هويدا
الجزء السادس
هتصالحنى ازاى بقا ؟
خدى ....جبت لك حته فطير اهى و لحقت لك حته فرخه عشان تتقوتى و تشدى حيلك كدا معايا
يا سلام يا اخويا
عارف انك جعانه ...قومى كلى و بعد كدا غيري هدومك دى عاوزك تلبسي لى كدا حاجه مشخلعه من اللى بتزغلل العيون ..عاوز رقاصه معايا فى الأوضه
اختشى يا صلاح
اللى يختشى من بنت عمه ميجبش منها عيال يا بت
عيب يا صلاح الكلام دا بستحى
لسه بتستحى منى يا بت ؟؟ ما خلاص بقينا واحد و مفروض محدش يستحى من التانى ابدا
لا انا هفضل استحى منك كدا لحد ما اخد عليك
لاهو انتى لسه مخدتيش عليا يا بت ؟؟ طب تعالى اقولك
لا اوعى كدا انا جعانه اوى
طب كلى و تعالى جنبى هنا يا حلوه بس البسيلى حاجه حلوه كدا
انت بتعمل ايه يا صلاح
بجيب الشريط اللى الواد عبدالصمد مدهولى .... هشغل لك اغنيه حلوه كدا ترقصيلى عليها ...بتعرفى ترقصى يا هويدا ؟؟
لا ...لا مبعرفش
كدابه يا بت ...شكلك لهلوبه
بعرف بس هستحى منك
هو كله تستحى تستحى يا بت انا جوزك عارفه يعنى ايه جوزك ؟؟ يعنى مفيش كسوف و لا خجل ....يلا خلصتى اكل ؟؟؟
ايوه الحمد لله
طب شوفى هشغلك اغنيه حلوه اوى يا بت
اغنيه ايه دى يا صلاح ؟
اغنيه الف ليله و ليله للست عارفاها ؟
طبعا عارفاها
تعرفى ترقصى عليها ؟؟
ايوه ...اعرف
طب يلا ورينى الحلاوه ...بس استنى هنقيلك حاجه على ذوقى تلبسيها ....ايوا خدى دا البنفسجى دا هياكل منك حته
طب دارى وشك الناحيه التانيه
ادارى ليه بقا ؟؟ مش قلنا مفيش بينا كسوف ؟؟
لا دارى و الا مش هلبسه
خلاص يا ستى تحت امرك ...انا مدارى اهو ... خلصتى ؟؟
ايوا خلصت خلاص
استنى .....تعالى هربط لك الايشارب دا حوالين وسطك قبل ما نشغل الاغنيه
قام صلاح بتشغيل المسجل ...ارتفع الصوت ...تمايلت هويدا فى حياء مع الموسيقى و مع صوت السيده ام كلثوم و هى تشدو
( يا حبيبى الليل وسماه ونجومه وقمره وسهره وانت وانا
يا حبيبى انا يا حياتى انا كلنا فى الحب سوا
والهوى اه منه الهوا سهران الهوى
يسقينا الهنا ويقول بالهنا يا حبيبي
ياللا نعيش فى عيون الليل ونقول للشمس تعالى تعالى بعد سنة مش قبل سنة ..دى ليلة حب حلوه بالف ليلة وليلة الف ليله و ليله ....الف ليله و ليله
بكل العمر هو العمر ايه غير ليلة زى الليلة. )
هنا طرق الباب بشده و جاء صوت زهيره من خلفه و هى تحاول فتح الباب بكل قوه
افتح يا ولا ...افتح يا دلول الست
هرع صلاح الى الباب بينما تخشبت هويدا مكانها
اقتحمت زهيره الغرفه قائله
يا حلاوه يا اولاااا انتوا قلبتوا الدار كباريه ؟؟
كباريه ايه بس يا اما ؟؟
امال اللى انا سامعاه دا ايه ؟؟ عمال تتحايل ع السنيوره ترقص لك و هى تدلع و فى الاخر مش عامل حساب أن عندك بنات اخوات لسه متجوزش
يا اما اخواتى لسه صغيرين ميفهموش الكلام دا
و انت بقا عاوز تفهمهم ....هات يا واد التسجيل دى و الله ما هو بايت هنا
يا اما فى ايه يا اما ؟؟ ما تسيبي المسجل
و الله ما سايباه و كلمه كمان هحكم عليك تبات بره الليله
لا خلاص ..خلاص خدى اهو
اياك تقفل باب الاوضه بالترباس تانى
حاضر
و انتى يا اختى بالراحه ع الواد شويه الواد مش حملك يا اختى ....و بعدين اعملى حسابك هصحيكى قبل الفجر عشان شغل الدار ...و الا فاكره انك جايه نخدمك هنا
لم تنطق هويدا و حاولت كتم دموعها إلى أن خرجت زهيره فانفجرت فى البكاء
وطى صوتك يا هويدا لتكون لسه واقفه ع الباب ...شششش
يعنى حتى العياط متحرم عليا ؟؟ هى امك بتعمل ليه كدا ؟
وطى صوتك ابوس ايدك هتسمعك و هتخلى ليلتنا سودا
انت خايف منها ليه ؟؟؟ مفروض انت راجل
منا راجل يا بت غصب عن اللى جابك تحبى اوريكى ؟؟
تورينى ايه بس ؟؟
طب وطى يا بت صوتك دا ..جك حش وسطك ....امى لو دخلت علينا تانى مش بعيد تطردنا و الا تنيمنا فوق سطح الدار
و بتقول مش خايف ؟ دا انت مرعوب فى جلدك منها
بقولك ايه متخلنيش اتغابى عليكى ... لمى نفسك كدا انتى لسه متعرفنيش
لا عرفتك خلاص و باين اوى ...من امبارح و هى عماله تلطش فيا انا و اهلى و الكلمه كلمتها و انت متقدرش تنطق كلمه واحده قدامها
بقى كدا ؟ طب و الله لاوريكى يا بنت الكلاب أن كنت راجل و الا لا
انهال صلاح على هويدا بالضرب بقوة ثور اختلى بعنزه صغيره ......فقد كشفت هذه الطفله حقيقته أمام نفسه فهو رجل اسما و شكلا فقط و لكنه فى الحقيقه لا يعلم شيئا عن الرجوله.
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق