قداره
الجزء الثامن عشر و الاخير
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
دلفت قداره إلى شركة السعد ...أخبرت السكرتيره انها تريد مقابله المدير
نظرت لها السكرتيره نظرة ضيق و لكنها قامت و دخلت لسعد
بعد دقيقه خرجت و هى تشير لقداره بالدخول
اهلا يا معلمه
مرحب بيك يا سعد بيه
الفلوس وصلت تمام
تمام يا سي سعد ... معلش بعتذر لك عن سوء التفاهم اللى حصل
حصل خير يا معلمه
انا جايه انهارده عشان اقولك انى حابه اكمل شغل معاك يا...
منا قلت لك يا معلمه أن شغلنا ده لو الشك دخل فيه يبقى كدا خلاص
ربنا ما يجيب شك ...هو سوء تفاهم زى ما قلنا
تمام بس انا دلوقتى غيرت مجال شغلى
ازاى ؟؟ يعنى ايه غيرت ؟؟
اهدى يا معلمه ...انا غيرت لحاجه احسن و فلوسها اكتر
يا حلاوه ....مش تقول كدا ؟ وقعت قلبى يا شيخ ....ايه بقا الحاجه دى ؟؟
البودره ...خفيفه فى وزنها و سهل إخفائها و فى نفس الوقت فلوسها اكتر بكتير من الحشيش
بس مش خطر دى يا سي سعد ؟؟
خطر على اللى بيتعاطوها مش اللى بيتاجروا فيها
لا و خطر علي اللى بيتاجروا فيها برده
منا قلت لك انتى ملكيش دعوه بأى مخاطره انتى شريك بالمال و بس
حلو اوى ....طب انا عاوزه نشتغل مع بعض و الفلوس تكتر اكتر
بس راس المال هنا هيبقى اكتر من موضوع الحشيش
خد الفلوس اللى ادتهالى امبارح ...خدها كلها هات بيها بضاعه
انتى فاكره أن دى فلوس يا قداره ؟؟ انا بشتغل مع ناس تقيله اوى و الفلوس اللى بتتكلمى فيها دى و لا حاجه بالنسبه لهم
طب خلاص انا هبيع لك القهوه بتاعتى و اجيب لك تمنها على الفلوس اللى معايا
القهوه هتجيب كام يعنى ؟؟ عشرين ألف ؟؟؟
امال انت عاوز كام ؟؟
اللى اعرفه انك صاحبة وكاله حاليا
لا الوكاله باسم دهشان مش بتاعتى
بس انتى اللى ممشيه الشغل فيها
ايوه الكلمه كلمتى
بتجيبي بضاعه منين ؟؟
كنا بنجيبها من واحد بس الله يرحمه مات امبارح و لسه بقا هدور على غيره
حلو اوى
هو ايه اللى حلو ده ؟؟؟
احنا هنستورد لك البضاعه دى من بره
ازاى يعنى ؟؟
انتى مش واخده بالك انى شركة استيراد و تصدير ؟؟
طب و ايه لازمته يعنى ؟؟
لا دا له لزوم اوى ....اولا هنجيب لك البضاعه بسعر رخيص اوى اكتر من اللى انتى بتجيبي بيه
تمااام
ثانيا هنخبى بضاعتنا في البضاعه الجايه دى
بس دا مش خطر ؟؟
خطر على مين؟؟
يعنى لو البضاعه اتقفشت ؟؟
اولا البضاعه عمرها ما هتتقفش لان الناس اللى بيحطوها ناس محترفين جدا و بيخبوها فى أماكن متخطرش على بال العفريت ...ثانيا حتى لو لا قدر الله اتمسكت احنا ملناش دعوه البضاعه باسم دهشان يعنى انتى فى السليم
عندك حق ....حلوه اوى الحكايه دى ..انا موافقه بس عاوز منى كام ؟؟
نص مليون
ايه ؟؟؟؟؟ لا كدا كتير اوى مقدرش على الفلوس دى كلها
متنسيش انك هتدفعى نص هتاخدى خمسه مليون
يا دين النبى ....خمسه مليون مره واحده ؟؟؟
ايوه طبعا ...و انتى فى السليم و حاطه رجل على رجل
بس انا اجيب النص مليون منين بس ؟؟ انا حتى لو بعت المحلات كلها و القهوه مش هكمل المبلغ ده ابدا
امال عاوزه تدفعى كام ؟؟؟
يعنى انت مدينى ٢٥٠ الف و المحلات ممكن تعملها خمسين ألف يعنى كله على بعضه ٣٠٠ الف
لا شويه يا معلمه ...انا هدفع قصادك نص مليون برده ...كدا هيبقى فى عجز ٢٠٠ الف جنيه
منا مش هعرف اتصرف عن كدا و مش عاوزه اطلب فلوس من دهشان عشان ميسألنيش عاوزه الفلوس فى ايه
طيب خلاص انا هدفعهم لك و ابقى اخصمهم من المكسب
كتر خيرك يا سعد بيه ....هو ده عشمى برده ...طيب انا هروح دلوقتى اشوف بيعه للمحلات و اجهز لك الفلوس و اجيبهم لك لحد عندك
و انا هحضر الورق الخاص بالبضاعه بس شوفى انتى الأصناف و الكميات حضريهالى عشان نطلبها و نشوف هنرتب موضوع البضاعه ده ازاى
و هو كذلك ....انا همشى بقا عشان أرتب لك كل حاجه
مع السلامه يا معلمه
خرجت قداره و هى تشعر بالفرح فهى بعد ايام قليله ستصبح من علية القوم ، ستلقى هذا العجوز المتهالك و ستجد غيره ...اجمل و أغنى منه ....ستترك التجاره و المعامله مع التجار ...ستزور البلاد المختلفه التى كانت تحلم بزيارتها والتى كانت تسمع بها فى الافلام فقط
عادت قداره و أخبرت دهشان انها وجدت مصدر آخر للبضاعه
و مين دا بقا اللى هتجيبي منه البضاعه دى؟؟؟
لا احنا مش هنجيب من تجار هنا ...احنا هنستورد البضاعه من بره
و احنا نفهم ايه فى حكايه الاستيراد دى يا قداره ؟؟؟
ملكش دعوه بقا انا هعرف ازاى اجيبها و بسعر و لا كنت تحلم بيه كمان
خلاص زى ما تشوفى
باعت قداره القهوه و المحلات لأحد التجار و اوصته بأن يظل كل شئ كما هو لمده شهر واحد فقط بعدها يستطيع اخبار الجميع أن المحلات أصبحت ملكه
سلمت قداره سعد النقود و اتفق معها إن بعد شهر ستصل البضاعه و حقها سيصلها فى غضون أسابيع
لاحظ دهشان التغير الكبير الذى أصاب قداره فقد أصبحت جافه بارده ترد عليه بعصبيه شديده
لم يستطع تفسير ما يحدث و لكن صلاح كان يفهم و يربط أن هذا التغيير مرتبط بسعد
استطاع صلاح جمع معلومات عن سعد و أن صفقاته مشبوهه حذر والده من قداره و شريكها
لم يصدقه والده و لكن صلاح أثبت له أن قداره تخفى عنه الكثير بدليل المحلات التى باعتها للمعلم سيد و أخفت عنه أمر بيعها
ثار دهشان و ذهب للمعلم سيد و علم منه الحقيقه
خرج دهشان كالمجنون و لكن صلاح نصحه بألا يخبر قداره بمعرفته بأى شئ حتى يستطيعوا معرفه ما تخطط له قداره مع سعد و أنه متأكد أنهما يتفقان على تجاره قذره فيما بينهم
جاء اليوم الذى ستستلم به قداره البضاعه من المينا بواسطه التوكيل الخاص الذى كتبه لها دهشان فى وقت سابق
سافرت قداره مبكرا و كان سعد ينتظرها هناك و كان الاتفاق انها تتسلم البضاعه و ينقلها سعد إلى مخازنه الخاصه و يستخرج المخدرات ثم يتم تحميل البضاعه مره اخرى على عربات و شحنها على مخازن دهشان
و لكن الأمر لم يتم كما خططوا له
استلمت قداره البضاعه و صممت على الذهاب مع سعد لتطمئن على مالها
اخذها سعد مع البضاعه و ذهبوا للمخزن الخاص به
بدأ رجال سعد فى اخراج اكياس البودره المخبأه عبر صناديق البضاعه
كانت قداره تنظر إلى الاكياس و كأنها تنظر إلى مستقبلها و غناها الذى تنتظره كانت الابتسامه لا تفارق شفاها
و فجأه وجدت ما لم تكن تتوقعه ...وجدت الشرطه تداهم المكان و بصحبتهم دهشان و صلاح
صرخت قداره صرخه رجت المكان
نظرت لدهشان باستعطاف
انا معملتش حاجه ...انا مكنتش اعرف حاجه ...انا فوجئت أن الحاجات دى موجوده فى بضاعتنا ...سعد ضحك عليا
هنا رد سعد
لا بقولك ايه انا مضحكتش عليكى و انتى عارفه كويس البضاعه اللى جايه ايه و دفعالى ٣٠٠ الف جنيه كمان فيها
نظر دهشان لقداره باحتقار شديد
ليه كدا ؟؟؟ انا اديتك كل حاجه ممكن راجل يديها لست ....انا سلمتك قلبى و مالى و تجارتى و فضلتك عن ولادى ..يا خساره
لم تستطع قداره الرد ....قبضت الشرطه على قداره و سعد و الرجال الموجودين بالمكان و تم تحريز المخدرات
عاد دهشان إلى بيته و قد زالت الغشاوه من عينه ...عرف كم كانت قداره تقسي قلبه على أولاده و تفرقه عنهم
جمع دهشان أولاده و اعتذر لهم و أخذهم بحضنه ارجع زوجته إلى عصمته .
اما قداره و سعد فقد أثبتت التحقيقات تورط جوهره مع سعد و أنها كانت تتفق معه على إيقاع قداره فى حبال نصبه
و أنها كانت تتفق مع بعض السيدات عن وصف معجزاتها أمام قداره حتى توقعها فى شباكهها و تحكم عليها عمليه النصب
و أنها اتفقت معه للمره الثانيه لاخبار قداره عن وجوده بمصر حتى يكتمل نصبهما عليها و يجرداها من كل مالها
تم الحكم على قداره و سعد بالمؤبد و على جوهره بعشر سنين بتهمه النصب
فقدت قداره كل شي بسبب طمعها لم ترض بما قسمه الله لها ...فقد أعطاها الله المال و الجمال و الزوج المحب و لكنها لم تقنع و لم تشبع و كان هذا جزائها العادل من الله عز وجل .
🌷🌷🌷🌷 تمت 🌷🌷🌷🌷
ارجو ان القصه تكون نالت اعجابكم
اذا عجبتكم القصه ارجو الدعاء لوالدى رحمة الله عليه و سائر موتى المسلمين .
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
جميله
ردحذف