الدميه
الجزء الرابع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
و بالفعل الراجل شاف واحده اتطلقت لأنها عاشت خمس سنين مع جوزها و مخلفتش
و افتكر بقا أن كدا مشكلته اتحلت وأنه لقى اللى هتاخد بالها منه و من بناته
بس اللى حصل بقا غير كدا خالص ...
الست كانت معدومة الضمير شديده و قاسيه جدا ...ذلت البنت الكبيره و بقت تعذبها ...دا غير أنها كانت بتسيب الصغيره من غير ما تأكلها
كانت تقومها من قبل الفجر تكنس و تغسل وبعدها تبعتها الغيط لابوها توديله الغدا و ترجع تلم لها الحطب و تولع على الاكل
دا كله مع الضرب و الزق و الشتيمه
كانت تخليها تعلف البهايم و تحط الاكل للطيور ...
البنت كانت بتشقى و تيجى اخر النهار تترمى زى القتيل تاخد عروستها و اختها فى حضنها و تنام
كل ده و الاب ميعرفش حاجه او بمعنى اصح عامل نفسه ميعرفش حاجه عشان يمشي أموره ...و عشان مراته كانت ست بشعه مبتسكتش تفضل تندب طول النهار و تنق زى الغراب و هو مكنش ناقص وجع دماغ ..و كل همه أنه يجى يلاقى لقمته موجوده و فرشته معدوله و لو هتتهد الدنيا بعد كدا ميهموش
عدت شهور و حملت مرات الاب و طبعا دى كانت مفاجأة لأن الراجل متجوزها على أنها عقيمه
الست لما حملت زاد دلعها على جوزها و زاد جبروتها على البنات و بقت تدوس عليهم برجليها و تحرقهم بالمعلقه السخنه لو واحده فيهم عملت غلطه من وجهه نظرها
فاتت شهور الحمل طويله كئيبه على البنتين و زاد الحمل على البنت الكبيره لأن مرات الاب مبقتش تقوم من مكانها لحد ما جه يوم الولاده
جوزها راح نده الدايه و جت هى وشويه ستات ...و ستات داخله و ستات خارجه و ميه سخنه و ميه بارده
البنت افتكرت يوم ما امها كانت بتولد اختها الصغيره و اتمنت أن مرات ابوها تموت زى ما امها ماتت علشان تخلص من الذل هى و اختها
لكن مرات الاب ممتتش و لأجل حظها ربنا اداها الولد
طبعا جوزها فرح و مبقتش الدنيا سايعاه و هى بقى زاد شرها على البنات و بقى مفيش حد قادرها ... كأنها جابت مينا موحد القطرين
بقت تسيبهم يناموا و هما جعانين باليومين
كانت الاخت الكبيره تنط من الشباك و تطلع تشحت لقمه و الا كوز دره تاكله هى و اختها .
البنات كانوا بيناموا فى اوضه لوحدهم فوق البيت و كانت العروسه اللى عاملاها لهم امهم هى ونسهم الوحيد ...كانوا دايما يتكلموا معاها و يشتكولها من قسوة مرات ابوهم و من ذلها فيهم و كأنهم بيشتكوا لأمهم.
البنت الصغيره كانت بدأت تتكلم و فى يوم و هى نايمه جنب اختها على سطح البيت و باصيين للسما
البنت قالت لأختها :
عارفه يا اختى ..انا شفت امنا فى الحلم
و عرفتى ازاى انها امنا ؟؟ انتى متعرفيش شكلها
هى قالت لى انها امنا
طيب كان شكلها ايه ؟؟
كانت سمرا و عنيها واسعه و شعرها قصير و قالت لى انتوا هتجولى قريب
هنجيلها فين ؟؟؟ هنروح المقابر يعنى ؟؟
معرفش يا اختى هى قالت لى كدا و قالت لى انتوا خلاص هترتاحوا من اللى انتوا فيه و ربنا هينتقم لكم من زينب دى
يا رب يا اختى ...اتمنى ربنا ينتقم لنا منها
تانى يوم كانت زينب تمت الاربعين و عندهم هناك فى البلد الست اللى بتتم الاربعين بتتزين زى العروس لأن نفاسها خلاص خلص
زينب ندت على البنات و قالت لهم خدوا بالكم من الواد اوعوا ناموسه تيجى جنبه
على بال ما ادخل الحمام
اوعى واحده فيكم تلمسه سامعين و الا لا ؟؟ انتوا تقعدوا جنبه بس و متخلوش حاجه تيجى ناحيته
زينب دخلت الحمام تستحمى و تعطر جسمها و سابت ابنها نايم على الارض
البنات قعدت جنب الولد و ناموا من كتر التعب طول النهار
جه تعبان قرصه و فات من جنبه دخل شق فى الحيط ...الولد مكملش دقايق و مات
طبعا زينب خرجت من الحمام و سرحت شعرها و كحلت عنيها و دا كله فاكره ابنها نايم
لما لقته غاب فى النوم جت تشوفه لقته ميت ...قعدت تصرخ و تقول إن البنات موتوا اخوهم عشان غيرانين منه
ابوهم لما جه مسمعش غير لمراته و للاسف صدقها و هى بقا نسجت حوار أنهم خنقوا الواد أو كتموا نفسه بالمخده
الاب ربط البنتين فى عمود جوه الدار و نزل ضرب فيهم
فضلوا يومين من غير اكل و مربوطين
ابوهم مبقاش فى قلبه رحمه زى مراته بالظبط مصعبوش عليه و لا صريخهم رقق قلبه و كان مصدق فعلا أنهم اللى موتوا ابنه
الاب راح الغيط و ساب البنتين مربوطين زى ما هما
مرات الاب كان الغل ماليها و قلبها مولع نار
قربت منهم و قالت لهم
بقى انتوا تموتوا ابنى و تعيشوا انتوا ؟؟؟ ليه ابنى يموت و انتوا لا ؟؟ انتوا ملكوش عيش على الدنيا دى بعد ما ابنى مات
مرات الاب راحت جابت حبل غسيل و ربطته حوالين رقبة البنتين و خنقتهم و لما الاب جه قالت له أنهم ماتوا من الربطه و قلة الاكل
الاب خاف اوى ليدخل فى سين و جيم لكن مرات الاب طمنته انها لها حد معرفه فى الصحه ممكن يطلع لهم تصريح دفن من غير ما دكتور الصحه يكشف عليهم و يعرف سبب الوفاه
و فعلا قدروا يطلعوا التصريح و يدفنوا البنتين من غير اى مسؤوليه قانونيه
لكن لو نفدوا من عقاب الدنيا ربك يمهل و لا يهمل
الست بقت كل ما تولد ولد تقوم تلاقيه مخنوق و هو عمره اربعين يوم بالتمام و الكمال
ولدت خمس ولاد و كلهم يموتوا بالطريقه دى
الست اتجننت و بقت مش عارفه تعمل ايه و ايه السبب أن اولادها بيموتوا بالشكل ده
راحت لواحد دجال كان ساكن الجبال و حكت له على اللى بيحصل
قالها :
و هيفضل عيالك يموتوا و مش هيعيش لك ولاد بسبب اللى عملتوه فى البنتين
بنتين ؟؟؟ احنا معملناش حاجه
بقولك ايه يا وليه ...محدش يكدب على الشيخ علام ..انا عارف اللى عملتيه انتى و جوزك و ده السبب فى اللى بيحصلكم دلوقتى
طب و بعدين يا عم الشيخ ؟؟
و لا قبلين ...انتوا بقيتوا فى لعنه بسبب اللى حصل و هيفضل اولادك يموتوا اول ما يتموا الاربعين و زى ما خنقتيهم... ولادك بيتخنقوا و بيتحرق قلبك عليهم
هما اللى بدأوا و موتوا ابنى يا عم الشيخ
لا ابنك قرصه حنش و هما مكنش لهم لا ذنب و لا جنيه
طب مفيش حل يا سيدنا الشيخ ؟؟
مفيش غير حل واحد
ايه هو ؟؟ انا مستعده اعمل اى شئ....
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق