الجزء الثالث
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
صلوا على خير الأنام يا ساده يا كرام 😍
خرج جوزى و انا بلمت و اتاكدت خلاص أن هيحصل بينى و بينه مشكله كبيره بسبب البت دى 😏
جوزى قعد يلف طول النهار و البت ملهاش اى أثر
رجع على المغرب و هو حزين ووشه مسمر و مش عارف يعمل ايه
حسيت براحه شديده و قلت الحمد لله أن الموضوع بعد عننا و أنه اكيد يومين و هينسي
لكن للاسف جوزى بعد ما دخل الاوضه و حط جنبه على السرير قام زى اللى لدغته حيه و طلع جرى على الباب
فى ايه يا عبدالوهاب ؟؟ رايح فين تانى
انا ازاى مجتش فى دماغى الفكره دى قبل كدا
فكرة ايه دى ؟؟
مرات اخويا والده فى مستشفى السلام للولاده و اكيد هما عارفين المولود راح انهى حضانه
و ليه اكيد يعنى ؟؟ مش يمكن ابوها وداها و هما ميعرفوش عنها حاجه ؟
لا اللى اعرفه ان المستشفى بتطلع إسعاف بالطفل و الاب و بتبعته للحضانه انتى ناسيه أن حصل لنا كدا مع شريف ابننا
اه ...اه صحيح
انا هروح اسال و اكيد باذن الله هعرف اوصلها
و راح جوزى و قعدت ادعى أنه ميلقهاش لكن للاسف المستشفى دلته على الحضانه و طلعت انها فى المركز اللى احنا تابعين له لأن مكنش فى حضانه فاضيه قريبه مننا
جوزى طلع جرى عليها و سأل و فعلا لقاها
و الدكتور قاله أن احنا من الصبح بنحاول نتصل بالأب عشان يجى يستلم الطفله بس محدش بيرد عليهم
جوزى حكاله ووراله شهاده الوفاه للاب و الام و استلم منه الطفله
و لقيته داخل عليا حوالى الساعه تسعه مساء و هو شايلها و كان لسه الحبل السرى موقعش من سرتها
حطها بين اديا و هو بيعيط
ايه دا ؟؟ انت لقتها ؟؟؟
ايوه ...دى اللى فاضله من ريحه اخويا الله يرحمه
ريحة اخوك ؟؟؟؟
بقيت اكلم نفسي ( طب و انا مالى ...اربى بنت مش بنتى ليه يعنى ؟؟ هو انا ناقصه ؟ مش كفايه ولادى عليا ؟؟ حرام و الله )
رضعيها بقا يا ساميه البت باين عليها جعانه اوى
ارضع مين ؟؟؟ لا يا حبيبي انا صحتى على أدى و بعدين لبنى يدوب بيكفى ابننا
يعنى ايه يعنى ؟ هتسيبي البت تموت ؟؟
و تموت ليه ما تروح تشتريلها لبن صناعى
اشتريلها لبن و انتى موجوده و بترضعى ؟
هو حد قالك عليا البقره الفرزين اللى جايبنهالك
خلى عندك رحمه يا ساميه
لا اله الا الله يعنى هى الرحمه تخلينى أضر بابنى و بصحتى ؟؟ جبت البت و مقلتش لك حاجه إنما عاوزينى كمان ارضعها اهو ده اللى مش ممكن ابدا و لو حتى فيها طلاقى
يا خبر ... هى وصلت للطلاق كمان يا ساميه ؟؟
ايوا يا عبدالوهاب انا مش ناقصه عيله زى دى كنت بكرهه امها كره العما
و هى ذنبها ايه يعنى دى يتيمه
يتيمه و الا مش يتيمه انت بتكلمنى كأنى انا اللى قتلت ابوها و امها
اعوذ بالله منك يا شيخه ...انا هنزل اجيب لها لبن
انزل يا اخويا انزل
طب على ما أنزل حميها و غيرى لها هدومها
يووووو بدأنا اهو
هو ايه اللى بدأنا ؟؟ اتعدلى يا ساميه
معنديش لبس لها
لبسيها اى حاجه من بتاعه زياد
دا لبس ولاد ...ابقى هات لها لبس بنات الاول
عليا الطلاق لو رجعت ملقتكيش محميه البت و مغيرالها ما انتى بايته فيها الليله
بتحلف عليا بالطلاق عشان بنت سماح ؟؟
دى بنت اخويا و يتيمه يا ظالمه
و نزل جوزى عشان يجيب اللبن و انا مسكت البت بكل عنف و حميتها و انا مش طايقه ابص فى وشها و نقيت لها اوحش جلابيه من جلاليب ابنى زياد و لبستهالها
جوزى جه و معاه اللبن و الببرونه و ادههملى و قالى من لا يَرحم لا يُرحم
الراجل دخل ينام و لا كأنه عمل حاجه ..و لا كأنه جاب لى بلوه حطها بين اديا
عملت الببرونه بميه من الحنفيه منا مش لسه هسخن و استنى أما تبرد و بعد كدا اعمل للمحروسه الطفح
كنت نايمه فى اوضه الاطفال و جبت ولادى التلاته نيمتهم جنبى و هى سبتها على السرير التانى لوحدها مكنتش طايقه اشم ريحتها
فضلت طول الليل مش عارفه انام و قعدت افكر ازاى اخلى جوزى يسيب البت دى أو يوديها دار ايتام
هدانى تفكيري أخيرا انى اروح شقة اللى اسمها سماح دى يمكن الاقى لها اى قرايب يقبلوا ياخدوا البت و ساعتها جوزى لما يعرف بكدا ممكن يسيبهالهم
مفاتيح شقة اخوه هو حاططها فى الدولاب
اتسحبت و رحت اخدتهم و قررت انى الصبح لازم اروح و ادور على اى حاجه ممكن تنفعنى فى الموضوع ده
و فعلا عملت كدا استنيت لما جوزى نزل على شغله و سبت البت مرميه على السرير و اخدت زياد فى ايدى و رحت على هناك
دخلت شقه سماح اللى ياما كانت ترزع بابها فى وشي لما كنت اجى اطلع على السطح عشان اكل الطيور بتاعتى
دخلت لقيت الشقه زى ما هى من اخر مره دخلتها من سنين ...صراحه سماح كانت نضيفه اوى و دايما شقتها مترتبه الله يرحمها بقا
دخلت على اوضه نومها لقيتها رصه هدوم البنت و مطبقاهم فوق بعض و حاطه سرير هزاز صغير جنب سريرها
ضربت بعينى لقيت نوتة تليفونات جنب التليفون الارضى
رحت مسكتها و دورت فيها لقيت نمرتنا و نمر كتير تقريبا كانوا نمر اصحاب جوزها و لقيت نمره مكتوبه بالقلم الرصاص و مكتوب جنبها اختى ثناء
اختها ؟؟؟؟ اللى اعرفه ان ملهاش اخوات خالص ؟ اختها ازاى يعنى ؟؟
انا عشت مع سلفتى دى حوالى تلات سنين مشفتش الا ابوها اللى كان بيزورها لأنها متجوزه سلفى و امها ميته و بعدها ابوها كمان مات دا بعد ما خرجنا من البيت بشهور ...بس ايه حكايه اختها دى ؟؟ انا لازم افهم الحكايه دى ...يا سلام لو تطلع اختها بصحيح و تاخد هى البت ؟؟
انا لازم اتصل بيها و اشوف
الرقم بتاعها جنبه كود مش كود محافظتنا ...اكيد اختها دى ساكنه فى حته تانيه ...انا هتصل و اللى يحصل يحصل
الو
الو ...مدام ثناء ؟؟
ايوا انا ثناء
حضرتك لكى اخت اسمها سماح ؟؟
ايوا
البقاء لله يا حبيبتى
البقاء لله فى مين ؟؟؟
فى سماح و جوزها و ابنها
انتى بتقولى ايه ؟ انتى مين ؟؟
انا سلفتها ....انا اسفه كنت فاكره انك عارفه
لا محدش قال لنا ...حصل امتى الكلام ده ؟؟ و ازاى حصل؟؟
من يومين عملوا حادثه و ماتت هى و سلفى و ابنها و هما رايحين للبت الحضانه بس بالله عليكى أهدى بس
دى اختى الوحيده دى اللى فاضلالى من الدنيا انا لا عندى أم و لا ابن هى كانت كل عيلتى دا انا كنت متفقه اجيلها فى السبوع
بس انا عمرى ما شفتك جيتى لها هنا قبل كدا
انا اختها من الام و كنت مسافره بره مع جوزى و لسه راجعه السنه دى
اااه عشان كدا
طب و بنت اختى فين ؟؟ اوعى يكون جرالها حاجه هى كمان
لا البنت بخير و معانا
معاكم ؟؟ الحمد لله ...
منا بكلمك بخصوص البت دى ...اكيد مفيش حد هيكون حنين عليها زيك
طبعا أنا كنت لسه هقولك ...انا لازم اخد بنت اختى دى هى اللى باقيالى
بس تاخديها ازاى بس ؟؟ عمها ممكن ميرضاش يدهالك
لا و ميرضاش ليه ؟؟ انا ليا فيها زى ما هو له فيها و بعدين انا ربنا مرزقنيش بأطفال و البنت دى هتكون عوض ربنا ليا
خلاص انا هديلك العنوان و تعالى اتكلمى مع عمها بس بالله عليكى ما تقولى انى كلمتك و لا قلت لك اى حاجه احسن يبهدلنى
لا متخافيش مش هجيب سيرتك ...بكرا باذن الله هكون عندكم
و انا من ناحيتى هحاول اقنعه أنه يسبهالك انتى اولى بيها يا اختى
ربنا يخليكى متشكره اوى
قفلت مع الست بعد ما اديتها العنوان و كنت فى منتهى السعاده انى اتخلصت من البنت من غير ما ازعل جوزى منى و مش هظهر فى الموضوع و لا كأنى عملت حاجه
و هو بقا لازم يديها لخالتها ما هى الخاله والده برده و اكيد هتكون حنينه على بنت اختها اللى لسه ميته و خصوصا أن معندهاش ولاد ...اشكرك يارب نجدتنى من مشكله مكنتش عارفالها حل 🙄
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
صلوا على خير الأنام يا ساده يا كرام 😍
تعليقات
إرسال تعليق