هويدا الجزء السابع

هويدا

الجزء السابع

انهال صلاح على هويدا بالضرب بقوة ثور اختلى بعنزه صغيره ......فقد كشفت هذه الطفله حقيقته أمام نفسه فهو رجل اسما و شكلا فقط و لكنه فى الحقيقه لا يعلم شيئا عن الرجوله ..

ياله من حظ عاثر لقد ارتضت هويدا بالهم و الهم لم يرضى بها 

باعتها امها و اشترتها ام زوجها لتعمل لديها بدون أجر و تكون لابنها اخر الليل

اعتادت هويدا على ظلم زوجها و ام زوجها 

عاد صلاح الى عمله بعد ثلاث ايام من العرس لتبقى هويدا تدور كالبقره فى الساقيه طوال النهار من اذان الفجر و هى تقوم بكافه اعمال البيت من اطعام الطيور و تنظيف الاوعيه و الارض  و ملىئ الماء و نزحه و غسيل الملابس و صنع الخبز و الذهاب بالغداء الى ابو زوجها فى الحقل و الى زوجها بمزرعه المواشي 

لم تسمح لها زهيره بزياره أسرتها و لا زياره أسرتها لها و تعللت بأن اهلها لا يفهمون فى الأصول 

مر شهران على ذلك الحال و بدأت زهيره فى القلق و حاولت بكل طريقه إذلال هويدا لأن بطنها لم تحمل طفلا بعد ذلك الوقت الطويل من وجهه نظرها 

كانت دائما تتصعب على حال ابنها قائله 

يا عينى عليك يا ابنى ...بينها ارض بور و ملهاش فى الخلفه

البت صغار يا اما .. انتى مستعجله على ايه بس ؟؟ 

عاوزه اشوف خلفك و يجروا و يملوا عليا البيت كدا بدل المخفيه مراتك الاولانيه واخده بنتك و مبتورهلناش كأننا قتلنا ابوها 

الله ينتقم منها بتفكرينى ليه بس يا اما ؟ 

ما هو عشان كدا يا واد عاوزه مراتك تخلف عشان نغيظ اللى يتحش وسطها مراتك الاولى و الناس كلها تعرف أننا مظلمتهاش و ربنا رزقنا ببنت الحلال اللى تولد لنا بدل الواد عشره 

عندك حق يا اما ...نفسي اكسر نفسها و تعرف قيمتى 

و مين قالك انها معرفتش قيمتك ؟؟ هى هتلاقى فى جمالك و حلاوتك فين ؟ 

هههههععع صحيح يا اما ؟؟ 

ايوا صحيح هو انا عمرى قلت لك حاجه و طلعت غلط ؟ 

صراحه لا ....طب هنعمل ايه فى حكايه هويدا دى ؟ 

انا هروح اجيب لها خالتك سعديه الدايه تشوف ليه بطنها مشلتش لحد دلوقتى 

اللى تشوفيه يا اما 

بعثت زهيره إلى الخاله سعديه و التى حضرت سريعا ظنا منها أن الزوجه الجديده قد حملت و أنهم يحتاجون منها بعض النصائح 

سلام عليكم يا حاجه 

و عليكم السلام يا سعديه تعالى يا اختى 

صلاة النبى احسن ... يا ارض احرصى ما عليكى ....يا مية اهلا و سهلا يا بنت الاصول يا زينه ستات البلد 

اللهم صلى عليه ...اقعدى يا وليه و بلاش الهليله اللى بتعمليها كل مره دى 

حاضر يا حاجه ....خير يارب قالولى انك بعتيلى. .... ها ؟؟ اقول مبروك ؟ 

مبروك ايه بس ؟؟ البت بينها ارض بور يا اختى 

بور ازاى ؟؟؟ متقوليش كدا يا حاجه 

امال بقالها شهرين مشلتش و لا باين عليها هتشيل 

يا حاجه البت صغيره ...يمكن لسه شويه

 

انا عاوزه اعرف لسه اد ايه يعنى ؟؟ و عاوزاكى تكشفى عليها و تقوليلى بالظبط

 

هو احنا هندخل فى علم الغيب يا حاجه ؟؟

 

يعنى ايه يا سعديه ؟؟ امال انا جايباكى ليه يا مرا ؟؟؟ 

خلاص يا حاجه هاتيها اكشف عليها 

عقبال ما تشربى الشاى تكون جت أصلها راحت تودى الاكل لجوزها و جايه 

و ماله يا حاجه نشرب الشاى ...مفيش بقا قرصتين كدا مع الشاى من قرصك الحلوه اللى بالسمن البلدى دى ؟ 

طول عمرك همك على بطنك 

يجعله عامر يا حاجه 

هديكى قرص و فطير و كل حاجه تشاورى عليها بس تجبيلى الخبر اللى عاوزه اسمعه

حاضر عنيا ليكى 

دلفت هويدا الى داخل الدار و هى تحمل بواقى الطعام على رأسها 

تعالى يا هويدا احنا هنا .....

وجدت هويدا ام زوجها و معها سيده غريبه لا تعرفها بداخل غرفتها 

تعجبت هويدا لأن ام زوجها دائما تستقبل ضيوفها  بالمضيفه و هى غرفه مفروشه بالكنب البلدى تتوسطها منضده كبيره تحمل فوقها زهريه بها ورود مصنوعه من البلاستيك 

تعجبت هويدا لأنها لم ترى زهيره من قبل تستقبل أحد بداخل اى غرفه من الغرف 

تعالى يا هويدا اقعدى جنب خالتك سعديه ....سلمى يا بت انتى عامله زى اليهيمه ليه كدا 

معلش يا اما اصلى لسه جايه من بره و مش شايفه كويس الدنيا ضلمه هنا 

طب ولعى النور يا ادلعدى عشان خالتك تعرف تشوف شغلها 

شغلها اللى هو ايه دا ؟؟ 

هتكشف عليكى عشان تشوف بطنك مشلتش ليه لحد دلوقتى 

تكشف عليا دا ايه ؟؟ هى كانت دكتوره ؟؟ 

دى احسن من الدكتوره كمان دى خالتك سعديه الدايه هى اللى مولده نص حريم البلد .. يلا يا بت نامى عشان تكشف عليكى 

لا يمكن يحصل ابدا ...ال انام ال 

بتكسري كلامى يا بنت عزه ؟؟؟ 

اه اكسر كلامك ...انتى مشغلانى عندك زى الخدامه من شهرين و مبفتحتش بوقى لكن تجييلى واحده معرفش منين و تقولى نامى تكشف عليكى ؟ اهو دا اللي مش ممكن ابدا 

بتعصى امرى يا كلبه يا بنت الكلاب 

معلش يا حاجه أهدى يا اختى 

أهدى ايه يا سعديه ؟ انتى مش شايفه البت بتبجح فيا ازاى ؟؟ و محدش مالى عينها 

طب معلش حقك عليا انا .. تعالى يا اختى نطلع 

نطلع مين ؟؟؟ دا هى اللى تطلع بره و تغور عند اهلها مش كفايه متحملينها و هى ارض بور مش فالحه غير فى الطفح بس ؟؟ 

و هو انتى بتطفحينى ببلاش منا عامله زى العبد عندك اهو و بعدين انتى مبتجبليش حاجه من عندك دا شقى جوزى 

جوزك مين يا ام جوز ....جوزك دا ابنى و لا يمكن يعصالى أمر ...أن مكنتش اخليه يطلقك و يرميكى رميه الكلاب مبقاش انا زهيره

ان شالله يقعد لك فى بناتك يا رب اللى بتعمليه معايا 

انتى بتدعى عليا يا بت ؟؟؟؟ نهارك اسود

 

انهالت زهيره على هويدا بالضرب قامت بتقطيع شعرها الطويل و عضها من أذنها لدرجه ان الدم سال منها كانت تجسم فوقها و تضرب بها بكل قوتها...

و هويدا تصرخ بشده و تدعى على زهيره

اخذت سعديه تخلص هويدا من تحت يد زهيره إلى أن نجحت هويدا من الخروج من بين يديها 

انطلقت هويدا بشعرها المنكوش و جلبابها المقطع خارج الدار متوجهه لبيت اهلها لتفر اخيرا من عذاب زهيره ...

يتبع

صلوا على حبيبكم النبى

         ‏

قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..