الدميه
الجزء العاشر
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
صلوا على خير الأنام يا ساده يا كرام😍
بسمه بصت للواد بكل غل و منطقتش و لا ردت على خالتى ...حتى خالتى استغربت اوى لما لقتها مشيت زى ما جت و منطقتش
انا بقا اللى كنت ملاحظه كل شئ و حاسه ان طلوع بسمه بالشكل ده مش هيكون خير ابدا 😔
جريت وراها و حصلتها على السلم و قلت لها
ايه يا بسمه مش هتستنى لما نعمل السبوع ؟؟
بصت لى بصه غريبه و ضحكت اوى و قالت ملوش لازمه السبوع
انا وقفت مش قادره أنطق بكلمه واحده ؟؟
بسمه نزلت من السلم بكل هدوء و فضلت باصه عليها و هى نازله لحد ما سمعت صوت صراخ جامد جوه عند خالتى
دخلت جرى لقيت خالتى عماله تصرخ و تقول الواد بيتخنق ...
الولد فعلا كان وشه ازرق جدا و شفايفه زرقا و بيطلع رغاوى من بقه
جوز خالتى اخده و نزل جرى و امى نزلت معاه على المستشفى
هناك عملوله تنفس صناعى و اكتشفوا أنه عنده عيب خلقى فى القلب
جوز خالتى كان مستغرب لانه لسه مستلمه من الحضانه و الدكتور هناك مأكد له أن الولد زى الفل و مفيهوش اى شئ مش طبيعى ....
جوز خالتى قال اكيد الدكتور ده مبيفهمش بس انا برده اللى كنت عارفه الحقيقه و محدش يعرفها غيري
الولد قعد يومين فى العنايه المركزه و فى الاخر مات
ايوه زى ما قريتوا مات ....طبعا لكل اجل كتاب بس هى اللى قتلته ...العروسه الملعونه هى اللى قتلت ابن خالتى اللى مستنياه بقالها سنين
خالتى من حزنها جالها نزيف شديد و للاسف الدكتور شال لها الرحم
خالتى حالتها النفسيه اتدمرت تماما و جالها اكتئاب حاد دخلت بعد مستشفى الامراض النفسيه و العقليه
بعدها جوزها مستناش كتير و خلال شهرين كان مطلقها غيابى من غير ما تعرف بس البيت كله كان عارف
هو ساب كل حاجه فى شقتها و اخد شنطة هدومه و مشي
و هى كل ما كانت تسأل عليه و هى فى المستشفى كنا نقولها مسافر
لحد ما الدكتور كتب لها على خروج
و رجعت خالتى البيت ملقتش هدوم جوزها و لا اى أثر من ريحته فهمت كل حاجه و قالت لماما :
جوزى طلقنى صح ؟؟؟
لا ..دا مسافر
متكدبيش يا سميره انا كنت عارفه أنه عمل كدا ...احلامى كلها كانت بتقول أنه سابنى و مشي زى ابنى ما سابنى و مشى ....ياريتنى مت مع ابنى ..ياريتنى مت
وحدى الله يا صباح ...متقوليش كدا يا اختى
لا اله الا الله بس قوليلى انا فايدتى ايه فى الحياه ؟؟ هعيش لمين ؟؟ حتى اقرب الناس ليا سابونى و مشيوا
هتعيشي لينا يا حبيبتى احنا عاوزينك ..احنا اخواتك و بنحبك
سبينى لوحدى من فضلك يا سميره ، عاوزه اقعد لوحدى
خالتى حالتها النفسيه اتدهورت جدا و اصيبت بهلاوس سمعيه و بصريه دا كلام الدكتور لكن اللى كانت بتحكيه كنت أنا مصدقاه و كنت عارفه أن اللى بيحصل لها دا كله من العروسه
كانت تقوم فى نص الليل تصرخ و تقول انها شافت ابنها و هو مخنوق بحبل ، و مره تقول أن فى بنتين بيجوا يقفوا جنب سريرها و كل واحده منهم معاها شعله نار و بيربطوها فى السرير بالحبال و بيبقوا عاوزين يولعوا فيها بس هى لما بتصرخ و بيحسوا أن امى اللى كانت بتنام فى الاوضه اللى جنبها بتقوم و تروح لها كانوا بيختفوا فورا
خالتى حالتها انتهت انها دخلت مستشفى الامراض العقليه و بقت تاخد جلسات كهربا على المخ لأن حالتها ساءت جدا
بعد كدا بدأ يظهر حاجات غريبه فى البيت ...زى أننا نلاقى على السلم دم مش عارفين جاى منين ....كمان كان عندنا اوضه فوق السطوح بنحط فيها الكراكيب القديمه لقيناها فى يوم ولعت لوحدها
طبعا كل البيت جرى و قعد يطفى الا بسمه كانت واقفه على السلم و فى عينها نظرة شماته و كأنها فرحانه باللى بيحصل وحاله الهرج اللى فى البيت و الذعر الشديد اللى كان واضح على الجميع و خوفهم أن الحريقه تمتد لشققهم
كنت يسأل نفسي طب ليه العروسه دى بتعمل كدا ؟؟ لا هى اكيد مش مجرد عروسه دى اكيد روح شريره بتنتقم مننا كلنا
طب ليه هو احنا عملنا فيها ايه ؟؟
لما شفت الحريقه و انها فعلا ممكن تضرنا كلنا و نفقد بيوتنا لا و ممكن حد يروح منا قلت فى نفسي انا لازم اتكلم ...مينفعش اسكت اكتر من كدا
و فى اللحظه اللى قررت انى احكى كل اللى عندى فعلا و دا بعد ما اهلى طفوا الاوضه و قعدوا يرتاحوا على السطح
لقيت بسمه بتشاور لى و فى عينها نظره غريبه
قربت منها و انا مرعوبه لقيتها مالت على ودنى ووشوشتنى
العروسه بتقولك اياكى تعملى اللى جه فى بالك دلوقتى ...و انها مش راضيه تضرك لحد دلوقتى عشان خاطرى
معرفتش انطق و لا حتى ارد بكلمه و لقيت دموعى بتنزل بغزاره
من اول دخول العروسه دى بيتنا و المصايب نازله علينا
بسمه جابت لبيتنا لعنه من البيت الملعون ده و الله اعلم اللعنه دى هتنتهى بايه 😔
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق