الامانه
الجزء الخامس و الاخير
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
صلوا على خير الأنام يا ساده يا كرام 😍
و فى يوم لقيت جوزى داخل عليا فرحان اوى و طاير من السعاده
فى ايه يا عبدالوهاب مالك مزقطط كدا ليه ؟
هقولك خبر بمليون جنيه هيخليكى انتى كمان تزقططى كدا زيى
خير يا رب ...فرحنى يا اخويا
الاعاره اللى كنت مستنيها من زمان جت ..لا و ايه فى قطر كمان
بجد ؟ معقوله ؟ انا مش مصدقه نفسي ..دا انت مقدم عليها بقالك عشر سنين
دا تقريبا على وش القمر سلمى
وش ايه يا ابو وش ؟؟ حاجه كنت مقدم لها و جت ايه دخل المفعوصه دى فيها
ربنا هيرزقنا من وسع بسبب اليتيمه دى ..انتى ازاى مش واخده بالك
طب خلاص سيبك من الكلام ده ...انت طبعا هتاخدنى انا و العيال معاك ؟
لا فى الاول كدا مش هينفع
ليه بقا ؟؟
لازم اروح اشوف الدنيا هناك عامله ايه و اجهز لكم انتوا كمان كل حاجه علشان تيجوا متتعبوش ...انا لسه معرفش النظام هناك ايه ؟
يووووو ...كنت فاكره انى هسافر معاك و اشوف الدنيا بقا
ما انتى هتسافرى بس كلهم كام شهر كدا اظبط امورى فيهم الاول و بعدين ابعت اخدك
ايه ؟؟؟ كام شهر ؟؟؟ انا كنت فاكراه شهر واحد
لا شهر مش هقدر اكون ظبطت حالى
طيب ...بس حاول تبعت لنا فى اسرع وقت
اكيد ...انا اصلا مقدرش ابعد عنكم و لا عن سلمى
سلمى ؟؟؟؟ و دى هتاخدها معانا ازاى ؟ ما تسيبها لخالتها ؟؟
تانى يا ساميه ؟؟؟ انا الوصى عليها و اقدر اطلع لها الورق بسهوله
ماشي يا اخويا انا مقلتش حاجه ...كنت فاكره أن فى مشكله فى سفرها يعنى
لا مفيش مشاكل أن شاء الله
و سافر جوزى و ساب لى الأربع عيال ...التلات اولاد و البنت
كنت حاسه ان العبء تقيل اوى عليا ...عبدالوهاب كان بيعملى حاجات كتير اوى و هو موجود ، دلوقتى بقيت مطالبه انى اقوم بدوره و دورى انا كمان
و احساس أن معايا بنت مش بنتى كان بيخلينى مستاءه جدا و حاسه ان حملها عليا اضعاف حمل اولادى عليا
زى ما يكون البنت دى سبب شقايا فى الدنيا و زى ما يكون امها خلفتها مخصوص عشان تنكد عليا حياتى
كرهى زاد ليها و بقيت اتفنن انى أذيها بكل الطرق ...بقيت اتمنى موتها و لو مرضت مكنتش بعبرها
كانت على طول هاديه بعكس اولادى اللى كانوا مجننى
و بالرغم من هدوءها ده الا انى مكنتش طايقاها برده
كانت بتبقى اخر اهتماماتى و كنت ساعات اسيبها نايمه و اخرج انا و اولادى و مش مهم بقا يجرى لها ايه ...منا كنت عاوزه اتخلص منها بأى طريقه و كان شيطانى مهيألى انى مظلومه انى اتحمل مسؤليتها لوحدى
إلى أن حصل اللى مكنش يخطر على بالى
فى يوم كان عمرها تقريبا ٨ شهور تقريبا و لقيتها مقامتش خالص زى عادتها ...( كانت اول ما تصحى تقوم تقعد على السرير و تضحك )
اليوم ده البت متحركتش نهائى و انا طبعا مسألتش فيها ...
لكن على اخر النهار قلقت لتكون ماتت و عمها يجى يعملى مشكله
بحط ايدى عليها لقيت جسمها مولع نار
معرفش ايه حصل لى ...لقيت جسمى كله بيترعش مع أن دى مش اول مره تتعب فيها
لقيت نفسي بلبس هدومى و أجرى بيها على مستشفى خاصه و بقيت عامله زى المجنونه
اتصلت على اخويا و امى عشان يجوا ياخدوا منى اولادى
و بقيت اعيط معرفش ليه ؟؟؟ لدرجه ان الناس فى المستشفى كانوا فاكرينى امها و اخويا و امى بقوا يهدوا فيا
انا نفسي كنت مستغربه حالتى دى ؟؟ منين بكرهها الكره دا كله ؟ و منين خايفه عليها بالطريقه دى ؟؟
اتحجزت بيها ١٥ يوم فى المستشفى لأن كان عندها حمى و التهاب رئوى شديد و فعلا كانت هتموت
طلعت من المستشفى شخص تانى خالص
ربنا نزل فى قلبى حبها و بقيت حاسه انها بنتى اللى خلفتها من بطنى
رجعت حد تانى غير ساميه القاسيه اللى معندهاش قلب ...و دا كان من فضل ربنا عليا ...أنه فوقنى و خلانى معملش اللى كنت بعمله دا
بعد كدا جوزى بعت لنا و سافرنا له كلنا
و كانت سلمى هى زهرة البيت ...الشمس اللى نورت لنا حياتنا ...الخير اللى ربنا فتحه لنا من حيث لا ندرى و لا نحتسب
بقت تكبر قدامى و كأنها الجنه اللى ربنا فتحها لى
رجعت مصر لما ابنى الكبير كان هياخد ثانويه عامه
و الحمد لله اخدها و دخل كليه الطب و تخصص فى العظام
و هى كمان اخدت ثانويه عامه و دخلت كليه طب الاسنان
انا طبعا مبقتش افرق بينها و بين اى حد من اولادى بل بالعكس دايما انصفها عليهم
انا و عمها بقينا نعاملها زى أولادنا بالظبط حتى لما اشترينا شقه لكل واحد فيهم اشترينا لها هى كمان ،
عمها جاب لها عربيه علشان متحتكش بحد فى المواصلات
و دلوقتى ابنى الكبير الدكتور شريف عاوز يتجوزها و هى بتحبه اوى
و الحقيقه انا حمدت ربنا انى مرضعتهاش علشان تنفع تتجوز ابنى
بس انا جوايا لسه ندم انى كنت بعذبها و هى صغيره ، مش قادره اسامح نفسي على. اللى عملته فيها
كل ما أشوفها قدامى ببقا عاوزه اوطى على رجلها ابوسها و اقولها سامحينى على اللى عملته فيكى
تفتكروا ربنا هيغفر لى اللى عملته ده ؟؟ و الا لازم اروح و اعترف لها بكل حاجه و استسمحها انها تسامحنى 🥺؟؟؟
تمت
ارجو تكون القصه عجبتكم و لو عجبتكم ارجو الدعاء لوالدى رحمة الله عليه و لسائر موتى المسلمين بالرحمه والمغفره
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق