الزوجه الثانيه
الجزء الثانى و العشرون
خلاص شوفى عاوزه ايه و اعمليه و لا يهمك من حد يلا اتصلى قدامى دلوقتى باخوكى عشان اعرف رده مع انى متاكده إنه مش هيكسفك
حاضر ...هتصل و ربنا يسترها
الو
الو ..ازيك يا احمد
مين معايا ؟؟
انت مسحت رقمى و الا ايه ؟
لا ابدا انا غيرت عدة الموبيل الظاهر رقمك سقط منى ...ازيك يا ثريا
الله يسلمك يا احمد
خير فى حاجه ؟؟؟
اه فى موضوع كدا كنت عاوزه اقولك عليه
موضوع ايه ؟
انا جايلى عريس و كنت عاوزاك تيجى و تتفق معاه يعنى
اول ما قلت كدا سمعت مرات اخويا بتقول :
عريس ؟؟؟؟؟ههههههه طب ما المطلقه بتتجوز اهى امال كنتى محرمه عليا الجواز ليه ؟؟ شوفتى بقا لفت الأيام و دارت و اتحطيتى فى نفس مكانى ازاى ؟؟؟
انت فاتح الاسبيكر يا احمد ؟؟
اه يا حبيبتى فاتحه و سمعت كل الكلام اللى قلتيه و انا اللى خليته يرد عليكى من الاول اصلا ...
يعنى الرقم معاك متمسحش و لا حاجه ؟
لا مش متمسحش ... و بقولك ايه بقا عاوزه تنجوزى روحى اتجوزى بعيد عنا ..عماله تتمحكى فينا ليه ؟؟؟ اعملى اللى عاوزه تعمليه أن شالله تنجوزى عشره ملناش فيه
لو سمحتى انا مبكلمكيش انتى ....انا بكلم اخويا
اخوكى يا حبيبتى سامع كل اللى بقوله لكى و موافق على كل اللى كلامى
صحيح يا احمد انت موافق على كلامها ؟
انسينى يا ثريا ملكيش اخ اسمه أحمد
كتر خيرك يا اخويا يا ابن امى و ابويا
قفلت السكه و انا مش قادره امسك نفسي من العياط
خالتى ناديه اخدتنى فى حضنها و قعدت تطبطب عليا و تقولى
حقك عليا انا اللى خليتك تكلميه بس مكنتش اعرف انه جاحد كدا ؟؟؟ اعوذ بالله ...دا مراته عقربه مفيش كدا و الله
كنت عارفه أنه هيعمل كدا ...دا مسألش على لحمه لما عرف انى اتطلقت يبقى هتنتظرى ايه يا خالتى ...ربنا يسهل له طريقه يا رب انا مش زعلانه منه
خلاص يا بنتى و لا تزعلى نفسك انا هكون معاكى و لو حبيتى اجيب لك عمك انور زى ما قلت لك
لا انا هجوز نفسي و مش هيهمنى الا روحى و اولادى بعد كدا
شاطره يا بت ...قومى يلا اغسلى وشك ده و شوفى حالك يلا متشليش فى نفسك
لا مش هشيل...... خلاص اتعودت
رجعت اوضتى و انا مقهوره و بعد ما كان جوابا تردد من الجواز لقيت نفسي مصممه عليه مبقاش ليا الا الحل ده
انا انسانه و من حقى اعيش و انا مش هضرها فى حاجه و لا هتعرف بوجودى من أصله يبقى ليه أحرم نفسي من عيشه اسريه و راجل ياخدنى فى حضنه و يطبطب عليا
مسحت دموعى و اتصلت على حسام و طلبت منه يجى يخرجنى انا و الولاد
حسام فرح اوى و لقيته واقف بعربيته قدام البيت بعد المكالمه بربع ساعه
ولادى كانوا فرحانين اوى أنهم هيخرجوا و يتفسحوا اخيرا
حسام أخدنا و رحنا مول كبير اشترالى منه هدوم ليا و لاولادى و مشينا اتفرجنا على المحلات اللى فى المول و اكلنا ايس كريم
بعد كدا عزمنا على بيتزا ...كنتى شايفه ولادى سعدا جدا و فرحانين اوى بقالى كتير مشفتهم فرحانين بالشكل دا
بعد كدا حسام اخدنا الملاهى و فسحنا و ركبنا كلنا العاب كتير هناك
رجعنا البيت انا و اولادى و احنا فى منتهى السعاده و هنا قلت لهم أن حسام هيبقى بابا و هياخدنا فى بيت كبير حلو و يفسحنا كتير و يجيب لنا هدوم و حاجات حلوه كتير
عبدالرحمن كان ساكت معرفش ليه لا زعلان و لا فرحان فسرتها ساعتها إنه مش فاهم اوى أما داليا فكانت صغيره اوى على أنها تفهم اللى بقوله لها
اتفقت مع حسام على كل تفاصيل الزواج و هو سافر عشان يجهز الشقه و بقى يبعت لى صورها اول باول
طبعا حسام ادانى مبلغ محترم رحت بيوتى سنتر جهزت نفسي و اشتريت فستان سواريه ابيض عشان كتب الكتاب و بدله لعبد الرحمن و فستان ابيض لداليا
اتفقنا أننا نكتب كتابنا فى الازهر و بعد كدا نطلع على اسكندريه
و بالفعل جه يوم الزواج و كنت فرحانه انى اخيرا هرجع زوجه مره تانيه و هيكون ليا مكانه وسط الناس مش درجه تانيه زى ما معتبرنى
حسام فات عليه فى الكوافير و كانت معايا خالتى ناديه و اولادى و لبست الفستان و عليه طرحه بيضا و المكياج كان جميل اوى و مغير شكلى بعد ما كنت مهمله فى نفسي بقالى اكتر من سنتين لدرجه ان خالتى ناديه معرفتنيش اول ما خلصوا مكياج
حسام اخدنا و طلعنا على الأزهر و هناك لقينا أصحابه حوالى خمسه و عيلته اخواته البنات ووالدته
سلمت عليهم و شكلهم ناس طيبين و فى حالهم
اول ما قعدنا و احنا مستنين الشيخ اللى هيكتب لنا الكتاب طلع لى خاتم سولتير و لبسه ليا و قال شبكتك يا عروسه
فرحت اوى لانى مكنتش متخيله أن هيجيلى شبكه زى اى ست و حتى مجرأتش اطلب منه اى حاجه بس هو فعلا بيفهم و الموضوع ده كبره فى نظرى اوى
الشيخ جه و طلعنا البطايق حطيت ايدى فى ايده ...كنت حاسه ان ايده حاضنه ايدى ..احساس افتقدته من سنين
بدأ الشيخ يتكلم و يقول الكلام اللى بيتقال فى المناسبه دى و انا باصه على حسام و مركزه على عنيه اللى بتلمع و باين فيها الفرح و اول مره اخد بالى من شعره الرزى الناعم و كان مصففه بشكل حلو اوى
عنيا كانت فى عنيه وقلبى طاير من الفرح و عقلى بيقولى خلاص اخيرا هترتاحى و ربك هيعوض صبرك خير ....حسام راجل جدع و اكيد هتلاقى اللى افتقدتيه فى اسماعيل
خلصنا كتب الكتاب وسط تبريكات و زغاريط من اخوات حسام و خالتى ناديه
سلمنا على الكل و ركبت انا و اولادى مع حسام و رحنا على شقتنا فى اسكندريه
الشقه كانت احلى من الصور بكتير
بقيت مش مصدقه نفسي أن دى شقتى
حسام كان عامل اوضه لولادى جميله اوى الولاد كانوا ناموا فى السكه و دخلناهم سرايرهم اول ما وصلنا
حسام اخدنى على اوضه النوم و فتح لى الدولاب ولقيته مليان هدوم من كل شكل و لون
و لقيته جايب لى مكياج بماركات عالميه غالى جدا
كان عاملى مفاجات كتير اوى و مش ناسي اى حاجه ..
عوض ربنا كبير اوى احمدك يا رب و اشكر فضلك.
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق