الدميه
الجزء الثامن
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
و اخدت العروسه و مشيت كنت حاسه انها بتبص لى اوى بس قلت لنفسي تلاقينى بيتهيالى
روحنا البيت و محدش خد باله من غيابنا
دخلت الاوضه و حطيت العروسه جنبى و غمضت عينى ....كنت لسه منمتش يعنى كنت بين الصحيان و النوم لقيت العروسه بتتحرك جنبى و بتبص لى اوى ...قربت عليا و انا حاسه انى متكتفه حاولت اقوم بس مقدرتش و سمعت صوت جوه ودنى بيقولى
انا قدرك ....لو حاولتى تتخلصى منى هتموتى
يا خبر ؟؟ انتى بتقولى ايه يا بسمه ؟؟
انا معرفش اللى سمعته و شفته ده كان حقيقه و الا مجرد حلم بس الحكايه دى خوفتنى و خلتنى مش عارفه اتصرف
ازاى مش عارفه تتصرفى العروسه دى لازم نتخلص منها بسرعه
مقدرش يا بسمه
متقدريش ليه ؟؟
هوريكى حاجه بس متقوليش لحد
طبعا يا حبيبتى مش هقول
بصى
ايه دااااا ؟؟؟
دا حرق فى رجلى
اتحرقتى كدا ازاى ؟؟
فكرت انى اتخلص منها و جت لى فكره انى ارميها فى الترعه ، رحت فعلا قبل ما نيجى بيوم و رمتها و كنت متخيله انى كدا اتخلصت منها
ورجعت و كنت فرحانه ، لما جيت انام حلمت بيها جايه و ماسكه شعله فى ايدها و راحت حرقانى فى رجلى و انا مش قادره اتحرك و قالت المره دى تحذير المره الجايه متلوميش الا نفسك ....فتحت عينى لقيتها جنبى ازاى معرفش
انتى لازم تقولى لخالتى الكلام ده
لا اوعى ...لو اتكلمت هتأذينى
طب ما انتى اتكلمتى معايا
كلامى معاكى برده ممكن يأذينى بس انا فعلا تعبانه و مكنتش قادره اخبى اكتر من كدا ، كنت حاسه انى هموت لو مقلتش السر ده لحد
كلام بسمه خوفنى اوى و خلانى عاوزه امشي من قدامها بسرعه بس هى كانت صعبانه عليا و مش عارفه اساعدها ازاى
بعد كدا بدأت الكوابيس متسبنيش كل يوم احلم بالعروسه انها جايه تأذينى ...كل يوم اقوم من نومى و انا بصرخ و امى تيجى جرى عشان تشوف مالى
أما أحوال بسمه بقا اتبدلت بقت على طول قاعده لوحدها ، مبترضاش تستحمى ، بقت تاكل زى الحيوانات و تدور فى الزباله و تجيب الاكل و تاكله ...بقت تجمع الزباله فى اوضتها و فوق سريرها و يا ويله اللى يقرب منها
ساعات كنا نسمعها بتضحك بصوت عالى اوى يهز البيت كله و ساعات تفضل تصرخ
محدش من البيت كان عارف ايه جرالها الا انا ...بس مكنتش قادره اتكلم لانى كنت خايفه اتأذى زيها ...
خالتى بقت حالتها وحشه جدا ، بيتهم بقى كله نكد و هم
ابوها لما شافها كدا مكنش عارف يتصرف و كان بيتكلم مع أمه فى التليفون
ازيك يا ولدى
تسلمى يا امى
مالك يا ولدى صوتك مليان هم ؟؟
البت يا اما حالها زى ما هو ...بالعكس بيسوء اكتر
ما قلت لك البت شكلها اتمست من بسم الله الرحمن الرحيم
اتمست ايه بس يا حاجه ؟؟ و ايه اللى هيمسها بس ؟؟
معرفش يا ولدى بس كل اللى بتحكيه بيقول كدا ...هات لها حد يشوف قطرها
قطرها ايه بس ؟؟ دا كل ده شرك بالله و امور دجل يا امى
امال هتسيبها كدا لحد ما تتجنن؟؟
لا طبعا هشوف لها شيخ يجى يرقيها
خلاص يا ولدى شوف و ابقى طمنى
حاضر يا حاجه
قفل جوز خالتى السكه و طبعا كنا كلنا قاعدين و سامعين المكالمه
خالتى قالت له شيخ ايه اللى هتشوفه ؟؟؟
امال هنسيب البت كدا؟؟
البت محتاجه دكتور مش شيخ ...انت ازاى متعلم و مش عارف ان اللى بيحصل لبنتك ده نفسي
و نفسيتها هيحصل لها كدا ليه ؟؟
معرفش ...بس اكيد الدكتور هيعرف
يعنى انتى مش عاوزانى اجيب شيخ ؟؟ و عاجبك منظرها ده ؟؟
لا مش عاجبنى و مش عاجبنى حكايه الدجل اللى عاوز تدخلنا فيها دى ...انت لازم تشوف لها دكتور كويس باسرع وقت
حاضر هشوف ...انا هعمل اللى يريحك مع انى عارف اللى فيها
ايه اللى فيها ؟؟؟ الخزعبلات اللى انت متربى عليها ؟؟
احترمى نفسك انا مش متربى على خزعبلات
هى بنتى حصلها كدا من ساعه ما راحت بلدكم ...الله اعلم حصلها ايه هناك و الا مين عمل فيها ايه ؟؟؟...البت كانت زى الورده المنوره
هو مين اللى هيعمل فيها حاجه ؟؟ و لو زى ما بتقولى كنتى فين حضرتك لما بنتك حصلها كدا ؟؟
ايووووه ارمى كل حاجه عليا كعادتك
البيت قلب خناقه و امى قامت تسلك ما بينهم و تحاول تهدى اختها و تاخدها على شقتها
انا الوحيده اللي كنت عارفه السر بس مش قادره اتكلم و لا اقول
بعد يومين كان جه ميعاد الدكتور اللى حجزه جوز خالتى لبسمه
طبعا بسمه مكنتش راضيه تروح ابدا و كانت هدومها متوسخه جدا و شعرها منكوش و ريحتها قذره لأنها مكنتش بتسمح لحد يقرب منها و لا يخليها تغير هدومها
امها اتحايلت عليها تغير حتى من غير ما تستحمى لكنها رفضت و بقت تصرخ و صريخها يجيب اخر البيت
ابوها اضطر عشان ينزلها معاه أنه يربطها بحبل جامد من اديها و رجليها و يشيلها على ضهره و ينزل بيها
بسمه قعدت تصرخ و تقول عاوزه هدى ...عاوزه هدى ...
انا معاكى يا بسمه
هاتى عروستى متسبهاش هنا لوحدها و تعالى معايا
حاضر حاضر يا بسمه
مسكت العروسه بخوف شديد و اديتها لخالتى
بسمه صرخت لا انتى خديها ...ماما لا ...انتى هتيجى معايا
طبعا أنا ساعتها كنت خايفه و مش عاوزه اروح معاها بس حالتها فعلا كانت وحشه اوى
خالتى عشان ترضيها قالت لى تعالى معانا يا هدى
استأذنت من والدتى و نزلت روحت معاهم و الخوف مالينى ...انا معرفش هى طلبت اروح معاها ليه ؟؟ و معرفش العروسه دى و الا الروح الشريره دى ممكن تعمل فينا ايه ؟؟
بسمه راحت للدكتور و هى مربطه الدكتور اول ما شافها كدا قالهم
ليه كدا ؟؟ انتوا رابطينها ليه كدا ؟؟
ما هى مكنتش عاوزه تيجى معانا يا دكتور
لا لا من فضلك فكها و اتفضلوا استنونى بره
طب تخلى بنت خالتها معاها ؟؟ دى اقرب حد ليها
خلاص سيبها معاها و اتفضل حضرتك انت ووالدتها بره لحد ما انده عليكم
حاضر يا دكتور
و خرج جوز خالتى و خالتى و فضلت انا معاهم
الدكتور كان لطيف جدا و طلع من الدرج شكولاتين و بص لى بابتسامه
اسمك ايه ؟؟
أسمى هدى
انتى اقرب حد لبسمه ؟؟
ايوا بسمه اختى
كويس ....تعرفى ايه اللى حصل لها ؟؟
هزيت راسي بخوف و انا بصالها و هى ظاهر على وشها نظرة غضب ، تؤ
امال بتقولوا انكم قريبين ازاى ؟؟
وطيت دماغى و مردتش عليه
الدكتور مد ايده و ادالى الشيكولاته اخدتها منه و قلت له متشكره
مد ايده بالشيكولاته التانيه لبسمه و قالها اتفضلى
بسمه رفعت راسها و بصت له بصه كلها غل و انتقام .. وقالت له
انت فاكر انك هتضحك علينا بالشيكولاته دى ؟؟؟ ابعد احسن لك .....
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق