ليلى و الذئب
الجزء الثالث
عادا والدى ليلى إلى المنزل بعد القيام بإبلاغ الشرطه
دخلت ناديه إلى غرفتها و هى بالكاد تجر رجليها
نامت على سريرها و الدموع تغرق وجهها
يا ترى انتى فين يا حبيبتى ؟؟ يا ترى رحتى فين يا نور عينى ؟؟ يا ترى جعانه و الا شبعانه ؟
يارب ميكونش زى ما بنسمع عن سرقة الأعضاء ...يارب ترجع لى
انا مقدرش اعيش من غيرها دى بنتى الوحيده اللى مخلفتش غيرها
يا ترى رحتى فين يا حبيبتى و مين خطفك ؟؟
يارب ...يارب ....طب لو كانت ماتت يا رب اشوف جثتها و ادفنها بايدى بدل منا مش عارفه بنتى بيحصل فيها ايه دلوقتى يارب ترجع لى ...يارب
ارتفع صوت ناديه بالنحيب و الصراخ الشديد فقد تخيلت أنها فقدت وحيدتها إلى الأبد
هنا دخل فوزى على صوت زوجته
صلى على النبى يا ناديه ...استهدى بالله كدا
عليه الصلاه والسلام....بنتى ..بنتى يا فوزى راحت خلاص
مراحتش و لا حاجه خلى عندك امل فى ربنا ...أن شاء الله هترجع بالسلامه يمكن اللى خطفها بس عرف أن معانا قرشين و عاوز فلوس
ياريت ياريت تيجى على اد الفلوس ...انا ادفع كل فلوسي ادفع عمرى كله بس بنتى ترجع
باذن الله هترجع
ياما قلت لها اجيب لها عربيه تروح بيها الجامعه بس مكنتش بترضى ابدا و تقولى يوم ما اركب عربيه يبقى لازم اكون شارياها بفلوسي ...ياريتك يا بنتى كنتى سمعتى كلامى
يعنى العربيه هى اللى كانت هتمنعها من الخطف ؟؟ قولى كلام معقول امال يا ناديه
ايوا ....يمكن اتخطفت فى مواصله زى ما بنسمع
طب و الناس راحت فين بقا ؟؟
الناس ؟ ناس ايه يا فوزى ؟ الناس بقت تشوف القتل فى الشوراع و محدش بيقرب ...و كل واحد بيقول يلا نفسي انا ايه يدخلنى فى حاجه زى كدا اخد لى سكينه و الا اموت ...
لا كلامك غلط انتى مش فاكره الشاب اللى اسمه محمود اللى دافع عن البنت اللى فى ولد عاكسها
اه فاكراه .....و عشان شهامته مات برده الله يرحمه يارب
بس اهو فى لسه ناس كويسه اهو
يارب يا بنتى يوقف لك ولاد الحلال و يبعد عنك ولاد الحرام يارب
خلاص يا ناديه يا حبيبتي قومى يلا كلى لقمه تلاقيكى مكلتيش من امبارح
لقمة ايه بس ؟؟ انا مليش نفس لأى حاجه فى الدنيا ...انا لو بنتى جرالها حاجه هموت
بعد الشر عنك ...بس لازم تاكلى انتى عندك سكر و قلب و الحزن الشديد دا مش كويس عشانك
سبنى يا فوزى من فضلك و اقفل النور دا و روح اوضتك
بقا كدا يا ناديه ؟؟ بقا انا بحاول اخفف عنك و انتى برده بنفس أسلوبك حتى فى المصيبه دى
انا مش طايقه نفسي بالله عليك مش وقته خالص الكلام ده
خلاص انا خارج حقك عليا
يووووو
خلاص خلاص انا خارج لو عزتى حاجه اندهى عليا
مش عاوزه حاجه ...انا عاوزه بنتى بس
إن شاء الله هترجع بالسلامه
يارب يارب ..معلش يا فوزى اتنرفزت عليك
لا ابدا انا مقدر ...دى بنتى برده بس لازم حد فينا يكون ماسك نفسه عشان يعرف يفكر برده ....انا مش هقعد انا هنزل اسال عليها فى المستشفيات و اروح الجامعه اسال زمايلها
صح ...ايوا يا فوزى انزل بسرعه بس روح الجامعه الأول يمكن حد من زمايلها يعرف عنها اى حاجه
حاضر هنزل اهو ...عاوزه حاجه اجيبهالك معايا ؟؟
عاوزه بنتى ...هات لى بنتى
حاضر ...باذن الله
🥺🥺🥺🥺🥺🥺
أما ليلى فقد قضت ليلتها فى البكاء و الخوف الشديد كانت تتوارد على رأسها الأفكار و لم يغمض لها جفن
عندما اصبح الصباح دخل عليها لبيب بقطعه من الجبن و رغيف خبز جاف ووضعهم امامها على المنضده
وقف لبيب يتأمل ليلى دون كلام
نظرت إليه ليلى نظرة يأس و لكنها حاولت استجماع شجاعتها
ممكن اطلب منك طلب
تطلبى منى ؟؟ انا ؟؟
ايوا انت ...انت شكلك طيب و هتعمل اللى اقولك عليه
لا مقدرش افتح لك الباب انا جبت لك الاكل ده من اكلى ...اخويا لو عرف انى دخلت لك تانى هيضربنى
لا مش عاوزه تفتح لى انا عاوزه اروح الحمام
حمام ؟؟ مفيش حمام هنا
ازاى ؟؟؟ ازاى مفيش حمام ؟؟
زى الناس ....شوفتى الجردل اللى جنب السرير دا ؟
اه ...ماله دا ؟؟
ممكن تعملى فيه حمام لو اتزنقتى
جردل ايه و زفت ايه ؟؟ انتوا مجانين ؟؟؟ خرجونى من هنا ...انتوا حابسنى ليه هنا ؟؟
وطى صوتك لو سمعوكى ممكن يموتوكى و يموتونى معاكى
ليه ؟ هو احنا فراخ ؟؟ طب قولى هما ليه خاطفنى ؟؟ عاوزين فلوس ؟؟ انا امى ممكن تدفع لهم اى مبلغ يطلبوه....بس خرجونى من هنا ....خرجنى و انا مش هجيب سيره لأى مخلوق أنكم خطفتونى
هنا وقف لبيب و كأنه لايفهم ما تقول و نظر إليها بشئ من البلاهه قائلا
بس انا عاوزك تفضلى معايا انا حبيتك اوى
حبتنى ؟؟ طب فكنى يا لبيب ...هتسيب حبيبتك كدا مربوطه
منا مقدرش ...هو انتى اسمك ايه ؟؟
اسمى ليلى
الله اسمك جميل زيك يا ليلى
طب خرجنى
مقدرش قلت لك ...انا سامع صوت ...هخرج بسرعه قبل ما يشوفونى هنا سلام يا ليلى
خرج لبيب و ما هى إلا دقائق سمعت ليلى صوت هاتف يرن
سمعت بضع كلمات و كان الصوت منخفض بشده
ايوا يا باشا ...كل حاجه تمام زى ما أمرت
لا لا متخفش محدش جه يمتها
حاضر يا باشا عنيا ...لا مفيش حد يعرف إلا انا و سيادتك و الواد اخويا لبيب و الاتنين اللى نفذوا العمليه
لا متخافش دا واد اهبل و مبيفهمش متخافش منه خالص
خلاص يا باشا انا مستنى أوامرك
انتهت المكالمه خارج الباب
وجدت ليلى الباب يفتح و يدخل ذلك الرجل الضخم مره اخرى
ازيك يا سنيوره ؟ عامله ايه .....
يتبع
صلوا على حبيبكم النبى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق