الامانه
الجزء الثانى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
صلوا على خير الأنام يا ساده يا كرام 😍
مر يومين و حصل اللى لا كان على بال و لا على خاطر
جوزى جاله تليفون و لقيته بيصرخ و يقول
هما فين دلوقتى ؟؟ مستشفى ايه ؟؟؟ انا جاى حالا
فى ايه يا عبدالوهاب ؟؟
اخويا و مراته عملوا حادثة كبيره
يا ستار يارب ...و حصل لهم ايه ؟؟
مش عارف ...اللى كلمنى قالى تعالى بسرعه و مقلش حصل لهم ايه
طب هما فى مستشفى ايه ؟
مستشفى الهلال
دى قريبه هنا ....ربنا يسترها طب اجى معاك ؟؟
لا هروح انا اشوف حصل ايه بسرعه كدا
خلاص ابقى طمنى
حاضر ...سلام
و مشي جوزى و انا قعدت استنى عشان اعرف ايه حصل لهم ، اى نعم أنا مبحبهمش بس فى نفس الوقت دول بنى ادمين و يصعب عليا لو حصل لهم حاجه
مر اكتر من ساعتين و جوزى متصلش و بقيت على نار لدرجه انى فكرت انزل له المستشفى اللى كانت تبعد عن البيت حوالى ربع ساعه بالعربيه
شلت ابنى زياد على ايدى و كان عمره ساعتها سنه و شهرين و قلت لازم اروح مدام أتأخر كدا و خصوصا انى كنت شايفه حلم قبلها بيوم أن حماتى جايه فرحانه و طلبت اكل كتير اوى و جوزى ادالها كل اللى طلبته
وصلت المستشفى و سألت على اسم سلفى و مراته و لسه الممرضه فى الاستقبال هتقولى لقيت جوزى جاى من بعيد و ماشي مش قادر يصلب حيله و على وشه هم الدنيا و الدموع مغرقه وشه
جريت عليه
خير يا ابو شريف الجماعه فين ؟؟؟
جوزى قعد على الأرض و حط ايده على دماغه و قعد يعيط بصوت عالى
فى ايه بس ؟؟ ايه اللى حصل ؟
اخويا ....اخويا و مراته و ابنه ماتوا يا ساميه
يا لهوى ....ماتوا ؟؟؟ انت بتقول ايه ؟؟
مش معقول ...اكيد فى حاجه غلط
مفيش غلط هما جم خلصانين و لولا لقوا نمرتى فى نوته فى جيبه مكنوش عرفوا يوصلوا لى .....و انا من ساعة ما وصلت و انا بجرى فى الإجراءات
و هما فين دلوقتى ؟
فى المشرحه
يا لهوى ...هما كمان هيشرحوهم ؟؟
لازم عشان تصريح الدفن
البقاء لله يا اخويا ...بس هما كانوا رايحين فين كدا و مراته لسه والده مبقاش لها خمس ايام ؟؟
اكيد كانت رايحه ترضع البت فى الحضانه و عملوا حادثه كلهم و ماتوا ....يا خبر 😳 البت ؟؟؟البت فين ؟؟
هو انت عارف البت فى انهى حضانه ؟؟؟
لا معرفش ....يا خبر اعمل ايه دلوقتى ياربى ؟
فى ايه ؟؟ خليك فى اللى انت فيه و بعد كدا بقا نشوف موضوع البت ده
اول ما جوزى اقتكر البت قلبى دق جامد، كدا البت دى مبقاش لها اى حد ...امها كانت مقطوعه من شجره و ابوها كمان مكنش له إلا اخوه اللى هو جوزى ....يا ادى المصيبه لو جابهالى ساعتها هقوله لا ...اكيد هقوله لا انا مش هربى بنت سماح بنت اكتر واحده كرهتها فى حياتى ، هو بقى يروح يشوف لها بنت خاله و الا بنت عمه و الا حتى يروح يوديها ملجأ انا مليش دعوه بيها و كفايه أن معايا تلات ولاد يعنى اى حد هيسمع هيقولك الله يكون فى عونى و انى معذوره انى مربيش عيل رابع و خصوصا أنه مش ضنايا و كمان حالة جوزى على ادها و يدوب قادر يصرف على عياله مش هنجيب هم تانى فوق همنا و نحط عليه
انا سرحت فى دا كله و لقيت نفسي رحت فى دنيا تانيه و فوقت على صوت التمرجى بيقول لجوزى الامانه جاهزه يا بيه و الورق خلص و تعالى عشان تستلمهم
قام جوزى من الأرض و هو مش قادر يصلب طوله و زى ما يكون كبر عشرين سنه و بقى ماشي مع التمرجى تايه و كأنه عيل صغير ساحبينه من ايده
روحت معاه لباب المشرحه و مقدرتش اتحمل قلت له :
انا هروح يا اخويا عشان اتصل بالعيله يحصلوك على المسجد اللى جنب الترب علشان تصلوا عليهم قبل ما تدفنهم
جوزى ركب مع عربيه نقل الموتى و راح على الترب عشان يدفن و انا روحت و اتصلت بأولاد عمه و اولاد خاله و العيله كلها عشان تحصله على المدافن
و فتحت البيت و اتصلت بالفراشه عشان يجيبوا كراسي و فراشه فى الشارع
جوزى راح دفنهم و خد عزاهم و اليوم مر تقييييل اوى ...جوزى كان مكسور اوى كسره مشفتهاش يوم موت امه حتى ..و كنت مستغربه اوى ليه زعلان الزعل دا كله على اخوه و مراته ....قصدى ليه مكنش بالشكل ده لما والدته ماتت ؟؟؟ كان اه بيعيط بس كان بيتعامل عادى و طالع و نازل و بيتكلم مع الناس امال دلوقتى ساكت خالص زى ما يكون فقد النطق و قاعد مبيتحركش من مكانه الا لو حد جه يسلم عليه يقوم بالعافيه يسلم و يقعد تانى ، كمان مرضيش يحط لقمه فى بطنه ،
انتهى اليوم و دخل جوزى اترمى على السرير و دموعه على وشه
وحد الله يا اخويا ...كلنا لها
و نعم بالله
اجيب لك حاجه تاكلها ؟
لا ...مش قادر ...انا هنام
لا متنامش و انت زعلان كدا ليحصلك حاجه ...قوم اتكلم معايا
لا يا ساميه مش قادر اتكلم سبينى و اقفلى النور من فضلك
براحتك يا عبدالوهاب ...انا كنت عاوزه اخفف عنك ...و اقولك أن كلنا هنموت و اخوك راح للى احن عليه منك و بعدين ....
ساميه من فضلك اخرجى و اقفلى الباب
بقى كدا ؟؟ طيب انا خارجه
رحت اوضه الاطفال و مكنتش عارفه انام من التفكير ...هما صعبانين عليا بس فى نفس الوقت موضوع البت ده هيسود عليا عيشتى و عارفه أن الموضوع مش هيمر بسلام و اكيد هيحصل خناقه كبيره بينى و بين جوزى بسبب البت دى
اه يا سلام لو جوزى ميعرفش يوصل لمكانها و اخر ما يزهقوا يودوها دار ايتام ...أو تيجى من عند ربنا و تحصل اهلها ...يبقى كدا الموضوع اتحل و ابقى كدا محصليش اى مشكله ....سبحان الله امها كانت بتعملى مشاكل و هى حيه و اهى ماتت و سابت بنتها تعملى مشاكل زيها
ربنا يسترها بقا و يجيب العواقب سليمة
نمت و انا عماله افكر و دماغى مشغوله حلمت بسماح جايه تضحك لى و راحت مديانى فى ايدى مفتاح كبير
بصيت لها باستغراب و قلت لها مفتاح ايه دا يا سماح ؟؟؟ اعمل بيه ايه ؟؟
ابتسمت مره تانيه من غير ما تنطق و لا كلمه و مشيت فى طريق طويل مزروع بزرع اخضر اوى
جيت أجرى وراها صحيت من النوم
يا ترى ايه المفتاح اللى جايه تدهولى ده ؟؟؟ برده مش هربى بنتك يا سماح حتى لو ادتينى ايه ...انا مش ملزمه اربى ولاد غيرى
سمعت صوت فى الصاله طلعت لقيت جوزى لابس و ماشي
انت رايح فين ؟؟
رايح ادور على بنت اخويا يا ساميه
بنت اخوك ايه بس على الصبح كدا ؟ دا لسه الساعه ٦ و بعدين هو انت عارف هى فى انهى حضانه ؟؟
لا معرفش بس هلف عليها فى كل الحضانات اللى فى البلد
ازاى بس ؟؟ انت تعبان و مكلتش حاجه من امبارح طب اقعد أفطر حتى
لا مليش نفس ...لازم الاقى بنت اخويا انا مش هيهدى لى جنب و انا عارف ان لحمى فى حته معرفهاش
خرج جوزى و انا بلمت و اتاكدت خلاص أن هيحصل بينى و بينه مشكله كبيره بسبب البت دى 😏
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق