الامانه
الجزء الاول
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
صلوا على خير الأنام يا ساده يا كرام 😍
انا مدام ساميه عمرى ٤٧ سنه حابه احكيلكم عن حاجه حصلت معايا من حوالى ٢٠ سنه
حاجه بتأرقنى و تعبانى إلى يومنا دا و مش قادره اتخلص من الإحساس بالذنب
الحكايه بدأت لما لقيت عبدالوهاب جوزى داخل عليا و بيقولى
ايه يا ساميه انتى لسه ملبستيش ؟؟؟
لا يا عبده ملبستش و لا عاوزه اروح
ازاى يعنى مش عاوزه تروحى ؟؟
يا عبده انت عارف انى مبقبلش اللى اسمها سماح دى و لا حتى ابنها الرخم ده اللى كل ما يشوف ولادى يضرب فيهم
لاحظى انك بتتكلمى عن ابن اخويا
ابن اخوك لكن رخم زى امه و صراحه انا مش عاوزه ادخل بيتهم دا ابدا
مش بمزاجك يا ساميه دا واجب و لازم نعمله الست لسه والده و فاتحه بطنها و بنتها فى الحضانه و ميصحش انك متروحليهاش
يا سلام ...و هى من امتى جات لى و لا عبرتنى و انا والده ؟؟ انت نسيت اللى عملته فيا و انا فى بيت العيله ؟؟؟ و بالرغم انى انا مرات الكبير بس و لا كانت بتعمل لده اى اعتبار و حماتى الله يرحمها مكنتش بتقدر تقولها اى حاجه رغم أنها كانت بتشوف هى كانت بتعمل معايا ايه
يا ستى دا كلام عدى عليه سنين
بس عمرى ما هنساه لها ...عمرى ما انسي انها كانت تكنس و تحط الزباله قدام باب شقتى و عمرى ما انسي انها كانت تنفض سجاجيدها على غسيلى الابيض و تخلينى اغسله مره تانيه و عمرى ما انسي انها دلقت لى زيت على السلم لما عرفت انى حامل فى احمد ابننا و لولا ستر ربنا كنت سقطت الجنين
ما هو بسبب الموضوع ده خرجنا من بيت العيله و أشترت لك شقه بره بعيد عنها ، يعنى الست خدمتك بعملتها دى ...بصى لنص الكوبايه المليان
و لا نص الكوبايه المليان و لا نصه الفاضى ارجوك يا عبده متضغطش عليا فى الموضوع ده بالذات
يا ساميه خلينا احنا احسن منهم
احسن منهم ؟؟؟ انت ناسي انها ياما عايرتنى انى معايا دبلوم و هى معاها شهاده عاليه و كانت دايما تلقح عليا أن اهلى شحاتين و مش لاقيين ياكلوا ؟
يا ساميه انتى قلبك ابيض و بتسامحى
لا يا اخويا انا قلبى فى الموضوع ده بالذات اسود زى النيله و سبنى بقى أطبق الغسيل و اشوف اللى ورايا دا أبدى منها و من المرواح لها
يعنى انتى هتخلى شكلى وحش كدا و انا داخل عليهم لوحدى ؟؟
و ليه يا حبيبي ؟؟؟ ..لا تروح و لا تيجى هو من امتى اخوك بيدخل لنا بيت ؟؟
بس انا الكبير يا ساميه و اخويا دا ملوش حد فى الدنيا غيري بعد موت ابويا و امى و اخويا حسام الله يرحمه
خلاص يا عبدالوهاب انا قلت لك على الخلاصه و مش هاجى يعنى مش هاجى
براحتك يا ساميه بس اعرفى انك بكدا مزعلانى وواخد على خاطرى اوى منك
معلش ..بس متجيش على اعصابى و تقول زعلان منك انت متتخيلش انا بكرهه مرات اخوك و اخوك ده ازاى
اخويا كمان بتكرهييه ؟؟؟
ايوا طبعا انت ناسي أنه ياما اتخانق معايا عشان مراته و فى مره جرى ورايا و كان عاوز يضربنى بسببها لولا امك اتدخلت و حاشته عنى
بس خلاص خلاص ...يا ستار عليكى مكنتش اعرف ان قلبك مليان حقد كدا
لا يا حبيبي قلبى مش مليان حقد و لا حاجه بس انا عمرى ما بنسي اى حاجه وحشه اتعملت فيها و مقدرش اسامح ابدا ناس هانوا كرامتى و خلوا دمعتى متنشفش من على خدى ليالى كتير و انا عمرى ما أسأت لحد فيهم و كنت فاهمه انها هتكون اختى و حبيبتى بس للاسف كنت غلطانه و كانت تغير منى كأنى متجوزه جوزها
خلاااااااص خلصنا انا رايح لوحدى اعمل الواجب
و راح جوزى لأخوه و مراته زارهم
الف حمدالله على السلامه يا ابو انور
الله يسلمك يا ابو شريف عقبال عندكم
لا يا عم كدا حلو اوى تلات ولاد ...عشان نعرف نربيهم و نعلمهم كويس
مش نفسك فى بنت ؟؟؟ انت لو شفت سلمى بنتى هتغير رايك على طول
هى لسه فى الحضانه ؟؟
ايوا يا اخويا عندها الصفرا عاليه اوى و مش عارفين هيخرجوهالنا امتى
باذن الله هتخرج و هتكون زى الفل و بكرا تفرح بيها و باخوها باذن الله
يارب يا عبده ...انا مش عارف قلبى مقبوض ليه و خايف كدا
لا يا اخى متخافش كل العيال بتنزل كدا و بيبقوا زى الفل
طب تعالى ادخل ام انور جوه صاحيه
حمدالله على السلامه يا ام انور
الله يسلمك ..امال ام شريف مجتش معاك ليه ؟؟
اصلها تعبانه شويه بس ان شاء الله هتبقى تيجى فى السبوع
إن شاءالله
اعمل مغات لأبو شريف يا هادى ..
لا لا انا مبشربش المغات
خلاص اعملك شاى
لا انا همشي بقا اصل ورايا شغل و هبقى اجيلكم تانى لما تجيبوا سلمى باذن الله علشان اشوفها
أن شاء الله يا اخويا ....شرفت و نورت
و رجع جوزى مغابش نص ساعه طبعا استقبلته بعوجه و قلت له
ها ....حرقت لك دمك زى العاده ؟؟؟
و لا حرقت لى دمى و لا نيله انا بس كنت مكسوف انى رايح من غيرك
يووووو احنا مش هنخلص من الموال ده ؟
خلصنا ...روحى يلا اعمليلى كوبايه شاى عندى صداع
حاضر عنيا ....شفت البت ؟؟ اكيد شبه امها
لا يا ستى مشفتهاش لسه فى الحضانه ...يارب تطلع لهم بالسلامه
يارب يا اخويا 😏
مر يومين و حصل اللى لا كان على بال و لا على خاطر
جوزى جاله تليفون و لقيته بيصرخ و يقول .........
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق