الزوجة الثانيه
الجزء الثالث و العشرون
حسام اخدنى على اوضه النوم و فتح لى الدولاب ولقيته مليان هدوم من كل شكل و لون
و لقيته جايب لى مكياج بماركات عالميه غالى جدا
كان عاملى مفاجات كتير اوى و مش ناسي اى حاجه ..
عوض ربنا كبير اوى احمدك يا رب و اشكر فضلك.
مرت الشهور و انا فى سعاده رهيبه ، حسام فعلا انسان كويس اوى
كان يقضى معايا تلات ايام كنت بعتبر نفسي فى الجنه ، عايشه مع ملاك مش انسان.... كان فيه كل الصفات اللى تحلم بيها اى ست... رومانسي جدا ، و حنين ، كريم اوى معايا و مع اولادى ، كان يجيب لى الحاجه قبل ما اطلبها
غير الخروجات و الفسح اللى كانت يوميا
حاجه كدا فوق الخيال
حبيته اوى ... و حسيت انى متجوزتش قبل كدا ...فعلا فى فرق بين راجل و راجل
لما حبيت حسام ابتديت اغير عليه و بقيت نفسي اعيش معاه طول الايام مش نصها بس
الغيره كانت بتاكل قلبى و تنهش فيا لما كنت اتخيل أنه فى حضن واحده تانيه غيرى و بيقولها نفس الكلام اللى بيقولهولى
الايام اللى كان بيروح عندها كنت بحس انى بموت ....مكنتش بعرف انام
ازاى يروح لها و يديها عدد ايام زيى او اكتر كمان و هو بيقول إنه مش بيحبها و انها مش بتفهمه زيى ؟؟ طب ما انا اولى بالايام دى
بس لما كنت بقوله كدا كان يقولى عشان خاطر ولادى انا مقسوم نصين هنا قلبى معاكى و هناك عقلى مع اولادى
الكلام ده كان بيسكتنى فى الاول و كنت بفضل الوم فى نفسي و اقول اسكتى يا بت هو انتى كنتى طايله اللى انتى فيه دلوقتى ؟؟ متخربيش على نفسك و اسكتى
لكن مع مرور الأيام و مع زياده حبى ليه زاد حب تملكى ليه و بقيت مش قادره على العيشه دى كان غصب عنى و الله الغيره مره و ميحسش بيها الا اللى جربها. ...كنت عاوزاه كله ليا لوحدى محدش يشاركنى فيه و كنت بدى لنفسي الحق ده لانه كان بيحبنى و مرتاح معايا انا اكتر منها
ليه ميطلقهاش و يفضل معايا انا ؟؟ و طبعا ميسبش أولاده زى ما اسماعيل عمل ...لا يمكن احرضه على كدا و لا اسمح له يعمل كدا أو يظلم ولاده
فكرت كتير ازاى افرق بينه و بينها و بقيت ازود جرعة الدلع اوى عشان يفضل معايا وقت أطول لكنه مكنش يخلف فى مواعيده ابدا مهما كان و كان ملتزم اوى من ناحيه بيته الاولانى
و فى يوم و انا قاعده بتصفح الفيس و هو كان عندها لقيت صورته مرت قدامى و مكتوب تحتها هيام محمود
دخلت بسرعه على بروفايلها لقيت مكتوب فيه متزوجه من حسام عبدالفتاح
اه دا بروفايلها بقا ....
دخلت على منشوراتها لقيت كلها حب لجوزها و دعاء أن ربنا يخليه ليها و أنه أعظم زوج فى الدنيا
و فعلا حسام يستاهل كل اللى اتقال عليه ده هو فعلا راجل بمعنى الكلمه
بقيت اقلب فى المنشورات و الصور و هو بيفسحها هى و أولادها و اماكن فى شرم الشيخ و الغردقه
و النار بقت تاكل فى قلبى اكتر و اكتر
ازاى بيقول مش بيحبها و عامل معاها كل ده ؟؟؟
بقيت كل شويه اجيب حسابها على الفيس و اراقبه و اشوف منزله ايه و هى كانت نشطه اوى و بتنزل تقريبا كل يوم احداث بتمر بيها مع أولادها و جوزها و أصحابها
هى شكلا احلى منى شويه بس دمها تقيل انا دمى اخف منها بكتير ، معرفش حسام اتجوزها ازاى من الاول ؟؟
و فى يوم كنت بفتح حسابها كالعاده و كان هو لسه مسافر عندها لقيتها بالليل مصوره خاتم شكله غالى اوى ...تحفه و كاتبه تحته انهارده عيد ميلادى و دى هديه زوجى حبيبي ليا
انا شفت الخاتم و اتجننت ...مقاليش إنه هيجيب لها حاجه و ازاى يجيب لها حاجه غاليه اوى كدا
اتصلت عليه و قلت له
انت فين ؟؟
هو ايه انت فين دى ياثريا ؟؟ و بعدين احنا مش متفقين انك متتصليش بيا و انا فى البيت التانى ؟؟
انا تعبانه يا حسام ...محتجاك جنبى
مالك فى ايه ؟؟
ماليش ...انا عاوزاك انت
انتى بتهزرى يا ثريا ؟؟ و الا عاوزه تعمليلى مشكله ؟؟
اعملك مشكله عشان بكلمك ؟؟ على فكره انا مراتك زيها بالظبط و هى بتتصل بيك و انت عندى عادى
ايوه عشان هى متعرفش بوجودك لكن انتى تعرفى بوجودها
خلاص عرفها
تانى يا ثريا ؟؟
هبحصل ايه يعنى ؟؟
انتى عارفه هيحصل ايه
انا مش عارفه انت خايف منها كدا ليه ؟؟
اقفلى يا ثريا و بعد بكرا انا جايلك و اوعى تتصلى بيا و انا هنا مره تانيه
بقا كدا يا حسام ؟؟ ماشي
قفلت السكه و قعدت اعيط الغيره كلت قلبى ...لقيت الدنيا لفت بيا و اغمى عليا ابنى قعد يفوق فيا و يا حبيبي مكنش عارف يتصرف لحد ما فقت لوحدى و لقيت نفسي غامه عليه اوى و مش قادره اعدل دماغى
الاحساس ده انا عارفاه كويس دا ....زى ما يكون ....لا لا مش ممكن انا متفقه مع حسام و باخد حبوب منع الحمل لانه مش عاوز عيال دلوقتى
اكيد ضغطى وطى من كتر الانفعال و العياط.....
تانى يوم الدوخه برده مفارقتنيش نزلت الصيدليه قست الضغط و لقيته مظبوط، جه فى دماغى الاحتمال التانى و هو انى ممكن اكون حامل
اشتريت اختبار حمل و طلعت عملته و بالفعل لقيت ظهر شرطتين
يا خبر
كان عندى احساسين متداخلين احساس بالفرح الشديد لانى حملت من حسام و هيكون الرابط بينى و بينه اكبر
و احساس بالخوف الشديد لأن حسام كان بيحذرنى كل مره انى اخدت الحبوب و الا لا و الصراحه انا كنت ساعات انساها و خاصه فى الأيام اللى كان بيبات فيها عند الهانم
يا ترى اما حسام يعرف هيعمل ايه ؟؟ هيطلب منى انزل الطفل و الا هيفرح أنه هيخلف منى ؟
مش عارفه أقوله و الا لا ؟
لا انا مش هقوله لحد ما الحمل يثبت شويه وساعتها مش هيقدر يقولى نزليه
و بالفعل مقولتش لحسام انى حامل لحد ما الحمل تم فى بطنى اربع شهور و هنا قررت انى أقوله عشان يعرف أن بقى ليا عليه حقوق زى حقوق مراته الاولى
استنيته لما جه و كان رايق اوى و جايب معاه فاكهه و حلويات و تسالى و دخل باس الولاد و قعد يلعب معاهم
قلت فعلا دى فرصه حلوه و هو رايق كدا أقوله على الخبر
حسام
نعم يا روح حسام
عاوزه اقولك على حاجه مهمه
قولى يا قلبى
أنا .....
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق