هويدا
الجزء الثامن
انهالت زهيره على هويدا بالضرب قامت بتقطيع شعرها الطويل و عضها من أذنها لدرجه ان الدم سال منها كانت تجسم فوقها و تضرب بها بكل قوتها...
و هويدا تصرخ بشده و تدعى على زهيره
اخذت سعديه تخلص هويدا من تحت يد زهيره إلى أن نجحت هويدا من الخروج من بين يديها
انطلقت هويدا بشعرها المنكوش و جلبابها المقطع خارج الدار متوجهه لبيت اهلها لتفر اخيرا من عذاب زهيره ...
انطلقت هويدا بشوارع القريه و الدموع تغرق وجهها
يراقبها الجميع فى تسائل عن ما حدث لها و جعلها بهذا الشكل
مسكينه هويدا فهى لم تعش طفولتها كبقيه البنات بل تحملت الكثير بدون ذنب ارتكبته
وصلت هويدا أخيرا إلى بيت أهلها للبحث عن من يواسيها و يضمد جراحها
كانت تفكر انها ستجد امها صدرا حنونا و لن يرضيها ما حدث لفلذه كبدها و أنها لن يرضيها هذا الحال و اكيد ستطالب بتطليقها من صلاح بسبب أفعال امه الظالمه
و لكن الحقيقه تختلف عن الخيال فما أن دخلت هويدا على امها ورأتها بهذا المنظر
نظرت إليها غاضبه
ايه يا بت اللى جايبك دلوقتى و فين طرحتك ؟؟
طرحتى وقعت من على دماغى يا اما لما زهيره ضربتنى
ضربتك ليه بقى ؟؟ تلاقيكى قليتى ادبك عليها ...منا عارفاكى
لا انا مقلتش حاجه و لا عملت لها حاجه
امال ضربتك ليه ؟؟؟ هى مجنونه هتضربك من الباب للطاق ؟
حرام عليكى يا اما ...دا بدل ما تخدينى فى حضنك و تطبطبى عليا ؟؟ دا بدل ما تروحى لزهيره دى و تجبيها من شعرها زى ما جابتنى من شعرى و كانت هتموتنى تحت أيدها ؟؟
مش لما تفهمينى عملتى ايه فى الاول ؟؟ ما يمكن الغلط عندك
حتى لو الغلط عندى ...انا بنتك لحمك و دمك بس اقول ايه ؟ ما انتى بعتينى لراجل اد ابويا و رمتينى مسألتيش فيا
انا جوزتك و خليتك واحده ست لها راجل و بيت
انهوا بيت دا يا اما ؟؟ دا انا مساويش خدامه عندهم
كل واحده بتخدم بيتها و راجلها لا انتى اول و لا اخر واحده تخدم فى دار جوزها ..انا ياما خدمت حماتى و اولادها و معزلتش منهم إلا من كام سنه بس...يلا يلا قومى لما اروحك و نستسمح حماتك قبل ما جوزك يجى و الموضوع يكبر
تروحينى؟؟؟ لا و الله منا قايمه من هنا و لو غصبتى عليا هولع فى روحى ...انا لا يمكن ارجع للست الظالمه دى ابدا
بقولك ايه يا اختى...لو فاكره أن لكى مكان هنا تبقى غلطانه ...انا ما صدقت انك غورتى مش ناقصاكى ترجعيلى مطلقه
بقى كدا يا اما ؟؟؟ و أنا اللى كنت فاكراكى هتحنى عليا
يا بنتى مش عاوزاكى تخربى بيتك بايدك ...البيوت ياما فيها طب اقولك عارفه ام ابوكى كانت بتضربنى كل شويه و عمرى ما رفعت عينى فيها ...ما هى زى امى برده و دعوة الحما فى السما
بس دى ظالمه و معندهاش ضمير
ربنا اللى هيحاسبها يا بنتى ....مقولتليش حماتك عملت معاكى كدا ليه ؟
كانت جايبالى واحده تكشف عليا عشان تشوف الحمل اتاخر ليه ؟
ها ....و لقت ايه ؟؟
لقت ايه يا اما ؟؟ انا مخلتهاش تقرب لى
ليه كدا يا بنتى ؟؟ الست عاوزه تطمن برده
تطمن على ايه ؟؟ ازاى يا اما انكشف على واحده غريبه ؟
لا دى تلاقيها الدايه يا بنتى ...كل ستات البلد بيروحولها
الستات تروح لها لكن أنا لا
طب استهدى بالله و قومى يلا ...الست مغلطتش
هنا دخل أبو هويدا ليجدها فى حاله مزريه
ايه اللى عمل فيكى كدا يا هويدا ؟؟ ايه يا بنتى مالك مين بهدلك كدا ؟؟
هنا انفجرت هويدا فى البكاء و ألقت نفسها بحضن ابيها و هو يربط على كتفها قائلا
متخافيش يا حبيبه ابوكى ...قوليلى مين اللى عمل فيكى كدا ؟؟
حماتى .. حماتى يا أبا مسكتنى ضربتنى و قطعت شعرى فى أيدها و كانت هتموتنى
الله ينتقم منها البعيده ...ازاى تعمل فيكى كدا ؟
هنا ردت عزه
بقولك ايه يا راجل هو انت هتخرب ع البت و الا ايه ؟؟
انا اللى هخرب ع البت ؟؟ هو انتى البعيده بهيمه ؟؟ مش شايفه البت عامله ازاى ؟؟
مالها يا اخويا ؟؟ اتشاكلت مع حماتها شويه ..ما انت ياما امك اتشاكلت معايا و ضربتنى كدا برده
امى انا ضربتك ؟؟
اه ضربتنى و كنت بسكت عشان بيتى ميتخربش
امى عمرها ما مدت أيدها عليكى يا عزه ...دا انتى اللى لسانك كان طويل و كنت بسمعك بنفسي و انتى بتردى عليها الكلمه بكلمتها
ايوا ايوا ...سيب البت و حكايتها و امسك فيا انا .... يلا متخربش عليها و خدها روحها لحماتها و خليها تحب على أيدها بنتك اللى غلطانه
انتى ايه يا شيخه ؟؟ جنس ملتك ايه ؟؟ دى لو بنت الجيران هيكون فى قلبك رافه عليها شويه ...انتى مش شايفه البت عامله ازاى ؟
يعنى ايه يعنى ؟؟
يعنى بنتى مش هتخرج من دارى الا اما يجى جوزها و يعتذر هو و امه على اللى عملوه فيها
ياادى المصيبه ...زهيره هتيجى تعتذرلك ؟؟؟ لا انت كدا عاوز بنتك تطلق
ايوا عاوزها تطلق ...امال اسيبها يموتوهالى
لا دا انت هتموتنى انا ؟؟ هو احنا ناقصين يا راجل ؟؟ مش كفايه اخواتها مش لاقيين نأكلهم ؟؟
ربك هيرزقنا ...لكن بنتى مش هفرط فيها
خليها لما تقع فى ارابيزك و يطلقوهالك بعد شهرين من جوازها و تكون سيرتها على كل لسان
اخرسي بقا ما انتى السبب ياريتنى ما مشيت وراكى ...كان زمانها لسه بنت بنوت و كنا جوزناها لواحد من سنها و مكنش حصل اللى حصل دا
ايوا أرمى عليا يا سبع الرجال و كنت هتجهزها منين للعريس الصغير دا ؟؟
ملكيش فيه ...قومى هاتى للبت جلابيه غير المتقطعه دى و هاتيلها حاجه تاكلها
ملهاش جلاليب هنا
قومى يا مره يا بارده احسن عليا الطلاق بالتلاته لو ما قمتى دلوقتى ما انتى بايته فيها الليله ادى
بتحلف عليا بالطلاق عشان بنتك ؟؟
ايوا و كلمه كمان هغورك على بيت أهلك مش هتباتى فيها
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق