دمرتنى
الجزء الاول
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
صلوا على خير الأنام يا ساده يا كرام 😍
انا جايه احكيلكم انهارده عن الشاب أحمد ، و هو شاب مهذب اعرفه شخصيا و هتلاقوا فى حكايته العجب العجاب
احمد زى اى شاب مصرى كان أمله أنه يتجوز و يكون اسره و يفتح بيت
شاب فى العشرينات اول ما خلص كليته كان مطالب زى اى شاب أنه يشوف بنت الحلال اللى يكمل معاها حياته
طبعا فى الحاله دى ستات العيله المقربين زى الخاله العمه الام بيرشحولوه البنات اللى بيشوفوهم مناسبين له
لكن احمد كان دايما فى خياله حاجه مختلفه ، كان نفسه يحب اللى هيتجوزها ، كان نفسه تكون صاحبته و أخته و مراته و حته منه كان نفسه يتجوز زى الافلام و يلاقى اللى تحبه من قلبها
لكن للاسف الكلام ده متوفرش بحكم أنه شاب خجول ملوش علاقات كتير حتى علاقاته بالبنات فى الكليه كانت مجرد زماله و بس
هنا بقا كان لازم سيدات العيله تدخل زى ما قلت قبل كدا و فعلا بدأوا يعرضوا عليه عرايس العيله و هو كان بيشوفهم اخواته و متربى معاهم و عمره ما فكر فى يوم يرتبط بواحده منهم
لحد ما فى يوم كانت عمته قاعده معاهم و جت سيرة الجواز و لقاها بتقوله
انت ليه مخطبتش لحد دلوقتى يا احمد ؟
لسه ملقتش بنت الحلال يا عمتى
ليه يا ابنى ؟؟ هما العرايس فرغوا من الدنيا ؟؟
لا مفرغوش و لا حاجه بس لسه النصيب مجاش
طب ايه قولك بقا انى لقيت لك نصيبك ؟؟
نصيبي مين دى ؟؟
عارف عمك غريب ؟؟
ايوا طبعا عم غريب ابن عم ابويا
ايواااا اسم الله عليك ...هو ده عنده بنت بسم الله ما شاء الله أموره و متعلمه تعليم عالى و كمان بتشتغل
بتشتغل ايه ؟؟
شغاله فى جمعيه خيريه بيقدموا مساعدات للناس الفقرا ...يعنى البت ادب و اخلاق و علم كمان
بنته مين بقا ؟؟
بنته أمل ما انت عارفها
امل ؟؟؟؟ هى كبرت ؟؟
هههههه ...امال هتفضل صغيره ؟؟
انا كنت بشوفها و انا صغير لما كنا نروح عندهم كانت صغيره اوى
و الصغير كبر خلاص و بقت عروسه قمر
انتى ايه رايك يا ماما ؟؟
رايى نعمل زياره لبيت عمك و تشوف البت أن عجبتك نتكلم معجبتكش ناخد واجبنا و نمشي
ماشي و انا موافق
و راح احمد مع والدته لبيت امل و اللى اتفاجا أن شكلها اتغير اوى و بقت فعلا عروسه حلوه
خرج من عندهم و هو مقتنع بأنها مناسبه من حيث التعليم و الادب و بلغ امه و عمته أن فى ارتياح من ناحيتها
ام احمد فرحت اوى لأن اخيرا احمد وافق على عروسه بعد ما دوخهم معاه
و ابتدت تفاتح ابوه فى الموضوع
ابو احمد رحب و قال دى تعتبر بنت اخويا يعنى من لحمى و دمى
طيب خلاص يا اخويا اعمل ترتيبك نروح لهم الجمعه الجايه نطلب ايدها قبل ما الواد يرجع فى كلامه
طيب انا هتصل بابن عمى و نروح نطلبها بس انتى جهزى زياره حلوه كدا
زياره ايه ؟؟ مش لما يوافقوا ؟؟
يا ستى الزياره دى من صلة الرحم و كمان دى قيمتك ...جهزى انتى بس حاجه محترمه كدا عشان نشرف الواد
حاضر يا اخويا
و بالفعل ابو احمد اخد ميعاد من ابن عمه و راحوا لهم فى الميعاد
وبعد الساقع و الترحيب بيهم دخل أبو أحمد فى الموضوع على طول
احنا جايين انهارده يا غريب يا اخويا نطلب أيد بنتنا امل لابننا احمد
و ماله احنا يزيدنا شرف يا عدلى
الشرف لينا احنا يا غريب
احنا مش هنلاقى احسن من احمد ...بس انت عارف الشرع لازم نشور على البت و بعدين نرد عليك
و ماله يا اخويا شور زى ما انت عاوز
طيب ادينى فرصه يومين اتنين بس و هرد عليك و باذن الله خير
طيب تمام هستنى تليفونك
خرج أبو أحمد و امه و احمد و هما مطمنين ، المقابله كانت كويسه و كان الارتياح باين على وش ابو العروسه و امها
و استنى عدلى تليفون من غريب و بالفعل جه التليفون اللى مستنيه
الو
الو ...اهلا يا ابو امل
اهلا بيك يا حبيبي
ها ...نقول مبروك ؟؟
معلش يا عدلى يا اخويا انت عارف انا بحبك اد ايه و بحب احمد اد ايه ، بس الجواز قسمه و نصيب زى ما انت عارف
طبعا يا غريب ...انا عارف و ماله دى حريه شخصيه و مفيش جواز بالعافيه
ارجو انك متزعلش منى يا عدلى انا إن كان عليا كنت أتمنى البت لابنك
لا يا حبيبي مفيش زعل و لا حاجه كل شئ قسمه و نصيب زى ما قلت
انتهت المكالمه و قفل عدلى الخط و جت مراته تسأله فى ايه ؟
قالها الجماعه رفضوا الواد
طبعا ام احمد زعلت و اتحمقت اوى و حلفت برأس ابوها إنه مش هيمر الاسبوع الا و هى خاطبه لابنها عروسه احلى منها
يا ترى احمد فعلا هيخطب غير امل ؟؟ و الا هيحصل حاجه تانيه ؟؟
دا اللى هنعرفه فى الجزء التانى من حكايه احمد باذن الله تعالى
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق