قداره
الجزء الثامن
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
اتجه المعلم للباب ....فتحه ليجد مهدى يقف أمامه يتصبب عرقا
الحق يا معلم ...
فى ايه يا مهدى ؟؟؟
الحاجه تعبانه اوى و نقلناها المستشفى
ازاى الكلام ده ؟؟ و محدش قالى من بدرى ليه ؟؟
مكناش عاوزين نقلقك فى ليله زى دى
انت بتقول ايه يا مهدى ؟؟ دى ام عيالى و عشرة عمرى ازاى مكنش جنبها فى موقف زى دا ....انزل اسبقنى انت على ما اجيلك
وجب يا معلمى
دلف دهشان الى غرفه النوم حيث جلست قداره على سريرها مرتديه أجمل الملابس ، يفوح منها عطرها الفواح كشجرة ياسمين مزهره
معلش يا قداره هستأذنك انى انزل شويه
خير يا معلم ؟؟ حصل ايه ؟؟؟
و الله الحاجه بعافيه شويه و نقلوها المستشفى
و مالوا يا معلم ...اتفضل يا اخويا ...اجى معاك ؟؟؟
لا كتر خيرك ...متزعليش منى
لا ازعل ازاى ؟؟ دا واجب يا اخويا
و الله انتى بنت اصول يا قداره و انا عرفت اختار فعلا
توجه المعلم باتجاه الباب مباشره بعد أن طبع قبلة على جبين قداره
نظرت إليه قداره و هو ينصرف دون أن يلتفت إليها مره اخرى بغيظ شديد و حدثت نفسها
بقا كدا ؟؟؟ شغل الضراير هيبتدى بقا ؟؟؟ الوليه عامله عيانه عشان متهننيش على الراجل ؟؟؟ طيييييب انا و انتوا و الزمن طويل يا ضرايرى ...ان مكنتش اطيركم من على ذمته مكنش انا قداره و الاجر على الله
اسرع المعلم دهشان إلى زوجته تحيه بالمشفى...حيث وجد أبنائه الاربعه يقفون امام العنايه المركزه
طمنى يا دكتور ...الحاجه عامله ايه ؟؟
انتوا مزعلين الحاجه ليه يا معلم ؟؟
محدش يقدر يزعل الحاجه طول منا موجود على وش الدنيا
امال ضغطها عالى ليه ؟؟ و ده أدى لجلطه للاسف
سلام قول من رب رحيم ..جلطة ايه دى ؟؟
جلطه فى القلب يا معلم و حالتها خطره جدا
خطره ازاى يا دكتور ؟؟ انا مستعد اعمل اى حاجه ...اوديها فى اى حته بس تخف
الحاجه دلوقتى فى العنايه المركزه و لو مر عليها اربعه و عشرين ساعه يبقى الخطر زال باذن الله
طب ممكن اشوفها ؟؟
لا انا مانع الزياره لأن حالتها وحشه جدا و خايف عليها من اى انفعال
متخفش يا دكتور انا مش هتكلم هبص عليها بس
خلاص اتفضل بس لو حالتها ساءت انت اللى هتتحمل المسؤوليه كامله
ان شاء الله مش هيحصل حاجه
دخل المعلم دهشان على زوجته الأولى ام أولاده و هو يحتبس دموعه فهذه زوجته التى رافقته طوال خمسة و عشرون عاما دون كلل أو ملل ...وقفت بجانبه فى احلك لحظات حياته ، باعت له مصاغها ليقف على قدميه و يكون المعلم ....هو لم ينسى قط فضلها عليه و لم تهتز غلاوتها لديه
جلس دهشان بجانب سريرها دون إصدار اى صوت ...
بعد دقائق فتحت تحيه عيناها لتجده يجلس بالقرب منها
ابتسمت تحيه نصف ابتسامه قائله
انت جيت يا دهشان ؟؟
ايوا يا تحيه انا هنا جنبك اهو
كنت خايفه اموت قبل ما اشوفك
بعد الشر عنك....دا انا اموت وراكى
بعد الشر عنك يا دهشان ... المهم انت راضى عنى ؟؟
طبعا يا تحيه انا راضى تمام الرضا عنك ...هو انتى فى زيك في الدنيا دى كلها ؟؟
لا انا قصرت فى حقك برده فى الكام سنه اللى فاتوا بس مش بخطرى غصب عنى ...سامحنى
مسامحك يا حبيبتى ...انتى هتقومى بالسلامه و هتكونى زى الفل
لا انا عارفه أن دى نهايتى
تفى من بوقك متقوليش كدا
اسمعنى يا دهشان انا فى قلبى حاجه عاوزه اقولها لك قبل ما اموت
متقوليش يا تحيه ...لما تقومى بالسلامه ابقى قولى اللى عاوزاه ...الدكتور قال بلاش إرهاق
صدقنى مش هلحق ...اسمع بس ..انا عرفت انك اتجوزت اللى اسمها قداره
انتى عرفتى ؟؟ انا كنت هقولك برده بس مرضتش ازعلك
لا انا مش زعلانه و لا حاجه طول ما انت مبسوط انا مبسوطه بس عاوزاك تاخد بالك منها انا سمعت انها بتتجوز الرجاله عشان تستغلهم
استغفر الله العظيم ايه اللى بتقوليه ده يا حاجه ؟؟
ربنا يسامحنى بس دا اللى سمعته
كلام غلط طبعا ...الجواز ده قسمه ونصيب
اللى خلانى اقول الكلام ده انى حلمت من يومين أن فى حيه قربت منك و كانت حيه ملونه و انت كنت مبهور بجمالها لدرجة أنك مكنتش واخد بالك من أنها هتأذيك ...الحيه قربت منك و هجمت عليك عضتك من رقبتك و انت كنت مستسلم جدا و زى ما يكون عاجبك اللى بيحصلك ...بعد كدا انت حسيت بدوخه شديده و وقعت على الأرض و كنت بعد الشر عنك زى ما تكون هتموت بس ربنا نجاك فى اخر لحظه و انتبهت للحيه اللى قافشه فى رقبتك و رحت ماسكها من دماغها و راميها فى الارض بعيد عنك
يا ستى دى تخاريف حية ايه و عضة ايه اللى بتتكلمى عنها ؟؟ استريحى انتى بس و مفيش حاجه من اللى بتقوليه ده هتحصل
يارب يا دهشان بس خلى بالك من نفسك
سبيها على الله
و نعم بالله
هسيبك ترتاحى
لا متمشيش ...انا عاوزاك جنبى
مش همشي انا هقعد استنى بره مش هتحرك من هنا
ربنا يخليك ليا و يبارك فى عمرك
و يخليكى ليه يا غاليه
خرج المعلم إلى خارج العنايه ، جلس يفكر بحالة زوجته و يفكر بكلماتها انها ستموت ...أخذ يستغفر الله و يحدث نفسه
تحيه تموت ؟؟ دى لو ماتت هزعل اوى ...الست دى اتجوزتها و هى ١٦ سنه يعنى انا اللى مربيها على أيدى ...اعرفها و تعرفنى من نظرة العين ...ياما اتحملت معايا ايام صعبه مفيش ست تتحملها
عمرها ما غلطت فيا و لا كشرت فى وشي ، كانت بتعاملنى كأنى ابنها مش جوزها ، خلفت لى الولاد و البنات و محرمتنيش من حاجه
لما كنت اسافر عشان اجيب بضاعه كانت تقف مكانى زيها زى اى راجل و كانت تسد على البيت و الشغل و كنت ابقى مطمن و انا غائب انى سايب ست بمية راجل مكانى
انا برده لما ربنا كرمنى و فتح عليا مخلتش فى نفسها حاجه و جبت لها دهب مغطى اديها الاتنين لحد الكوع ...لبستها احلى لبس و اكلتها احلى اكل ..كنت اجيب لها الحاجه من غير ما تطلب عشان أكرمها زى ما كرمتنى
كانت امى و اختى و زوجتى و بنتى ...مقدرش اتخيل حياتى من غيرها
هنا هب المعلم من مكانه و توجه لحجره الطبيب المختص
ممكن يا دكتور كلمه من فضلك ؟؟
اتفضل يا معلم
انا عاوز ....
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق