يا عبدالله ؟؟ بجد ؟؟ يعنى انا طلع ليا أهل صحيح ؟؟

ايوا يا ابنى امال ايه 

حبيبي يا عبدالله تستاهل بوسه على الخبرين اللى احلى من بعض دول 

و فى حركه مفاجئه اخدنى فارس فى حضنه و باس خدى من الناحيتين 

حسيت ساعتها أن جسمى قشعر ...اول مره اتلامس مع بشر بالشكل ده و كمان مش اى بشر ...دا ده الإنسان اللى بحبه 😍

يتبع

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..

#تلا 

#الجزء_الثامن

و فى حركه مفاجئه اخدنى فارس فى حضنه و باس خدى من الناحيتين 

حسيت ساعتها أن جسمى قشعر ...اول مره اتلامس مع بشر بالشكل ده و كمان مش اى بشر ...دا ده الإنسان اللى بحبه 😍

تانى يوم رحنا على العنوان اللى جبته ووصيت فارس قبل ما نوصل أنه ميتكلمش فى اى عتاب و لا يسأل رموه ليه فى الملجأ

 

فارس بصلى و الدموع فى عنيه و قالى حاضر يا عبدالله بس كان نفسي اعرف ليه عملوا كدا ؟؟ ليه مأخدونيش فى حضنهم و ربونى وسط عيالهم بدل عيشة الذل اللى كنت عايشها ؟؟

خلاص يا فارس اللى حصل حصل و لو عاوز يكون لك اهل و عيله متتكلمش فى اللى فات 

حاضر يا عبدالله 

يلا عشان نجيب هديه و احنا رايحين لعمك

 

هديه ؟؟؟ على ايه ؟؟ 

ما قلنا أن احنا مش هنعاملهم بمعاملتهم بقا 

عندك حق ...حاضر هجيب لهم هديه 

و اخدنا هديه حلوه و رحنا للاستاذ عبدالباسط عم فارس 

الراجل كانت مقابلته بارده جدا و لما عرف أن ده فارس ابن اخوه كان بيتكلم بقرف و زى ما يكون مش طايقنا أو خايف فارس يطلب منه حاجه 

فارس بصلى و عرفت هو عاوز يقولى ايه ...هزيت له راسي كدا اصبر شويه 

مرات عم فارس دخلت الشاى و قعدت تبص على فارس بحده و تجيبه من فوق لتحت 

شبه المرحوم ابوك الخالق الناطق 

ايوه فعلا يا عديله شبه ابوه بالظبط 

هنا رد فارس 

لو سمحت يا عمى ملقيش عندك صوره لابويا و امى ؟؟... نفسي اشوفهم 

اه طبعا عندنا البوم صور بحاله لهم فى فرحهم و بعد ما خلفوك كمان و صور ليك و انت صغير 

طب ممكن اشوفها من فضلك 

قومى يا عديله هاتى البوم الصور 

حاضر يا عبدالباسط 

عديله جابت البوم كبير جدا مليان صور لفارس و لوالده ووالدته 

صور فرح ، صور مصايف ، صور له و هو صغير ...صور كتير اوى 

و كان فارس بيسال عمه عن الناس الموجوده فى الصوره و اللى جذب انتباهه أن فى واحده شبه امه بالظبط دايما معاها فى كل الصور

مين دى يا عمى اللى شبه ماما ووافقه معاها فى معظم الصور ؟؟ 

دى خالتك سناء التوأم بتاع امك 

هى لسه عايشه خالتى دى ؟؟

ايوا طبعا لسه عايشه ...و اللى اعرفه انها متجوزه فى بلد تبع بنها اسمها تقرييا شبلنجه

طب ما تعرفش العنوان بالظبط يا عمى ؟؟ 

لا معرفش بس اعرف أن جوزها اسمه محمد الشرقاوى 

متشكر اوى ...ممكن اطلب منك طلب 

خير 

عاوز صورة ابويا و امى دى 

اتفضل خدها 

استأذن انا يا عمى 

اتفضل ...مع السلامه 

طلعنا من عند عبدالباسط و شفت فى عين فارس دمعه محبوسه جوه عينه 

ليه مخلتنيش اسأله يا عبدالله ؟؟ انت شفت قابلنا ازاى ؟؟ 

شفت و عشان كدا قلت لك متتكلمش فى اللى فات لانه لو حس انك جاى تئنبه مكنش هيفتح لك اى حديث من أصله 

شفت ابويا و امى حلوين ازاى ؟؟ 

ايوا ...الله يرحمهم 

انا عاوز اروح لخالتى سناء دى ...أنا متأكد انى هشوف فيها امى و اشم ريحتها 

طب و ماله ...لو عاوزنى اجى معاك انا تحت امرك 

لا مش عاوز اتعبك معايا و عشان تلحق شغلك ...اتكل انت على الله انا هروح بنفسي 

ماشي يا فارس خلى بالك من نفسك 

حاضر يا اخويا 

و مشي فارس و افتكر انى هسيبه لكن انا مقدرش افارقه ...كنت خايفه عليه لخالته تقابله زى ما عمه قابله و تكسر قلبه و عشان كدا  كنت معاه لحظه بلحظه 

من اول ما ركب العربيه اللى هتوديه البلد اللى فيها خالته لحد ما نزل و بدأ يسأل على جوزها و اهل الخير دلوه على بيتها 

فارس وقف قدام البيت متردد و بعدين رن الجرس 

خرجت ست فى الأربعينات بيضا و شكلها تقريبا زى الصوره ملامحها متغيرتش كتير الا من بعض التجاعيد الخفيفه فى وشها ، و جسمها اللى اتملى اكتر من الصور

سلام عليكم 

و عليكم السلام يا ابنى 

الست سناء ؟؟

ايوه انا سناء خير يا حبيبي ؟؟ 

انا فارس ابن اختك 

فارس ؟؟؟؟ يا حبيبي يا ابنى ....انا عرفتك ..و الله عرفتك قبل ما تنطق بيها انت شبه ابوك اوى الله يرحمه و فيك روح اختى ....يا حبيبي يا حبيبي

الست سناء اخدت فارس فى حضنها و هى بتعيط و هو كمان بقى يعيط وهى مفيش على لسانها الا كلمه واحده

 كنت فين يا فارس ؟؟؟ دورت عليك كتير يا ابنى ؟؟ يا حبيبي يا ريحة الحبايب 

 ‏تعالى ادخل يا حبيبي ادخل يا ابنى 

 ‏

 ‏فارس وشه نور و زى ما يكون اترد فيه الروح من مقابلة خالته له

 ‏

 ‏تعالى يا حبيبي ...انت اكلت الاول ؟؟

 ‏

 ‏ايوه يا خالتى اكلت 

 ‏

 ‏اكلت ايه ؟؟ 

 ‏

 ‏اكلت كشري و انا جاى 

 ‏

 ‏لا كشرى ايه بس ؟ انا عامله محشي و بط و رقاق هخلى ناهد تجيب لك 

 ‏

 ‏لا و الله يا خالتى انا مش جعان

 ‏

 ‏اسكت يا واد

 ‏

 ‏يا ناااهد ...يا ناهد 

 ‏

 ‏نعم يا ماما 

 ‏

 ‏تعالى يا حبيبتى ...دا فارس ابن خالتك اللى حكيت لك عنه 

 ‏

 ‏انت فارس بقا اللى ماما ملهاش سيره غيرك ؟؟ اهلا وسهلا 

 ‏

 ‏اهلا بيكى يا اختى 

 ‏

 ‏اختك ؟؟ انا أسمى ناهد ...قول ناهد كدا ؟؟ 

 ‏

 ‏اهلا ناهد 

 ‏

 ‏شاطر يا فروسه كررها كدا كذا مره احسن تنساها  

 ‏

 ‏اسكتى يا بت و بطلى لماضه و روحى يا اختى هاتيله ياكل 

 ‏

 ‏ماشي يا ست ماما ...اقعدى انتى مع حبيبك و انا اروح اجهز الاكل

 ‏

 ‏متزعلش يا فارس هى البت دى لمضه كدا و مدلعه اكمنها اخر العنقود 

 ‏

 ‏لا ابدا دى دمها خفيف اوى وشبهك يا خالتى

 ‏

 ‏و شبه المرحومه والدتك اوى و نفس لماضتها بالظبط 

 ‏

 ‏الله يرحمها يارب 

 ‏

 ‏مقولتليش كنت فين السنين دى كلها و ليه مسألتش عليا قبل كدا ؟؟ 

 ‏

 ‏سالت بس معرفتش اوصل و لسه يدوب انهارده واصل لعمى و عرفت منه أن ليا خاله ساكنه فى شبلنجه 

 ‏

 ‏عمك عبدالباسط ؟؟ الله يسامحه بقا هو و الحربايه مراته 

 ‏

 ‏ليه بتقولى كدا يا خالتى ؟؟ 

يتبع

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..

#تلا 

#الجزء_التاسع

عمك عبدالباسط ؟؟ الله يسامحه بقا هو و الحربايه مراته 

 ‏

 ‏ليه بتقولى كدا يا خالتى ؟؟ 

 ‏

 ‏ما هو و مراته اللى رموك فى الملجأ ..منهم لله 

 ‏

 ‏رمونى ليه يا خالتى ؟؟ و ليه انتى مخدتنيش معاكى ؟؟ ليه اتربى فى ملجأ و انا ليا أهل ؟؟ 

 ‏

 ‏اهدى يا فارس و انا هحكيلك كل حاجه يا ابنى ... ابوك و امك الله يرحمهم كانوا عايشين فى شقه ملك فى بيت عيله 

 ‏البيت كان باسم جدك الله يرحمه بس كان أبوك بانى شقته بنفسه و دفع دم قلبه و اختى الله يرحمها عاشت فى زنقه كبيره بسبب الشقه دى 

 ‏المهم ..ربنا شاء أنه يسترد وديعته و ابوك يموت و انت لسه مولود عمرك شهر تقريبا 

 ‏

 ‏ايه دا ؟؟ هو مش ابويا مات و انا لسه فى بطن امى ؟؟ 

 ‏

 ‏لا مات بعد ما اتولدت 

 ‏

 ‏تصدقى صح انا كنت فاهم غلط ..و فعلا شوفت صور ليا مع ابويا و امى 

 ‏

 ‏اختى كانت حمالة اسيه و كانت مرات عمك بتغير منها جدا جدا و اللى سمعته انها كان عينها على ابوك قبل ما تتجوز اخوه بحكم انهم قرايب ..لكن اما ابوك اختار اختى هى النار قادت فى جتتها و قعدت تشاغل فى عبدالباسط لحد ما راح خطبها 

 ‏ياما امك شافت منها مشاكل و تلقيح بالكلام لأن امك اتأخرت فى الحمل تلات سنين ...و كانت تسكت على عكس طبيعتها و لما كنت اسالها ليه ساكتالها كانت تقول عشان خاطر عين تكرم الف عين و انا مش عاوزه جوزى يتخانق مع اخوه بسبب الحريم 

 ‏يوم ما امك حملت فيه النار قادت اكتر فى قلب عديله لدرجة أنها كانت بترميلها الزباله قدام شقتها عشان تفتعل معاها المشاكل 

 ‏و زاد اجرامها انها دلقت على السلم زيت علشان امك تقع و تفقدك 

 ‏و لكن ربك كان معاها عشان كانت غلبانه و مظلومه و انتبهت للزيت المدلوق و مسحته 

 ‏امك بعد الحادثه دى طلبت من ابوك أنهم يمشوا من المكان حتى لو هيأجروا اوضه بره بعيد عن المشاكل 

 ‏بس ابوك كان رايه أنه لو ساب الشقه اخوه و مراته هيستولوا عليها و الشقه دى شقى عمره بيشتغل عشانها من و هو فى ثانوى 

 ‏امك قالت له خلاص و انا معاك و هستحمل عشانك اى حاجه 

 ‏و بقت تاخد بالها كل ما تطلع من شقتها لتكون عديله رشه لها اى حاجه 

 ‏خلصت شهور الحمل و اتولدت انت بدر منور اللى يشوفك ميقولش الا الله اكبر نسخه من ابوه 

 ‏ابوك و امك كانوا فرحانين اوى و كانوا بيخططوا أنهم يربوك كويس و يعلموك تعليم عالى لكن ربنا مأردش و ابوك اتوفى على طول 

 ‏امك كانت حزينه اوى حزن عمرى ما شفت اختى حزينه بالشكل ده 

 ‏و لما خلص العزا قلت لها هتقعدى ازاى وسط الناس دى ؟؟ قالت دى شقتى و شقة ابنى و لا يمكن اسيبها و دى رغبة جوزى الله يرحمه 

 ‏بعد موت ابوك بحوالى سنه جوزى جاله سفريه لقطر و رحت لامك أودعها قبل ما اسافر و فاكره اخر كلمه قالتهالى 

 ‏

 ‏هتسافرى و تسبينى يا سناء ؟؟ 

 ‏

 ‏اعمل ايه بس ؟ مش بخاطرى و الله 

 ‏

 ‏الله يسعدك يا حبيبتى و يرضيكى ..عاوزه اطلب منك طلب يا سناء 

 ‏

 ‏اطلبى يا حبيبتى 

 ‏

 ‏لو جرالى حاجه عاوزاكى تاخدى فارس تربيه وسط ولادك 

 ‏

 ‏الشر برا و بعيد ...ليه بتقولى الكلام ده ؟؟ متوجعيش قلبى امال 

 ‏

 ‏انا بس بوصيكى لأن فارس ملوش حد فى الدنيا الا انا و انتى حتى جده مات بعد ابوه بشهرين و مبقلوش حد 

 ‏

 ‏معاه ربنا يا حبيبتى و انتى أن شاء الله هتكبريه و تفرحى بيه و بعروسته و أولاده كمان

 ‏ 

 ‏يا رب يا سناء يا رب 

 ‏

 ‏و سافرت مع جوزى و بعدها بكام شهر جالى خبر وفاة اختى ...كنت زى المجنونه و عاوزه انزل بأى طريقه 

 ‏

 ‏جوزى قالى احنا لسه مكملناش سنه و العقد بتاعى ممنوع انزل و الا هدفع غرامه 

 ‏

قلت له و انا بعيط ‏مليش دعوه انا عاوزه انزل اشوف اختى 

 ‏

 ‏يا ستى اختك خلاص ماتت ياريتها كانت لسه موجوده كنا نزلنا و اللى يحصل يحصل 

 ‏

 ‏طب و ابنها اللى موصيانى عليه ؟؟ 

 ‏

 ‏ابنها اكيد مع عمه ...دا لحمه و دمه 

 ‏

 ‏لا ارجوك يا محمد عاوز انزل و اخده فى حضنى دا بقا يتيم اب و ام ...بالله عليك 

 ‏

 ‏حاضر يا سناء هحاول احجز لك انتى و العيال و تنزلى بس معرفش بقا هتعرفى ترجعى بيه هنا و الا لا 

 ‏

 ‏و ليه معرفش ؟؟ 

 ‏

 ‏لان ورقه مش معاكى لازم يكون معاكى ورق رسمى بحضانته 

 ‏

 ‏هعمله الورق و هرجع بيه يا محمد ، متزعلش منى 

 ‏

 ‏لا و انا ازعل ليه ؟؟ دا عيل يتيم و أن مكنش يبقى فى قلوبنا رحمه عليه نبقى مش بنى ادمين 

 ‏

 ‏و حجز لى جوزى و عقبال ما لقينا تذكره كان مر شهر و نص تقريبا على موت اختى 

 ‏

 ‏نزلت على عنوانها و عرفت أن عبدالباسط باع البيت بعد موتها بحوالى شهر و عرفت من الجيران انهم اتخلصوا منك وودوك ملجأ 

 ‏

 ‏والجيران عرفوا منين يا خالتى ؟؟

 ‏

 ‏عديله بعد موت امك و النسوان بيعزوها و يوصوها عليك بقت تتشال و تتحط و تقول و انا اربى ابن غيري ليه ؟؟ لو مفيش حد سأل عليه من اهل امه هنوديه ملجأ و هما حرين بقا 

 ‏الجيران بيقولوا أن بعد العزا بكام يوم معدوش بيسمعوا صوت عياطك و عرفوا أن كلام عديله مكنش مجرد تهديد 

 ‏الناس ابتدت تتكلم عن عمك و مراته أنهم رموا لحمهم وبقوا يقابلوه يشتموه فى وشه 

 ‏عمك راح بايع البيت و مشي من المكان عشان فضيحته و كلام الناس 

 ‏لما وصلت قعدت اسال عليه و هل حد عارف مكانه و للاسف معرفتش اوصل 

 ‏رحت كل الدور اللى كانت حوالين المكان يمكن الاقيك فى دار منهم و للاسف ملقتكش

 ‏قلبى كان بيتحرق عليك و انا مش قادره اعرف مكانك 

 ‏بعدها سافرت لجوزى و قعدنا هناك خمستاشر سنه و رجعنا 

 ‏بس انا عمرى ما نسيتك و دايما كنت بدعى الله انى الاقيك و الحمد لله ربنا استجاب لدعوتى 

 ‏

 ‏معقوله فى بشر بالطريقه دى يا خالتى ؟

 ‏

 ‏ايوه طبعا يا ابنى و فى اوحش من كدا 

 ‏

 ‏الاكل يا عم فارس 

 ‏

 ‏عم ايه يا بت انتى ؟؟ دا فارس ميجبش 22 سنه يعنى اكبر منك بحوالى تلات سنين بس

 ‏

 ‏و ايه يعنى لما أقوله يا عم ؟؟

 ‏

 ‏سبيها يا خالتى تقول اللى هى عاوزاه

 ‏

 ‏شاطر يا ابن خالتى ...كل بقا عشان اعملك كوبايه شاى فى الخمسينه و بعدها الاعبك دور طاوله ...مش بتعرف تلعب طاوله ؟؟

 ‏

 ‏لا مبعرفش 

 ‏

 ‏ايه ؟؟؟ هعلمك انا و هكسبك باذن الله و لما اكسبك هتعزمنى على ايس كريم 

 ‏

 ‏بس يا بت بطلى رغى و هاتى مايه مع الاكل دايما تنسيها 

 ‏

 ‏حاضر ..علم و ينفذ يا ست الحبايب 

 ‏

 ‏ناهد دمها خفيف اوى يا خالتى 

 ‏

 ‏ناهد الخالق الناطق امك فى كل حاجه قبل ما تشيل الهم يا حبيبتى ... انت بقا هتبات معايا و هحكيلك كل حاجه عن امك الله يرحمها 

 ‏لا ابات ايه انا يدوب امشي عشان عندى شغل 

 ‏

 ‏ايوووه ...عاوز تهرب منى و من الطاوله ؟؟ لا كان غيرك اشطر يا استاذ فارس 

 ‏

 ‏يا بت اسكتى خلينى اكمل كلامى مع الجدع

 ‏

 ‏لا اسكتى انتى يا ماما ..انت مش هتخرج منها ..خلاص تمت المصادره

 ‏

 ‏مصادرة ايه ؟؟

 ‏

 ‏صادرناك يا ابو الفوارس و مفيش خروج الا بمزاجنا احنا 

 ‏

 ‏هههههههه يوه جتك ايه بت 

 ‏

 ‏خلاص يا ناهد هبات معاكم بس همشي الصبح باذن الله 

 ‏

 ‏لا حكايه تمشي دى بمزاجنا برده 

 ‏

 ‏لا عشان شغلى 

 ‏

 ‏الا صحيح يا فارس انت بتشتغل ايه يا ابنى ؟؟  ‏

 ‏

يتبع

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..

#تلا 

#الجزء_العاشر

الا صحيح يا فارس انت بتشتغل ايه يا ابنى ؟؟

انا معايا معهد و بشتغل الايام دى مع جدع طيب اوى اسمه عبدالله مشاركنى بفلوسه و بنعمل قطع ارابيسك و نبيعها 

ايه دا انت بتعرف تعمل ارابيسك ؟؟؟ 

ايوه 

يا محاسن الصدف ...انت تعرف أن بابا عنده ورشه ارابيسك و كان عاوز حد يمسك له الورشه بعد اللى كان ماسكها سافر بره 

بجد ؟؟؟ 

اه و الله بجد ...دا بابا هيفرح اوى بالخبر ده 

بس انا مقدرش اسيب عبدالله ...دا هو الشخص الوحيد اللى مد لى ايده و ساعدنى 

افهم يا فارس انت مع عبدالله بتعملوا كام قطعه يعنى ؟؟ إنما هنا هتبقى انت المسؤل عن ورشه بحالها بإمكانياتها و تحت ايدك كذا عامل ..يعنى هتكبر اكتر و تتعامل مع تجار كبار بابا عارفهم ...بص لما بابا يجى اكيد هيقدر يقنعك اكتر منى

فارس هز دماغه لناهد ...معرفش إن كان اقتنع بكلامها و الا اتحرج منها 

بعد اللى سمعته خرجت من بيت سناء 

بعد ما اتطمنت أنهم مكسروش قلبه و أنه مبسوط و هو فى وسطهم

رجعت القصر و دخلت سريري و انا بكلم نفسي 

انتى عاوزه ايه يا تلا ؟؟

انتى هتعملى زى روفان و تكونى مستنيه تمن مساعدتك لفارس ؟؟ 

طب لو فارس حبك هتقنعى اهلك ازاى ؟؟ 

ناهد بنت خالته دى حلوه و دمها خفيف و شكله كدا اعجب بيها 

انا شفت فى عينه لمعه مشفتهاش و هو بيبص لنور 

طب ما يمكن اللمعه دى عشان فرحان أنه لقى أهله ؟

يا ترى انا غلطانه انى عرفته على أهله ؟؟؟ 

كنت سبته من غير حد و كان اعتبرنى انا كل أهله 

دماغى هتنفجر من التفكير و مش عارفه اخرة الحيره اللى انا فيها دى ؟؟؟

على العموم انا مش عاوزه اسبق الأحداث بكرا كل حاجه تظهر و تبان 

تلا ... تلا

ايوا يا ماما 

انتى لسه صاحيه ؟؟

ايوه يا ماما اتفضلى

ايه يا بنتى مالك ؟؟ 

مالى يا ماما ؟ منا كويسه اهو ؟؟ 

معنتيش بتقعدى معانا و كل ما اسال سلافه عنك تقول نايمه أو مشغوله 

معلش يا امى سبينى براحتى 

منا سايباكى براحتك خالص بس انا ملاحظه من اول ما اتقدم لك الأمير  مارو و انتى دايما حزينه و واخده جنب 

لا ابدا يا ماما انا حتى مش فاكره أن فى عريس متقدم لى من أصله 

ازاى بقا ؟؟ دا خلاص قرب يجى 

هو مينفعش تأجلوا الميعاد ده شويه ؟؟ 

و نأجله ليه ؟؟ قوليلى السبب اللى عاوزه تأجلى عشانه 

حاسه ان نفسيتى مش مظبوطه شويه و كنت عاوزاه يجى فى وقت تانى 

و امتى نفسيتك هتتظبط ؟؟ 

مش عارفه يا ماما 

يبقى مفيش تاجيل يا تلا ...و إن كان على نفسيتك انا هعرف أحسنها ازاى ؟؟

ازاى يا ماما ؟؟

هاخدك و نروح جبل البنفسج تلات ايام انا عارفه انك بتحبى الرحله دى اوى 

لا لا مش عاوزه أخرج 

مفيش الكلام ده ...بكرا الصبح تعملى حسابك من بدرى انك تصحى و تجهزى نفسك عشان نطير على جبل البنفسج ...يلا هسيبك عشان تنامى تصبحى على خير

و انتى من اهل الخير يا ماما 

ماما خرجت و انا اتضايقت ...هفضل تلات ايام فى جبل البنفسج يعنى هبعد فتره كبيره عن فارس بزمانهم هما ...اعمل ايه يا ربى ؟؟ 

و الا يمكن تكون دى فرصه كويسه علشان اعيد تفكير و اشوف نور هتوحش فارس و الا لا ؟؟ 

تانى يوم لقيت سلافه بتصحينى من بدرى و محضرالى كل حاجه محتاجاها لزوم السفر 

جبل البنفسج عندنا يعتبر جبل الراحه ، زهرة البنفسج هناك فى كل مكان ، و رائحتها العطره معبيه المكان ...هناك بتنسي مؤقتا اى حزن أو تعب أو ذكرى مؤلمه ، هناك كل وسائل الراحه و الاستجمام ..

كل المملكه بتتمنى تروح جبل البنفسج لانه من اكتر الاماكن راحه و متعه

انا فاكره لما رحته مع امى و انا صغيره و مكنتش عاوزه ارجع منه ابدا 

فى جبل البنفسج محدش يعرف هوية حد ،

كل واحد مننا بيدخل باسم مستعار علشان ميتعرفش دا مين أو ابن مين 

فى جبل البنفسج كلنا سواسيه مفيش امير و مفيش حاشيه ، كلنا لابسين لبس واحد ، مفيش لبس غالى أو رخيص.

و يمكن دا اكتر ما بيميز المكان ..انك هناك تبقى براحتك تتكلم مع الناس تعمل صداقات مؤقته مده بقائك بس فى الجبل 

بعدها كل واحد بيروح لحاله من غير ما يعرف هو كان بيكلم مين 

وصلنا الجبل انا ووالدتى و قلعنا تيجانا على البوابه المؤديه للجبل و سلمونا ملابس بلون زهرة البنفسج و سلمونا اسمائنا الجديده 

انا لورا و ماما لورين 

اول ما عدينا من البوابه حسيت بنشوة كبيره غمرتني 

ريحة الزهور اللى ماليه المكان و المكان الواسع الجميل 

استقبلتنا جنيتان ظراف ماسكين فى اديهم طوقين من زهر البنفسج 

لبسونا الاطواق و انطلقنا إلى داخل الجبل 

قابلتنا جنيتين تانين و قدمولنا مشروب الفواكه اللذيذ

رحنا فندق البنفسج و اللى فيه كل حاجه على شكل زهرة البنفسج 

دخلنا اوضنا و بعد دقايق لقينا استقبال من اداره الفندق بيرحب بينا 

و بيدعونا لغرفة الاسبا ...تدليك و سونه مع مشروب طاقه 

بعد كدا خرجت انا و ماما و افترق كل منا فى طريق 

رحت قعدت على البحر

فردت جسمى على الكرسي و غطيت وشى بوشاح من البنفسج 

فجاه لقيت حد بيخبط فى الكرسي بتاعى 

قمت و رفعت الوشاح و لقيت شاب قدامى وسيم جدا واقف محرج جدا و بيقولى

انا اسف جدا ...انا 

يتبع

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..

#تلا 

#الجزء_الحادى_عشر

فجاه لقيت حد بيخبط فى الكرسي بتاعى 

قمت و رفعت الوشاح و لقيت شاب قدامى وسيم جدا واقف محرج جدا و بيقولى

انا اسف جدا ...انا مأخدتش بالى افتكرتك زهره من الزهور اللى موجوده بالمكان

ههههههههه كل دى زهره ؟؟

انا اسف مره تانيه معرفتكيش بنفسي انا عقيل 

و انا لورا

اهلا لورا ...ممكن اقعد معاكى شويه ؟؟ 

اشمعنى

عادى شفتك وحيده قلت ادردش معاكى شويه ...لو مش هيضايقك يعنى ؟؟ 

معلش انا بستجم فى الشمس و مش قادره ادردش مع حد 

انا اسف انى ازعجتك ...نهارك سعيد

انصرف عقيل و غطيت وشى مره تانيه وغمضت عينى 

و سرحت فى فارس بس محستش بأى الم لأن جبل البنفسج مفيهوش اى ذكرى ممكن تضايق أو تألم

افتكرت كل حاجه حلوه و بس ، اول مره يرفع نظره و اشوف لون عنيه ، اول مره يلمسنى لما حضنى على انى عبدالله ...يااا احاسيس جميله بتخلى قلبى يترعش من جوه 

بعد شويه لقيت جنيه لطيفه جايه تقولى 

 اهلا بيكى فى جبل البنفسج شرفتينا

 ‏

 ‏انا اللى مبسوطه اوى انى بينكم

 ‏

دا ميعاد المسابقات ‏يلا بينا 

مسابقات ايه دى ؟؟ 

دا نشاط جديد بيشترك فيه كل رواد الجبل و بيقضوا وقت سعيد و اللى بيفوز بيكون له هديه قيمه

مشيت معاها و كلى حماس و حاسه انى هخرج طاقتى فى حاجه ممتعه 

 وصلتنى لمكان واسع جدا عامل زى استاد كبير اوى و عرفت أن  عدد المسابقات تلات مسابقات

اول مسابقه عباره عن  ربط كل اتنين من المشتركين بحبل واحد  من رجليهم و تفضل رجل  واحده حره هى دى اللى يتحركوا بيها لحد ما يوصلوا لنقطة النهايه

طبعا اختيار المشتركين عشوائى تماما و عن طريق ارقام سلموها لنا 

و كمان سلمونا اقنعه على هيئه رؤس حيوانات زى دب أو بطه أو قطه 

و اللى عرفته أن قبل اختيار المتسابقين أن الرقمين اللى هيطلعوا هيفضلوا رفقاء لآخر المسابقات 

انا كان رقمى 53و كنت لابسه قناع قطه بيضا و لقيت جنيه بتنادى على رقمى و تقول 

رقم 53 مع رقم 77 

ببص لقيت حد بيخرج من ضمن الصفوف و مكتوب على صدره 77 و لابس وش دب لونه بنى 

جت جنيه من جنيات الجبل ربطت رجلينا سوا لانه ممنوع الطيران داخل الجبل 

و ابتدت اول مسابقه و كانت مسافه الف متر و احنا مربوطين ببعض 

ابتدأ الكل يجرى على رجل واحده و انا لحد ما بدأت المسابقه مكنتش عارفه شريكى ده راجل و الا ست 

بس بعد شويه اتأكدت أنه راجل لانه كان قوى جدا و سريع جدا ...انا تقريبا كانت رجلى مبتلمسش الأرض 

كان شايلنى و انا عامله زى العصفوره 

حاولت اتكلم معاه و احنا بنجرى بس كان مركز جدا و مردش عليا 

انا كمان حاولت انتبه اكتر لما لاقيت أننا اقرب للفوز 

و بالفعل طلعت انا و رقم 77 الأوائل فى المسابقه 

بعد ما فزنا قلت له

ليه مبتردش عليا ؟؟؟ انت راجل و الا ست 

شاور لى بايده انى لازم استعد للمسابقه التانيه 

و المسابقه دى كانت جرى برده بس بتتقسم المسافه على الاتنين المشتركين 

المتسابق الاول بيمسك عصايه فى ايده و يجرى و يسلمها لشريكه و اللى يوصل الاول يكون هو الفريق الفايز

كلنا اصطفينا و اخترت انى انا اللى ابدا و شريكى يستنانى فى نص المسافه 

و انطلقنا كلنا ...بس الكل سبقنى و كنت اخر واحده فى كل المتسابقين لدرجة انى قلت اننا لا يمكن هنكسب المسابقه دى 

و كنت عاوزه انسحب 

بس شفت شريكى من بعيد بيشاورلى و يحمسنى انى اكمل و بيرفع ايده بعلامه النصر 

تشجيعه ليا حفزنى و خلانى احاول و احاول لحد ما وصلت له ...بس بعد ما الكل سبقنى فعلا 

اخد منى العصايه و ملقتوش قدامى ...سرعه رهيبه زى السهم المنطلق 

بقيت واقفه مذهوله لدرجة أنه سبق الجميع و خلانا اخدنا المركز الاول 

وقفت مبهوره باللى عمله ده لانه يعتبر معجزه ...ايه القوه دى كلها ؟؟ مين الشخص الغريب ده ؟؟ 

مرضتش اساله مره تانيه ليكسفنى و ميرضاش يرد عليا 

و جت المسابقه التالته و المسابقه دى كانت فيها مخاطره شويه 

كانت عباره عن ربط أحد المتسابقين فوق قمة الجبل و المطلوب من الشريك أنه يصعد الجبل و يفك شريكه و يحمله على ضهره و ينزل بيه و اول حد يوصل يكون هو الفايز

و طبعا لما قالوا مين هيطلع و يتربط هو شاور لى انى اطلع و فعلا مكنش ينفع غير كدا لانى مش سريعه و لا هقدر اشيله و انزل بيه الجبل

طلعنا الجبل و أيدوا اديا و رجليا و ربطوا راس القطه اللى لابساها كمان بوشاح علشان مخافش و شريكى منزلنى من الجبل

بعد دقائق و انا قاعده على اعصابى لقيته وصل لى و مد ايده قطع الحبال اللى مقيده رجلى و ايدى و ساب الوشاح المغمي عينى 

قبل ما ينزل بيا مسك ايدى ماسكه جامده زى ما يكون بيقولى متخافيش 

و راح حاططنى على ضهره و نزل فى دقيقتين من الجبل 

و فزنا للمره التالته بالمسابقه 

كان عندى فضول رهيب انى اشوف مين اللى عنده القوه الخارقه دى و كنت حاسه انى مش قدام جنى عادى 

لما المسابقات خلصت و أعلنوا انى انا و شريكى الفائزين ادولنا الهديه و كانت رحله يوم بليله فى البحر مع الاستمتاع بالغطس فى القاع و زيارة متحف الاحياء المائيه الموجود تحت الميه 

استلمت الهديه و كنت فرحانه اوى لأن الرحله دى مش اى حد يوصلها 

متشكره اوى ليك احنا فوزنا بسببك و لولاك مكناش فوزنا ابدا 

شريكى هز دماغه بحركه معناها تحت امرك

 

هو انت مبتردش عليا ليه ؟؟ 

انا من حقى اعرف شكل الشريك اللى همضى معاه يوم بليله و انزل معاه تحت الميه كمان 

انا هخلع القناع و انت كمان 

و خلعت القناع ....انا لورا اهلا و سهلا 

شريكى تردد شويه و رفع قناعه و قال

و انا ......

يتبع

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..

#تلا 

#الجزء_الثانى_عشر

و خلعت القناع ....انا لورا اهلا و سهلا 

شريكى تردد شويه و رفع قناعه و قال

و انا عقيل اظن اتعرفنا قبل كدا ؟؟ 

ايه دا ؟؟ هو انت ؟؟؟

ايوه انا 

و مردتش عليا ليه لما سألتك ؟؟ 

كنت خايف تنسحبى من المسابقه لو عرفتى انى انا اللى خبطت فيكى قبل كدا 

و انسحب ليه ؟؟ 

كنت فاكر انك اتضايقتى منى 

لا ابدا و لا اتضايقت و لا حاجه انت خبطت الكرسي و اعتذرت ..هزعل منك ليه بقا ؟

يمكن عشان كنت متطفل و حبيت اقعد ادردش معاكى ؟؟ 

لا مزعلتش و لا حاجه متخافش 

طيب الحمد لله ...احنا هنروح رحلة البحر سوا 

ايوه ...الرحله دى حلمت بيها من زمان اوى 

اشمعنى 

اصلى كنت اسمع أن فى اوضه من اوض المتحف فيها عجوز من الجن بقالها آلاف السنين ...العجوز دى لو سألتها عن اى حاجه ممكن تدلك 

ساحره يعنى ؟؟ 

لا مش ساحره بس عندها علم و حكمه ربنا مدهالها

طب و انتى عاوزاه تسألى العجوز فى ايه؟ 

عاوزه اسألها عن حاجات كتير 

زى ايه يعنى ؟؟ 

لا بقولك ايه انا مبحبش الفضول ده ...انت لازم تفهم طبعى من الاول علشان منختلفش 

اسف ...مش قصدى بس كنت عاوز افهم

 

هو انت عمال تتأسف كل ما اكلمك كدا ليه ؟؟ 

مش عاوز تزعلى منى 

و هو انت تعرفنى ؟؟ 

 صحيح انا مشوفتكيش قبل كدا بس حاسس انى اعرفك أو أننا اتقابلنا فى حياه تانيه 

 ‏

 ‏ايه الكلام الغريب اللى بتقوله ده ؟؟ 

 ‏

 ‏انتى متعرفيش أن فى حاجه اسمها تناسخ الأرواح ؟؟ 

 ‏

 ‏لا معرفش 

 ‏

 ‏طب مبتؤمنيش بالاشارات ؟؟ 

 ‏

 ‏اشارات ايه مش فاهمه ؟؟ 

 ‏

 ‏يعنى اى حاجه بتحصل لنا فى حياتنا مبتكنش عبث أو مجرد صدفه ...دى كلها إشارات أو علامات ربنا بيدهلنا و المفروض ناخد بالنا منها كويس 

 ‏

 ‏لا برده مش فاهمه ...قصدك ايه ؟؟ 

 ‏

 ‏ايه اللى خلانى اخبط فى الكرسي بتاعك دونا عن كل اللى موجودين هنا ؟؟ 

 ‏

 ‏صدفه ...مجرد صدفه الا اذا كنت قاصد 

 ‏

 ‏لا ابدا مقصدتش و بعدين انتى كنتى مغطيه وشك و انا معرفش مين اللى نايمه دى .....طب بلاش المثال ده 

 ‏ايه اللى خلى منظم المسابقات اختار ارقامنا سوا ؟؟ 

 ‏

 ‏صدفه برده 

 ‏

 ‏منا عارف انها صدفه السؤال هنا ليه حصلت الصدفه دى ؟؟ 

 ‏

 ‏معرفش 

 ‏

 ‏و لا انا اعرف بس اكيد الايام هتعرفنا ليه حصلت الصدفه دى 

 ‏

 ‏كلامك جميل و عقلك كبير  دا غير قوتك البدنيه كمان 

 ‏

 ‏طبعا مش بيقولوا  العقل السليم في الجسم السليم

               🌷🌷🌷

 ‏بيشاورولنا عشان نروح نركب السفينه 

 ‏اتفضلى يا سيدتى 

 ‏

 ‏سيدتك ايه ؟؟ انا لورا و بس 

 ‏

 ‏اسف جدا 

 ‏

 ‏تاااانى ؟؟

 ‏

 ‏و طلعت السفينه انا و عقيل و كنت متحمسه جدا 

 ‏

 ‏طبعا ممكن يكون بيدور فى دماغكم سؤال امال فين والدتك من كل الاحداث دى ؟؟ 

 ‏بصوا انا هريحكم ...نظام جبل البنفسج أن كل واحد بيروح فى طريق و الجبل كبير جدا و انشطته كتيره اوى ممكن ماما تكون فى رحله تانيه دلوقتى أو بتتنزه على شط الميه 

 ‏فى نهايه الرحله و احنا خارجين بنتقابل مره تانيه و نروح سوا ...خلاص فهمتوا ؟

            🌷🌷🌷🌷🌷

 ‏لما طلعت مع عقيل السفينه لاحظت أدبه الشديد و تربيته الراقيه جدا 

 ‏كان ميقعدش الا اما يقعدنى بمنتهى الاحترام ..طول الوقت لطيف جدا و محاولش يضايقنى أو يسألنى اى سؤال تانى 

 ‏بالعكس بقا انا اللى كان عندى فضول شديد اعرف مين ده ؟؟ و ايه حكايته و هل هو جاى الجبل علشان ينسي ذكرى مؤلمه حصلت له ؟؟ و الا مجرد فسحه 

 ‏كل الكلام ده كان بيدور فى عقلى و انا و هو واقفين على حرف السفينه و بنتفرج على الموج اللى عمال يخبط فى بعضه 

 ‏لما خلصت تفكير و بصيت له علشان أقوله انى تعبت من الوقفه لقيته بيبتسم لى زى ما يكون قرأ افكارى 

 ‏فى بعض الجن مننا بيتميز بالميزه دى ...معرفش عقيل منهم و الا لا ..بس وشه كان باين عليه أنه عارف انا بفكر فى ايه بدليل انى لقيته بيقولى تعالى اقعدى على الكرسي ده انتى شكلك تعبانه 

 ‏بصيت له كدا و انا عاوزه اساله هو انت بتقرا الأفكار ؟؟ 

 ‏

 ‏لقيته ابتسم و هز راسه و سابنى و راح يجيب لنا مشروب فواكه البحر 

 ‏معرفش ازاى اعجبت بشخصية عقيل و حسيت زى ما قالى انى اعرفه قبل كدا مع انى عمرى ما شفته 

 ‏طب و فارس يا تلا ؟؟؟ نسيتى فارس حبيبك ؟؟ 

 ‏لا منستوش انا معجبه بشخصيه و قوه عقيل الهايله مش اكتر من كدا 

 ‏تعالى يا لورا لما اوريكى جبل الامنيات 

 ‏

 ‏جبل الامنيات ؟؟ فين ده ؟؟ 

 ‏

 ‏اهو ...المنور هناك ده 

 ‏

 ‏الله ...دا طالع منه الوان مختلفه ازرق و احمر و بنفسجى و اخضر و اصفر و برتقالى

 ‏

 ‏عارفه أن الألوان ذاتيه ؟؟ 

 ‏

ذاتيه ‏يعنى ايه  ؟؟ 

 ‏يعنى مش مصابيح ...الجبل ده بيشع الالوان دى بنفسه

 ‏

 ‏ازاى كدا ؟؟

 ‏

 ‏سمعت من جدتى أن دى امنيات الجن اللى بيقفوا عليه و بيطلبوها من ربنا 

 ‏

 ‏الله ....طب و ليه الامنيات الوانها مختلف ؟ 

 ‏

 ‏لان لكل واحد امنيه بتختلف عن التانى 

 ‏فى منهم اللى بيتمنى يتجوز واحده معينه و فى منهم اللى بيتمنى أنه ينسي واحده معينه ...فى منهم اللى بيدعى أن ربنا يديله اطفال وفى اللى بيتمنى الكنوز 

 ‏

 ‏اااه فهمت ...طب هما مش هينزلونا على الجبل ده ؟؟ 

 ‏

 ‏هينزلونا ....أنا سألت الربان و قالى و احنا مروحين هينزلونا عليه 

 ‏

 ‏كويس جدا ...لانى عندى امنيه نفسي أتمناها عليه 

 ‏

 ‏و انا كمان يا لورا عندى امنيه نفسي أتمناها عليه 

 ‏

 ‏بعد دقايق جت جنيه و قالت لنا العشا جاهز 

 ‏رحنا قعدنا على تربيزه طويله مرصوص عليها شموع وورود و الاكل أصناف و الوان 

 ‏شكل التربيزه بالاكل اللى عليها تحفه فنيه 

 ‏بعد العشا الموسيقى عزفت و صوت الكمان كان ساحر يأسر القلوب

 ‏عقيل طلبنى للرقص ...لما قبلت و اول ما طلعنا على المسرح لقيت هدومنا اتغيرت 

 ‏و لقيت نفسي لابسه فستان منفوش من البنفسج و على راسي تاج من زهر البنفسج و جزمه بكعب عالى على شكل زهرة بنفسج ... و عقيل كان لابس بدله انيقه جدا وفى جيبه زهرة بنفسج 

 ‏

 ‏كل ده كنت شايفاه فى المرايات اللى حواليا و اللى ماليه المكان 

 ‏عقيل اخد ايدى بمنتهى الرقهو انحنى و باسها ..اتحرجت جدا لما عمل كدا 

 ‏بعدهاحطيت ايدى على كتفه و هو حط ايده على ضهرى و بدأنا في الرقص

 ‏

 ‏الموسيقى كانت بتعزف و انا حاسه انى طايره فى السما ...مش حاسه برجليا على الأرض ...حاسه انى فى حلم جميل اتمنيت أنه ميخلصش 

 ‏الغريب انى مكنتش مكسوفه أو خايفه من عقيل و انا تقريبا نايمه فى حضنه ...زى ما يكون الشخص ده من دمى 

 ‏رقصنا وقت طويل و كل ما الموسيقى تخلص تبدأ قطعه جديده ادوب انا معاها 

 ‏النهار كان قرب يطلع و فجاه حسيت انى مبقتش قادره اقف حرفيا 

 ‏عقيل ابتسم لى و أنهى الرقصه ببوسه لطيفه لايدى مره تانيه 

 ‏

 ‏روحنا كل واحد على اوضته اللى محضرينهاله اترميت على السرير و انا فى منتهى السعادة و منتهى التعب 😍

يتبع

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..

#تلا 

#الجزء_الثالث_عشر

روحنا كل واحد على اوضته اللى محضرينهاله اترميت على السرير و انا فى منتهى السعادة و منتهى التعب 😍

بعد حوالى ساعتين لقيت إحدى الجنيات بتصحينى و بتقولى يلا عشان تلحقى اليوم من أوله 

و بالرغم انى منمتش الا ساعتين بس الا انى كنت حاسه بحماس و نشاط كبير اوى 

غيرت هدومى  و لبست فستان ابيض بلون الفل اكمامه و ديله مزركشين  بزهور البنفسج الجميله

خرجت لقيت عقيل مستنينى اخدنى من ايدى و طلعنا على ضهر المركب 

و لقيتهم محضرين لنا الفطار انا و عقيل تحت اشعه الشمس الممتعه 

بعد ما خلصنا الفطار جالنا ربان السفينة و رحب بينا 

اهلا بيكم على متن سفينه الاحلام ...معاكم الربان عاصم 

اهلا بيك 

اتشرفنا بوجودكم على متن السفينه 

الشرف لينا احنا

انا جاى اقولكم على برنامج الرحله انهارده و أرجوا انكم تستمتعوا معانا 

اتفضل 

اليوم  بتاعكم بدأ بالفطار بعد كدا

الخطوه اللى بعد كدا  هتتوجهوا لاوضكم هتلاقوا بدل الغوص تلبسوها و تقابلوا كابتن الغوص الغواص سامر  و اللى هياخدكم ويغطس بيكم تحت الميه و هناك هتزوروا متحف الاحياء المائيه و تستمتعوا بأكتر سمك نادر فى الكوكب ...و اللى مفيش زيه فى اى حته تانيه

كنت عاوزه اسال من فضلك على حاجه ؟

اتفضلى 

هو صحيح فى المتحف ده عجوز حكيم موجوده من آلاف السنين ؟

ايوا العجوز تريمون ام الحكمه فى عالم الجن 

طيب هل ينفع اتواصل معاها ؟؟

لا السؤال دا انا مقدرش انفعك و اقول إجابته 

و ليه بقا ؟؟ 

لان الحكيمه تريمون بتقابل اللى عاوزاه  و بترد على اللى عاوزه ترد عليه و بس ...

يعنى ممكن مترضاش تقابلنى أو تكلمنى   ؟؟ 

طبعا ...هى عندها الحريه الكامله و لو فى حاجه تقوليهالك تأكدى انها مش هتتأخر عليكى

 

فهمت ...اشكرك 

عفوا ....بعد زياره المتحف هتخرجوا من الميه و تطلعوا تتغدوا و ترتاحوا ساعه 

هنكون ساعتها وصلنا لجبل الامنيات 

هننزل فى الجبل و نقعد فيه مقدار ساعه

بعد كدا هنرجع للسفينه و نبحر للشط و بكدا تكون رحلتنا انتهت ...اى استفسار او سؤال تحبوا تسألوه ؟؟؟

متشكرين جدا يا كابتن عاصم 

العفو ....بعد اذنكم 

اتفضل 

بعد ما انصرف الكابتن رحنا اوضنا و لبسنا بدل الغوص 

وصلنا للكابتن سامر اللى رحب بينا و ادالنا التعليمات و بعدها لبسنا أنابيب الأكسجين و اللى كانت تقيله جدا عليا 

الكابتن طمنى انى لما انزل الميه مش هحس بالتقل ده 

و نزلنا الميه انا و عقيل و سامر 

و لقيت نفسي بغوص بخفه و مش حاسه فعلا بانبوبه الأكسجين 

شفنا تحت عالم ساحر ...اول مره اعرف ان البحر فى أماكن مضيئه بذاتها تحت الميه

اسماك اشكال و الوان عمرى ما شفت زيها

 

و احنا فى الميه قابلنا سرب من الدلافين الودوده جدا و اللى كانت بتلعب معايا انا و عقيل و شالتنى على ضهرها 

كنت خايفه اوى بس مش مبطله ضحك خصوصا لما لقيت عقيل بيعوم ورا الدولفين اللى شايلنى بمنتهى القوة زى ما يكون خايف الدولفين يخطفنى و يهرب 

خلصت رحلتى مع الدولفين و انا مش قادره اقولكم حاسه بايه ...زى ما يكون رجعت طفله صغيره فى مدينه ملاهى 

نزلت من على ضهر الدولفين و لمحت فى عين عقيل القلق ...و مش عارفه ليه حسيت بفرحه جوه نفسي مش قادره افسرها 

دخلنا المتحف و على الباب خلعنا الأنابيب لأن المكان جوه فيه هوا عادى معرفش ازاى 

مشيت جنب عقيل و هو ساكت تماما مبينطقش

 

مالك ساكت ليه ؟؟ 

لا عادى 

خايف ؟؟ 

و هخاف من ايه ؟؟ 

معرفش بس شفت الخوف فى عينيك 

انا ؟؟ ابدا 

متنكرش 

لا بس المفروض تخافى على نفسك اكتر من كدا 

و هو انا عملت ايه ؟؟ 

انتى عارفه انك كدا عرضتى نفسك للخطر لما الدولفين حملك على ضهره

لا مكنتش اعرف 

خلاص يا لورا انا اسف 

اسف على ايه ؟؟ مش قلنا بلاش تتأسف على الفاضى و المليان ...بتبص لى كدا ليه ؟

انا مش هتكلم خالص عشان ترتاحى 

ههههههههه احسن برده 

دخلنا المتحف و اللى كان عباره عن حجرات كتير جدا و كل اوضه فيها مجموعه نادره من الأسماك كان الدليل بيوصفهالنا و يقولنا اسمها و عمرها و جنسها و انا دا كله مش مركزه معاه و بنتظر بفارغ الصبر انى اوصل لاوضة العجوز تريمون 

يا ترى لو سألتها هترد عليا و الا لا ؟؟ يارب ترد ..انا محتاجه حكمتها اوى و اللى اعرفه عنها أن كلامها لا يخطئ 

الغريبه بقا أننا طول ما احنا بنلف بين الحجرات عقيل منطقش بكلمه واحده و زى ما يكون زعل منى مع انى كنت بهزر معاه 

لحد ما وصلنا لحجرة العجوز تريمون 

و هنا سألنا الدليل لو حابين ندخلها و الا لا ؟؟؟

رديت و قلت طبعا ...دا انا جايه الرحله دى عشانها 

الدليل بص لعقيل و انت ؟؟ 

عقيل هز له رأسه و قاله ايوه هدخل

الدليل قال بس كل واحد يدخل بمفرده و الوقت هى اللى بتحدده ... هدخل استاذنها فى دخولكم 

انا عاوزه ادخل الاول 

انتظرى هنا لما اديها خبر

حاضر مستنين على احر من الجمر ...

بصيت لعقيل بعد ما دخل الدليل و قلت له

مالك بتبص لى كدا ليه؟؟ و من اول ما دخلنا المكان منطقتش بكلمه ليه ؟؟ 

مش دى رغبتك ؟؟ انا بنفذ أوامرك 

هو انت زعلت منى ؟؟ انا كنت بهزر معاك 

ممكن اسالك ليه انتى ملهوفه كدا على مقابله العجوز ؟؟ 

بص مع انى مبحبش حد يتدخل فى خصوصياتى بس عندى سؤال مهم هيتوقف عليه مصيرى نفسي أسأله للعجوز و اعرف إجابته عشان ارتاح 

و انتى مش عارفه اجابه السؤال ده ؟؟ 

انا محتاره 

لو بصيتى جوه نفسك هتعرفى اجابه سؤالك ..انتى ادرى الناس بحالك 

اممم و كمان فيلسوف ؟؟ و انت بقا عاوز تدخل للعجوز ليه ؟؟ 

عاوز اسالها انا كمان سؤال مصيري 

ههههههههه طب ما تبص جوه نفسك زى ما انت لسه ناصحنى 

ههههههههه تصدقى عندك حق ...خلاص انا مش عاوز ادخل ...ادخلى انتى و انا هستناكى هنا 

                🌷🌷🌷🌷🌷

السيد عقيل 

نعم 

العجوز طالبه تشوفك انت الاول 

بس انا رجعت فى كلامى ...خلى لورا هى اللى تقابلها 

مينفعش ..العجوز طلبتك انت و بعدين السيده لورا 

وقفت مستغربه 

ليه العجوز طلبت عقيل مع انى انا اللى طلبت الدخول عليها الاول ؟؟ 

دخل عقيل و انا مستنيه على احر من الجمر و بقيت مش قادره اقعد على كرسي الانتظار

و مفيش خمس دقايق و لقيته طالع وهو بيضحك 

ايه ؟ العجوز جاوبتك على سؤالك ؟؟ 

ايوه جاوبتنى 

قالت لك ايه ؟؟ 

قالت لى ...

اتفضلى ادخلى يا سيده لورا 

رجعالك يا عقيل عشان اعرف تريمون قالت لك ايه ؟؟؟

اول ما دخلت الحجره  على العجوز لقيت ....

يتبع

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..

#تلا 

#الجزء_الرابع_عشر

اتفضلى ادخلى يا سيده لورا 

رجعالك يا عقيل عشان اعرف تريمون قالت لك ايه ؟؟؟

اول ما دخلت الحجره  على العجوز لقيت ست عجوزه جدا ...وشها كله تجاعيد كبيره عامله زى الاخاديد المحفوره بدقه جوه جلدها   لكن بوجه باسم و بشوش

اول ما دخلت عليها قالت بصوت واطى 

تعالى يا تلا 

انتى عارفانى ؟؟

 

هنا مفيش اسماء مستعاره...تعالى يا تلا اقعدى جنبى هنا 

حاضر 

ليه محتاره ؟؟ و انتى قدامك الحقيقه واضحه وضوح الشمس ؟؟ 

انا متلخبطه ..كنت فاكره أن احاسيسى اتحركت ناحيه ال ...

الانسي ؟؟؟ صح ؟ 

ايوه صح ...اول مره قلبى يتحرك و احس ناحية حد بالعاطفه دى 

و ان قلت لك أن اللى انتى حاساه و عايشه فيه ده احساس مزيف تقولى ايه ؟؟ 

اقول مش معقول ... مش ممكن اكون بتوهم دا كله ؟؟ 

انتى يا تلا قلبك رقيق و مليان شفقه ، عالم الانس بالنسبالك كان عالم سحرى لانك كنتى بعيده عنه و لا تنتمى له 

لما قابلتى فارس كان فى أضعف حالاته ، قلبك الرحيم أشفق عليه و ساعده 

لازم تفرقى بين الشفقه و الحب يا تلا 

و ازاى افرق بينهم ؟؟ 

أسألى قلبك ...الحب مش مجرد احساس بنحسه أو بنشعر بيه ...الحب مفرداته كتير اوى زى الالفه ، الانس ، الموده ، الراحه النفسيه

كل ده حسيته مع فارس 

لا ...احساسك مكنش حب على اد ما هو شفقه 

ليه متأكده كدا ؟؟ 

بدليل إعجابك بغيره 

لا ...انا مش معجبه بيه اعجاب حب دا ....

متكدبيش ...اللى بيحب حد مبيشوفش غيره ...حتى لو قدامه اجمل شخص فى الكون

افهمينى ...الحكايه انى...

افهمى انتى يا بنتى و اسمع منى خلاصة الكلام ...الارتباط بشخص لازم يكون على أساس ...ساعات الحب وحده ميكفيش 

لازم لما نيجى نختار نختار المناسب لينا 

مينفعش اختار اختيار غلط و ارجع اندم عليه ...لازم تختارى السند اللى يحبك و يطبطب على قلبك ، اللى يفهمك من نظرة عينك و يحس بيكى ، اللى يفضلك عن نفسه ...فرحك يبقى فرحه و حزنك يبقى حزنه ....الحب اللى قدامه تذلل كل الصعاب

منا بتكلم عن الحب اللى بتقولى عليه ده 

هو فين ده ؟ شاوريلى عليه ...الحب اللى بتكلم عليه بيكون متبادل

قصدك ايه ؟؟  حبى من طرف واحد ؟؟فارس مبيحبنيش ؟؟ 

مش عاوزه اصدمك يا تلا ...انتى قلبك جميل و اخاف عليه

لا قوليلى الحقيقه من فضلك 

مصممه انك تعرفى الحقيقه ؟

ايوه ..من فضلك 

انا هخليكى تشوفى بنفسك ..بصى فى البلوره السحريه دى 

ايه دا ؟؟ دا فارس ...هو قاعد ،،؟؟.... هو ..لا لا 

أهدى يا تلا ...ايوه اللى شايفاه صحيح .. 

دى خطوبة فارس على ناهد بنت خالته 

ازاى يخطبها ؟؟ طب مفتكرش نور ؟؟ مفتكرش عبدالله ؟؟ 

الانسان يا بنتى اتسمى انسان لانه بينسي ، و انتى بقالك هنا اكتر من يومين و دول فى عالم الانس بيتعدوا شهور ...

بس ازاى ؟؟ انا شفت حبه لنور بعنيا 

طب و هل نور هى انتى يا تلا ؟ 

ايوا ..امال نور مين ؟؟ 

نور شكل انتى اتمثلتى فيه ، فارس حتى ميعرفش شكلك الحقيقى و لا اسمك الحقيقى ..فارس ميعرفش عنك اى شئ 

بس اكيد اللى فى قلبى وصله 

بس انتى خدعتيه و اديتى لنفسك الحق فى انك تدخلى حياته و تتعاملى معاه بشخصيات مختلفه 

انا كنت بساعده ...بس هو ازاى يفكر بالسرعه دى فى واحده غيري ؟؟ 

ااااه يا بنتى ...للاسف فى منكم كتير و يمكن علشان حداثة سنكم بيتخيل أن اى نظره أو كلمه هى نظرة حب و اعجاب زى اللى حصل لروفان ......روفان صدقت نفسها و افتكرت أن الانسي بيحبها و لما اتصدمت ماتت من قهرتها و انا مش عاوزه اللى حصل لروفان يحصلك 

بعد ايه ؟؟؟ ما خلاص 

لا مش خلاص لسه نصيبك جاى ...ساعات الحقيقه بتبقى بين ادينا و ظاهره لينا ظهور الشمس و احنا بنتغافل عنها

طب انا عاوزه اعرف هو نسى عبدالله كمان ؟؟ 

فارس رجع لعبدالله لكن لا لقاه و لا لقى نور ...فضل مستنى ايام و ايام و سأل عليكم فى كل مكان لكن محدش وصله

رجع لخالته و زوج خالته و ابتدأ شغله معاهم يزيد و حبه لناهد  و ارتباطه بيها يزيد معاه  و دا بحكم أنه كان محروم من الجو الأسرى و محسش بيه الا وسطيهم .

و اليوم كانت خطوبتهم و قريبا هيتجوزوا 

سمعت الكلام من تريمون و كنت حاسه انى هفقد وعيى ...مش قادره اصدق أن ده يحصل 

ممكن تساعدينى ؟؟ 

عاوزه تنسيه صح ؟؟ 

عاوزه انسي البشر كلهم ...مش عاوزه افتكر منهم حد 

لا غلط ...مش عاوزاكى تكونى متسرعه و تحكمى على الأمور من موقف واحد اتعرضتى له ...و بعدين انتى محكوم عليكى بمساعدتهم 

انا ؟؟؟  اساعدهم ؟؟؟

ايوه انتى ....انتى طاقه النور يا تلا ...انتى الخير و ربنا هيرزقك باللى يعينك على فعل الخير 

طب عاوزه انسي ذكرى حبى ليه أو على الأقل محسش باللى انا حاساه من الم دلوقتى 

بسيطه انتى قدامك جبل الامنيات تقدرى تتمنى اللى انتى عاوزاه عليه 

ايوه صحيح ...عندك حق 

قومى يا تلا علشان روحى و افتكرى كلمتى 

      (نصيبك بين اديكى يا طاقه النور)

      ‏

خرجت من عند العجوز و انا ساكته تماما 

قابلنى عقيل على الباب و شافنى ساكته

اخد ايدى و طبطب عليها زى ما يكون حس باللى جوايا 

عدنا للمركب بعد ما لبسنا بدل الغوص 

بعدها شفت جبل الامنيات من بعيد و شفت الانوار اللى طالعه منه ...حسيت أن قلبى بيرفرف كل ما كنا نقرب منه 

لحد ما وصلنا 

عقيل وقف فى جنب و دعا و هو رافع كفه و بيبتسم 

و انا كمان رفعت كفى و دعيت ...

يا رب ازل اى الم بصدرى ...يا رب أسعده ...يارب ارزقنى بمن احبه و يحبنى ...يارب استعملنى و اجعلنى طاقه نور كما اخبرتنى العجوز تريمون

خلصت دعايا و اول ما خلصته حسيت أن قلبى ارتاح جدا و مبقتش شاعره بالألم اللى كنت حاساه 

رجعنا المركب و حسيت أن نظرتى لعقيل اتغيرت اوى ...مش عارفه ليه حسيت أنه بقى اقرب 

بس قلت لنفسي انا خلاص هغادر و مش هشوفه تانى و لا حتى اعرف اسمه الحقيقى و لا هو كمان يعرف أسمى الحقيقى ...متعلقيش نفسك يا تلا 

رجعنا لجبل البنفسج و انتهت الرحله 

نزلت من المركب 

عقيل انحنى على أيدى و قبلها قبله لطيفه و قالى كنت سعيد اوى ياليومين اللى قضناهم سوا و كان نفسي يمتدوا اكتر من كدا

و انا كمان يا عقيل 

رجعت الفندق بعد ما خلاص خلصت الرحله اللى كانت زى الحلم 

انتهت التلاته ايام و جه وقت الرجوع 

قابلت امى و كنت حاسه انها وحشتنى اوى 

اترميت فى حضنها و كانت مستغربه 

رجعنا المملكه و مبقاش فى قلبى غير ذكرى عقيل ...بقيت ائنب نفسي انى مسألتوش هو مين أو عرفت عنه اى شئ 

فى اليوم التالى خرجت اتنزه فى حديقه القصر و لقيت ميمون هالل عليه 

تلا ...تلا 

عاوز ايه يا ميمون ؟؟ 

صحيح الأمير المتقدم لك جاى بعد بكرا ؟؟ 

معرفش ...و بعدين دا يخصك فى ايه ؟؟ 

انا بحبك يا تلا ...ليه مبتحبنيش ؟؟ 

يا ميمون انا عمرى ما شفتك زوج ليا ...مش عارفه انت مش عاوز تفهم ليه 

بقا كدا يا تلا ...ماشي ..انا مش هيأس برده و هتكونى ليا فى الاخر و بكرا تشوفى 

   

يتبع

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..

#تلا 

#الجزء_الخامس_عشر

بقا كدا يا تلا ...ماشي ..انا مش هيأس برده و هتكونى ليا فى الاخر و بكرا تشوفى 

ميمون انصرف و انا بضحك عليه ..طول عمره تافه و عبيط و عامل زى الاطفال تهديده ملوش اى لازمه 

على طول يقول كلام هو مش اده و فى الاخر يقعد يعيط زى العيال 

بس دا بيقول بعد بكرا ؟؟ معقول الكلام ده صحيح ؟ 

انا لازم اسال سلافه 

يا سلافه ..يا سلافه 

نعم يا اميره 

هو صحيح العريس اللى متقدم لى ده جاى بعد بكرا ؟؟ 

ايوه يا اميره و المملكه كلها بتستعد لقدومه من اليوم 

غريبه محدش ادانى خبر 

ازاى ؟؟ انتى تعرفى الميعاد من فتره 

مأخدتش بالى ..مفتكرتش ...كنت فاكره أن الميعاد لسه عليه شويه 

دخلت اوضتى و انا متنرفزه جدا ...مش قادره اتخيل انى اتجوز بالطريقه دى 

انا معرفش الأمير مارو ده و لا عمرى شفته 

انا مش عاوزه اتجوز من أصله 

انا لازم اروح لوالدى و اطلب منه يلغى الزياره دى ...لان الكلام مع امى ملوش فايده و مش هترضى تسمعنى من أصله

و رحت لوالدى دخلت عليه و هو مشغول بقراءه كتاب ( اسرار خبايا خفيه فى المملكه السحريه )

ممكن اخد من وقتك شويه يا والدى ؟؟

تعالى يا تلا ....اتفضلى 

انا ..انا مش عاوزه اقابل الامير مارو ...مش عاوزه اتجوز خالص ..مش عاوزه 

طب اهدى يا بنتى ...فى ايه مالك ؟؟ 

مفيش بس مش قادره اتخيل انى اتجوز حد معرفوش 

يعنى هو انتى فاكره أننا هنجوزه لكى فى نفس القاعده ؟؟ ما انتى لازم هتعرفيه 

لا يا والدى ارجوك ...مش عاوزه اشوفه لانى متاكده انى مش هتجوزه 

و ايه اللى خلاكى متأكده كدا ؟؟ 

مفيش ...دا مجرد احساس 

يكونش فى حد تانى ؟؟ 

لا ..انا ..لا مفيش اى حد 

طيب انا عاوز أسألك سؤال يا تلا 

اتفضل يا والدى

لو جالك ضيف هل تطرديه أو تقوليله ارجع مش هستقبلك فى بيتى ؟؟؟

لا طبعا مينفعش اعمل كدا

طب يبقى مينفعش دلوقتى نبعت للراجل و نقوله متجيش ...دى تبقى اهانه له ووحشه فى حقنا يا اميره 

عندك حق يا والدى 

و اوعدك يا ستى أنه لو معجبكيش مش هغصبك عليه ، و هسيبك براحتك خالص 

حاضر يا والدى 

خرجت من عند والدى و انا حاسه برجفه فى قلبى 

ليه اتلخبطتى لما والدك سألك فى حد تانى و الا لا ؟؟

و ليه جه فى ذهنك عقيل ؟؟؟ ليه مثلا مفتكرتيش فارس 

الغريب أن فارس اتمسح من دماغى كأنى مأعجبتش بيه فى يوم من الايام 

طب و عقيل ؟؟؟؟

انتى اتجننتى يا تلا ؟؟؟...هو انتى اصلا تعرفى عقيل ده يبقى مين ؟؟ ما يمكن يكون من العامه و ساعتها والدك عمره ما يوافق عليه 

و بعدين ازاى معجبه بيه و هو حتى متكلمش و لا يعرف انتى مين و لا حتى سألك عن شخصيتك الحقيقيه 

فوقى يا تلا ...انتى عايشه فى الاحلام ليه ؟

العجوز قالت لك نصيبك بين اديكى و انتى مش شايفاه ...ما يمكن قصدها على الأمير مارو و انا معرفش 

مش يمكن يعجبنى بصحيح و يكون هو ده اللى ربنا كاتبهولى 

انتى بتقولى ايه ؟؟ ازاى هتحبيه و تتجوزيه ؟؟ العجوز قالت لو حبيت حد مقدرش افكر فى حد غيره 

يووو ...انا متلغبطه و مقدميش الا انى استنى و اشوف هيحصل ايه 

مر اليومين فى تجهيزات مشفتهاش قبل كدا ...من تجهيز للقصر و تجهيز المدينه بأكملها 

و جه اليوم اللى مارو جاى فيه هو ووالده ووالدته عشان يخطبونى 

من تقاليدنا أن والدى ووالدتى يستقبلوا الأمير و والده ووالدته ... و بعد كدا يتقدم لهم واجب الضيافه و بعدها ادخل عليهم و انا فى كامل زينتى و اقابل العريس المتقدم لى ..اقعد معاه و اتكلم و بعدها نضايفهم تلات ليالى و فى اخر يوم بنديله الجواب يا بالرفض يا بالايجاب

اتفضلى يا مولاتى الفستان جاهز 

ايه دا يا سلافه جايبالى فستان اصفر كنارى ؟؟ 

ايوه يا مولاتى دا لونك المفضل 

و مين قالك انى عاوزه البس لونى المفضل 

امال ايه ؟؟ مش لازم تبقى فى اجمل صوره 

انا مش عاوزه اكون فى اجمل صوره ...هاتيلى فستان بنى أو اقولك اسود هاتيلى فستان اسود 

ميصحش يا اميره ..اسود ايه بس ؟؟ 

اسمعى الكلام زى ما بقولك هاتيلى الفستان الاسود 

مقدرش يا اميره ...والدتك ممكن تطردنى أو تسجنى و انتى مريضكيش اذيتى 

و ماما تطردك ليه ؟؟ اذا كانت دى رغبتى 

مولاتى ...ارجوكى متحرجنيش و متحرجيش والدك 

خلاص هاتى و امرى لله 

و لبست الفستان الاصفر و اللى كان تحفه ..فستان اصفر منفوش بتلبيسه واسعه  و عليه نقوش و مطرز بالالماس من فوق لتحت

بعد ما لبست الفستان دخل فريق التزيين علشان يزينونى رفضت و قلت لهم لا ..

سلافه بقت تتحايل عليا قلت لها لا يا سلافه و إن كان عاجبه 

جه الوقت انى أخرج للأمير مارو اصطفت الوصيفات على الجانبين و انا كنت ماشيه و كأنى رايحه اقابل الموت 

كنت حاسه ان كل خطوه بخطيها بتألمنى و بتجرح فى قلبى 

لحد ما وصلت و دخلت 

مكنتش قادره ابص و كان وشي فى الارض 

ناس كتير كانت قاعده و انا مش مميزه مين فيهم العريس 

فجأه و قبل ما اوصل قدامهم ظهر ميمون معرفش منين 

شدنى من ايدى و نادى باعلى صوت 

تلا دى بتاعتى انا ...مش هتقدر تاخدها  منى يا مارو 

حصل هرج و مرج ..و فجاه ميمون طلع من جيبه عصايه سحريه و شاور عليا بعد ما قال كلمه سحريه .. وحولنى عصفور صغير اخدنى فى ايده و شاور على نفسه بالعصايه و قال ابرا كدبرا...اختفاااااء

و اختفى بيا 

طبعا مش عاوزه اقولكم عن القلق اللى حصل و ازاى والدى قلب الدنيا على ميمون 

انا طبعا مبحبش ميمون بس كنت مبسوطه انى اتخلصت من الأمير مارو و قلت اكيد بعد اللى حصل هو نفسه مش هيكون عنده رغبه فى الزواج ...اما ميمون فأمره سهل و مش هيقدر يعمل لى اى شئ 

لكن كنت غلطانه ...لان اللى حصل بعد كدا لا كان على بال و لا  على خاطر 🙄

   

يتبع

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..

#تلا 

#الجزء_السادس_عشر

طبعا مش عاوزه اقولكم عن القلق اللى حصل و ازاى والدى قلب الدنيا على ميمون 

انا طبعا مبحبش ميمون بس كنت مبسوطه انى اتخلصت من الأمير مارو و قلت اكيد بعد اللى حصل هو نفسه مش هيكون عنده رغبه فى الزواج ...اما ميمون فأمره سهل و مش هيقدر يعمل لى اى شئ 

لكن كنت غلطانه ...لان اللى حصل بعد كدا لا كان على بال و لا  على خاطر 🙄

ميمون خطفنى و راح مكان مقطوع مكنتش اعرف أنه موجود فى المملكه من أصله 

مكان ضلمه بارد مخيف زى ما يكون تحت الارض

من اول ما دخلنا فيه حسيت احساس غريب اوى و كأنى مريضه أو قلبى عليل ...احساس جامد بعدم الراحه بس قلت اكيد عشان الضلمه اللى حواليا  

ميمون كان حاططنى فى قفص صغير جدا على اد حجمى بالظبط و مخبينى جوه جيبه 

اول ما وصلنا المكان الوحش ده راح مولع شعله  و علقها على الحيط و طلعنى من جيبه و حطنى على الأرض و قعد يعيط قدامى 

انتى اللى خلتينى اعمل فيكى كدا ...لو كنتى حبتينى زى ما حبيتك مكنتش افكر انى اعمل كدا ابدا ....انتى متعرفيش انتى بالنسبالى ايه ...انتى مش مجرد واحده بحبها انتى روحى ...حياتى كلها مش هقدر اعيش من غيرك لحظه واحده ...لو اتجوزتى غيرى انا هموت 

ميمون مسح دموعه و قام مسك القفص و بص لى 

قولتى ايه يا تلا؟؟ هتحنى عليا و تتجوزينى ؟؟ و الا برده هتركبى دماغك ؟؟ 

انا عملت اللى محدش يعمله عشان اعرف اجيبك هنا و احولك عصفور ...عارفه عملت ايه ؟؟؟ و الا ميهمكيش انك تعرفى ؟؟؟؟ هقولك انا لجأت لايه عشان تعرفى بس اد ايه انا بحبك  ؟؟ 

انا لجأت للساحر (كلهان) ...طبعا عارفاه و عارفه اد ايه هو شرير بس داهيه 

رحت له و طلبت انى اعمل اي حاجه فى سبيل انك متضعيش من ايدى ...و هو اللى ادانى العصايه دى بعد ما طلب منى اتنازله عن مئتين عام من عمرى ،

و ايه يعنى متين سنه فى سبيل انك تكونى معايا ؟؟؟ انا اصلا من غيرك مش هيكون ليا وجود فى الدنيا دى 

كنت بسمع كلام ميمون و بالرغم من غباءه اللى وصلنا للوضع الغريب اللى احنا فيه ده إلا أنه صعب عليا اوى 

الحب شعور راقى جميل لكن تصرفه غلط ، هو كان لازم يفهم أن الحب و الكره مش بادينا و المحظوظ اللى يحب حد بيحبه 

و بعدين يا ميمون ؟؟؟ انت عاوز منى ايه دلوقتى ؟؟

ايه دا ؟ انتى بتتكلمى ؟؟ انا كنت فاكر انك متقدريش تتكلمى و انتى على الوضع ده

ايوه بتكلم بس كنت عاوزه اعرف نهايه اللى بتعمله ده ايه ؟؟

 لسه بتسألى يا تلا ؟؟ انتى عارفه كويس انا عاوز ايه ؟ 

 ‏

 ‏انت مجنون ...و اللى عملته ده مش هيعدى بالساهل 

 ‏

 ‏متهددنيش ...انتى دلوقتى تحت امرى انا و فى مكان لا يمكن ابوكى يعثر عليكى فيه

 ‏

 اعقل يا ميمون و رجعنى لوالدى و اوعدك انى اتشفعلك عنده و اخليه يخفف عنك العقوبه 

 ‏

 ‏لا لا ...ما انا معملش دا كله و اخسر متين سنه من عمرى و فى الاخر تقولى اتعاقب 

 ‏

 ‏امال عاوز ايه ؟؟ 

 ‏

 ‏عاوزك تتجوزينى .. و لو حصل كدا كلنا هنكسب ... انا مش هتعاقب و هكون ضحيت بالسنين دى كلها فى سبيل حاجه تستاهل

 ‏

 ‏و انا هكسب ايه بقا ؟؟ 

 ‏

 ‏هتكسبي قلب يحبك و يخاف عليكى من الهوا الطاير 

 ‏

 ‏هو الحب بالعافيه ؟؟ 

 ‏

 ‏ايوا بالعافيه ...قلتى ايه ؟؟ 

 ‏

 ‏قلت لا و الف لأ 

 ‏

 ‏خلاص خليكى على وضعك ده ...كلهان قالى لو فضلتى 24 ساعه على الوضع ده مش هينفع ترجعى تلا مره تانيه ...و انتى حره بقا 

 ‏

 ‏و ماله مرجعش بس لا يمكن اكون لك ..

 ‏

 ‏اد كدا بتكرهينى يا تلا ؟؟ 

 ‏

 ‏انا بكره حمقك و غبائك و أفعالك المتسرعه و الغير محسوبه 

 ‏

 ‏بقا كدا؟؟ طيب يا تلا ...خليكى بقا مش انا غبى ؟؟؟ شوفى الغبى دا هتتحايلى عليه اد ايه لما ال24 ساعه يقربوا يخلصوا 

 ‏

 ‏عمرى ما اتحايل عليك انا الاميره تلا راسي دايما فى السما و لو حتى فيها موتى 

 ‏

 ‏ميمون حط القفص و قعد قدامه مثبت عنيه عليا يمكن احن أو ارق و أقوله موافقه 

 ‏فات اكتر من عشر ساعات و هو قاعد مبيتحركش 

 ‏

 ‏ايه يا تلا فكرتى ؟؟؟ 

 ‏

 ‏انت عارف رأيى كويس و مش هغيره 

 ‏

 ‏انتى عنيده كدا ليه ؟؟ 

 ‏

 ‏انا حره يا ميمون و متفتكرش انك هتغصب عليا باللى بتعمله ده 

 ‏

 ‏هنشوف يا تلا هنشوف 

 ‏

 ‏ميمون فضل قاعد قدامى لما مر اكتر من  عشر ساعات تانيه و بدأ يتحايل عليا 

 ‏

 ‏يلا يا تلا مش فاضل الا تلات ساعات بس و تفضلى طول عمرك على هيئة عصفور ...ارجوكى يا تلا متنشفيش دماغك و ارضى انى اكون زوجك 

 ‏

 ‏الكلام خلص خلاص يا ميمون ...انا اللى مكنتش اتخيل انك تعمل معايا كدا 

 ‏

 ‏عشان بحبك ...و أن مكنتيش ليا مش هتكونى لغيري 

 ‏

 ‏مش هكون لك و لا لغيرك ريح نفسك

 ‏

 ‏مرت ساعتين كمان و كل ما الوقت يمر ميمون يزيد اضطرابه و يهيج اكتر 

 ‏ميمون قام و مسك القفص اللى انا فيه و بدأ يهزه بعنف شديد ...انطقى بقا و قولى موافقه حرام عليكى ...انتى عارفه انى مقدرش أتراجع و أن جزاء اللى عملته ده القتل 

 ‏

 ‏انا قلت لك انى هتشفع لك و اخلى والدى يخفف عقوبتك 

 ‏

 ‏هيخففها ازاى يعنى ؟؟ هتحبس مئة عام ؟؟؟ و الا اتنفى فى جبل الاحزان ؟؟

 ‏

 ‏انت غلطت يا ميمون و لازم تتحمل غلطك 

 ‏

 ‏لا انا مش هشيل الشيله لوحدى ...لازم تشيليها معايا ...يا نعيش سوا يا نموت سوا 

 ‏

 ‏انت عمرك ما حبتنى ...اللى يحب حد عمره ما يفكر أنه يأذيه...انت عندك حب تملك و بس ...من و انت صغير دايما كنت تشبط فى اللى مش لك ...عندك عقده انك تقدر تاخد اى حاجه عاوزها بأى طريقه سواء كانت الطريقه دى شريفه أو لا ...انا ميشرفنيش انى اكون زوجتك و اسفه انك صعبت عليا للحظه انا فعلا كنت غلطانه 

 ‏

 ‏بقا كدا ؟؟؟؟ طب اسمعى بقا اللى مكنتش عاوز أقولهولك... ...انتى مش هتفضلى عصفور و تعيشي ....لانى ببساطه كدا ميت و كدا ميت ...و قبل ما ابوكى يعثر عليكى هكون خنقتك بأيدى و رميت نفسي من فوق الجبل هنا 

 ‏

 ‏احنا فى جبل ؟؟؟ مش تحت الارض ؟؟ 

 ‏

 ‏احنا فى اعلى نقطه فى جبل الآلام ...عارفاه طبعا و عارفه أن محدش بيقرب منه و عشان كدا و لا ابوكى و لا غيره هيفكر أنى مستخبى هنا 

 ‏

 ‏اه ...فهمت ليه المكان مظلم و كئيب ...و فهمت ليه حسيت بالألم من اول ما جبتنى هنا 

 ‏

 ‏مش اكتر من المى يا تلا صدقينى .. انا بحبك و محدش يقدر يخلصك من اللى انتى فيه ده إلا أنا 

 ‏

 ‏او انا 

 ‏

 ‏انت مين ؟؟ 

 ‏

 ‏انا قدرك و عملك الاسود اللى عملته فى الدنيا دى ....

يتبع

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..

#تلا 

#الجزء_السابع_عشر_والاخير

مش اكتر من المى يا تلا صدقينى .. انا بحبك و محدش يقدر يخلصك من اللى انتى فيه ده إلا أنا 

 ‏

 ‏او انا 

 ‏

 ‏انت مين ؟؟ 

 ‏

 ‏انا قدرك و عملك الاسود اللى عملته فى الدنيا دى ....

 ‏

عقيل انت جيت هنا ازاى ؟؟ 

مش وقته يا تلا 

انت بقا الشجيع اللى جاى تنقذها ؟؟ 

ايوا انا يا ميمون 

عقيل مسك ميمون من رقبته و رفعه بايده زى ما يكون رافع ريشه 

سبنى ...سبنى بقولك احسن ميحصلش لك طيب 

ورينى هتعمل ايه يا ميمون ؟؟ 

ميمون مد ايده بصعوبه و طلع العصايه السحريه اللى معاه و لسه هيوجهها ناحيه عقيل 

حاسب يا عقيل ....

عقيل انتبه لميمون و حاول ياخد منه العصايه لكن ميمون حب يبعدها عن ايده و حدفها على طول دراعه 

العصايه طارت و استقرت بين صخرتين فى مكان مرتفع جدا 

العصايه يا عقيل هى اللى هترجعنى لصورتى ...فاضل دقايق 

عقيل ساب ميمون و بدأ يتسلق الصخور لكن ميمون مسبوش و بدأ يشد فى رجليه و عقيل يزقه برجله ويبعده بأى طريقه 

لكن ميمون كان مصمم لدرجة أنه التقط جزع شجره كان مرمى على الأرض و بدأ يضرب بيه عقيل 

عقيل ملقاش حل إلا أنه يسكته و نزل و تقاتلوا سوا 

عقيل كان يضربه الضربه يطير من مكانه و  يرجع له مره تانيه زى الدبانه المثابره

كل ده كنت فهمه أنه بيحاول يأخر عقيل على اد ما يقدر علشان أفضل فى صوره عصفور و مينفعش اتجوز غيره 

الوقت يا عقيل ....الوقت 

عقيل بدأ يضرب فى ميمون بكل قوه علشان  بس يسكته و يلحق يتسلق و يجيب العصايه 

ميمون بقا وشه كله جروح و مع ذلك كان بيعافر و يعافر و يشد فى عقيل علشان ميطلعش و يجيب العصايه 

اخر ما عقيل زهق راح مديله ضربه قويه فى وشه...وقع على الأرض محطش منطق

عقيل ابتدأ يتسلق لحد ما وصل لمكان العصايه لكن للاسف العصايه كانت محشوره فى مكان ضيق جدا و ايده مش واصله له 

عقيل نزل بسرعه و فتح لى القفص و قالى 

اطلعى يا تلا زقى العصايه من الفتحه الضيقه بمنقارك 

طرت بسرعه و جه فى دماغى هو عرف اسمى الحقيقى منين ؟؟ و عرف منين انى مخطوفه اصلا ؟؟ مش وقته يا تلا ...انتى بتفكرى فى ايه دلوقتى ؟ 

طرت لحد ما وصلت للعصايه و بدأت بمنقار العصفور ازق فيها علشان ايد عقيل توصلها 

كانت محشوره و عقبال ما حركتها اخدت منى دقايق

و عقيل عمال يشجعنى و مادد ليا ايده 

يلا يا تلا ..بسرعه 

العصايه اتزحزحت و عقيل قدر يلمسها بايده 

عقيل اخد العصايه بسرعه و نزل و نزلت معاه 

عقيل وجه العصايه ليا و قال 

تلا ترجع للصوره الاصليه....ابرا كدبرا

و رجعت لصورتى الاصليه 

اشهد ان لا اله الا الله و اشهد ان محمدا رسول الله 

حمد الله على السلامه يا تلا 

الله يسلمك يا عقيل ...بس انت عرفت منين انى هنا و ازاى جيت هنا لوحدك ؟؟ و ....

هههههه بالراحه يا تلا انا هفهمك كل حاجه ...بس لما أيد ميمون الأول عقبال ما يحضر ابوكى و جنوده و يقبضوا عليه 

عقيل مسك العصايه و أمرها تقيد ميمون 

بعد دقايق لقيت والدى الملك أصفهان حضر فى المكان و معاه جنوده اللى قبضوا على ميمون 

فهمونى بقا الحكايه ...ايه جاب عقيل هنا ؟؟ و عرفت منين انى هنا يا والدى ؟؟ 

عقيل مين يا تلا ؟؟ 

عقيل ده 

قصدك الأمير مارو 

هو ده اسمك الحقيقى ؟؟ 

ايوا يا تلا دا أسمى 

يعنى ايه ؟؟ انت كنت متفق مع ماما انك تقابلنى فى جبل البنفسج ؟؟ 

لا ابدا دى مجرد صدفه ...ذهابى للجبل كان مجرد نزهه لكن لما شفتك حبيتك و اتمنيتك و كنت شاعر بالحزن لأن والدى خطب لى اميره من الجن الاحمر و اسمها تلا ....كنت ناوى ارجع لوالدى و أقوله انى خلاص لقيت اللى بحلم بيها و انى مش عاوز الاميره اللى خطبتهالى و اترجاه أنه يلغى الميعاد 

لكن لما دخلت للعجوز و سألتها عن حبى ليكى و هل هتكونى ليا قالت لى نصيبك بين اديك و هتاخد اللى قلبك مال ليها 

قلت لها بس والدى خطب لى غيرها

 ضحكت و قالت لى 

القدر عجيب يا ابنى و له تصاريف ...تخيل أن اللى انت ملت إليها هى هى اللى والدك خطبك ليها 

خرجت سعيد من عندها و الدنيا مش سيعانى و قررت انى مصارحكيش و قلت ادخل القصر من بابه 

ياااا ...دى حاجه و لا فى الخيال ...طب و عرفت ازاى انى فى جبل الآلام ؟؟ 

انتى يا تلا و انتى فى جبل البنفسج لاحظتى عليا انى بقرا أفكارك صح ؟ 

ايوا صح 

الحمد لله ربنا ادانى الموهبه دى و عرفت من ميمون و هو بيكلم نفسه و بيقول محدش هيفكر فى انى اخطفها لجبل الآلام و لا هيجى فى خيالهم 

و عشان كدا قلت لوالدك أنى هروح جبل الآلام و ابحث عنك و بالفعل جيت و دورت عليكى فى كل مكان لحد ما وصلت لكى و كنت متفق مع والدك ان غبت اكتر من عشرين ساعه يلحقنى على الجبل و الحمد لله لحقنا ....ها فهمتى بقا الحكايه ؟؟ 

ايوه فهمت ...و بشكرك اوى يا مارو 

بتشكرينى على ايه بس ؟؟؟ ...المهم انا عاوز اعرف رأيك ؟؟

فى ايه ؟؟ 

تتجوزينى و الا مش موافقه ؟؟ 

طبعا موافقه ...انت نصيبي اللى بين أديا اللى دلتنى عليه العجوز 

                💕💕💕💕💕

                ‏

و تزوجت الأمير مارو ابن الملك بشنان ملك ملوك الجان و عملى فرح كبير استمر أربعين ليله و ليله و لبست فستان ملبستوش بنت من بنات الجان 

اما ميمون فاتحكم عليه بالاعدام و ده حكم  مجلس حكماء الجان 

لما اتجوزت مارو بقيت اسعد مخلوق فى الدنيا ...مارو مش بس شهم و شجاع لا ..و محب للخير كمان 

مارو كان له نشاط محدش يعرف عنه شئ و هو مساعده الانس و الجان ...كان بيجوب البلاد و يحاول يساعد المحتاج ...و لما كشفت له سري و قلت له انى رحت لعالم الانس اعترفلى هو كمان بسره و اتفقنا أن ده يكون سرنا الصغير و أننا نستمر فى مساعده اى انسان او جان  يحتاج مساعدتنا .

تمت 

            🌷🌷🌷🌷🌷🌷

انا عاوزه اقول كلمه ...الخير موجود فى كل مكان ...موجود فى الانس و الجان ...

اعمل الخير و متستناش مقابل لان اللى هيجازيك هو رب العالمين 

و قد قال رسول الله صلى الله عليه وسلم : (أحب الناس إلى الله أنفعهم للناس وأحب الأعمال إلى الله سرور تدخله على مسلم أو تكشف عنه كربة أو تقضي عنه دينا أو تطرد عنه جوعا ولأن أمشي مع أخي المسلم في حاجة أحب إلى من أن أعتكف فى هذا المسجد شهرا ومن كف غضبه ستر الله عورته ومن كظم غيظه ولو شاء أن يمضيه أمضاه ملأ الله قلبه رضا يوم القيامة ومن مشى مع أخيه المسلم فى حاجة حتى تتهيأ له أثبت الله قدمه يوم تزل الأقدام وإن سوء الخلق ليفسد العمل كما يفسد الخل العسل) .

                  🌷🌷🌷🌷🌷

ارجو أن القصه تكون نالت اعجابكم لو عجبتكم القصه لا تنسونى و لا تنسوا أبى من سائر دعائكم ...اللهم اغفر لأبى بحق تربيته لى و لاخواتى و اغفر لسائر موتى المسلمين.

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..