هويدا
الجزء الخامس
لا متخافيش مش هكرر الغلطه دى تانى ابدا ...يلا انا هقوم اريح شويه
لحقت شبعت ؟؟
ايوا يا اما شبعت سبينى بقا
طب يا شملول ...روح يا اخويا لعروستك
حاضر يا اما
انتصف النهار ....حضر أهل هويدا بالصباحيه وسط الكثير من الزغاريد
استقبلتهم زهيره و هى تنظر إلى ما احضروه بعدم رضا
الف مبروك يا حجه
الله يبارك فيك مبروكه على صاحبها يا حاج اتفضلوا
هما فين العرسان عشان نبارك لهم ؟
نايمين لسه ...هروح اصحيهم
همست عزه فى إذن زوجها بعد انصراف زهيره :
هى الست دى مالها مكشره فى وشنا كدا ليه ؟؟
و لا مكشره و لا حاجه يا عزه ...انتى هتبتدى فى شغل الحموات من دلوقتى ؟
انا برده اللى بعمل شغل الحموات ؟؟ دا الوليه مش طايقانا و عماله تبص للحاجه اللى جايبنها بقرف ...هو انا جايبالها هى ؟ انا جايبه لبنتى
اتهدى يا عزه مش عاوزين نخرب ع البت من اول يوم ...بنتك خلاص بقت فى بيت راجل
و هو انا قلت حاجه ؟ انا بس مش عاجبانى المقابله
اسكتى بقا الست جايه اهى
دخلت زهيره أمام عائله هويدا و معها زوجها
بعد دقائق دخل صلاح بجلبابه الابيض و ابتسامته البلهاء و سلم على الجميع
لحقته هويدا و هى تنظر بالأرض
قامت عزه لتنفرد بابنتها
بعد اذنك يا حاجه هاخد بنتى اتكلم معاها كلمتين فى الاوضه
كلمتين ايه دول يا ام هويدا ؟؟ هو انتى يا اختى لسه هتقولى لبنتك كلام ؟
طب و فيها ايه يعنى لما اتكلم مع بنتى يا حاجه ؟
فيها أن دا بيتى و أنا اللى احكم فيه و اقول مين يدخل و مين يخرج
و هو انا قلت حاجه ؟ انا عاوزه ادخل اوضه بنتى اتطمن عليها
و تطمنى عليها من ايه يا عمر ؟؟؟ بنتك قدامك اهى منقصش منها حته
هنا تدخل ابو العروس
خلاص يا حاجه حقك علينا ...عزه مش قصدها ....يلا يا عزه البت فى بيت جوزها تزيد مش تنقص ...الف مبروك يا جماعه
طب اقعدوا اشربوا الشربات يا جماعه ( قال أبو صلاح )
متشكرين يا حاج ...دايما عامر باذن الله نستأذن احنا بقا
انصرف أهل هويدا سريعا وسط ذهول من الجميع الا زهيره كان الشرر يتطاير من عينها
ايه يا حاجه ؟ مش عارفه تمسكى فى الجماعه شويه ؟؟
جماعه مين يا اخويا ؟؟ مش شايف جايبين لبنتهم فى الصباحيه ايه ؟؟ مش كفايه مكلفنهمش اى حاجه فى الجوازه دى ؟ بيستهبلوا كمان و جايبين صباحيه زى وشهم ؟
ليه بس يا حاجه ما الحاجات كتير اهو و كذا صينيه و كذا سبت قدامك اهم
اسكت انت يا حاج ...هو انت لك فى الكلام دا ؟ و الا تفهم فيه ؟؟ دا تقدير و الناس دى استقلت بينا و جايبالنا حاجات اى كلام ....شوف جايبه ايه ؟؟ ال خمس فطاير ؟؟ المفروض العروسه بيجيلها ١٥ فطيره عشان نوزع على حبايبنا ..... و جايبالى شويه رز عاملين ازاى ؟ و ايه العيش إلى. جايباه دا ؟ و حطالى جوز فراخ و حته بطه مسلوعه على الصينيه ....دا اكل عرايس برده ؟؟
سمعت هويدا كلمات زهيره ...اجهشت بالبكاء و انصرفت إلى حجرتها
أراد صلاح اللحاق بها و لكن زهيره نهرته بشده
خد هنا يا شملول ....رايح وراها ليه يا واد انت ؟؟ دا الكلام اللى وصيتك بيه الصبح ؟
يا اما البت بتعيط انتى برده قسيتى عليها اوى
يا سلام يا اخويا ...ايه يا ولا ؟ هتبقى دلدول الست ؟
دلدول ايه بس ؟؟؟ انتى تقريبا طردتى اهلها و عيبتى على مجايبهم
دول ناس معندهاش ريحة الدم و لا بيفهموا فى الأصول
خلاص يا اما حصل خير
خد هنا يا ولا
عاوزه ايه منى ؟
اترزع هنا ...امال مين هياكل الاكل اللى نسايبك جايبينه دا ؟؟
طب هاخد الاكل و اروح اكل مع هويدا
يا حلاوه يا اولاد ....اكل ايه اللي. هتاخده للسنيوره فى اوضتها ليه فاكره نفسها ست و احنا خدامين ابوها ؟؟
يا اما البت منطقتش
خلاص اترزع كل هنا و هى عاوزه تاكل تبقى تيجى
طب اروح اناديها ؟؟
اللهم طولك يا روح
خلاص خلاص يا اما
جلس صلاح و أسرته لتناول الطعام
قامت زهيره إلى المطبخ لتحضر المعالق و الاطباق .... فقام صلاح بتخبئه قطعه من الفطير بداخل ملابسه و عليها قطعه من الدجاج
جاءت زهيره و تناولوا جميعا طعامهم و انصرف كل منهم لشؤنه
دخل صلاح لهويدا وجدها تضع رأسها بالوساده و تبكى
مالك يا بت ؟ بتعيطى ليه دلوقتى ؟؟
يعنى مسمعتش امك قالت ايه ؟؟
امى مقالتش حاجه ...انتى عاوزه تنكدى علينا و الا ايه ؟
انا برده اللى بنكد ؟
ايوا امال ؟؟ فى حد يوم صباحيته يعيط كدا ؟؟
اه طبعا لما اهلى يتطردوا و يتقال عليهم اللى اتقال دا يبقى ليا حق ازعل و انقهر كمان
سلامتك من القهره يا جميل ...قومى يا بت هصالحك
هتصالحنى ازاى بقا ؟
خدى ....جبت لك حته فطير اهى و لحقت لك حته فرخه عشان تتقوتى و تشدى حيلك كدا معايا
يا سلام يا اخويا
عارف انك جعانه ...قومى كلى و بعد كدا غيري هدومك دى عاوزك تلبسي لى كدا حاجه مشخلعه من اللى بتزغلل العيون ..عاوز رقاصه معايا فى الأوضه
اختشى يا صلاح
اللى يختشى من بنت عمه ميجبش منها عيال يا بت .....
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق