ليلى و الذئب
الجزء الثاني
الحقنى يا فوزى
فى ايه يا ناديه ؟
ليلى مرجعتش لحد دلوقتى ؟
مرجعتش ازاى ؟؟ دا الساعه بقت سبعه
معرفش و تليفونها مقفول
طب ما يمكن عندها سكشن متأخر ؟؟
لا يا فوزى معندهاش هى قالت لى أنها هترجع على العصر
و أما قالت لك كدا كنتى فين دا كله يا ست هانم ؟
منا من ساعتها و انا عماله ارن عليها بس حكايه قفلة التليفون دى اللى قلقتنى اوى ، هى عمرها ما بتقفل تليفونها
يمكن فصل شحن ...بس انتى المفروض كنتى اتصلتى عليا قبل كدا
منا مكنتش عاوزه اقلقك انا قلت يمكن خرجت مع حد ما أصحابها ساعه كدا بعد الجامعه
خرجت ايه بس ؟ اقفلى انا هروح الكليه اشوف فى سكاشن شغاله لدلوقتى و الا لا
ابقى طمنى بالله عليك يا فوزى اول ما تعرف حاجه
حاضر ...حاضر يا ستى
استقل فوزى سيارته و توجه الى كليه العلوم
قام فوزى بالسؤال عن ابنته ليلى و لكنه لم يجدها
عاد فوزى إلى البيت على أمل أن يجد ليلى قد عادت و لكنه لم يجدها
لقيتها يا فوزى ؟؟
الاقيها فين بس ؟؟ مفيش حد فى الكليه يا ناديه ...
يا ترى رحنى فين يا بنتى ؟؟
طب مقالتش لكى انها خارجه مع أصحابها و الا حاجه ؟؟
لا مقلتش
متاكده يا ناديه ؟؟
ايوه متاكده هى قالت هترجع على العصر
عصر ايه دا العشا ادنت
يبقى لازم نبلغ يا فوزى .. بنتى اتخطفت
اعوذ بالله عليكى ...اتخطفت ايه بس ؟
ليه انت مش سامع عمليات الخطف اللى شغاله فى البلد اليومين دول ؟
يا ستى تلاقيها إشاعات ...الناس بتهول و بتعمل من الحبه قبه
و لو هى حكايات زى ما بتقول فين بنتى يا فوزى ؟؟
يمكن خرجت مع واحده صاحبتها ...طب ممعكيش نمر صحابها ؟؟
لا و انا هيبقى معايا نمر صحابها ليه ؟؟
امال انتى ام ازاى ؟ مش المفروض يا هانم تعرفى صحابها مين و نمرهم ايه عشان ظرف زى دا ؟؟ امال انتى قاعده فى البيت خيال مآته ؟
انت هترمى عليا المسؤوليه زى كل مره ؟ خلاص يا سيدى انا غلطانه بس هات لى بنتى
اجيبها لك منين بس ؟ مقدمناش الا الانتظار
انتظار ايه ؟ يلا نروح نبلغ فى القسم
القسم مش هيرضى بأى بلاغ الا بعد مرور ٢٤ ساعه من اختفائها
يا لهوى ...دا يكونوا موتوها
اعوذ بالله من لسانك يا شيخه أن شاء الله عندى امل نلاقيها داخله علينا دلوقتى
يارب يا فوزى يارب
بس لو جت هيكون حسابى معاها عسير
لا اوعى تكلمها و لا تزعلها
خلاص بس تيجى بس
مضت الليله على فوزى و ناديه كأصعب ليله تمر عليهم بحياتهم
اصبح الصباح و توجه فوزى و زوجته إلى قسم الشرطه لتحرير محضر بالاختفاء
توجه فوزى إلى أمين الشرطه لكتابه المحضر
لو سمحت يا حضرة الأمين
ايوا يا سيدى
عاوز أبلغ عن اختفاء بنتى
بنتك انت ؟؟
ايوا بنتى
اختفت ؟؟
ايوا اختفت
عندها كام سنه دى ؟؟
عندها ٢٠ سنه
و اللى عندها ٢٠ سنه دى تختفى ازاى ؟
و الله معرفش اختفت ازاى ؟ انا جاى هنا عشان تعرفولى اختفت ازاى ؟؟
يعنى مكنش جالها عريس و انت غصبتها عليه ؟
لا و الله ما حصل
طب تكونش حبت واحد زميلها و انت رفضته فمشيت معاه ؟؟
لا طبعا بنتى عمرها ما تعمل كدا و لا كان لها علاقه بأى حد
متأكد ؟؟؟؟
ايوا متأكد
طب تكونوش زعلتوها و خدت على خاطرها و راحت لواحده صاحيتها ؟؟
يا سيدى ابدا ...لا زعلناها و لا كلمناها
طب .....
من فضلك افتحى لى المحضر
بالراحه يا استاذ اسئلتى دى مهمه عشان بنتك و سمعتها
سمعتها ازاى يعنى ؟؟
يعنى لو البنت زعلانه أو عند حد من قرايبكم يبقى بلاش شوشره على سمعة البنت
يا سيدى مش عند اى حد من قرايبنا .. احنا اتصلنا بكل الناس اللى نعرفهم و مش عندهم
طب اتصلتوا على أصحابها ؟
للاسف منعرفش لها أصحاب
اهى دى غلطه
عارفين انها غلطه بس لو سمحت اعمل لى المحضر بقا
مقدرش
ليه متقدرش ؟؟
لازم يفوت على الاختفاء ٢٤ ساعه
ما هى مختفيه من امبارح
امممم يبقى كدا افتح لك المحضر
إنه فى يوم ......
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق