الدميه
الجزء الاول
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
مش عارفه ايه اللى خلانى عاوزه احكيلكم الحكايه دى دلوقتى
يمكن عشان اطلع طاقه الرعب اللى جوايا و احس انى اهدى شويه ؟؟
او يمكن لانى عاوزه ارعبكم زى ما انا مرعوبه ؟؟؟ ( انا جبانه اوى )
او يمكن واحد منكم يفسر لى معنى اللى حصل ده ايه ؟؟
اولا الحكايه مش حكايتى ...هى حكايه بنت خالتى بسمه بس انا عارفه كل تفاصيلها بحكم أننا اكتر من اخوات و بيوتنا تعتبر بيت عيله لأن جدى الله يرحمه خلف تلات بنات و بنى لكل بنت شقه و شرط على اى عريس متقدم أنهم يسكنوا معاه فى نفس البيت
جدو كان بيحلم أنه يجمع بناته حواليه لحد اخر يوم من عمره
و بالفعل نجح فى كده و جوز التلات بنات معاه فى البيت لتلات رجاله محترمين
والدتى سميره كانت أكبرهم و خلفتنى انا هدى و اخويا احمد
و بعدين خالتى سميه اللى خلفت بسمه و كانت تقريبا قدى فى السن و سها و مها
اما خالتى التالته صباح فدى ربنا مرزقهاش بأطفال
جدو مات بعد ما شافنا كلنا و فرح بينا ...بعدها بسنتين ماتت جدتى و مفضلش غير التلات بنات برجالتهم
زوج خالتى صباح كان عاوز يمشي من البيت بعد موت جدتى لكن خالتى موافقتش و قالت له انا هحافظ على عهد بابا و هفضل مع اخواتى
لكن زوجها كان دايما حزين معرفش بقا بسبب أنهم مخلفوش ساعتها و الا ايه السبب الحقيقى
ابو بسمه اللى هو زوج خالتى كان راجل طيب اوى و كان أصله من الصعيد بس شغله فى القاهره
شاف خالتى و عجبته و طلبها من جدى و كان شرط جدى انها تتجوز معاه
و وافق زوج خالتى على الشرط رغم أن ده صعب شويه عندهم و إن كان المفروض يتجوز خالتى و تروح معاه الصعيد تقعد فى شقته هناك و هو ينزل لها اجازه كل شهر
لكن محصلش و بقوا هما اللى ينزلوا زياره كل كام شهر لأهله فى البلد
و فى يوم كنا لسه مخلصين امتحان الابتدائيه انا و بسمه و كانت بسمه شاطره جدا فى المدرسه و بتطلع الاولى على فصلها .
كنا فرحانين اوى أننا خلاص هنلعب زى ما نحب و محدش هيقولنا ذاكروا وراكم شهاده....
طلبنا من امهاتنا ننزل نلعب فى الشارع لكن موافقوش و قالوا خلاص انتوا كبرتوا على موضوع الشارع ده
بسمه قعدت تعيط كان نفسها تلعب
جه والدها و طبطب عليها و سألها
بتعيطى ليه يا بسبوسه ؟؟
ماما مش راضيه تخلينى العب فى الشارع يا بابا
طب ما هى عندها حق ...الشارع يا بنتى مش امان و انتى كبرتى دلوقتى
و انا مالى انا عاوزه العب ...انتوا طول السنه تقولوا ذاكرى و كنت مستنيه الاجازه تيجى عشان العب براحتى
خلاص متزعليش ..... انا هاخدكم يا ستى و نروح عند جدك فى الصعيد الحته هناك امان اكتر ...تلعبى زى ما انتى عاوزه
صحيح يا بابا ؟؟ هنسافر ؟؟
ايوه صحيح ...حضرى نفسك يا حبيبتى انا حجزت القطر بعد يومين
بسمه نطت من الفرحه ...هى كانت بتحب بلد ابوها جدا
بس انا مفرحتش و كنت هعيط كمان
وقفت ساكته و حزينه
بسمه شافتنى واقفه زعلانه و سالتنى
زعلانه ليه يا هدى ؟؟
زعلانه عشان هتسافرى و تسبينى ..العب مع مين دلوقتى ؟؟ دا انا ما صدقت أن الاجازه جت و هنلعب سوا
معلش يا هدى دا هو اسبوعين اللى بنقعدهم هناك و انا هجيب لك حاجات حلوه من الصعيد و انا جايه
و سافرت بسمه هى و اخواتها و خالتى و جوزها و انا فضلت حزينه من غيرها
بسمه كانت بتكلمنى كل يوم و بتحكيلى عن كل اللى بيحصل معاها هناك من اول ما وصلت
كانت بتحكيلى عن جدتها و أنها بتجمعهم هما و اولاد عمها و تحكيلهم حكايات مخيفه عن النداهه و ابورجل مسلوخه و عن الناس اللى بيلاقوها مقتوله و مرميه فى الترعه و عفاريتهم بتطلع بالليل تخوف الرايح و الجاى
كنت اسمع من بسمه الكلام ده و اخاف اوى و اتخيل أن عفريت القتيل هيخرج لى و انا نايمه و كنت أقوم من النوم معيطه لحد ما ماما لاحظت اللى بيحصلى و سألتنى
مالك يا هدى ؟؟ بتقومى تصرخى ليه كدا يا حبيبتى هو فى حد بيخوفك ؟؟
مفيش يا ماما
بتخبى على امك ؟؟
لا بس ...انا خايفه من النداهه
النداهه ؟؟؟ جبتى الكلمه دى منين ؟؟؟؟
من بسمه
و بسمه عرفت الكلمه دى منين ؟؟؟
جدتها حكت لها عليها
اااه
هو صحيح يا ماما النداهه دى ست حلوه اوى بشعور طويله بتنادى على الناس و لو ندهت على حد و راح لها بيلاقيها اتحولت و بقى شكلها وحش اوى و تاخده تقطم رقبته فى الترعه ؟؟؟
ايه دا الكلام دا ؟؟؟ دا خرافات يا هدى
خرافات يعنى ايه ؟؟
يعنى مجرد حكايات الناس زمان كانوا بيحكوها
لا بسمه قالت لى أن جدتها كان لها صاحبه و ندهتها النداهه و قاموا تانى يوم لقوها من غير رقبه و مرميه فى الترعه
متصدقيش الكلام ده ...و بعدين متتكلميش مع بسمه فى الحاجات دى مدام انتى بتخافى كدا
حاضر يا ماما ...لو جت تحكيلى على اى حكايه من الحكايات دى هقولها لا
شاطره يا هدى ....ابقى اقرى ايه الكرسي و الفاتحه و المعوذات قبل ما تنامى
حاضر يا ماما
تانى يوم بسمه كلمتنى فى التليفون و لسه هتحكيلى على حكايه من حكايات جدتها المرعبه قلت لها لا مش عاوزه اسمع
بسمه سكتت و زى ما يكون زعلت منى و بعدها قالت لى انها راجعه بعد يومين
فرحت اوى و جهزت الألعاب بتاعتى عشان لما بسمه ترجع العب معاها
فى اليومين دول بسمه متصلتش تانى و انا مجاش فى بالى اى حاجه
انا كنت مشغوله بعمل فساتين للعرايس و زينه ازين بيها اوضتى
عدى اليومين و سمعت ماما بترحب بخالتى و اولادها اللى كانوا لسه جايين من الصعيد
فطيت من مكانى و جريت عشان أسلم عليهم و اخد صاحبتى تلعب معايا
اول ما شفتهم خالتى ابتسمت لى و خدتنى فى حضنها و سلمت عليا
دورت بعينى لقيت بسمه واقفه ورا خالتى و ساكته خالص على غير عادتها و معاها فى أيدها عروسه شكلها غريب اوى .....
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق