قداره
الجزء الثانى عشر
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
سمعت قداره ما دار بين حسن و عبوده .....احست أن الدنيا تدور من حولها ، احست باحتباس دمها ،
شعرت بالقهر الشديد و مما زاد احساسها انها لا تستطيع أن تنطق بكلمة واحده عن اتفاقها مع سعد
قامت قداره و القت بالارجيله على الأرض صرخت
واد يا حسنى
نعم يا معلمه
خد يا واد تعالى لما اقولك ... بالراحه كدا روح شوف لى المعلم سعد فى دكانه و الا لا و لو لقيته خليه يجى يكلمنى ضرورى ...اوعى ترجع من غيره لاقطع خبرك
عنيا يا معلمه فوريره
اسرع حسنى إلى محل سعد و الذى يبعد عن قهوة قداره بحوالى عشر دقائق سيرا على القدمين
جلست قداره تحسب وقت وصول و رجوع حسنى
الواد لو راح فى عشر دقايق و رجع فى عشره زيهم ووقف اتكلم معاه خمس دقايق يبقى كدا ٢٥ دقيقه قولى نص ساعه ...كلها نص ساعه و اعرف لو كان الكلام اللى سمعته ده عليه و الا قصدهم سعد تانى ....يارب يكون سعد تانى بس ازاى دا بيقوله أن فى صفقه و مكسب يعنى نفس الكلام اللى قالهولى ...معقول الصدفه تكون للدرجه دى ؟؟؟؟
نظرت قداره فى الساعه التى تلتف حول معصمها مراقبة عقارب الساعة و هى تتحرك ببطء شديد و هى على احر من الجمر تنتظر حسنى
تأخر حسنى و مر ساعه الا ربع كانت قداره وصلت للاشتعال
همت بأن تقوم بنفسها و تذهب الى سعد و لكنها وجدت حسنى مقبلا عليها و ترتسم على وجهه علامات الخذلان
فين يا واد المعلم سعد ؟؟؟
ملقتوش يا معلمه
ازاى ملقتوش يعنى ؟؟؟
الدكان متسمكر بالضبه و المفتاح يا معلمه
و لما انت ملقتهوش ايه اخرك دا كله ؟؟؟
منا خفت منك لو رجعت من غيره قلت اروح ادور عليه فى بيته
و هو انت تعرف بيته ؟؟
لا بس سألت المحل اللى جنبه و هو دلنى
طب و عملت ايه انطق
خبطت كتير اوى لحد ما خرجت لى جارتهم و قالت لى أنهم عزلوا و سابوا الشقه
ايه ؟؟؟ يا خراب بيتك يا قداره ....يا مصيبتك السودا يا قداره
هو فى ايه يا معلمه انا مش فاهم ايها حاجه
ملكش دعوه يا واد انت و حسك عينك تقول لحد انى سألت على سعد ده
حاضر يا معلمه تحت امرك
اخذت قداره تحدث نفسها :
اجييك منين يا سعد الكلب انت ، ازاى واحد زى ده يضحك عليكى يا قداره؟؟؟؟...كان عقلك فين ؟؟؟؟ بقى انا اللى بضحك على الرجاله يتضحك عليا من واحد زى ده ؟
الله يخربيتك يا سعد و يخربيت اليوم اللى شفتك فيه
كانت تغلى كالبركان الثائر ، لا تعرف ماذا ستفعل و فجأه لمعت بذهنها فكره جعلتها تقفز مسرعه و تصرخ فى حسنى أن يغلق القهوه
أسرعت قداره إلى بيت جوهره بنفسها
دقت على الباب بشده
ايوا يا اللى على الباب بالراحه شويه هتخلعه الله يسامحك
افتحى يا جوهره
مين ؟؟؟ ست العرايس ؟؟؟ يا اهلا...
و لا اهلا و لا زفت غتينى يا جوهره
فى ايه مالك يا حبيبتى ؟؟؟
يعنى انتى مش عارفه ؟؟
و هعرف منين بس ؟؟؟
ازاى ؟؟ مش بتقولى انك تعرفى كل حاجه ؟
لا حاشا لله ..هو فى حد بيعرف كل حاجه برده ؟؟
نعم يا اختى ؟؟؟ امال ايه حكايه انك واصله دى ؟؟
فى ايه بس يا ست الكل ؟؟؟
اتنصب عليا فى الفلوس يا خالتى
الفلوس كلها ؟؟؟؟ لا حول ولا قوه الا بالله ...ازاى الكلام ده ؟؟؟
انا اللى هقولك ازاى ؟ و الا انتى اللى لازم تقوليلى دا حصل ازاى ؟؟ و راح فين سعد الكلب ده
أغمضت جوهره عيناها و أمسكت سبحتها تحرك بين أصابعها ، تنطق بكلمات غير مفهومه ...و كأنها تتحدث مع أحد الأشخاص
السلام و التحيه على أهل السلام
سمعتوا الست قالت ايه ؟
دورولى عليه بسرعه و اعرفوا مكانه
فين ؟؟؟
انتوا متأكدين ؟؟؟
طب اتأكدوا مره تانيه
تمام
و عليكم السلام
خير يا خالتى قالولك راح فين ؟؟
سعد خرج من البلاد
خرج راح فين ؟؟
سافر على ليبيا و من هناك هيشوف له سفريه لبلاد بره
ازاى الكلام ده ؟؟
هو منصبش عليكى لوحدك ...دا نصب على ناس كتير و اخد فلوسهم و حول معظمها لدهب لبسه لمراته و اخدها معاه
الله يخربيته البعيد ...طب و أوصله ازاى ده ؟؟
علمى علمك
اتعدلى يا وليه و عرفينى مكانه احسن لك
و انا هعرف منين بس ؟ انا قلت لك أنه فى ليبيا و دا كل اللى اعرفه مقدرش اعرف اكتر من كدا
الكلام ده مينفعنيش يا جوهره انتى لازم تقوليلى هو فين و الاقيه ازاى
بقولك ايه يا اختى ...انتى مقدرتيش على الحمار هتتشطرى على البردعه ؟؟ روحى يا اختى دورى عليه بعيد عنى و بعدين انتى بتعيطى على شويه فلوس و انتى معاكى البنك بذات نفسه ؟؟ يلا يا اختى انا مش فاضيه عندى جلسة اسياد دلوقتى
انصرفت قداره و هى تجر أزيال الخيبه ، شاردة الفكر ..تكتم دموعها حتى لا يراها احد
عادت لشقتها القديمه دون أن تشعر ...دخلت و ألقت بجسدها على الأريكة ...
انهارت و بدأت تضرب فى الوساده و تصرخ بداخلها إلى أن خارت قواها
اصبحت كالجثه ..بلا حراك ..مفتوحه العينين ...تتساقط دموعها دون صوت
ظلت على هذا الحال أكثر من ساعتين
تفكر و تفكر ....إلى أن دق بابها
لم تهتم بمن يدق الباب و لم ترد
و لكنها سمعت بعد كثير من الطرق صوت زوجها
افتحى يا قداره انا عارف انك هنا ...افتحى و قوليلى مين زعلك بس و انا اهد الدنيا فوق دماغه
هنا لمعت برأسها فكره من أفكار إبليس
قامت مسرعه و دموعها قد حولت الكحل إلى سواد شديد تحت عينيها
فتحت للمعلم الباب ...ألقت بنفسها بين يديه ...تظاهرت بانها فقدت الوعى
انزعج المعلم كثيرا و اخذ يحاول افاقتها
قداره حبيبتى ...فى ايه مالك بس ؟؟
قوليلى يا حبيبتى
ما انت مش هاتصدقنى
ازاى تقولى كدا ؟ هصدقك طبعا اتكلمى يا قداره
الحكايه هى .....
يا ترى ما هى الحكايه التى سترويها قداره للمعلم ؟؟ و هل سيصدقها أو لا ؟
هذا ما ستعرفونه فى الجزء القادم باذن الله تعالى
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق