الدميه
الجزء السادس
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
النار مسكت فى العضم كأنها رشت بنزين عليه و شعللت اوى و الدخان عبى المكان و بدأت تعدى من عليه سبع مرات زى ما قالها علام وفى اخر مره و هى بتعدى لقت نفسها داخت و فجأه ظهر لها تعبان ضخم خرج من شق فى جدار المقبره
داود اول ما شافه قام وقف و هو خايف و استنى يشوف دا ايه
التعبان كان ضخم لدرجه متصدقش دا جه منين و الا طلع ازاى من الشق ده
كان طوله اكتر من تلاته متر و كبير و عريض زى التعابين العاصره
التعبان كان زى اللى عارف وجهته ...مشى ناحيه زينب بكل بطئ و هى اتجمدت مكانها
التعبان اول ما وصلها قام و انتصب و بقى ارتفاعه أعلى منها
زينب مقدرتش تتحمل المنظر و اغمى عليها
و طبعا داود طار موقفش يشوف ايه اللى هيحصل
زينب بعد ساعات فاقت و لقت نفسها مرميه جنب رماد البنات و ابنها خارج من بطنها ملفوف حوالين رقبته الحبل السرى و لونه ازرق و طبعا مخنوق
زينب لما شافت المنظر شعرها شاب و حصل لها لوسه فى عقلها شالت الواد بدمه و طلعت بيه بره المقابر
طلعت تجرى فى الشوارع و شعرها منكوش و هدومها كلها دم و ابنها على أيدها و العيال الصغيره تحدفها بالطوب
الناس خدوها وصلوها لدارها و حاولوا ياخدوا العيل منها لكنها مرضيتش و مسكت فيه و اللى كان يقرب عشان ياخده كانت تحدفه بالطوب
حتى جوزها معرفش يعمل معاها حاجه
و للاسف لقوهم بعد يومين ميتين الاتنين و كأن حد خنقهم .
و من اليوم ده البيت اتقفل و كان كل ما حد يعدى جنبه يسمع اصوات عيال بتلعب و ساعات عيال بتصرخ و ساعات يلاقوا طوب بيتحدف عليهم و عشان كدا الناس بطلت تعدى من جنب البيت ده نهائى أو حتى تقرب منه
يااااا دى حكايه غريبه اوى ...بس انتى برده مقولتليش جبتى العروسه دى منين ؟؟
هقولك بس متقوليش لحد و لا حتى خالتك
ايه دا ؟؟ هو خالتى متعرفش انتى جايبه العروسه دى منين ؟؟
لا متعرفش انا قلت لها انى كنت بلعب مع بنت هناك و ادتهالى
طيب ...مش هقول بس قوليلى بقا جايباها منين ؟؟؟
لما جدتى حكت لنا الحكايه دى كان نفسي اوى اشوف البيت اللى بتحكى عنه ده و اجرب كدا انى اعدى من قصاده يمكن اسمع الضحك و الا البكا اللى بيقولوا عليه او يمكن حتى اشوف الطوب اللى بيتحدف ده
يا خبر ....انتى قلبك جامد اوى
المهم.. ليا ابن عم هناك فى الصعيد اسمه ابراهيم اكبر مننا بسنتين و كان قاعد معانا و جدتى بتحكيلنا الحكايه و كان ظاهر عليه أنه سمعها قبل كدا و عارفها كويس اوى و كان بيقول أنه فعلا لما راح عند البيت ده اتحدف عليه طوب و ساعتها الجده زعلت و قالت له
ايه اللى وداك هنا يا واد ؟؟ انت عاوز تتلبس و الا ايه ؟؟
اتلبس ايه يا جده ؟؟ انا كنت رايح بالنهار
نهار و الا ليل ؟؟ انا قلت لك متهوبش يمة هناك ...مبتسمعش الكلام ليه ؟؟
معلش يا جده ..مش هروح تانى
لو عرفت انك رحت هخلى ابوك يربطك فى الغيط و مش هخلى حد يحلك
خلاص يا جده مش رايح تانى
ابراهيم خرج من عند الجده و خرجت وراه
ابراهيم
نعم يا بسمه
هو انت صحيح رحت البيت اللى الجده بتقول عليه ؟؟
ايوا رحت
و مخفتش ؟؟؟؟
انا راجل ...مبخفش من اى حاجه
لا بس باين عليك بعد ما رحت انك خايف شويه
مين قال كدا ؟؟ انا عمرى ما اخاف
خلاص لو مش خايف تعالى ورينى البيت ده فين ؟
هو انتى مسمعتيش كلام الجده ؟؟
و مين هيقولها ؟؟ احنا هنروح فى دقايق و نرجع ....هو البيت ده بعيد ؟؟
هو عند أول البلد فى الزراعيه
يعنى ناخد اد ايه على ما نوصل ؟؟؟
عشر دقايق
طب حلو اوى و هنقف هناك خمس دقايق يعنى المشوار كله مش هيكمل نص ساعه محدش هيلحق يحس بغيابنا
بس يا بسمه ...مقدرش
شفت بقا انك خايف
لا قلت لك انا مبخفش
امال مش عاوز تروح ليه ؟ الا انك خايف تروح تتلبس زى ما الجده قالت
لا مش خايف و لا حاجه و تعالى معايا و انا اوريلك كمان
ايوا كدا هو ده ابن عمى الشجاع
و رحنا على البيت و احنا بنجرى عشان نوصل بسرعه قبل ما حد ياخد باله اننا مش موجودين
وصلنا البيت و احنا بننهج من كتر الجرى و اول ما وصلنا لقيته بيت فلاحى قديم اوى مبنى بالطوب النى و شبابيكه واقعه و مكسره و باين عليه الخراب
قربت من شباك من الشبابيك و بصيت جوه لقيت ابراهيم بيشدنى و يقولى
تعالى هنا ...متقربيش كدا
هههههههه انت خايف صح ؟؟
يا بنتى مينفعش تبصى جوه كدا ؟
و ليه يعنى ؟؟
كان فى عيل بيقولوا بص جوه الدار زى ما بتعملى كدا و لقوه تانى يوم رقبته مفصوله عن جسمه
يا سلام و مين قالكم بقا أنه بص و انتوا لقتوه ميت ؟؟
معرفش دا اللى احنا سمعناه
خرافات ....ادى احنا واقفين اهو بقالنا شويه و لا سمعنا حاجه و لا شفنا حاجه
طب كفايه كدا يا بسمه و يلا بينا
اه يا خواف
انا خايف عليكى ...و بعدين لو جرالك حاجه الجده هتموتنى
لا متخافش ...اذا كان انا نفسي مش خايفه و مش مصدقه اى حاجه من الكلام اللى قالته الجده ده
لا صدقى ....لانى شفت و سمعت بعينى
شفت ايه ؟؟؟
شفت الطوب و هو بيتحدف
طب استنى هبص مره كمان و خلاص
دخلت دماغى من فتحه الشباك المكسور و كان نص جسمى الفوقانى تقريبا جوه البيت
و لفيت بنظرى شمال و يمين عشان اشوف كل حاجه موجوده
و فجاه لقيت حاجه بتتحرك جوه ..ببص كدا لقيت 😳😳 ....
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق