الدميه
الجزء الثانى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
فطيت من مكانى و جريت عشان أسلم عليهم و اخد صاحبتى تلعب معايا
اول ما شفتهم خالتى ابتسمت لى و خدتنى فى حضنها و سلمت عليا
دورت بعينى لقيت بسمه واقفه ورا خالتى و ساكته خالص على غير عادتها و معاها فى أيدها عروسه شكلها غريب اوى .. العروسه كانت بتبص لى و كأنها بتتحدانى عيونها شكلها مخيف اوى و شعرها طويل و ناعم بس مش نضيف و هدومها كمان قديمه و مش نضيفه معرفش عجبت بسمه ليه ؟؟ احنا عندنا عرايس اجمل منها بكتير
قربت من بسمه و جيت احضنها لكن وقفتنى بايدها و بنظره حاده جدا من عنيها
لقيت نفسي ببعد من غير ما انطق كلمه
و لقيت خالتى بتقول لماما
احنا هننزل بقا عشان جايين تعبانين اوى من السفر
طب اقعدوا اتغدوا معانا ...انا عامله مسقعه من اللى قلبك يحبها
لا أكلنا فى الطريق ...عاوزين ننام و بس
طيب يا حبيبتى انزلى ارتاحى انتى و لو عزتى اى حاجه رنى عليا
ماشى ...اه كنت هنسي ...خدى الملوحه دى حماتى بعتهالك خدى كيس و ابعتى لصباح كيس لانى مش قادره اطلع
طب ما تطلعى و خلاص عشان متزعلش
لا عشان جوزها فوق و مبحبش اطلع و هو فوق
اه منا عارفه ...خلاص هبعت احمد لها دلوقتى ..
سلام بقا هموت و انام
مع السلامه يا حبيبتى
و نزلت خالتى و معاها بسمه من غير ما تكلمنى كلمه
ماما بصت لى و هى مبتسمه
اظن حبيبتك رجعت اهو ....ملكيش حجه
بسمه مخاصمانى يا ماما
مخصماكى ازاى ؟؟
مكلمتنيش و لا سلمت عليا
يا حبيبتى دى جايه من مشوار اكتر من ١٢ ساعه يعنى زمانها نايمه على نفسها ...الصبح هتلاقيها هى اللى بتخبط و جايه تلعب معاكى
تفتكرى يا ماما ؟؟
اه طبعا افتكر اوى
و دخلت اوضتى و انا حاسه انى مش مرتاحه ....معرفش ايه السبب فى الاحساس ده ...
نمت على سريري على أمل أن كلام ماما يتحقق و الاقى بسمه جايه تخبط عليا الصبح
لكن فى الليله دى حلمت بحاجه غريبه اوى
حلمت بالعروسه اللى كانت فى ايد بسمه انها واقفه على باب اوضتى و طالع من عينيها شعاع اصفر شكله بشع
العروسه كانت بتبص لى بكل غل و كره و انا كنت خايفه منها جدا
العروسه قربت على سريري و انا قاعده كشه رجليا على صدرى و هموووت
و فجأه لقيتها قدامى
حطت أيدها على رقبتى غرزت ضوافرها فيها و بدأت تخنق فيا
قعدت اصرخ اصرخ لحد ما ماما فاقت و جت بسرعه هى و بابا صحونى بسرعه
بقيت اعيط بهستريه و اقولهم العروسه هتموتنى
ماما طبطبت عليا و قالت لى
اكيد دا حلم يا حبيبتى...مش حقيقه
ماما جابت لى عصير عشان اهدى و غطتنى وولعت نور الاباجوره و بعدها حاولت انام بس مقدرتش خاصه انى كنت حاسه بحاجه بتحرقنى فى رقبتى
قمت بهدوء ولعت نور الاوضه و بصيت على رقبتى فى المرايه لقيت خربوش طويل بطول رقبتى
ايه دا ؟ ايه اللى خربشنى كدا؟؟
معرفتش ساعتها أفسر ايه ده و اقنعت نفسي انى اكيد هرشت رقبتى و انا مش واخده بالى
تانى يوم استنيت بسمه بس مطلعتش
ماما قالت لى انزليلها انتى يا هدى
نزلت و خبطت على الباب لقيت سها فتحت لى
سها و مها توأم و اصغر مننا بسنتين و لهم اوضه لوحدهم و بسمه لها اوضه لوحدها ياما لعبنا فيها سوا
فين بسمه يا سها ؟؟
جوه فى اوضتها
فتحت الباب على بسمه لقيتها نايمه فى الضلمه
بسمه ..بسمه
نعم
انتى نايمه ؟؟
لا
امال مضلمه الاوضه كدا ليه ؟؟
عادى
انا هفتح البلكونه
و جريت على البلكونه فتحتها و الاوضه نورت و لقيتها حاضنه العروسه المخيفه دى و متبصش ليا
بسمه ...هو انتى زعلانه منى ؟؟
لا مش زعلانه
امال مالك مكلمتنيش ليه و مش بتلعبى معايا ؟؟
مش عاوزه العب
انتى جبتى العروسه دى منين دى شكلها وحش اوى
بسمه رفعت بصرها و بصت لى بعنف و قالت
متقوليش عليها كدا
انا اسفه بس مين جاب لك العروسه دى ؟؟
محدش جابهالى ...انا لقتها
لقتيها فين دى ؟؟
منا جيت احكيلك وانتى مرضتيش تسمعينى
معلش يا ستى حقك عليا ...احكيلى بقا
لا خلاص مش هحكى
كدا يا بسمه ؟؟ احكيلى الحكايه اللى جدتك قالت لك عليها
بسمه هزت راسها و قالت
جدتى حكت لنا عن بيت مهجور فى أول البلد و قالت إن البيت ده الناس بتخاف تقرب له لأن بيطلع فيه عفاريت
عفاريت ازاى ؟؟
اى حد بيمر من قدام البيت ده بيلاقى اللى بيحدفه بالطوب بالرغم أن مفيش حد ساكن فيه
جدتى قالت لنا كمان أن فى مجموعه من الشباب دخلوا البيت ده عشان عاملين نفسهم شجعان لكن مخرجوش لحد دلوقتى
مخرجوش ازاى ؟؟ راحوا فين يعنى ؟؟
سألت جدتى السؤال ده و هى قالت لى الله اعلم ...اهلهم دوروا عليهم كتير اوى و خصوصا أن العيال دخلوا بالليل ...و كل البلد عارفه أن اللى يدخل البيت ده بالليل ميطلعش
يا خبر ...طب جدتك محكتش لكى ليه البيت ده فيه عفاريت كدا ؟؟
حكت لى
طب ما تقوليلى
ما انتى بتخافى و بتروحى تعيطى لخالتى
ايه دا ؟؟ انتى عرفتى ازاى ؟؟
مش مهم عرفت ازاى... بس حصل صح؟
ايوا حصل ...بس انا عاوزه اعرف حكايه البيت ده
البيت ده كان عايش فيه راجل و مراته و بنته و كانوا ناس على اد حالهم
حملت الام فى طفل تانى و كانت خلاص قربت تولد ...لكن الولاده كانت متعثره اوى و الدايه معرفتش تولدها
يعنى ايه دايه ؟؟
دى ست بتساعد الستات و هى بتولد
اه و بعدين ...كملى
للاسف الست دى ماتت و هى بتولد
جدتى بتقول انها اتعذبت و هى بتولد لدرجة أن البلد كلها كانوا سامعين صريخها و محدش كان عارف يساعدها ازاى .
لما ماتت فى ناس قالوا زمان ابنها او بنتها اللى فى بطنها لسه حى و حرام ندفنها و ندفنه معاها
شويه ستات قالوا لازم نفتح بطنها بسرعه و نطلع العيل قبل ما يموت هو كمان زى الام
و فتحوا بطنها بجد ؟؟؟
بصى يا ستى ...الستات ....
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق