دمرتنى
الجزء الثالث
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
صلوا على خير الأنام يا ساده يا كرام 😍
احمد و هو طالع على السلم كان فاكر أنه خلاص هيودع حياة العزوبيه و هيبقى زوج و رب اسره و لكن مش كل ما يتمناه المرء يناله
طلع احمد مع امل و اتقفل عليهم باب واحد
اول ما دخل شقته باس ايدها و قالها
مبروك يا عروسه
ردت رد باهت بصوت واطى
الله يبارك فيك
انا باذن الله هحاول اسعدك على اد ما يقدرنى ربنا
هزت امل رأسها و هى موطيه دماغها فى الارض و مش بتبص له
احمد تخيل أن ده كسوف ...فحب يطلعها من حاله الكسوف دى
ايه مش جعانه ؟؟؟
لا
لا ايه بس ؟؟ تلاقيكى من الصبح فى الكوافير و مكلتيش حاجه ...بصى ادخلى غيري هدومك و انا كمان هغير هدومى و نأكل سوا اول اكل فى بيتنا
حاضر
احمد و امل غيروا هدومهم و قعدوا ياكلوا صنيه العشا اللى امها كانت محضراها على التربيزه و عمرانه بما لذ و طاب
و كل شي تمام
بعد كدا أحمد دخل مع امل اوضتهم علشان يبدأوا حياتهم الزوجيه
لكن .........
احمد حس أن فى حاجه مش طبيعيه ، حس أنه مش قادر يقرب منها أو يلمحها حتى
حس أنه مخنووووق اوى و أن فى قوى اكبر منه بتخليه يبعد عنها
احمد لقى نفسه بيخرج بره الاوضه ..كان عاوز هوااا
طلع فى البلكونه يشم شويه هوا ...و يكلم نفسه
هو فى ايه ؟؟ انا مش قادر ادخل الاوضه
احمد فضل قاعد فى البلكونه طول الليل
الساعه سبعه الصبح لقى جرس الباب بيرن
فتح لقا حماه ابو امل و معاه شيخ
ايه دا فى ايه ؟؟؟
مفيش يا ابنى انا و عمك الشيخ جايين نطمن عليك
و تطمنوا عليا ليه يعنى ؟؟؟
يا احمد انا زى ابوك و بنتى قالت لى على كل حاجه
بنتك قالت لك ايه ؟؟؟
قالت انك مقربتش منها و دى حاجه ميتسكتش عليها ...متتكسفش منى فى ناس كتير بيحصل لهم كدا ليلة دخلتهم
احمد كان فى حاله ذهول ، عقله مشوش و مش فايق و لا كان نام طول الليل
قرر أنه يسكت و يشوف الشيخ ده هيقول ايه ؟
الشيخ حط ايده على جبهة احمد و قعد يقول كلام مش مفهوم بصوت واطى و بعد ما خلص
قال أحمد معمول له كذا عمل و هيحتاج أنهم يتفكوا
اعمال ايه اللى بتتكلموا عليها ؟؟؟ يا عمى مفيش الكلام ده ...و بعدين هو حصل ايه يعنى ؟؟
محصلش يا ابنى بس عمك الشيخ بيقول اهو
بيقول ايه ؟؟؟
خلاص اهدى يا ابنى اهدى ....احنا هنمشي مدام كلام الشيخ مش عاجبك
و كلامه ده يعجب مين ؟؟
خلاص حقك علينا ...يلا يا عم الشيخ
و خرج ابو امل و قعد احمد على كنبه الانتريه مذهول من اللى حصل ؟؟ امتى مراته قالت لابوها على الكلام ده ؟ و ازاى اصلا يجيلها الجرأه تعمل كدا ؟؟
احمد دخل نام فى اوضه الاطفال و هو حاسس أنه تعبااااان ، الدنيا بتلف من حواليه و كأنه غرقان فى بحر واسع
راح فى النوم اخيرا و قام على جرس الباب بيرن بعد العصر
قام قعد مكانه و لسه بيفتح عنيه سمع صوت عمة مراته جايه و بتقول بصوت عالى
اتفضل يا سيدنا الشيخ ... فين جوزك يا امل ؟؟
نايم جوه يا عمتى فى اوضه الاطفال
روحى صحيه اجرى سيدنا الشيخ عاوز يشوفه
هنا خرج احمد قبل ما امل تدخل له
عمة امل بصت له و ابتسامه شماته على وشها
ازيك يا عريس
اهلا يا عمتى
تعالى اقعد جنب عمك الشيخ هنا عشان يكشف عليك
و يكشف عليا ليه ؟؟
انت مش الصبح مقتنعتش بالشيخ اللى اخويا جابه ؟؟ انا بقا جبت لك شيخ تانى عشان يأكد أو ينفى الكلام ...تعالى يا حبيبي ربنا يهديك
احمد قعد و كأنه مسلوب الاراده ، و كأنه فى حلم و بقى يمنى نفسه أنه اكيد هيصحى منه
الشيخ التانى قال برده أن فى أعمال و سحر
عمتها اخدته و نزلوا بعدها احمد تعب اوى و بقى مش قادر يقوم من مكانه
يومين نايم و مش قادر يقوم و كوابيس رهيبه كل ما عينه تغمض
بعد يومين عمتها جت و قالت له
يا حبيبي انت لسه تعبان ؟؟ انا جبت لك حاجه من الشيخ هتشربها و هتكون زى الفل
و طلعت ازازه صغيره من البوك بتاعها و قالت لامل هاتى كوبايه ميه يا حبيبتى
امل جريت جابت الميه و عمتها فرغت الازازه فى الكوبايه
احمد شرب الكوبايه من هنا و بقى هيموووووت بقى يتلوى زى التعبان
عمتها قالت له
لا مبدهاش بقا ...انت لازم تعرض نفسك على دكتور ذكوره انا هحجز لك بكرا
و فعلا تالت يوم الفرح كانت حجزت له عند الدكتور
احمد كان مستسلم جدا و عاوز يعرف ايه السبب فى الحاله اللى هو فيها دى
ام احمد طبعا شافت حالته و اللى حاصل و بقت تعيط بالدموع و مش عارفه ابنها حصل له ايه ؟؟؟
ابنها كان زى الفل و فى خلال يومين دبل و بقى اصفر زى اللمونه
ام احمد جابت واحد جارهم شيخ ازهرى و راحت لابنها لقته رايح للدكتور مع حماه
راحوا كلهم للدكتور
و دخل احمد للكشف
خير يا استاذ احمد بتعانى من ايه ؟؟
مش بعانى من حاجه يا دكتور
ههههه امال جايلى ليه ؟
هنا حماه نطق :
اصله محرج يا دكتور ...هو كان فرحه من تلات ايام و محصلش حاجه يعنى
اه ....محصلش دخله يعنى ؟؟
ايوا يا دكتور و احنا جايبينه لحضرتك تكشف عليه و تقولنا فيه ايه ؟؟
طيب اتفضل يا استاذ احمد ورا البارفان نام على السرير
حاضر
الدكتور كشف على احمد كويس جدا و خرج لهم
قعد على مكتبه و الكل قاعد منتظر الدكتور هيقول ايه ؟
خير يا دكتور
خير .... الاستاذ أحمد ....
يا ترى الدكتور هيقولهم ايه ؟؟؟ هل عنده مشكله صحيه تمنعه من الزواج ؟؟ دا اللى هنعرفه فى الجزء الرابع باذن الله تعالى
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق