قداره
الجزء السابع عشر
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
انا اللى غلطانه انى امنت لواحد زيك
اقعدى يا قداره ....و احنا نتفاهم
ادينى قعدت ...هترجع لى فلوسي و الا لأ
فلوسك موجوده و بفوايدها كمان
اه نصبايه جديده دى ؟ صح ؟؟
بقولك انا هديكى فلوسك ...هنصب عليكى فى ايه ؟
و ليه بقا هتدينى فلوسي ؟؟؟ حقانى لا قدر الله ؟؟؟
ايوا انا حقانى يا قداره و مكنتش ناوى اكل عليكى فلوسك
بامارة انك هربت صح ؟؟
لا مش صح ...انا سافرت للصفقه اللى قلت لك عليها
و مقولتش انك مسافر ليه ؟؟
و اقول ازاى و انا مينفعش اقرب من بيت المعلم و بعدين منا بعت لك خبر فى القهوه
و لا حد قالى حاجه .. المهم فين فلوسي
فلوسك فى البنك
ايواااا رجعنا بقا لللف و الدوران
و الف و ادور ليه بس ؟؟ هو انتى متخيله انى حاطط فى جيبي ٢٥٠ الف جنيه ؟؟
ايه ؟؟ هى فلوسي بقت ٢٥٠ الف جنيه ؟؟
ايوا طبعا
ازاى فى الفتره الصغيره دى ؟
منا كنت قايلك على اللى فيها يا معلمه
طب لايمنى عليهم
هكتب لك شيك حالا ... اتفضلى يا معلمه
ايه دا ؟؟؟ دا بجد ؟؟؟ يعنى لو رحت هلاقى رصيد ؟؟
ايوا طبعا هتلاقى انتى ناسيه أن ليا اسم دلوقتى و شركتى شركه محترمه
عجيبه
و ايه العجيب فى كدا ؟؟
كنت فاكراك بتنصب عليا
لا ابدا انتى فهمتى غلطت ....شرفتينى يا معلمه
طب بقولك ايه يا سعد بيه
نعم يا معلمه
هو انا مينفعش اشغل فلوسي معاك ؟؟
بصى يا معلمه انا عاوز اقولك أن الشك دخل ما بينا و فى شغلانتنا دى اهم حاجه الثقه لأننا بنبقى شايلين أرواحنا على ادينا
ايوا فاهمه و بعتذر لك عن سوء التفاهم اللى حصل ده
طيب انا مش عاوزك تتسرعى الشيك معاكى روحى اصرفيه و اتاكدى أنه له رصيد و بعد كدا لو حابه نتعاون مع بعض انا تحت امرك
كلام عين العقل ...استأذن انا
اذنك معاكى يا معلمه
خرجت قداره و هى تحدث نفسها ...
يا سلام معقول الخمسين الف تكسب المكسب دا كله فى الوقت الصغير ده ؟؟؟ دا بينى ظلمتك يا سعد
انا لازم استفاد من المكسب دا كله ...ابقى ست هبله لو اكتفيت بالفلوس دى
دا انا بقالى شهرين بنحر فى نفسي فى الوكاله مع التجار و مكسبتش و لا ربع المكسب ده ...انا بس أتأكد أن سعد مبيضحكش عليا و مدينى شيك مضروب و بعد كدا مش هسيبه
توجهت قداره للبنك مباشرة ، اقبلت على الشباك و قلبها يدق بشده
ناولت الموظف الشيك نظر إليه و رفع بصره مره اخرى لقداره
اهتز قلب قداره من نظره الموظف
تحدث إلى زميل بجانبه بصوت هامس
اضطربت قداره أكثر ...قطعت اظطرابها بقولها
هو فى حاجه و لامؤاخذه يا سيدنا الافندى ؟؟؟
لا ..مفيش بس المبلغ كبير شويه و لازم نتأكد من العميل
و ماله ما تتاكدوا هو حد حاشكوا
طيب انتظرينا شويه من فضلك يا فندم
طب هات الشيك
و ليه ؟؟؟ الشيك معايا
لا شيكى فى ايدى مرجعش ادور عليه
اتفضلى الشيك اهو و انتظرينى عشر دقايق
ادينى منتظره لما نشوف اخرتها
اتصل الموظف بسعد و أخبره بأمر الشيك ، اجابه سعد أنه الشيك صحيح و أنها إحدى المتعاملين معه
اشار الموظف لقداره
اسفين يا فندم على التاخير ...خمس دقائق و الفلوس تكون جاهزه
لا انا عاوزه افتح حساب عندكم و احط فيه المبلغ
طب اتفضلى يا فندم عند الاستاذ سامح يفتح لك الحساب
فتحت قداره الحساب ووضعت به المبلغ
خرجت من البنك و هى تشعر بسعاده غامره
عادت الى المنزل ساهمه تفكر فى المكسب الكبير
جلست بغرفتها تحسب المكاسب التى ستتحصل عليها أن استثمرت كامل المبلغ مع سعد
دخل المعلم و على وجهه ترتسم علامات الحزن
سلام عليكم يا معلمه
و عليكم ....مالك كدا ضارب بوز ؟؟
لا مفيش
بقولك ايه انا مزاجى رايق و مش عاوزه عكننه اتكلم على طول
المعلم منصور الجمل تعيشي انتى
الله يرحمه ...و مالك مزعل نفسك اوى كدا ليه ؟ هو كان من بقية عيلتنا
انتى مش واخده بالك أن معظم بضاعتنا بناخدها منه
طب و ماله ؟ هو بموته هيقفلوا يعنى ؟؟
اه طبعا لانه معندوش عيال كان عنده ولد واحد و مات الله يرحمه فى حادثه من سنتين
خلاص متشغلش بالك هنشوف غيره و يلا طفى النور عاوزه انام
حاضر يا معلمه
لم تنم قداره تلك الليله كانت تفكر فى المكاسب وامتد تفكيرها إلى ما بعد ذلك و أن هذا الدهشان لن يكون مناسب لها
و انها ستكون يوما من سكان القصور و أنها تستحق أن تتزوج شاب صغير تسعد معه فهى لا ينقصها شئ لا مال و لا جمال
قامت مبكرا ارتدت اجمل ثيابها وضعت المساحيق
استغرب دهشان لتأنقها الزائد و سألها عن السر
اشاحت بيدها و ارتفع صوتها
عاوز منى ايه على الصبح ؟؟
مالك يا قداره ؟؟ هو انا غلطت لما سالتك ؟؟
ايوا غلطت ....عندى مشوار خصوصى
مشوار ايه ده و رايحه فين على الصبح كدا ؟؟؟
ملكش فيه ....انا حره يا اخى
انتى بتكلمينى كدا ليه ؟؟؟
بكلمك ازاى يعنى ؟؟؟ شايفنى بكلمك من قفايا ؟؟
ايه اللى بتقوليه ده ؟؟؟
مالك يا معلم هو انا وجهت لك كلام ؟؟ انت قايم تقول يا شر اشتر و الا ايه ؟؟
و لا شر و لا حاجه خلاص يا قداره انا اسف
بقولك ايه يا دهشان انا مبحبش حد يخنقنى يا اخويا ....انت عارف انا اتطلقت قبل كدا كام مره و مش صعب عليا اتطلق تانى
بقى كدا يا قداره ؟؟؟ بعد كل اللى عملته معاكى ؟؟
عملت ايه يا اخويا ؟؟
كفايه انى طلقت مراتى التانيه عشانك و طردت ابنى الصغير عشانك و عاملت بناتى بمنتهى القسوه عشان ارضيكى
ايوااااا لزق فيا كل حاجه بقا .... و نسيت تقول انى كمان كنت السبب فى موت المرحومه
الله يرحمها
بقولك ايه انا هسيبك مع ذكرياتك انا مش فاضيالك و لما ارجع نبقى نتكلم
كان صوتهما مرتفع لدرجه ان كل أفراد المنزل سمعوا الحوار
خرجت قداره بينما جلس المعلم مذهول و لا يعلم سر هذا التحول فى المعامله ... تبعها صلاح ليعرف إلى اين ستذهب
لم تستقل سيارة زوجها و لكنها اوقفت تاكسي ....استقل صلاح تاكسي اخر و ذهب ورائها ليجدها تصل إلى شركة السعد للاستيراد والتصدير ..
اااه ....اكيد هو ده سعد اللى سمعتها بتتكلم عنه هى و اللى اسمها جوهره ...خلاص يا قداره قربت اجيب سرك و افضحك قدام والدى ...انا و انتى و الزمن طويل يا قداره .
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق