الدميه
الجزء الثالث عشر و الاخير
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
صلوا على خير الأنام يا ساده يا كرام😍
خلص اليوم بصعوبه و دخلت خالتى ترتاح فى اوضتها و لسه بتفتح الشنطه الكبيره لقت حاجه مكنتش متوقعه وجودها فى الشنطه نادت على بسمه
يا بسمه يا بسمه
نعم يا ماما
انتى ايه اللى مخليكى حاطه العروسه الزفته دى فى شنطتى ؟؟؟
بسمه جالها ذهول و مبقتش عارفه ترد
يعنى تضيعى هدومك و تحافظى على العروسه ام شكل وحش دى ؟؟ ما تردى يا فالحه
مش عارفه يا ماما
طب خدى يا اختى عروستك الننوسه اهى و يلا عشان تنامى
بسمه خدت العروسه فى حضنها و راحت الاوضه اللى بتنام فيها و هى حاسه ان رجليها مش شايلاها ، هى متأكده أن العروسه عمرها ما هتسامحها على اللى عملته فيها ده
بسمه باتت طول الليل تشوف كوابيس و تشوف مقابر و جثث محروقه و تشوف أن العروسه بتأذى ابوها و امها و اخواتها و بتحولهم جميعا لجثث متغطيه جنب بعضها بسمه بقت كل شويه تقوم مفزوعه من النوم
اخر حلم شافته شافت نفسها فى البيت اللى جابت منه العروسه و أنها دخلت البيت ده و كان معاها عروستها بعدها لقت نفسها فى حته واسعه جدا و لوحدها مش معاها اى حد من اهلها و لا معاها العروسه
بسمه فاقت من نومها و جت فى دماغها فكره انها عشان تتخلص من العروسه دى لازم فعلا ترجعها لمكانها و بكدا تكون اتخلصت من اللعنه دى للابد ....ازاى انا مفكرتش فى الموضوع ده قبل كدا ؟؟؟
بسمه اتصلت عليا و حكت لى كل حاجه من اول ما سابت العروسه فى العربيه و ازاى مامتها لقتها و حكت لى على الاحلام اللى شافتها و هى مرعوبه و أنها خايفه على أهلها و لازم تروح ترجع العروسه مكانها مره تانيه
بس يا بسمه الموضوع مش سهل زى ما انتى فاهمه ....انا خايفه عليكى اوى
متخافيش يا هدى ....هو ده الحل اللى مفيش غيره ...العروسه دى لو مرجعتش ممكن فعلا تأذى عيلتى كلها
و ممكن تأذيكى انتى نفسك
متخافيش عليا يا هدى و لو حصل لى حاجه ابقى دايما افتكرينى و افتكرى ايام ما كنت بستخبى منك تحت السرير و تدوخى على ما تلاقينى ...متنسنيش يا هدى و دايما دورى عليا ...و ابقى ادعيلى
متقوليش كدا ...بعد الشر عنك
دى غلطتى و لازم اتحملها
لا دى مش غلطتك انتى مكنتيش تعرفى أن ده كله هيحصل
خلاص يا هدى اشوف وشك على خير
استنى يا بسمه ..خالتى لازم تعرف.... لازم تقوليلها كل حاجه
لا لا يا هدى ...ماما مش لازم تعرف اى حاجه ...لو عرفت العروسه اكيد هتأذيها
طب منا عرفت و مأذتنيش
انا معرفش هى ليه مأذتكيش بس انا متأكدة أن اى حد هيعرف سرها هتأذيه
قفلت بسمه و نادت على ابراهيم ابن عمها
ابراهيم ...يا ابراهيم
نعم يا بسمه
انا عاوزاك فى مشوار معايا
مشوار ايه يا بسمه ؟؟ مينفعش اروح فى اى حته دلوقتى... مقدرش اسيب عزا الجده
يعنى مش هتعرف تيجى معايا ؟؟
انتى عاوزه تروحى فين ؟؟
مش مهم بقا خلاص ...روح يلا شوف اللى وراك
قررت بسمه انها تروح لوحدها بس بعد ما تكتب جواب لأهلها و تحطه فى شنطتهم علشان لو حصل لها اى حاجه يبقوا عرفوا القصه كلها . و كانت متخيله أنهم اكيد هيلاقوا الجواب بعد ما تكون اللعنه انتهت و بكدا مش هيحصل لهم اى حاجه
و بالفعل كتبت الجواب و شرحت فيه كل حاجه بالتفصيل و حطته فى جيب الشنطه الكبيره
استنت بعد صلاة العصر و حطت العروسه فى كيس و اخدتها و طلعت على البيت الملعون
بسمه راحت و مرجعتش ....ايوه اختفت و محدش عرف يوصلها مره تانيه
اهلها دوروا عليها كتير اوى و سألوا عليها لكن محدش عرف هى راحت فين
لحد ما لقوا الجواب و فهموا اللى حصل معاها و رغم كدا جوز خالتى مسكتش و راح هو و خالتى و ناس كتير من عيلته و دخلوا البيت يدوروا على بسمه لكن للاسف ملقوهاش برده و محدش عرف هى راحت فين و ايه اللى جرالها
لما خالتى و جوزها يئسوا من التدوير عليها كانوا مضطرين يرجعوا علشان شغل جوز خالتى
جوز خالتى وصى ولاد عمه أنهم ميبطلوش تدوير على ما يسافر و ياخد اجازه طويله و يرجع يدور معاهم
و فعلا سافروا كلهم و للاسف عملوا حادثه فى السكه و مرجعش منهم إلا شنطه هدومهم
ايام صعبه و لعنه رهيبه مرحتش الا بموت بسمه و أسرتها ....
فضى البيت علينا و مبقاش فيه بسمه و لا خالتى و لا اولادها ...حتى خالتى صباح حالتها بتدهور يوم عن يوم
مر على الحادثه دى دلوقتى عشرين يوم ....عشرين يوم و انا بشوف بسمه فى احلامى و هى بتضحك لى و تمشي و تروح تقابل أسرتها و تاخدهم و تدخل جنينه جميله جدا خضرتها مشفتش زيها
كل يوم نفس الحلم ...و اللى عرفت منه أنها هى و أسرتها فى مكان كويس الحمد لله بس بالرغم من ده الرعب مسبنيش ، معرفش ايه كان مخوفنى بالشكل ده بالرغم أن كل شي انتهى
و عشان كدا قلت احكى معاكم يمكن رعبى دا يخف شويه او حد منكم يفسر لى اللى حصل انا بيتهيالى أن بسمه كانت غلطانه لما كتبت الجواب لأهلها و عرفتهم قصه العروسه و يمكن عشان كدا العروسه انتقمت منهم هما كمان
اللى شاغلنى بقا ليه انا بالذات العروسه ماذتنيش بالرغم انى عارفه كل الحكايه ؟؟؟؟
اكيد فى سر ...بس ايه هو؟؟ معرفش
وحشتنى بسمه ووحشنى لعبى معاها ...وحشنى تدويرى عليها تحت السرير ....ربنا يرحمك يا حبيبتى
هى وصتنى ادور عليها تحت السرير ...ايه الجنان ده ؟؟؟ بس هعمل اللى قالت لى عليه يمكن هى حواليا دلوقتى و تشوف انى منستهاش
انا بدور عليكى يا بسمه ....يا ترى انتى مستخبيه تحت السرير زى كل مره ؟؟ انا هرفع الملايه و لو لاقيتك مش هسيبك
هرفع اهو
.
.
ايه دا ؟؟؟؟؟؟ العروسه 🥺😳😳😳
🌷 تمت 🌷
✋طبعا كلكم عرفتوا ليه دلوقتى العروسه ماذتش هدى 🙄🤔
ارجو ان القصه تكون عجبتكم ...و لو عجبتكم القصه ارجو الدعاء لوالدى رحمة الله عليه و سائر موتى المسلمين بالرحمه و المغفره
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق