الدميه
الجزء التاسع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
صلوا على خير الأنام يا ساده يا كرام😍
الدكتور مد ايده و ادالى الشيكولاته اخدتها منه و قلت له متشكره
مد ايده بالشيكولاته التانيه لبسمه و قالها اتفضلى
بسمه رفعت راسها و بصت له بصه كلها غل و انتقام .. وقالت له
انت فاكر انك هتضحك علينا بالشيكولاته دى ؟؟؟ ابعد احسن لك .....
اضحك عليكوا ؟؟؟ انتوا مين ؟؟؟
ملكش دعوة
قصدك انتى و بنت خالتك يعنى ؟؟؟
ملكش دعوه قلت لك
طيب ليه بتقولى انى عاوز اضحك عليكوا مش يمكن انا عاوز اساعدكم
ساعد نفسك الاول
الدكتور ابتسم ابتسامه لطيفه و قالها حاضر يا ستى هساعد نفسي بس عاوز اساعدك انتى كمان
قلت لك ابعد عننا بس شكلك مش عاوز تجبها لبر مصمم تاخد عقابك
عقابى اللى هو ايه بقا ؟؟
متتحدنيش يا عاصم
لا انا عاوز اتحداكى يا ستى ورينى هتعملى ايه ؟
طب قابل بقا التليفون اللى جايلك ده
الدكتور ابتسم مره تانيه و قال
اى تليفون ؟؟؟
هنا رن تليفونه بالفعل وسط استغراب منه و منى انا كمان
الدكتور كان محافظ على ابتسامته و هو بيقول الو لكن فجأه تحولت ابتسامته دى لحزن و فزع شديد
انتى بتقولى ايه يا حنين ؟؟؟ هانى وقع من الدور التالت ازاى ؟؟ و انتى كنتى فين ؟؟ ابنى جراله ايه ؟؟؟
الدكتور سابنا و جرى و انا بصيت لبسمه لقيتها بتضحك اوى و نظرتها غريبه فيها شماته رهيبه
خالتى و جوز خالتى دخلوا جرى و سالوا هو فى ايه ؟؟ الدكتور بيجرى كدا ليه ؟
بسمه بصت لهم و قالت
ابنه يا عينى وقع و حصل له كسر فى الجمجمه و الله اعلم بقا هيعيش و الا ايه ؟؟
جوز خالتى اخدها و مشيوا قدام و هى شايله عروستها
و انا مشيت انا و خالتى وراهم و انا مرعوبه ...انا الوحيده برده اللى شفت و فهمت ...محدش يعرف ايه اللى حصل و فاكرين انها حادثه عاديه بس انا عارفه أن العروسه هى اللى كانت بتتكلم على لسان بسمه و هى اللى اذت ابن الدكتور
رجعت البيت و انا حزينه جدا ..دخلت اوضتى و قعدت اعيط و مش عارفه اتصرف ازاى ؟ مش قادره اتكلم مع اى حد و أقوله الحقيقه و فى نفس الوقت خايفه منها لانها بكدا ممكن تأذى اى حد فى البيت
قررت انى متكلمش خالص و ابعد عن بسمه ، مطلعش لها و لا العب معاها
استريحت انى مبقتش اشوفها و هى شايله الداهيه اللى فى أيدها ديه
بعد كدا عرفت أن الدكتور اعتذر عن علاجها و أنه قفل عيادته و سافر بابنه بره علشان يعالجه
معرفش بقا هل اللى حصل ده مجرد صدفه ؟؟؟ طب لو صدفه هى عرفت منين أن التليفون هيرن ؟؟ و عرفت منين أن حصل كسر فى الجمجمه الدكتور مقلش كدا قدامنا ؟؟؟ و لو هى ...طب ليه تأذى ابنه و هو محصلش منه اى حاجه وحشه ؟؟
بعد كدا خالتى و جوزها زهقوا و بطلوا يدوروا على دكاتره لأنهم كل ما كانوا بيلاقوا حد كانت تحصل مشكله و ميعرفوش يروحوا ( مره خالتى رجلها تتكسر و هى نازله معاهم على الدكتور و مره عربيه جوز خالتى تولع و هما ماشيين ...)
جوز خالتى كان فى كل مره يحصل فيها حاجه من دى كان يقول لخالتى أن الموضوع مش طبيعى و لازم نشوف للبت شيخ و لكن خالتى كانت دايما تسفه كلامه و تقوله بطل الجهل اللى انت فيه دا
بعد كدا حاله بسمه ابتدت تتحسن عن الاول شويه فقرروا أنهم يسبوها يمكن ترجع لطبيعتها لوحدها
مرت الايام و فى يوم و احنا قاعدين لقيت خالتى صباح بتخبط على الباب و بتضرب الجرس بفرحه شديده
افتحوا يا اولاد ...افتحوا
فتحت الباب و لقيتها هتطير من الفرحه
امك فين يا هدى ؟؟
امى فى المطبخ
خالتى جريت على المطبخ و انا جربت وراها
انا حامل يا سميره ...حامل بعد سنين عذاب ...حامل بعد طول انتظار
حامل ؟؟ الف مبروك يا صباح الف مبروك يا حبيبتى عرفتى ازاى ؟؟
الدكتوره كشفت عليا و قالت لى انى حامل فى التانى
يا ما انت كريم يا رب ...الحمد لله يا حبيبتى ربنا يتم لك على خير يارب ...بصى بقا من هنا و رايح انتى متعمليش اكل و لا تنضفى و لا تتعبى نفسك فى اى حاجه ، انتى بس قوليلى عاوزين تاكلوا ايه و انا اعملهولك و أطلعه لكى لحد عندك و التنضيف هنجيب واحده تنضف كل اسبوع
ليه كل دا ؟؟ الدكتوره مقالتش انى متحركش كدا
قالت و الا ما قالتش بقا احنا لازم نحافظ من نفسنا كدا ....دا جاى بعد شوق و عطش عشان ربنا يسترها معانا و يكملنا على خير
باذن الله يا حبيبتى
و عدت شهور الحمل بتاعة خالتى و كانت كل ما تدخل فى شهر تتعب اكتر و امى و خالتى معاها مش سايبنها و جوزها كان مستنى اليوم اللى هتولد فيه بفارغ الصبر
اول ما خالتى دخلت الشهر التاسع حست بألم فى ضهرها و لاحظت أن فى ميه بتنزل على رجليها
جوزها اخدها هى و امى للدكتوره و الدكتوره قالت إن الميه بتتسرب من حوالين الجنين و فى طلق مبكر و انها لازم تولد لأن كدا خطر على الطفل
و بالفعل دخلت خالتى اوضه العمليات و عملوا لها قيصريه وولدت ولد زى القمر لكن دخل الحضانه اسبوع لانه كان غير مكتمل
ابوه راح استلمه يوم السبوع و كان راجع فرحان اوى أنه شايله بين اديه
خالتى لما شافته مكنتش مصدقه نفسها وقعدت تعيط و تبوس فيه
اليوم ده امى كانت محضره السبوع و الملح و كل لوازم الاحتفال و مشغله اغانى السبوع بصوت عالى و الكل فرحان
فجأه دخلت بسمه و معاها عروستها المخيفه ( مع انها مؤخرا مكنتش بتشارك اى حد فينا فى اى مناسبه و الكل كان مستغرب انها طلعت)
بسمه مشيت ببطئ وعنيها مركزه على الأوضه اللى فيها خالتى قاعده على سريرها و جنبها ابنها
اول ما وصلت جنب السرير خالتى ابتسمت لها و قالت لها شوفتى عبدالرحمن يا بسمه ؟؟
بسمه بصت للواد بكل غل و منطقتش و لا ردت على خالتى ...حتى خالتى استغربت اوى لما لقتها مشيت زى ما جت و منطقتش
انا بقا اللى كنت ملاحظه كل شئ و حاسه ان طلوع بسمه بالشكل ده مش هيكون خير ابدا 😔
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق