دمرتنى
الجزء الثانى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
صلوا على خير الأنام يا ساده يا كرام 😍
طبعا ام احمد زعلت و اتحمقت اوى و حلفت برأس ابوها إنه مش هيمر الاسبوع الا و هى خاطبه لابنها عروسه احلى منها
مر يومين و دخلت ام احمد عليه و هى بتقوله
ابسط يا عم لقيت لك عروسه تقول للقمر قوم و انا اقعد مطرحك
لقتيها فين دى يا ماما ؟؟
المدرسه بتاعه بنت عمك سما ، شفتها اول امبارح و هى طالعه من عندهم بس ايه بسم الله ما شاء الله قمرررر و تضرب ست امل المتعنطظه دى مية مره
يا ماما هو بالشكل ؟؟؟
لا طبعا و بالادب و الاخلاق ...هو انت فاكر يا واد انى مسألتش عليها و جبت قرارها ؟؟؟ دا ابوها وكيل وزاره و امها مديره مدرسه و اهلها ناس اصلا بصحيح
و لو رفضونا ؟؟؟
هما مين اللى يرفضونا دول ؟؟ محدش يقدر يرفضك ابدا
هههههههه منا لسه مرفوض اهو يا ماما مبقليش يومين
و هو انت بتاخد على كلام الجماعه دول ؟؟؟ هما كانوا يطولوا واحد زيك ؟؟ ها قلت ايه ؟؟
فى ايه ؟؟
فى العروسه ؟
مش لما اشوفها و اعرف تعليمها ايه ؟ و بتفكر ازاى ؟؟
أن شاء الله هتعجبك اوى و انا هتصل بأمها اخد ميعاد منهم
لا ارجوكى يا ماما استنى شويه لما حتى اشوفها من بعيد و هى طالعه من عند سما اشوف هتقبلها و الا لأ
و ماله هى بتيجى لها مرتين فى الاسبوع و بكرا ميعادها انت بقا ممكن تشوفها و هى داخله أو خارجه
ماشي يا ماما
و انا بقا هروح اتصل بعمتك و اقولها أن احنا لقينا عروسه احلى من العروسه اللى جابتهالنا مليون مره
و ليه كدا يا ماما تزعلى الناس منا ؟؟
لا مبزعلش حد و لا حاجه بس انا مقهوره أنهم يرفضوا ابنى و لازم اغيظهم انا كمان ، انا متاكده أن عمتك هتروح تقولهم انك هتخطب
يا ماما كبرى دماغك
ملكش دعوه انت
انتى حره يا ماما
تانى يوم احمد وقف فى البلكونه فى ميعاد درس سما بنت عمه و شاف بنت جميله محجبه ماشيه على استحياء و دخلت البيت
احمد من شكلها و شكل هدومها الواسعه حس انها بنت كويسه و قال لامه أنه موافق مبدئيا يروح يطلب ايدها
ام احمد فرحت اوى و قالت له
خلاص لما ابوك يجى نقوله و ناخد رايه برده و بعد كدا نتوكل على الله و نخطبهالك
على المغرب جرس التليفون رن ردت ام احمد عشان تلاقى ابو امل على التليفون
ازيك يا ست ام احمد
الله يسلمك يا ابو امل
انتى زعلانه مننا و الا ايه ؟؟
و هنزعل منك ليه يعنى ؟؟
وصلنا كلام انكم زعلانين
و لا زعلانين و لا حاجه. ...كل شئ قسمه و نصيب و اللى خلق بنتك خلق غيرها
طب بالراحه عليا شويه يا ست ام احمد ...انا بتصل بيكوا عشان اراضيكوا
و مين قالك أن احنا مش راضيين ؟؟
صوتك بيقول اهو ...حقك عليا يا حاجه ، انا عمرى ما الاقى حد زى احمد لبنتى
يعنى ايه يعنى ؟؟
يعنى البت كانت متردده شويه بس انا طمنتها انكم ناس كويسه و أن احمد مفيش منه و البت وافقت خلاص
اه و بعدين ؟؟
و لا قبلين ...تتفضلوا عندنا عشان نتفق على التفاصيل
طيب يا حاج لما ابواحمد يجى هخليه يرد عليك
و ماله يا ست ام احمد ..احنا خدامينكم
متشكرين يا اخويا ...مع السلامه
قفلت ام احمد المكالمه و راحت لاحمد تقوله :
و ليه يا ماما كلمتيه بالطريقه دى ؟؟
امال عاوزنى أكلمه ازاى ؟؟
الراجل وافق خلاص
ليه ؟ هو احنا تحت امره هو و بنته ؟؟؟
ليه واخداها بالشكل ده ؟؟؟
هى متتاخدش غير كدا .و البت دى لو اخر بت فى الدنيا مش هجوزهالك
بس البنت فعلا كويسه يا ماما .. و معملتش حاجه غلط لما قالت لا
هى قالت لا و رجعت فى كلامها و انا كمان دلوقتى بقولك لا و رجعت فى كلامى و هجوزك الاستاذه سها اللى برقبتها و بعمرها ، انت فاكر هما رجعوا ليه ؟؟ لما عرفوا انك هتخطب واحده احسن من بنتهم مية مره
يا سلام
اه و الله زى ما بقولك كدا
هنا دخل أبو أحمد و سألهم
فى ايه ؟؟
فى أن ابن عمك لسه متصل و بيقول أنهم وافقوا على احمد
صحيح ؟؟؟
هو ايه اللى صحيح ؟؟ مالك فرحت كدا؟
و مفرحش ليه ؟؟ مش دا اللى كنا عاوزينه من الاول ؟
اه دا كان الأول لكن دلوقتى انا شفت لابنى عروسه احلى من اللى اسمها امل دى و كنت مستنياك تيجى عشان نكلم اهلها
عروسة تانيه مين يا وليه انتى ؟؟ هو دخول البيوت بالساهل كدا ؟
ايه اللى صعبه يعنى ؟؟
احنا خلاص رحنا لناس و هما وافقوا فين المشكله بقا ؟؟
احمد مش هيتجوز البت دى يعنى مش هيتجوز البت دى
و مين قال كدا بقا ؟؟
انا اللى بقول
انتى اتجننتى يا ست انتى ؟؟ عاوزانى اخسر ابن عمى ؟؟
و هو لما رفض ابنك مخافش على زعلك ليه ؟؟
و الراجل رجع ووافق خلاص عشان خاطرنا
برده ابنى مش هيتجوز البت دى
طب عليا الطلاق بالتلاته أن احمد هيتجوزها يعنى هيتجوزها و مش عاوز اسمع كلمه تانيه فى الموضوع ده
بتحلف عليا بالطلاق يا عدلى ؟؟
ما انتى مش عاوزه تتلمى و تلمى الدور
خلاص حقك عليا بس بكرا تندم انت و ابنك على الجوازه دى
ملكيش دعوه محدش جه اشتكالك
خلاص انتوا حربين
طبعا ام احمد اخدت على خاطرها و قعدت تعيط بس خلاص مقدرتش تعمل حاجه و سلمت أمرها لله
ابو احمد اتصل بابن عمه و اخد منه ميعاد عشان يتفقوا على تفاصيل الجواز
و بالفعل تم الاتفاق و عملوا خطوبه عائليه صغيره كدا
احمد كان فاكر أنه خلاص خطب و أنه هيعيش قصة حب زى اللى بيسمع عنها فى المسلسلات و الافلام
و كان بيمنى نفسه أن اجمل ايام عمره هى اللى جايه دى
احمد لاحظ لما كان بيروح يزور امل انها دايما ساكته و مببتكلمش و ساعات تسيبه و تدخل اوضتها
و لما سأل والدتها قالت له انها بتتكسف و أن دى طبيعتها
احمد احترم خجلها و قال خلاص انا مش هجبرها انها تتجاوب معايا مدام دى طبيعتها ..
مرت الايام و خلصت الخطوبه و اتحدد ميعاد الفرح
احمد مكنتش الفرحه سايعاه ، كان طاير من فوق الارض و كان عمال يخطط أنه ياخد عروسته و يقضوا شهر العسل فى مصيف قريب من بلدهم
طول الفرح احمد كان عمال يرقص و فرحان بعكس العروسه اللى كانت قاعده ساكته خالص و على وشها نظره غريبه فسرها احمد انها محرجه اكيد
ام احمد كانت مراقبه العروسه طول الفرح و مش عاجبها شكلها بس مكنتش عاوزه تكسر فرحة ابنها و فضلت ساكته
خلص الفرح ...و اخد احمد عروسته و طلعوا شقتهم اللى كان فارشها هو و مش مخليها ناقصه حاجه
احمد و هو طالع على السلم كان فاكر أنه خلاص هيودع حياة العزوبيه و هيبقى زوج و رب اسره و لكن مش كل ما يتمناه المرء يناله
يا ترى احمد هيتحقق حلمه ؟؟ و الا هتحصله حاجه تعطل الحلم ده ؟؟ دا اللى هنعرفه فى الجزء الثالث باذن الله تعالى
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق