قداره
الجزء الحادى عشر
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
بقيت قداره مع المعلم الذى كان يجلس حزينا بعد هذا الموقف العصيب
جلست بجانبه قداره و ربتت على كتفه ، أخذته بحضنها و اخذت تملس على شعره الفضى اللامع
انخرط المعلم فى البكاء بين يديها إلى أن هدأ كطفل صغير تعلق بصدر امه .
أهدى يا معلم الواد لسه صغير و موت امه برده تاعب أعصابه
شايفه كلمنى ازاى يا قداره؟؟
معلش ...انا متأكدة أنه بكرا هيجيلك و يحب على ايدك كمان
انا اسف يا قداره
لا متقولش كدا ...دول زى اخواتى الصغيرين ...هو فى حد بيزعل من اخواته برده ؟؟؟
طب يلا قومى لما اوريكى اوضة النوم فين
يلا يا اخويا
اتفضلى يا معلمه
بسم الله ما شاء الله اوضه حلوه اوى
ايوا دى لسه جديده ...مبقلهاش
شهر ...كنت جددتها للمرحومه
هى حلوه بس اعذرنى مقدرش انام فيها
و ليه بقا ؟؟؟
يعنى عشان جتتى مش هترتاح و انا عارفه أن فى واحده تانيه كانت نايمه على الفرشه دى ...
خلاص اغير لك الفرش و المرتبه لو تحبى
لا مش مسأله مرتبه و فرش ...انا مقدرش انام فى الاوضه بذات نفسها
و ليه يا قداره ؟؟
عشان خاطر ولادك برده ...العيال لسه دم امهم مبردش فى التربه و انت عاوز تجيب واحده ست مكانها ...لازم نراعي مشاعرهم ...و لولا انا مقدره الحاله اللى انت فيها و مش عاوزه اسيبك كنت رجعت شقتى بدون تكسير كلامك يعنى
و الله انتى بنت اصول يا قداره و اختيارى ليكى كان صح
كتر خيرك يا معلم
طب تعالى انا هدخلك اوضه الضيوف ، الاوضه دى محدش نام فيها خالص و لسه جديده
و ماله يا معلم تحت امرك
اتفضلى يا قداره
يزيد فضلك ...انا كدا مرتاحه اكتر
طب الحمد لله ...هروح اغير هدومى و اجيلك
لا لا يا معلم احنا قولنا ايه ؟؟؟ مش قولنا نراعى مشاعر الولاد ؟؟
يعنى ايه ؟؟
يعنى نستنى شويه ...كل واحد ينام فى اوضه
و دا ينفع يا قداره ؟؟؟
معلش يا معلم عشان خاطرى
خاطرك غالى اوى ... حاضر
خرج المعلم من الغرفه ...اخذت قداره تحدث نفسها
هو ده الشغل يا قداره ... لازم امشى على مبدأ شوق و لا تدوق عشان يفضل ملهوف عليا كدا و ميقدرش يكسر لى كلمه....و بعدين عاوزه اشوف نظامهم فى البيت اىه ...منا مكنتش عامله حسابى على الخطوه دى ...دا انا حتى هنام بهدومى
هنا دق باب قداره ...
ادخل
اتفضلى يا حبيبتى
ايه دا يا معلم
دى جلابيه جديده محدش لبسها ...عشان تغيري هدومك
يا سلام على حنيتك ...مكنتش اعرف انك حنين كدا
انتى لسه متعرفنيش يا قداره ...بكرا تعرفى مين دهشان ....و استنى متناميش هجيب لك عشا
لا لا كتر خيرك انا مبتعشاش
ازاى ؟؟؟ الكلام ده مينفعش هنا هخلى ام عبده تحضر لك عشا خفيف كدا
لا و الله مش هقدر لو كلت بطنى هتوجعنى
لا سلامتك ...خلاص هجيب كوبايه لبن
ماشي يا معلم و انا موافقه
قضت قداره ليلتها الاولى فى بيت المعلم تخطط لمستقبلها ..تحلم بما ستجنيه من أرباح هائله من تجارة المخدرات و استيلائها على قلب و أموال دهشان
استيقظت قداره باكرا أيقظت ام عبده و أعدت إفطار لذيذ للمعلم و أولاده
دخلت على زوجها بغرفة نومه ، طبعت على خده قبله لطيفه ، استيقظ المعلم مبتسما
يا صباح الفل و الياسمين
صباحك نادى يا معلم
اجمل حاجه فى الدنيا انى اصحى على الوجه الحسن ده
تسلملى يا سيد الرجاله ..قوم يلا عشان تفطر
بدرى كدا ؟؟
ايوا طبعا الاكل بدرى صحه
طب ما تيجى جنبى اقولك كلمه
الله ...و بعدها معاك يا معلم ؟ مش قلنا نصبر شويه
مش قادر اصبر على حلالى
واحده واحده الدنيا مش هتطير
بشوقك يا قداره
يلا قوم عشان ناكل سوا ...انا كمان عامله حساب الولاد معانا
لا الولاد مبيصحوش دلوقتى خالص
ازاى الكلام ده ؟؟؟ لا من هنا و رايح فى نظام تانى انا مبحبش الدلع
معلش يا قداره سبيهم براحتهم اليومين دول عشان الظروف اللى هما فيها
خلاص يا معلم زى ما تحب
اوعى تكونى زعلتى ؟؟
لا هزعل من ايه ؟؟ انت حر فى اولادك
لا مش مسأله حر و لا حاجه بس مش عاوز اى خلاف من اول يوم
خلاص يا دهشان محصلش حاجه يلا نقوم نفطر
يلا يا حبيبتى
ذهب صلاح بعد طرده من البيت لخالته سعاد و التى كانت تشبه امه كثيرا و روى لها عن ما حدث ...
بكت سعاد كثيرا و أخذته بحضنها
و لا تزعل نفسك يا حبيبي ...انت عارف انى عايشه لوحدى بعد موت ابنى فؤاد الله يرحمه و كنت بتمنى انى الاقى ونيس ليا
انت ابنى و ابن الغاليه الله يرحمها ..امك كانت اختى الصغيره و كنت بحس انها بنتى مش اختى
كتر خيرك يا خالتى ...انتى فعلا زى امى و اول ما فكرت فكرت اجيلك انتى
جدع يا صلاح ...و إن كان على الشغل انت معاك شهاده و الف مين يتمنى يشغلك ...اوعى تشيل هم طول ما خالتك معاك
ربنا يخليكى ليا يا خالتى
مرت الايام و قداره تشعل نار دهشان بتقريبه تاره و البعد عنه تارة أخرى .
كانت تقصد ابعاده حتى إذا اقتربت منه لا يستطيع أن يرفض لها طلبا
فى هذه الأيام عرفت قداره الكثير عن دهشان ..فهو يختلف عن جميع الرجال الذين تزوجتهم رجل أخلاقه عاليه ...يعاملها كطفله و كأمراه ناضجه يفيض عليها بمشاعره البريئه التى تشبه مشاعر صبى فى الخامسة عشر من عمره ...يحاول ارضائها بكل شكل ...ليس لديه مشكله فى اى طلب تطلبه منه
سخى جدا ...ينطبق عليه المثل القائل
( اللى فى ايده مش له )
اما أولاده فكانوا حزانى لا يفارقون غرفهم و لذلك طلبت قداره من دهشان نزولها لعملها من اليوم الثالث لانتقالها لبيته بحجة أنها لا تجد من تتحدث معه
وافق دهشان على مضض و خصص لقداره سياره بسائق توصلها اى مكان تريده
و فى يوم من الايام بينما كانت قداره جالسه فى المقهى الخاص بها تدخن الارجيله و المذياع يصدح بصوت السيده ام كلثوم باغنيتها الرائعه الف ليله وليله
كان يجلس بالقرب منها حسن و عبوده رجلين من رجال الحاره
سمعت عبوده يقول ...
انا مش عارف راح فين ؟؟؟ دورت عليه فى كل حته زى ما يكون فص ملح و داب
ما يمكن مسافر البلد
بلد ايه ؟؟ هو ده عنده بلد ؟؟
ازاى يا جدع ؟؟
بقولك سعد دا تربيه ملجأ ميعرفش حتى ابوه
انت بتقول ايه ؟ و عرفت الكلام ده ازاى ؟؟
انت ناسي انى اعرفه من اول ما جه الحاره هنا و اعرف عنه كل حاجه
طب سألت مراته و عياله عنه ؟؟
ما هو اللى خلانى اقول انه طفش أن مراته و أولاده ملهمش اثر هما كمان ...بس اللى هيجننى ايه اللى خلاه يعمل كدا
الله اعلم ...بس انت شاغل بالك كدا ليه ؟؟
اصل ...
اصل ايه يا عبوده ؟ انطق
اصله قالى على صفقه حلوه و قالى أن مكسبها كبير خلانى بعت اللى ورايا و اللى قدامى حتى دهب الوليه بعته و اديته الفلوس
يا خبرك منيل يا عبوده ...اديته كام يا فالح ؟؟
خمس الاف جنيه
يا خبر خمس الاف مره واحده ؟؟؟
امال انا هتجنن ليه ؟؟ دا الوليه لو مرجعتلهاش دهبها و عليه دهب زى ما وعدتها مش بعيد تدش دماغى بإيد الهون
و مستغرب طفش ليه ؟؟؟ اكيد خد الفلوس بعد ما نصب عليك و هرب ...عوضك على الله يا ناصح ... الله يرحمك مقدما
سمعت قداره ما دار بين حسن و عبوده .....احست أن الدنيا تدور من حولها ، احست باحتباس دمها ،
شعرت بالقهر الشديد و مما زاد احساسها انها لا تستطيع أن تنطق بكلمة واحده عن اتفاقها مع سعد
يا ترى ماذا ستفعل قداره ؟؟ و كيف ستتصرف فى هذا الموقف ؟؟
هذا ما ستعرفوه فى الجزء القادم باذن الله تعالى
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق