الدميه
الجزء الثالث
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
شويه ستات قالوا لازم نفتح بطنها بسرعه و نطلع العيل قبل ما يموت هو كمان زى الام
و فتحوا بطنها بجد ؟؟؟
بصى يا ستى ...الستات اتقسموا نصين
نص قال ايوا نفتح وننقذ روح و النص التانى قال لا حرام نفتح بطن الست و هى ميته ...كدا بنعتدى على حرمة الميت
ها و بعدين ؟؟؟
الدايه ندهت جوزها و قالت له على الموضوع و هل تفتح و تجيب له عيله و الا لا ؟؟؟ بس هو قالها لا متفتحوش و حتى لو الواد أو البت اللى فى بطنها حى مين هيربيه دا عيل شوم كان السبب فى أن مراتى تموت و بيتى يتخرب ...انا هبعت اجيب المغسله تغسلها و ندفنها قبل الليل ما يليل
كل ده كان بيحصل قدام بنتها اللى كان عمرها سبع سنين ...كانت واقفه فى ركن من أركان الاوضه و محدش واخد باله منها
شافت الستات و هما بيجيبوا الميه و يغسلوها و فى منهم اللى تعيط و منهم اللى تصرخ و تولول
البنت كانت مش فاهمه الستات دول بيعملوا كدا ليه ؟ و ليه امها ساكته و سايباهم يعملوا فيها كدا ...طب مش هتخلف اخوها و الا اختها اللى كانت بتحكيلها عليها ؟؟؟ و أنها كانت مستنيه العيل ده من سبع سنين فاتوا و أن العيل ده هيكون اخوها أو اختها اللى هتلعب معاها و يكون ونيسها
ليه الستات بتغطى وش امها ؟؟ ليه عمالين يعددوا و يقولوا كلام مش كويس ؟؟
جدتى بتقول أنهم فعلا دفنوها فى ليلتها
البنت كانت مستنيه امها و كانت فاكره أن ابوها اخدها مشوار و هترجع
لما ابوها رجع لوحده سألته عن أمها
ابوها قالها
امك راحت عند ربنا و معدناش هنشوفها
و ليه يا أبا مش هنشوفها ؟؟
علشان العيل الشوم اللى كان فى بطنها موتها
طبعا البنت مفهمتش هو بيقول ايه بس فى حاجه جوه نفسها مكنتش مصدقه الكلام اللى ابوها بيقولوا لها ...لان امها ياما كلمتها عن اخوها أو اختها دى و قالت لها أنه بيحبها
الصبح لما الناس راحت المقابر كالعاده هناك عشان تزورها سمعوا عيل صغير رضيع بيعيط من جوه التربه
الناس خافت و طلعت تجرى على جوزها اللى كان لسه نايم فى البيت لكنه طرد الناس و قالهم يا ناس حرام عليكم بطلوا كدب بقا انا فيا اللى مكفينى
الناس مسكتتش راحوا طالعين على عمدة البلد
العمده فى الاول مصدقهمش و قال عليهم ناس بتخرف
لكن جه اكتر من خبر بأنهم سامعين صوت رضيع بيعيط داخل تربه ست لسه مدفونه و كانت حامل
العمده خاف ليكون حد خاطف عيل و حطه جوه التربه عشان يعمل فى أهله مقلب ... اتصل على الظابط فى المركز و حكاله الحكايه ....الظابط قاله لازم إذن من النيابه عشان التربه دى تتفتح مره تانيه دا لو عاوز تمشيها رسمى
العمده قاله ايوا يا باشا نمشيها رسمى طبعا انا مش ناقص وجع دماغ
الظابط طلع اذن النيابه و راح بنفسه مع العمده و قوه من عساكر النقطه و شويه غفر و راحوا على التربه المذكوره
و طبعا جوزها كان عنده خبر لأن العمده بعت له غفير و قاله اسبقنا على الترب
و فعلا اول ما قربوا سمعوا العياط مكتوم جوه التربه
العمده قعد يتشاهد و يقول سلام قول من رب رحيم ....الظابط امر التربى أنه يفتح التربه عشان يشوفوا ايه اللى جوه
طبعا البلد كلها كانت ملمومه و عاوزين يعرفوا ايه اللى حاصل
اول ما التربى فتح لقى عيله صغيره موجود فى كفن الام و الحبل السرى متعلق بالام و الدم مغرق الكفن
بس سبحان الله كأن حد شال قماش الكفن من على وشها عشان متموتش و يكون لها حياه على ضهر الأرض دى
الناس اول ما التربى طلع البنت بدأت تكبر و تقول لا حول ولا قوه الا بالله و الكل كان مذهول و مش مصدقين اللى حصل
ازاى الست تولد و هى ميته ؟؟؟ و ازاى الطفله دى فضلت حيه ممتتش داخل المقبره كدا ؟؟
البنت اول ما طلعت من التربه واحد قلع جلابيته و غطى جسمها العريان
البنت كانت بتصرخ بهستريا ...العمده سال فى واحده هنا بترضع ؟؟؟
قامت واحده قالت ايوا يا جناب العمده انا برضع
قالها طب خديها معاكى البيت حميها و رضعيها و بعد كدا جبيها لابوها
و فعلا الست عملت كدا و راحت ودتها لابوها اللى اخدها و هو متضرر
الراجل اخد البنت و دخل و بقى يبص لها بغل ...و يقولها
انتى يا وش المصايب السبب فى اللى انا فيه دا ....امك ماتت بسببك يا بومه ...و ياريتك طلعتى ولد ...دا انتى بنت يعنى مصيبه تانيه اتحطت فوق دماغى هرضعك منين ؟؟ و اشتغل ازاى و انتى معايا و انا لا ليا اخت و لا ام اسيبك عندهم ...كان مستخبيلى دا كله فين ياربى ؟؟؟
كل ده و بنته الكبيره مراقباه و سامعه كلامه مع اختها و كانت فرحانه اوى انها بقى لها اخت اخيرا
استنت لما ابوها حط اختها على السرير و قربت منها عشان تشوف شكلها كويس و باستها فى خدها و راحت جابت عروسه امها كانت عاملاها لها من القماش و القطن و ضفايرها من شعر امها كانت قاصاها و مركباها للعروسه
حطت العروسه جنبها و خلتها تلمس بايدها الصغيره شعر العروسه و قالت لها
دا شعر امنا ....انتى مشوفتيهاش بس هى كانت طيبه اوى و كانت بتكلمنى عنك على طول و هى بتحبك اوى ...انا مش مصدقه ابويا انك السبب فى موت امى
الاب كان بيروح الغيط و يسيب البنتين من غير اى اكل
البنت الكبيره كانت تلف على البيوت عشان تجيب شويه لبن لأختها أو تنادى جاره ترضعها
الناس نصحوا الأب أنه يتجوز واحده تاخد بالها من البنات ولو يقدر يجيب واحده مبتخلفش يكون احسن عشان تعامل اليتامى كويس
و بالفعل الراجل شاف واحده اتطلقت لأنها عاشت خمس سنين مع جوزها و مخلفتش
و افتكر بقا أن كدا مشكلته اتحلت وأنه لقى اللى هتاخد بالها منه و من بناته
بس اللى حصل بقا غير كدا خالص ...
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق