دمرتنى
الجزء الرابع و الاخير
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
صلوا على خير الأنام يا ساده يا كرام 😍
الدكتور كشف على احمد كويس جدا و خرج لهم
قعد على مكتبه و الكل قاعد منتظر الدكتور هيقول ايه ؟
خير يا دكتور
خير .... الاستاذ أحمد طبيعى جدا و مفيهوش اى حاجه
امال اللى حاصل دا ايه يا دكتور ؟؟
و الله مشكلة الاستاذ أحمد مش مشكله طبيه ..الله اعلم بقا ممكن يكون ضغط نفسي
تمام يا دكتور متشكرين اوى
و مشى احمد و حماه ووالدته اللى كانت شايفه ابنها تايه و مش عارفه تعمله اى حاجه
تانى يوم لقاهم جايبين له شيخين و جايين
الشيوخ قرت عليه و قالوا إنه معموله تلات اعمال واحد بالربط عن مراته و التانى بخراب البيت و التالت بالموت
الكلام ده كان فى شقة والدته تحت
احمد طلع مش شايف قدامه و مش حاسس بالدنيا و لقى نفسه جاب كام شريط لادويه مختلفه و اخد ٣٥ حبايه و هى كانت شايفاه و متكلمتش لحد ما اغمى عليه و نقلوه المستشفى و عملوا له غسيل معده
و لما سألوا امل ايه اللى حصل ؟؟ هو اخد برشام قالت مخدش بالرغم انها كانت شايفاه
الدكتور بقى يستغرب ازاى هى بتقول كدا و ام احمد شكت فيها و قالت اكيد البت دى هى اللى عامله عمل لابنى أنه يموت نفسه
و لما قالت لعمتها كدا عمتها جابت له شيخ تانى و جه قال إنه مش معمول له أى حاجه ...و للاسف كانوا متفقين مع الشيخ
ده عشان يقول الكلام ده و يبعد الشبهه عنهم
بعد كدا احمد حاله اتدهور اكتر و حاول ينتحر اكتر من مره
مره والدته مسكت فيه و هو هيرمى نفسه من البلكونه و مره تانيه طلع على السطح و كان هيرمى نفسه لولا واحد جاره لحقه
بعد كدا و لما الحال وصل لده أحد الشيوخ قاله لازم تخرج بره البيت و بالفعل احمد اخد عروسته و راح أحد البلاد الساحليه
و هناك احمد فعلا حس بتحسن و قدر أنه يتتم موضوع الزواج
رجع احمد و عروسته بعد يومين و اول ما دخلت البيت قالت له طلقنى
و اطلقك ليه يا بنت الناس ؟؟؟
مش عاوزه اعيش معاك انا حره
انتى ليكى كبير انا هرد عليه و اشوف هل الكلام ده هيعجبه و الا لا
و جه ابوها و مغلطهاش و اتهم احمد أنه مبيعملش المستحيل عشان يحايل مراته
احمد بص له باستغراب و قاله :
يعنى انت يا عم الحج موافق على الكلام اللى بنتك بتقوله ده ؟؟
بنتى مش غلطانه و انت اللى مقصر معاها من اول الجوازه السوده دى
انا اللى مقصر ؟؟ كنت فاكرك هتعقلها و تقولها عيب كدا اقعدى فى بيت جوزك
لا مش هقولها و هاخدها معايا كمان لحد ما تعرف قيمتها
ابو احمد رد و قاله اتكلم كلام عدل يا غريب
عليا الطلاق بالتلاته بنتى ما قاعده فى بيت ابنك يا عدلى و لا ليله واحده كمان
ابو امل اخدها و مشي ...و احمد مكنش مصدق أن الكلام ده يحصل من عمه اللى المفروض يفهم فى الأصول
طبعا فى ناس كتير حاولت تدخل بالصلح لكن للاسف جميع المحاولات فشلت
احمد بعد كدا بقى يخاف من اى حاجه ، يخاف يدخل الحمام ، يخاف لو جرس الباب رن ، يخاف يدخل البيت ....الخوف كان ملازمه على طول
ابوه لما شاف كدا جاب له شيخ تانى
احمد سأله انا عاوز افهم ايه اللى بيحصل لى دا يا عم الشيخ ؟؟
دا من تأثير سحر يا ابنى
و مين عامل السحر ده ؟؟ انا لما سالت الشيوخ اللى قبلك محدش رضى يقولى
و لا حد هيقولك
و ليه ميقولوش ؟؟
علشان الناس متقعش فى بعض
طب قولى و انا و الله ما هتكلم انا شاكك فى حاجه بس نفسي اتاكد
طيب انا ممكن اخليك تشوف بعينك كل حاجه
صحيح ؟؟
ايوه صحيح بس ....
بس ايه ؟؟
هتتحمل اللى يجرالك ؟؟؟
هو ممكن يجرالى ايه ؟؟
ممكن متخرجش من الاوضه حى أو تخرج من غير عقلك من اللى هتشوفه
و انا موافق بس اتأكد مين عملى كدا
الشيخ نيم احمد و حضر عفريت و خلى احمد يشوف بعينه كل حاجه
شاف مراته و هى بتدهن على جسمها العمل اول يوم فرحهم و بعد كدا شافها و هى بتحط له فى المهلبيه و اخيرا شافها و هى بتحط له عمل فى ازازة البرفان و شاف عمتها و هى بتديله عمل تانى يوم جوازه لما اوهمته أن دا علاج باعته الشيخ
و كمان شاف الراجل اللى عملت عنده العمل و عرف هو مين
احمد اتأكد أن امل مش كانت عاوزه و بس لا دى كانت عاوزه تموته كمان
سأل نفسه كتير ايه كميه الشر دى ؟؟ ليه عاوزه تموته و هو معملش لها اى حاجه
الشيخ شافه و هو فى حاله الحيره دى سأله
مالك يا ابنى
ليه يا عم الشيخ كميه الشر دى كلها ؟؟ ليه مقلتش لا من الاول و خلاص
هى يا ابنى كانت مشغوله بغيرك و كانت بتتمنى تتجوزه
طب و ليه مرفضتش لما اتقدمت لها ؟؟
علشان ابوها غصب عليها و هى معرفتش تقول له لا و كانت عاوزه تيجى منك انت
يا ريتها صارحتنى و قالت لى انها مش عاوزانى و لا كانت بهدلتنى و دمرتنى بالشكل ده
معلش يا ابنى دا ابتلاء و كل واحد بياخد نصيبه ...لازم تبقى راضى بقدر الله
و نعم بالله يا عم الشيخ ...راضى الحمد لله
طبعا الموضوع انتشر فى البلد و عرف أن عروسته و مراته كانت بتبعت صوره و هو نايم لاصحابها و كانت كاشفه كل أسرارهم الداخليه و كأن الناس عايشه معاهم فى غرفة النوم
كل ده عرفه لما لقى صاحباتها باعتين له اسكرينات بكلامها بكلام فاضح و ميصحش ابدا
احمد قرر أنه يطلقها غيابى( دا بعد ما ادالها حاجتها كلها ) و أنها لا يمكن تدخل بيته مره تانيه .
بعدها اهلها رفعوا عليه قضايا نفقه و متعه ولسه للان القضايا شغاله
عم مراته عرض عليه أنه يرجع مراته و هيجيبوا له عربيه و هيراضوه باللى هو عاوزه ( دا طبعا بعد ما البنت اتفضحت باللى عملته فى ابن عمها )... لكن هو رفض .
احمد حاليا خطب لكن للاسف اعمال السحر مش سايباه فى حاله
احمد حكالى حكايته بنفسه و هو معانا هنا و عاوز يعرف رأى الناس فى اللى حصل له ده و ليه واحده المفروض انها بتشتغل فى جمعيه خيريه يعنى بتعمل خير تفكر انها تعمل كدا ؟؟ اسئله كتير فى دماغه مش لاقى لها حل ،
احمد كان عاوز الناس كلها تعرف حكايته يمكن حد يدعيله دعوه تبعد عنه الأذى اللى لسه بيلاحقه لحد دلوقتى .
تمت
انا عاوزه اقول كلمه ...النفس الانسانيه غريبه جدا ، مفيش حد ملاك دايما و مفيش حد شيطان دايما ، كلنا فينا الخير و فينا الشر ، كلنا بنعمل غلطات و لولا ستر الله كنا جميعا اتفضحنا ،
و بالرغم من كدا و من وجود الخير و الشر جوانا لكن يا بخته اللى يغلب الحته الخير اللى جواه على الشر ، ساعتها هيكسب فى الدنيا و الاخره . 😊
ارجو ان القصه تكون عجبتكم و لو عجبتكم القصه ارجو الدعاء لوالدى رحمة الله عليه و سائر موتى المسلمين .
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق