الزوجه الثانيه الجزء الرابع و العشرون و الاخير

الزوجه الثانيه

الجزء الرابع و العشرون و الاخير

قررت انى أقوله عشان يعرف أن بقى ليا عليه حقوق زى حقوق مراته الاولى
‏استنيته لما جه و كان رايق اوى و جايب معاه فاكهه و حلويات و تسالى و دخل باس الولاد و قعد يلعب معاهم
‏قلت فعلا دى فرصه حلوه و هو رايق كدا أقوله على الخبر
‏حسام
‏
‏نعم يا روح حسام
‏
‏عاوزه اقولك على حاجه مهمه
‏
‏قولى يا قلبى
‏
أنا بحبك اوى و نفسي نفضل طول العمر سوا

وانا كمان بحبك اوى يا ثريا ..بس ليه بتقولى كدا دلوقتى ؟؟

كنت عاوزه اقولك على خبر بس مش عارفه هيفرحك والا لا

خبر ايه ؟ خير يا رب

هو خير ...و انا شايفه أنه هيربط بينا لاخر العمر

هو ايه دا اللي....اوعى تكونى قصدك ...

ايوه يا حسام انا حامل

حامل ازاى ؟؟ انتى مش بتاخدى حبوب ؟؟

باخد بس قدر ربنا ...ربنا أراد انى احمل منك

تحملى ازاى انتى عندك طفلين و انا عندى تلاته و انا متفق معاكى من الاول أننا هنربى الخمس اولاد و خلاص الحمد لله على كدا

طب اعمل ايه ؟؟ دى حاجه غصب عنى

نعم يا اختى ؟ غصب عنك ازاى ؟؟؟ انتى بتحطينى قدام الأمر الواقع يا ثريا ؟؟

لا ابدا انا معرفتش زيى زيك الا اما تعبت و روحت لدكتوره و قالت لى انى حامل فى اربع اشهر

كمان ؟؟؟ اربع اشهر ؟؟ ازاى معرفتيش طول الوقت دا ؟ انتى هتستهبلى ؟

ايه يا حسام ؟؟ انفعالك ده ملوش الا معنى واحد بس ؟؟

معنى ايه يا ست هانم

معناه انك عامل حسابك انك تتجوزنى فتره و انك مش عاوز اى حاجه تربطنى بيك

هو انتى بتفهمى و الا لا ؟؟ انا قلت لك انى استكفيت بولادنا و خلاص مش عاوز اخلف تانى وبعدين مين قالك أن العيال ممكن تربط راجل ؟؟؟

بس انا عاوزه اخلف منك يا حسام

اه يعنى بتعترفى انك انتى اللى عملتى كدا بالقصد ؟؟

لا ابدا ...انا فرحت لما لقيت نفسي حامل منك ...يا حسام انا بحبك

و انا مش عاوز ولاد تانى يا ثريا و اللى فى بطنك دا لازم تتصرفى فيه

اتصرف ازاى بقولك بقا عمره اربع شهور يعنى مينفعش أنزله

انتى كدا اخليتى بالشرط اللى شرطته عليكى انا متجوز عشان ارتاح و انبسط مش عشان اخلف تانى

دا رزق ربنا بعته لينا

بقولك ايه ؟؟؟ مبحبش حد يلوى دراعى انتى فاهمه و الا لا ؟؟ و اوعى من وشي

حسام ..حسام ..رايح فين بس تعالى نتكلم

حسام سابنى و خرج و معرفتش اعمل ايه قعدت ارن عليه ميرضيش يرد عليا
كنت متضايقه اوى و مليش حد اتكلم معاه غير خالتى ناديه اتصلت عليها و حكيت لها كل حاجه و انا زعلانه و بعيط

اهدى يا بنتى انتى حامل و كدا غلط عليكى

هو مش عاوز يخلف منى ليه يا خالتى ؟؟ امال بيحبنى ازاى ؟؟

يا بنتى هو اتغاظ بس من الطريقه هو حس انك بتدبسيه و الراجل كان مخليكى انتى الحته اللى بيرتاح عندها و مش عاوز وجع دماغ و عيل يزن

مش عارفه اعمل ايه يا خالتى ...دا مشي و مش راضى يرد عليا

متخافيش هو شويه كدا و هيهدى و هتلاقيه جاى يصالحك

يا رب يا خالتى

خلى بالك انتى بس من نفسك و من ولادك الواد عبدالرحمن و البت داليا وحشونى اوى

هبقى اجيبهم و اجيلك باذن الله

لا خلى بالك من نفسك و من حملك يا حبيبتى ربنا يكمل لك على خير

تسلميلى يا خالتى

عدى يومين و حسام متصلش بيا كنت بموت و انا مستنياه و عينى على باب الشقه طول الوقت و نفسي اسمع المفتاح و هو بيتحرك و الاقيه داخل عليا

قلت لنفسي أكلمه انا و اراضيه و خلاص
اتصلت عليه لقيته عاملى بلوك
اتجننت دخلت على الواتس لقيته برده عاملى بلوك
يعنى ايه ؟؟؟ يعنى كدا خلاص ؟؟؟ هو خايف منها لتعرف أن عنده زوجه و ابن طيب انا بقا هقولها و اللى يحصل يحصل

معرفش كان عقلى فين و انا بعمل كدا
عملت اكاونت تانى و دخلت عندها و بعت لها رساله أن جوزها متجوز عليها واحده تانيه و حامل منه كمان
شافت الرساله و ردت بمنتهى البرود

انتى مين ؟؟

ملكيش دعوه انا مين

انتى كدابه جوزى لايمكن يعمل كدا

لا عمل و لو مش مصدقه اثبت لك

تثبتيلى ازاى ؟؟

هبعت لك صورته هو و مراته

ابعتى مع انى متاكده انك كدابه

بقا كدا ؟؟ صورتهم اهى و هما سوا

انتى مين ؟؟ انتى مراته ؟؟؟

هى قالت كدا و انا رحت ماسحه الصوره بسرعه و عملت لها بلوك ....انا وصلت لها المعلومه و خلاص  و دلوقتى اللى هو خايف منه خلاص و معايا الولد يعنى ضمنت حقوقى و انا عارفه أنه مش زى اسماعيل مش هياكل حقى ابدا خصوصا أنه بيحبنى اوى و ميقدرش يستغنى عنى
فاتت ساعه و لقيت حسام بيرن عليا
فرحت اوى أنه فك البلوك و قلت خلاص هيصالحنى
لقيت وابل من الشتيمه و الزعيق ....عمرى ما شفت حسام بيتكلم بالطريقه دى

فى ايه انت بتشتمنى ليه ؟ انا عملت ايه ؟؟

عملتيها يا ثريا ؟؟ قلتى لهيام ؟؟ بس انا اللى غلطان ...انا اللى غلطان انى اتجوزت واحده زيك

استنى يا حسام انا مقولتش حاجه

بطلى كدب بقا يا شيخه حرام عليكى خربتى بيتى  بعد ما لميتك و عملت لك بيت ..... صحيح اتق شر من احسنت اليه....... منك لله

أنا خربت بيتك ؟؟ حسام ...حسام

حسام قفل السكه فى وشي و لقيت الدنيا بتدور بيا ....ازاى كنت مجنونه و عملت كدا ؟؟ انا كنت فاكره لما تعرف هيرجع لى تانى ....على العموم هى كدا اكيد طلبت الطلاق و مش هيلاقى غيري برده يعنى هيرجع لى ....انا لازم أهدى و افكر اتعامل ازاى انا برده اللى هكسب هو ميقدرش يستغنى عنى

مر اسبوع ولا فى حس ولا خبر بس كنت متاكده أن الوقت فى صالحى .....اكيد هى دلوقتى غضبت و مشيت على بيت اهلها و مصممه على الطلاق مش بعيد الاقيه داخل عليا دلوقتى ماهو مفيش غيري
و أنا قاعده بفكر فى الكلام  ده لقيت حسام بيرن عليا قلت خلاص هو اكيد هدى من ناحيتى و اكيد وحشته
رديت بسرعه لقيت صوت واحده ست بيرد عليا

ايوا يا حسام

ايوا يا مدام

انتى مين ؟؟

أنا اللى خدتى جوزها يا بجحه يا اللى معندكيش دم انا ستك و تاج راسك يا بت

انتى بتقولى ايه و فين حسام ؟

قصدك حسام جوزى اللى خطفتيه يا خطافه الرجاله ؟؟

ليه هو عيل صغير و خطفته ؟؟

اه كان بيلعب .... لعبه عجبته شويه لعب بيها و خلاص زهق منها و هيرميها فى اقرب صفيحه زباله

احترمى نفسك

أنا اللى احترم نفسي يا زباله ؟؟ انتى فاكره يا بت انك هتقدرى تهدى بيتى ؟؟؟ كان غيرك اشطر يا بت انتى ....دا و لا انتى و لا عشره زيك يا مقشفه يا زباله بصى لنفسك يا شاطره انتى بنت مين يا لمامه ؟؟

لو سمحتى ميصحش كدا انا مراته زيى زيك

اخرسي متقوليش زيى زيك دى ابدا و بعدين انا عايزاكى تسمعى اللى جاى دا كويس حسام ....

نعم

أرمى عليها اليمين

انتى طالق يا ثريا

اهو طلقك يا حلوه و شوفى بقا هتعملى ايه بالتلات عيال اللى معاكى ....الصبح انا جايه ع الشقه و حسك عينك الاقيكى فيها هرميكى انتى و اولادك من الدور الرابع مش الشقه فى الرابع برده يا حسام ؟

ايوا فى الرابع

اسمعى يا بت انتى لما تحبى تتجوزى ابقى شوفى حد شبهك مش تطمعى فى اسيادك فاهمه و الا لا ؟

قفلت السكه و انا جالى صدمه مش مصدقه اللى سمعته كنت خايفه و مش عارفه اتصرف ازاى ؟ مجاش فى دماغى الا انى اقوم الم هدومى و اخد ولادى و امشي قبل ما تيجى و تعمل فينا حاجه
و فعلا قمت خدت حاجتى و اولادى و ركبت عربيه و رحت على سكنى القديم و للاسف لقيت صاحب البيت اجره
خالتى ناديه استضافتنا و حكيت لها على كل اللى حصل و هى غلطتنى و انا عرفت انى غلطت بس خلاص الندم معدش ينفع

قبلت انى اكون زوجه تانيه و عشت فى الضل و دى كانت غلطه لأن الراجل اللى يخاف يقول لمراته الاولى اكيد هيجى وقت و يطلق التانيه لما الاولى تعرف
و دا اللى حصل معايا
انا غلطت فى حق نفسي و فى حق ابن ملوش ذنب .... انضم على اخين تانين من اب تانى ....بس الحمد لله أنا المره دى كنت اقوى شويه و معايا الخاتم اللى ادهولى حسام هديه جوازنا بعته و أجرت مكان اعيش فيه انا ولادى و أجرت محل صغير فتحته كوافير و اهى ماشيه

عارفه انى غلطانه فى حاجات كتير و راضيه بجزائى ...و اكتر حاجه بتألمنى لما افتكر حسام و العيشه اللى كان معيشهالى و أنا خربت على نفسي بغيرتى و الحقد اللى ملى قلبى
حكيت لكم حكايتى يمكن حد يتعلم منى و ميغلطش غلطتى
اوعى تتجوزى فى السر ،
اوعى تخربى على نفسك لو معاكى راجل كويس و بيحبك
الغيره مره بس اوعى تخليها تدمر لك حياتك

                  🌷تمت 🌷
                  ‏
أنا عاوزه اقول حاجه ثريا مثال لناس كتير جواها الخير و الشر بتخطئ و تصيب يمكن هى متسرعه شويه و ناقصها رجاحه العقل و دا اللى أدى بيها انها تخسر حياتها مرتين
القصه دى مفروض نتعلم منها حاجات كتير اوى منها أننا مندخلش في حيات الآخرين مهما كانوا قريبين مننا الا بالنصيحه ،
كمان مينفعش نزعل حد من ابوينا و نخاصمه لان ممكن يحصل زى ما حصل لثريا و ملحقتش تصالح امها و ندمت أشد الندم
لازم نفكر بالعقل و منستسلمش للظروف و نرمى نفسنا فى اى علاقه الا اما ندرس كويس اوى العلاقه دى صح و الا غلط و طبعا كله نصيب فى الاول و الاخر بس ربنا ادانا عقل نميز بيه و نحاول نتلمس الصح و منتسرعش
‏
أرجو أن القصه تكون عجبتكم ، اذا عجبتكم القصه ارجو الدعاء لوالدى رحمة الله عليه و لسائر موتى المسلمين بالرحمه والمغفره
و كل عام و حضراتكم جميعا بخير
#د.جيهان_عادل

قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي

#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..