قضية شرف
الجزء الثانى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
صلوا على خير الأنام يا ساده يا كرام 😍
امى بقا بقت تخبط على رجليها باديها الاتنين
مسكت اديها و الدموع مغرقه وشي...
ابوس ايدك يا امى متعمليش كدا الناس بتتفرج علينا 🥺
اه يا مرارك يا مجيده ، انا هاين عليا دلوقتى اخنقها بيدى ، عملت ايه فى دنيتى ياربى عشان يحصل لى كدا ؟؟
يا ماما الناس ابتدت تاخد بالها ...بالله عليكى يا امى تسكتى
بصيت لاخويا لقيته واقف زى التمثال ، زى ما يكون فى دنيا تانيه ، مش حاسس بأى حد من اللى حواليه ، فى عينه دمعه محبوسه ...ساكت و باصص فى الفضا و كأنه مش معانا
قربت جنبه و هزيته
سعد ...سعد خلى امك تسكت ، الناس هتعرف اللى حصل ، امك مش قادره تتحكم فى أعصابها
سعد زى ما يكون فاق من الشرود اللى كان فيه و خد باله من كلام امى
خلاص يا امى ..قومى يلا عشان اروحك
تروحنى ازاى ؟؟ و هنسيب المصيبه دى و نمشي ؟؟
هروح اشوف الدكتور يكتب لها إذن خروج و ناخدها معانا
سعد راح للدكتور و طلب منه أننا نخرج اختى لكن الدكتور قاله
لا طبعا لا يمكن تخرج النهارده
و ليه متخرجش يا دكتور ؟؟
عشان هى واخده منوم و فى لسه محاليل هنديهالها و لازم نراقبها على الأقل ٢٤ ساعه لان الدم المنقول لها ده ممكن يسخنها و لازم تكون تحت الملاحظه
خلاص يا دكتور بكرا هاجى اخدها ، انا عاوز انقلها مستشفى تانيه
شوف انا مقدرش احكم دلوقتى بخروجها بكرا و الا لا لانى معرفش الحاله هتطور ازاى و لو حصل انك صممت يبقى لازم تمضيلنا على إقرار انها خرجت على مسؤوليتك الشخصيه
و ماله امضى و لو عاوزنى أمضى دلوقتى و اخدها معايا أنا موافق
لا دلوقتى مش ممكن زى ما قولت لك
خلاص تمام الصبح ربنا يسهلها
رجع اخويا من عند الدكتور و لاقانى واقفه و امى قاعده فى الارض حاطه راسها فى الارض و اديها فوق دماغها
يلا يا امى عشان نروح
الدكتور قالك هناخدها معانا ؟؟
لا بكرا انا هاجى اخدها لأنها واخده منوم ..
طب ممكن تسيبنى ابات معاها الليله يا سعد ؟؟
لأ
امال هنسيبها لوحدها ؟؟ افرض احتاجت حاجه بالليل ؟؟
بقولك ايه يا ندى مش عاوز كلام كتير يلا يعنى يلا ...هى مش هتصحى الا الصبح ، الدكتور قالى كدا ، قومى امك يلا خلينا نمشي من هنا
قومت امى و اللى كانت مش قادره تصلب طولها و سندتها لحد ما وصلنا العربيه
ركبنا العربيه و كأننا احنا التلاته منعرفش بعض ، محدش فينا نطق بكلمه واحده
امى بقت تعيط و هى ساكته و اخويا باصص للطريق بس تحس أنه سرحان و مش فى الدنيا
انا بقا كل اللى كان فى تفكيرى ازاى الهام عملت كدا ؟؟ و ازاى انا اختها و خبت عليا انها اتعرفت بحد
انا فعلا كنت ساعات اشوفها راجعه فرحانه و لما اسألها مالك
كانت تضحك و تقولى انها فرحانه اوى عشان اتصاحبت على ناس كتير من خارج البلد ناس جدعه جدا وعرفوها اللى عمرها ما عرفته
بس مجاش فى خيالى انها تقصد شبان ، لان اختى دى متربيه كويس اوى و عمرها ما كلمت حد و لا كان لها علاقه بحد ، و اصلا مفيش عندنا الكلام ده لأننا من الصعيد و البنت عندنا راجل ميتخافش عليها ابدا ....طب ليه مقالتليش ؟؟؟ انا اه اصغر منها بسنتين بس احنا كنا نعتبر تؤام كل اسرارنا مع بعض ...بس السر ده الوحيد اللى مقلتوش ليا ...يمكن خافت تقولى احسن اقول لاخونا ؟؟ بس انا عمرى ما كنت هعمل كدا ...
ليه يا الهام ؟؟ ليه تفضحينا و تحطى دماغنا فى الطين كدا ؟؟؟
انتى كدا قضيتى علينا كلنا ، انا و امك و اخوكى ...
أما أنا غبيه صحيح ...انا شفتها تعبانه و دايخه من اسبوع و مخدتش بالى
و هاخد بالى ازاى بس و دى حاجه لا كانت فى البال و لا فى الخاطر
ياربى دماغى هتنفجر من التفكير ، انا لازم اعرف اللى حصل ايه ؟
ايوه ...انا عرفت هعمل ايه
موبيل الهام معايا اهو ...صاحبتها ادتهولى اول ما رحنا
اكيد نمرة صاحبتها ثريا دى عليه
لما اروح البيت هاخد النمره و اتصل عليها عشان اعرف اللى حصل بالظبط
بس مش لازم اقول لحد الا اما افهم الاول ايه حصل
وصلنا البيت ، اخويا نزلنا و مشي بالعربيه مدخلش البيت
امى دخلت على اوضتها و حزن الدنيا ماليها
اجيب لك حاجه يا اماى؟؟؟؟
لا مش عاوزه ...روحى شوفى مذاكرتك انتى
حاضر يا اماى
خرجت من اوضة امى و انا بقول لنفسي
مذاكرة ايه اللى هذاكرها ؟؟؟ هو انا هعرف ابص فى كتاب انهارده ،؟؟؟
دخلت اوضتى و طلعت موبيل الهام و دورت عن نمرة ثريا و رنيت عليها
الو
الو ...ثريا معايا ؟؟
ايوا انا ثريا
انا ندى اخت الهام
الهام جرالها حاجه ؟؟
لا الهام كويسه بس انا كنت عاوزه اسالك على حاجه
انا معرفش اى حاجه
هو انا لسه سألتك عشان تقولى معرفش حاجه ؟؟
لا من غير ما تسألى انا معرفش حاجه
ثريا ...احنا عرفنا أن اختنا كانت حامل و أجهضت نفسها و عاوزه اعرف منك هى عملت ايه ؟ و مين عمل فيها كدا ؟؟ و مين الشخص اللى حملت منه ده ؟
لا انا معرفش هى حملت من مين ...هى اصلا مقالتش ليا على اى حاجه
يا سلام ...ازاى و انتى كنتى معاها ؟
لا انا رحت لها على العياده لما اتصلوا بيا
عيادة ايه ؟؟؟ انتى بتقولى ايه ؟
بصى يا ندى الحكايه دى لو اتعرفت اهلى هيودونى فى داهيه ...
و يودوكى فى داهيه ليه ؟ انتى مالك ؟
اهلى لو عرفوا انى رحت لزميلتى اللى بتجهض نفسها هيبهدلونى و مش بعيد يقعدونى من التعليم خالص
متخافيش يا ثريا انا عاوزه اعرف الحكايه بس و اوعدك مش هجيب سيرتك نهائى
بصى انا كنت فى الكليه و لقيت رقم غريب بيرن عليا لما رديت لقيت واحده ممرضه بتقولى
انتى ثريا صاحبه الهام ؟؟
قلت لها ايوا
طب صاحبتك هنا فى عياده الدكتور سهير و تعبانه شويه و قالت لى اتصل عليكى تيجى تاخديها
تعبانه عندها ايه ؟؟
متخافيش هى وقعت و هى ماشيه عشان داخت شويه و هى مش عاوزه تتصل بحد من أهلها عشان ميتخضوش عليها
طب العياده دى فين ؟؟
عند محطة القطر تقفى و ضهرك للمحطه هتلاقى يافطة الدكتوره سهير انور فى وشك
طيب خلاص حالا هكون عندكم
و رحت العياده لقيت الهام وشها اصفر زى الليمونه و الدم مغرق هدومها
ايه دا ؟؟ انتوا عملتوا فيها ايه ؟؟
معملناش و خدى صاحيتك من هنا من غير فضايح
اخد صاحبتى ازاى ؟ دى بتنزف فين الدكتوره ؟؟
الدكتوره جالها حاله ولاده مستعجله و مشيت
طب و إللى بتموت دى ؟؟
خديها تموت بعيد عنى ...انا مالى بيها
سندت اختك و نزلت بيها و اول ما شاورت للتاكسى و ركبتها اغمى عليها
السواق كان جدع و قالى فى ايه ؟
قلت معرفش هى بتنزف قال لازم نوديها المستشفى
دخلت بيها و انا دا كله مش فاهمه هى بتنزف ليه ؟؟ و كانت فى العياده بتعمل ايه ؟؟
الدكتور هو اللى فهمنى انها كانت حاله اجهاض و الجنين مات و ملحقهوش
انا لما عرفت كدا قلت اتصل بيكم لانى مكنتش اقدر أفضل معاها
يعنى انتى متعرفيش مين عمل معاها كدا
انا ....لا ...لا معرفش
ازاى الكلام ده ؟؟ و ليه خلت الممرضه تتصل بيكى انتى بالذات ؟؟
و الله معرفش بس تقدرى تسأليها
طيب يا ثريا متشكره اوى ...سلام عليكم
و عليكم السلام ورحمه الله وبركاته
قفلت السكه و انا حاسه ان ثريا بتكدب عليا ...شكلها تعرف الحكايه و مش عاوزه تتكلم
تانى يوم اخويا راح المستشفى و كتب إقرار على نفسه بخروج اختى وجابها على البيت
اول ما اختى دخلت و نامت على سريرها
اخويا قالها :
انا عاوز اعرف دلوقتى مين عمل فيكى كدا ؟؟؟
يا ترى الهام هتتكلم و تقول مين عمل فيها كدا ؟؟ و الا مش هتقول ؟؟
عاوزين تعرفوا استنونى فى الجزء التالت من القصه باذن الله تعالى
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق