الدميه
الجزء السابع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
دخلت دماغى من فتحه الشباك المكسور و كان نص جسمى الفوقانى تقريبا جوه البيت
و لفيت بنظرى شمال و يمين عشان اشوف كل حاجه موجوده
و فجاه لقيت حاجه بتتحرك جوه ..ببص كدا لقيت بنت صغيره بتتحرك ووقفت فى جنب كأنها خايفه
بص يا ابراهيم ...فى بنت صغيره هناك اهى
اعوذ بالله من الشيطان الرجيم يلا يا بسمه يلا نمشي من هنا
دى بنت صغيره و شكلها خايف لازم نساعدها
نساعد مين ؟؟ دى تلاقيها بسم الله الرحمن الرحيم عفريته
عفريته ايه بس ؟؟ هو فى عفريته بتطلع بالنهار ؟؟
ايوا يا ستى ...و يلا من هنا لتأذينا
لا مش همشي الا اما اشوف البنت دى ايه جابها هنا ؟؟
هى فين البت اللى بتقولى عليها دى ؟؟
اهى فى الركن هناك اهى
انا مش شايفه اى حاجه
ازاى يا اخى مش شايف ؟؟؟ دى قاعده اهى و لازم ندخل تساعدها
نساعد مين ؟؟؟ لا احنا متفقناش على كدا ....يلا احسن همشي و اسيبك
اه يا جبان ...كنت عارفه انك خواف و كنت متأكدة كمان
من خاف سلم يا اختى ...هتيجى و الا امشي لوحدى ؟؟؟
لا امشي مش عاوزاك
هتعرفى ترجعى لوحدك ؟؟
اه هعرف يلا امشى
بس انا مش هقدر اسيبك لوحدك ليجرالك حاجه و فى نفس الوقت مش عاوز اقعد هنا ثانيه واحده الحل ايه بقى ؟؟
الحل انك تقوى قلبك شويه و متبقاش جبان كدا مش يمكن البنت اللى جوه دى زينا جت تتفرج و دخلت و مش عارفه تخرج ؟؟ مش يمكن ربنا بعتنا لها عشان نساعدها ؟؟
او يمكن بسم الله الرحمن الرحيم عفريته
لا مظنش ...ها ...هتدخل معايا ؟؟
لا يا اختى هستناكى هنا
كنت متأكدة و الله أن ده هيبقى جوابك عارفه أن خوفك اتغلب عليك ...انا هدخل عشان اساعدها و لو مطلعتش يبقى ذنبى فى رقبتك
و ذنبك فى رقبتى ليه يا بنت الحلال ؟؟؟
ما تيجى بينا نمشي و خلاص
لا مقدرش امشي و فى حد محتاج مساعدتى
يا بسمه الحاجات اللى موجوده فى البيت دا حاجات مش طبيعيه و يمكن ياذوكى انتى لسه صغيره و غشيمه
لا انا مش صغيره انا فى أولى إعدادى
كدا انتى كبيره يعنى ؟؟
ايوه طبعا ....ها هتدخل معايا ؟؟
لا يا بسمه مش داخل
خلاص انا داخله
يا خبر يا بسمه ؟؟ و دخلتى فعلا و مخوفتيش ؟؟
و هخاف من ايه يا هدى ؟؟؟ الموضوع عادى جدا
دخلت ..البيت كان له ريحه غريبه اوى اول مره اشمها ...حاجه كدا زى ريحة حريق على ريحه مش حلوه
لما قربت من المكان اللى البنت كانت واقفه فيه ملقتهاش
استغربت اوى لانى كنت لسه شايفاها و ازاى تروح من قدامى كدا من غير ما أشوفها
ابتديت اقلق شويه و حسيت أن كلام ابراهيم ممكن يكون حقيقى
جيت ارجع لقيتها واقفه على سلم من الطين و زى ما يكون عاوزانى اطلع وراها
و طبعا مطلعتيش ؟؟؟
لا طلعت
يا خبر يا بنتى ...دا باين اوى انها عفريته
حتى مع معرفتى بأنها مش انسيه بس حسيت انها عاوزه تقولى حاجه و كانت حاجه بتشدنى انى اطلع وراها و اشوف هى عاوزه توصلى ايه
طلعت و لقيت اوضه فوق السطح متهدمه دخلت ....و دخلت وراها
و فجأه لقيت طاقة نور فتحت جوه الاوضه الضلمه و شفت كل حاجه
كل حاجه ازاى ؟؟؟
شفت اللى حكتهولى الجده..... هى ورتنى ازاى ابوهم ربطهم و مرات ابوهم خنقتهم بالحبل بكل غل و مصعبوش عليها لحظه و هى بتخنقهم و شايفاهم وشهم بيزرق و بيطلعوا رغاوى من بقهم و ازاى انها بعد ما اتاكدت أنهم ماتوا فكتهم و رمتهم على الأرض و حطت عليهم شوال و غطتهم بالقش لحد ما ابوهم جه و قالت له أنهم ماتوا من الربطه و قلة الاكل و ابوهم قعد يقلب فيهم يمكن مغمى عليهم بس لقاهم خلصانين قعد جنبهم و حط ايده على دماغه و كان خايف ...مكنش زعلان اد ما خايف من الحكومه لكن زينب طمنته و قالت له متخافش انا هخلص لك الموضوع ده من غير ما حد يحس
المنظر كان فظيع ...مش زى ما بنشوف فى الافلام ...لا دى كانت حقيقه لدرجة انى كنت حاسه أنه هيغمى عليا من المنظر
بعد ما شوفت كل اللى حصل لقيت البنت جابت العروسه دى و مدت لى أيدها بيها
اترددت انى اخدها و قلت لها
دى العروسه اللى مامتك عملتها ؟؟
هزت راسها بايوه
طب انتى عاوزانى اخدها ؟؟؟
هزت راسها مره تانيه ايوه
اخدت العروسه و البنت اختفت و الدنيا ضلمت
نزلت جرى من السلم و فى ايدى العروسه و طلعت من الشباك لقيت ابراهيم واقف مش على بعضه
اتأخرتى ليه ؟؟ و ايه اللى فى ايدك دا ؟؟
دى عروسه البنت
و جايباها ليه ؟؟
هى ادتهالى
لا ارميها ارميها جوه زى ما كانت
لا هاخدها
تاخدى ايه؟؟ اسمعى الكلام يا بسمه
لا يا ابراهيم و لو مسكتش هقول للجده أنك جبتنى هنا
بقا كدا يا بسمه ؟؟ دا جزاتى انى سمعت كلامك ؟؟
متخافش يا ابراهيم دا سر ما بينا و انا مش هتكلم الا لو انت اتكلمت
طب و هتقوليلهم جبتى العروسه دى منين يا فالحه ؟؟؟
هقولهم سهير اللى بلعب معاها ادتهالى
خلاص انتى حره يا بسمه بس انا مش مرتاح للعروسه دى شكلها مش مريح خالص
انت اللى خواف
ماشي يا اختى يلا بينا زمانهم خدوا بالهم اننا مش موجودين
يلا يا ابن عمى
و اخدت العروسه و مشيت كنت حاسه انها بتبص لى اوى بس قلت لنفسي تلاقينى بيتهيالى
روحنا البيت و محدش خد باله من غيابنا
دخلت الاوضه و حطيت العروسه جنبى و غمضت عينى ....كنت لسه منمتش يعنى كنت بين الصحيان و النوم لقيت .....
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق