الامانه الجزء الرابع

الامانه 

الجزء الرابع

قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي

صلوا على خير الأنام يا ساده يا كرام 😍

قفلت مع الست بعد ما اديتها العنوان و كنت فى منتهى السعاده انى اتخلصت من البنت من غير ما ازعل جوزى منى و مش هظهر فى الموضوع و لا كأنى عملت حاجه 

و هو بقا لازم يديها لخالتها ما هى الخاله والده برده و اكيد هتكون حنينه على بنت اختها اللى لسه ميته و خصوصا أن معندهاش ولاد ...اشكرك يارب نجدتنى من مشكله مكنتش عارفالها حل 🙄

تانى يوم الست كانت فعلا عندنا 

دخلت و عرفت جوزى هى مين 

انا ثناء اخت سماح الله يرحمها 

اختها ؟؟ 

ايوا اختها من الام يمكن حضرتك متعرفنيش لانى كنت مسافره بره و لسه راجعه السنه دى 

اهلا بيكى يا ست ثناء ...البقاء لله فى اختك 

و نعم بالله ...انا جايه انهارده عشان بنت اختى ممكن اشوفها 

طبعا ممكن ...هاتى سلمى يا ساميه 

حاضر يا اخويا 

اتفضلى يا حبيبتى بنت اختك اهى الخالق الناطق اختك الله يرحمها 

فعلا شبهها اوى ...نفس العيون الخضرا و البياض و تقاطيع الوش الجميله يا حبيبتى يا بنتى  

متعيطيش يا حبيبتى اللى خلف مماتش و انتى مؤمنه و موحده بالله 

و نعم بالله ...انا عاوزه استأذنك يا استاذ عبدالوهاب انى اخد بنت اختى اربيها 

تاخديها ازاى ؟؟

زى الناس دى بنت اختى يعنى من لحمى و دمى 

انا مقلتش حاجه بس دى بنت اخويا و شايله اسم عيلتنا يعنى احنا الاولى بيها 

انا عارفه انكم الاولى بيها بس انا بستاذنك خاصه انى ربنا مرزقنيش بأطفال و يمكن ربنا بعت لى سلمى عشان يعوض صبرى خير 

معلش يا ست ثناء سلمى لازم تكون تحت عينى و تتربى فى وسط اولادى ....دى الطريقه الوحيده اللى هكون مطمن عليها بيها غير كدا هحس انى قصرت فى الامانه اللى اخويا سابهالى 

يعنى انت مش هتديلى البنت ؟؟ 

لا طبعا ...بس البيت مفتوح لو عاوزه تشوفيها فى اى وقت تحت امرك 

انا كدا هضطر انى ارفع قضيه بحضانه البنت و انا اولى بالحضانه زى ما حضرتك عارف 

لا لا ترفعى ليه بس ...خلاص يا عبدالوهاب اديلها البت و هى خالتها برده يعنى زى امها و اكيد يعنى هتكون حنينه عليها 

اسكتى انتى من فضلك يا ساميه ...بنت ايه اللى ادهالها ؟؟ دى الامانه اللى اخويا سايبها و لا يمكن أبدا اتخلى عنها 

خلاص انا جيت و طلبتها بالذوق لكن انت هتضطرنى انى ألجأ للقضاء 

الجأى للى عاوزه تلجأى له ..بنت اخويا مش هتخرج من هنا 

تمام سلام عليكم

استنى بس يا ست ثناء ....اقعدى يا اختى ..صلوا على النبى يا جماعه انتوا الاتنين عاوزين مصلحة البنت و انتوا الاتنين لكم الحق فيها بس الكلام ميبقاش بالطريقه دى 

بصى يا ست ثناء انا مش هخلى راجل غريب يصرف على بنت اخويا و بعدين لامؤاخذه مش هبقى مآمن عليها و هى عايشه مع راجل انا معرفوش 

دا جوز خالتها و بعدين جوزى راجل محترم جدا 

يا ستى انا مبقولش أنه مش محترم بس انا ليا الحق اخاف على لحمى و اظن أن دى حاجه متزعلكيش انتى هدفك أن البت تكون كويسه و انا كمان 

خلاص يا استاذ عبدالوهاب بس البنت تكون بينى و بينكم يعنى وقت ما احب اخدها يومين اخدها 

طب ازاى بس ؟؟ 

خلاص بقا يا عبده الست برده قلبها محروق على اختها و من حقها تكون بنت اختها فى حضنها 

طيب خلاص بس لما البنت تكبر شويه و تعرف تتكلم عشان تبقى فاهمه ...و إن كان علينا بيتنا مفتوح لك فى اى وقت تتفضلى و تقعدى معاها زى ما انتى عاوزه 

متشكره اوى ...و انا دلوقتى مطمنه على بنت اختى لانى عرفت فعلا انك خايف عليها زى ابوها و اكتر 

طبعا دى لحمى و دمى 

طيب استأذن انا دلوقتى و بستأذنكم انى اجيلها كل فتره كدا اشوفها 

و ماله يا ستى بيتك و مطرحك 

الست مشيت و انا متغاظه ، هى جت فى ايه و مشيت فى ايه ؟ امال قعدت تقول هرفع قضيه و مش هسكت...فين الكلام ده ؟ دى طلعت كلمنجيه و خلاص و زى ما يكون ما صدقت انى جوزى يتمسك بالبت

بصيت لعبدالوهاب بغيظ شديد و قلت له 

انت ليه مسبتش البت لخالتها ؟؟؟ يعنى انا هكون احن عليها من خالتها اخت امها ؟؟ 

بص لى بحزن شديد و سكت شويه كدا و هو حاطط رأسه فى الارض ...بعدها رفع دماغه و قالى 

بصى يا ساميه انا هقولك كلمتين و مش هكررهم تانى 

انتى سالتينى ليه كنت زعلان اوى يوم موت اخويا و مراته و ابنه و مكنتش زعلان بالشكل ده يوم موت والدتى صح ؟؟ 

ايوا انا استغربت دى الام مفيش زيها 

انا هقولك ...امى طبعا أنا كنت زعلان عليها اوى لكن هى ست كبيره و كانت تعبانه اوى فى اخر أيامها و اظن انتى شفتى بعينك 

ايوا صحيح الله يرحمها اتعذبت 

ايواااا اتعذبت و عشان كدا لما ماتت ربنا رحمها من العذاب ده و كنت بالرغم من حزنى الشديد عليها إلا انى حسيت أن الموت رحمه ليها إنما اخويا شاب صغير مكملش التلاتين سنه و موته كان فجاه ..و موت الاخ يا ساميه صعب اوى ..الاخ هو السند ربنا سبحانه و تعالى قال لسيدنا موسي سنشد عضدك باخيك...يعنى الاخ هو اللى بيشد حيل اخوه و اللى بيكون واقف فى ضهره وقت حاجته له ، 

لما مات اخويا فقدت اخر سند ليا فى الدنيا ، بقيت عامل زى فرع الشجره اللى طاير فى الهوا مليش اى جذور تثبته فى الارض ...انتى مستغربه ليه انا متمسك بالبنت ؟؟ لان ببساطه البنت دى هى كل عيلتى فاهمه يعنى ايه يا ساميه ؟ فاهمه يعنى ايه انى اتخلى عن آخر فرع فى عيلتى ؟؟ عن كل اهلى ؟؟؟ انا مبغصبكيش على حاجه بس لازم تعرفى انى لا يمكن اتخلى عنها حتى لو كلفنى ده انى اتجوز واحده تانيه ترضى تربى البنت اليتيمه دى 

ياااا و تهون عليك عشرة السنين دى كلها يا عبدالوهاب ؟؟ 

لا طبعا ...بس انتى اللى هتكونى اختارتى مش انا 

بصيت له كدا من غير ما انطق و قمت دخلت اوضة الاطفال و انا بعيط

طبعا بعد الكلام اللى انا سمعته من جوزى ده عرفت و اتاكدت أنه لا يمكن يسيب البنت و هيفضل متمسك بيها و لو ايه اللى حصل 

اتصلت على امى و عرفتها بالموضوع و امى قالت لى خلاص يا بنتى متخربيش بيتك هتطلقى و تجيلنا بالتلات عيال مين هيصرف عليهم انتى عارفه أننا على أدنا و كمان لما تربى البت هتكسبي ثواب تربيه يتيم و دا له اجر كبير اوى عند ربنا ، و اخويا قالى نفس الكلام 

قلت خلاص بلاش اخرب بيتى مع انى فعلا مش طايقه البنت و لا طايقه اشوفها 

جوزى راح شقة اخوه و جاب الهدوم اللى كانوا محضرنهالها و السرير و بقى يعيط عليهم و على البنت 

 اوحش حاجه بقا أنه كل ما يدخل كان اول حاجه يسال عليها هى البنت و يدخل جرى ياخدها فى حضنه 

و دا كان بيزود النار جوايا و كنت بغير و بزعل أنه مبيعملش كدا مع أولادى

بقيت اتفنن انى اهمل فى البنت طول ما هو بره ...كنت اسيبها طول النهار من غير اكل و البنت تفضل تعيط لحد ما حسها يتنبح من العياط و تنام من كتر التعب 

ابنى الصغير كان ساعات يشد فيها أو يشد شعرها و مكنتش بقوله عيب كنت بسيبه يعمل اللى هو عاوزه فيها منا مش طايقاها و كفايه أن وجودها فى البيت غصب عنى و أن جوزى حط رأسها براسي 

كنت قبل ميعاد وصول جوزى كنت أحضر لها ببرونه من الحنفيه و اشربهالها 

جوزى كان يستغرب أنها مبترضعش كتير ليه و اللبن مبيقلش فى العلبه و أن وزنها خفيف اوى و انا كنت بقوله إن دى طبيعه جسمها و مكنش يعرف انى انا اللى مبأكلهاش 

كنت ارميها على الأرض فى عز البرد و هى لابسه هدوم خفيفه و ادعى عليها انها تمرض و تموت عشان اتخلص منها 

و كانت لما تمرض و جوزى يكشف عليها مكنتش اديها الدوا ...و كنت ادلقه فى الحوض عشان مياخدش باله انى مبدلهاش 

و كانت تفضل عيانه فتره طويله و جوزى يستغرب و انا أقوله أن مناعتها ضعيفه و لما كان يقول لازم نغير الدكتور كنت أقوله 

دكتور ايه اللى نغيره ؟؟ هو انت فلوسك كتير ؟؟ دا يدوب اللى جاى على اد اللى رايح ...و كنت اطلب منه طلبات بزياده عشان احسسه بالعجز و كل ما يقول ممعييش ابص للبت و أقوله ما كان معانا قبل كدا بس هى اقدام 😏

و فى يوم لقيت جوزى داخل عليا فرحان اوى و طاير من السعاده 

فى ايه يا عبدالوهاب مالك مزقطط كدا ليه ؟

هقولك خبر بمليون جنيه هيخليكى انتى كمان تزقططى كدا زيى 

خير يا رب ...فرحنى يا اخويا

انا .....

يتبع 

قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..