قداره
الجزء التاسع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
هنا هب المعلم من مكانه و توجه لحجره الطبيب المختص
ممكن يا دكتور كلمه من فضلك ؟؟
اتفضل يا معلم
انا عاوز انقل الحاجه لمستشفى تانيه
و ليه يا معلم ؟؟
عاوز انقلها مستشفى خاص و اجيب لها دكاتره من بره يكشفوا عليها
انت حر بس صدقنى احنا هنا مش متأخرين عليها و بنعملها كل اللازم
معلش يا دكتور ريحنى
و ماله بس لازم تعدى ٢٤ ساعه زى ما قلت لك لأن نقلها حاليا فيه خطر كبير عليها
تمام يا دكتور ...لو محتاجين اى حاجه أنا جاهز
ادعيلها بس يا معلم
بدعيلها و الله
جلس المعلم أمام العنايه المركزه و أولاده الاربعه يجلسون على مقاعد مجاوره يختلسون النظر إليه و لسان حالهم يقول
انت السبب ...انت من أنزلت القهر بقلب امنا للمره الثانيه دون مراعاة العشره و الايام الطوال ...أسرعت الان متلهفا عليها ؟؟؟ ....لماذا لم تراعى مشاعرها و مشاعرنا عندما فكرت فى الزواج للمره الثالثه ؟؟؟
كان الجميع متأثر خاصه صلاح الابن الأكبر لانه أكثرهم تعلقا بأمه
كان يحدث نفسه
كله منك انت ...القهره اللى حصلت لامى دى انت السبب فيها ...من يوم ما سبتها مرميه و رحت اتجوزت واحده اد عيالك و كمان خلفت منها و فوق كل ده رحت تتجوز مره تانيه واحده تلعب بالبيضه و الحجر و معروف عنها انها استغلاليه و مبتسبش الراجل اللى معاها الا اما تمص دمه ، امى لو جرالها حاجه مش هسامحك عمرى
بات الجميع ليلتهم بالمشفى ينتظرون الفرج
اصبح الصباح و مازالوا ينتظرون تتجه أنظارهم عبر زجاج الغرفه يراقبون تنفس الام صدرها الذى يرتفع و ينخفض بهدوء
تتنفس بصعوبه و لكنها مازالت تتنفس
يتجدد الامل مع كل نفس يخرج من صدرها
عندما اذن الظهر فتحت الام عينها و ازاحت قناع التنفس من على وجهها ...
اسرعت الممرضات إليها و حضر الطبيب مسرعا
كان الجميع ينظرون لها بفرحه شديده و علامات الرضا تظهر على وجه الطبيب
خرج الطبيب بعد أن أتم الكشف على تحيه و القى ببعض التعليمات للممرضات
خير يا دكتور ؟؟؟
خير أن شاء الله الحاجه ضغطها انتظم و تنفسها و الحمد لله المؤشرات الحيويه كلها شبه طبيعيه
يعنى مرحله الخطر انتهت يا دكتور ؟؟
الحمد لله انتهت و انا أمرت بنقلها لغرفه عاديه
طب مش حضرتك قلت ٢٤ ساعه ؟؟
ايوا ..دا لما كانت المؤشرات مش طبيعيه بس دلوقتى انا شايف انها مش محتاجه عنايه مركزه
تمام ..متشكرين اوى يا دكتور
لا شكر على واجب يا معلم
نقلت تحيه الى غرفتها و التف حولها اولادها
حمدالله على السلامه يا ماما
الله يسلمكم يا اولاد
حمدالله على السلامه يا تحيه
الله يسلمك يا معلم ...انا جعانه اوى نفسي اكل فرخه بحالها
يا سلام عيونى ليكى يا ام صلاح
تسلم عيونك يا معلم
يا ماما مينفعش تاكلى الا اما نسأل الدكتور
بقولك جعانه يا صلاح و حاسه انى مش تعبانه خالص
و ماله بس نتأكد الاول و بعدها انزل اجيب لك الاكل اللى تحبيه
لا روح انت يا صلاح و خد اخواتك معاك انتوا هنا من امبارح و منمتوش لحظه
ما انت كمان هنا من امبارح يا بابا
و ماله يا سلوى انا مع امكم لحد ما تخرج بالسلامه ...قوم يلا يا صلاح يا ابنى امشى زى ما قلت لك
حاضر يا بابا انا هاخد اخواتى اوصلهم و اسال الدكتور على أكل ماما و لو قال تأكل هجيب لها اكل واجى
و ليه يا ابنى ؟؟ منا هخلى واحد من رجالتى يجيب الاكل
معلش يا بابا انا لازم ارجع مش هعرف انام و انا عارف إن امى على سرير فى مستشفى
ماشي يا صلاح ...
ذهب صلاح و سأل الطبيب فاخبره أنه يمكنها اكل طعام خفيف و كتب له قائمه بالاكل المناسب و بالمحظورات
عاد صلاح للبيت و أعدت اسماء اخته الطعام ،وضعته فى اوانى خاصه ...اخذها صلاح و عاد للمشفى
قدم لامه الطعام الساخن .....اكلت و هى تضحك و تتحدث كأنها لم تكن مريضه
فرح صلاح كثيرا بانتهاء المحنه ، و طمأن نفسه أن أمه ستعود معه غدا إلى بيتها لتنيره مره اخرى
شبعتى يا ماما ؟؟
ايوا يا ابنى عقبال ما اكل يوم فرحك
يووو لسه بدرى
بدرى ايه يا واد ؟؟؟ هو انت فاكرنى مش واخده بالى
واخده بالك من ايه يا حاجه ؟؟
من منيره جارتنا و النظرات اللى طالعه نازله
انتى بتقولى ايه يا ماما ؟؟ احم
هروح انا يا تحيه اشوف حساب المستشفى
و ماله يا حج بالسلامه
انصرف دهشان عندما وجد ابنه يشعر بالحرج من كلمات تحيه
ايه يا ماما انتى لازم تحرجينى كدا قدام الحج ؟؟؟
احرجك ليه بس ؟؟ دا يوم المنى يا ابنى ..و بعدين منيره بنت مؤدبه و حلوه و مش هنلاقى زيها
صحيح يا ماما ؟؟؟ يعنى انتى موافقه عليها ؟؟
طبعا موافقه و لما ابوك يطلع هفاتحه يروح يخطبهالك
لا يخطبهالى كدا مره واحده ؟؟
امال هيخطبهالك على مرتين ؟؟
لا قصدى مش لما نجس نبضها الاول و نشوف موافقه و الا لا ؟؟
طبعا موافقه ...دا عنيها فاضحاها يا ابنى
انتى متاكده يا ماما ؟؟
طبعا متاكده
امال لما بتشوفنى على السلم بتجرى و تقفل الباب ليه ؟؟
مكسوفه يا ابنى ...بنت مؤدبه متعرفش لا كدا و لا كدا
طيب لما يجى الحج بقا قوليله ..انا عارف أتأخر كدا ليه ؟؟
شوف الواد مستعجل ازاى ؟؟ اقولك روح ناديه عشان ميركنش هنا و الا هنا
لا سبيه براحته
امشي يا واد اعمل اللى بقولك عليه
خرج صلاح مسرعا كأنه كان ينتظر هذه الكلمه
وجد والده يقف مع أحد العاملين بالمشفى ، و الرجل يحكى له عن ظروفه الصعبه و المعلم يربط على كتفه و يتحدث معه و بحاول مساعدته
بابا ...يا حج
ايوا يا صلاح
ماما عاوزاك فى الاوضه
مالها ؟؟ هى تعبت و الا ايه ؟
لا ابدا ...دى عاوزك فى موضوع كدا
خير يا ابنى ...جاى وراك اهو
بابا جاى ورايا يا حاجه همتك بقا معايا
خير يا حاجه ؟؟؟ تحيه تحيه
ماما ...ماما
دكتوووووور 😳🥺
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق