قضية شرف
الجزء الاول
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
صلوا على خير الأنام يا ساده يا كرام 😍
انا جايه احكيلكم حكايه ، هى مش حكايتى بس هى أثرت على حياتى كلها ، كسرت جوايا اى حاجه اتربيت عليها أو عرفتها ، حولتنى لحد تانى انا معرفوش ،كائن ممسوخ مشوهه نفسيا ، فاقد للحياه
انا فعلا مت و انا على قيض الحياه
الحكايه بدأت من حوالى اربع سنين لما جرس التليفون رن و كانت نمرة اختى الهام
الو ...ايوا يا الهام
لا انا مش الهام ...انا صاحبتها ثريا
صاحبتها ؟؟؟ امال فين الهام ؟؟؟
الهام هنا فى المستشفى العام
ليه فى ايه ؟؟ مالها اختى ؟؟
متخافيش ...هى داخت شويه نقلناها المستشفى
يعنى هى كويسه و الا تعبانه ؟؟
متخافيش هى كويسه بس تعالى بسرعه
حاضر مسافة السكه بس هتلاقينا قدامك
قفلت السكه و جريت على ماما و اخويا سعد اللى كان فى الوقت ده عنده ٢٨ سنه
الحقى يا ماما الهام فى المستشفى العام
مين قالك الكلام ده يا ندى ؟؟
صاحبتها اتصلت بيا حالا و قالت لى
طب البسوا بسرعه على ما أنزل اسخن العربيه يا اما
حاضر يا سعد ....صاحبتها مقالتش لكى مالها يا ندى ؟؟
بتقول داخت و هى فى كليتها و نقلوها المستشفى
اه نسيت اقولكم أن اختى الهام كانت فى تانيه كليه تربيه
ركبنا العربيه انا و امى مع سعد ....هى دى اسرتنا الصغيره بعد موت والدى الله يرحمه ، ملناش غير اخونا ده اللى هو فى مقام ابونا و اللى بيقوم بكل طلباتنا و حنين علينا اوى
امى طول الطريق قلقانه و عماله تستغفر و تسبح و تقول لا حول ولا قوه الا بالله استرها يارب
مالك يا اما قلقانه ليه ؟؟ بتقولك شويه دوخه و زمانهم ادولها محلول و اسعفوها
معرفش يا سعد قلبى مقبوض اوى يا ابنى...اختك بقالها فتره دبلانه و خاسه و مش على بعضها ابدا
ايوووووه جينا بقى للتهيئات ...انتى دلوقتى هتنسجى أن البت خلاص حالتها صعبه و عندها الأمراض المستخفيه ههههههههه
لا انا بتكلم بجد يا سعد ، اختك اتبدلت يا ابنى مبقتش الهام الورده المفتحه
يا اما تلاقيها ضعفت من كتر المذاكره انا كل ما ادخل عليها الاقيها حاطه وشها فى الكتاب تقوليش محدش اتعلم غيرها ؟ انتى عارفه انها شاطره و جابت السنه اللى فاتت تقدير و كانت بتقولى انها هتحاول تتفوق كمان عن السنه اللى فاتت ...متقلقيش تلاقيها اجهدت نفسها فى السهر و المذاكره بس
يارب جيب العواقب سليمه
وصلنا المستشفى و امى برده مش سايبها القلق
انا بقا بقيت اضحك على كلام سعد لان فعلا امى بتخاف علينا اوى و لو حصل لنا اى حاجه صغيره بتكبرها جدا و بتحسسنا انها نهايه العالم
نزلنا من العربيه ووقفنا بعيد انا ووالدتى
سعد دخل يسأل عن الهام ...
الموظف قاله أنها فى عنبر الحريم
سعد شاور لنا بعد ما قطع تلات تذاكر و طلعنا الدور التانى
دخلنا العنبر و اللى كان مليان ناس
سعد مكنش عاجبه المنظر وبص لامى و قالها
ايه اللى جاب بنتك هنا ؟؟ كانت كلمتنى و انا ودتها مستشفى خاص
تلاقى صحابها اللى جابوها يا ابنى
اهى ...الهام اهى يا ماما
جريت على سرير الهام اللى كان فى اخر العنبر و كان واقف جنبها زميلتها اللى اتصلت بينا
هى كانت نايمه و مش حاسه بالدنيا
سلمنا على صاحبتها و امى سألتها
ايه اللى حصل لها يا بنتى ؟؟
مفيش يا خالتى داخت و جبتها على هنا
و الدكتور قال ايه ؟؟؟
مقالش ...معرفش
اخويا استغرب و قال لنا انا هروح اجيب الدكتور عشان اعرف منه مالها يمكن يكون ضغطها وطى و الا حاجه
ثريا صاحبة اختى ظهر على وشها القلق و لقيتها بتقول
الحمد لله انكم وصلتوا لها ..انا لازم امشي بقا عشان اتأخرت و اهلى زمانهم قلقانين عليا
اتفضلى يا بنتى كتر الف خيرك
و مشيت ثريا ...لا جريت و كنت مستغربه هى بتجرى كدا ليه ؟ بس قولت فى نفسي يمكن فعلا خايفه من أهلها
بعد خمس دقايق لقيت سعد داخل و معاه الدكتور و بيشاور له على سرير الهام
الدكتور مسك التقرير المتعلق فى السرير و قراه
مالها يا دكتور ؟؟ عندها ايه ؟
دى اختك صح ؟؟؟
ايوا اختى
طيب هى حضرت للمستشفى و هى فى حاله اعياء شديد نتيجه نزيف حاد
نزيف ؟؟؟ من ايه النزيف ده ؟؟
للاسف كانت بتحاول تجهض جنين و للاسف ملحقنهوش
انت بتقول ايه يا دكتور ؟؟
اجهاض ايه و جنين ايه ؟؟؟ انا بسألك عن دى ...اللى نايمه قدامك دى ؟؟
منا عارف ...و بقولك أن كان فى محاوله اجهاض و عملت لها نزيف حاد و احنا نقلنا لها دم كمان
يا خبر اسود و منيل
معلش يا حاجه ربنا يعوض عليكم باذن الله
الدكتور خرج و كلنا وقفنا و كأننا مضروبين بالنار ، مفيش حد قادر ينطق
بصيت فى وش اخويا لقيت وشه اسود و حط رأسه فى الارض
امى بقا بقت تخبط على رجليها باديها الاتنين
مسكت اديها و الدموع مغرقه وشي...
ابوس ايدك يا امى متعمليش كدا الناس بتتفرج علينا 🥺
يا ترى سعد هيعمل ايه فى المصيبه دى ؟؟؟ دا اللى هنعرفه فى الجزء الثاني باذن الله تعالى
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق