قداره
الجزء السابع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
قداره كانت ترتدى فستانا ابيض اللون مزين بورود بيضاء صغيره بفصوص لامعه منثوره على الفستان بالكامل ....واضعه الكحل الذى أعطته لها جوهره و باقى الزينه المعتاده
عندما رآها دهشان اسرع بالنزول من السياره .......اخذ بيدها و قبلها
اتفضلى يا عروسه .
صعدت قداره إلى السياره و كأنها ملكه متوجه ...كانت نظرات دهشان لها تثير غرورها ...لم يستطع رفع بصره و كأنه فى عالم اخر
توقفت السياره أمام مكتب المأذون (الشيخ جلال )
امسك المعلم يدها و انزلها بكل رقه
دلفوا إلى الشيخ حيث كان بانتظارهم
سلام عليك يا شيخ جلال
و عليكم السلام يا معلم ...اتفضل
انا جبت لك العروسه اهى و الشهود
يا مرحبا ...الف مبروك يا جماعه
الله يبارك فيك يا شيخنا
يلا يا شيخنا البطايق اهى اكتب يلا
طب هات يا معلم
لا استنوا ...مش احنا متفقين تطلق قبل ما نتجوز يا معلم ؟؟؟
حاضر يا قداره بس بعدين
لاااا ....اللى أوله شرط آخره نور و بعد العيد مبيتفتلش كحك
انتظرى بس يا عروسه ...انتى عاوزاه يطلق زوجاته ؟؟
ايوا يا سيدنا الشيخ دا اتفاقى معاه عشان ارضى بالجوازه دى
انتى متعرفيش أن اللى بتطلبيه ده حرام شرعا
حرام ازاى يعنى و لا مؤاخذه ؟؟؟
دا مش كلامى يا عروسه دا كلام النبى عليه الصلاه و السلام.... فعَنْ أَبِى هُرَيْرَةَ رضي الله عنه عَنِ النَّبِيِّ صلى الله عليه وسلم قَالَ : (لاَ يَحِلُّ لاِمْرَأَةٍ تَسْأَلُ طَلاَقَ أُخْتِهَا لِتَسْتَفْرِغَ صَحْفَتَهَا ، فَإِنَّمَا لَهَا مَا قُدِّرَ لَهَا)
يعنى ايه مش فاهمه ؟؟
يعنى مينفعش تطلبى أنه يطلق زوجاته علشان يكون خالص ليكى لوحدك
بس دا كان شرطى يا فضيلة الشيخ
شرط ميرضيش ربنا
و بعدين بقا ؟؟؟
انا يا قداره مش هأثر معاكى فى أى شئ و مش هتحسي انى متجوز غيرك اصلا
لا مش كفايه
اللى تطلبيه هعمله لكى
الكلام ده مش قدام الناس كدا ...عن اذنكم خمسه و راجعين
نزلت قداره سريعا من مكتب المأذون و دهشان يهرول خلفها
استنى بس يا قداره ...انتى بتجرى كدا ليه ؟؟
دا مش اتفاقنا يا دهشان و أن كان على المهر هروح البيت و ابعته لك
لا لا مش عاوزه ...انا عاوزك انتى و بس
لا انت رجعت فى كلامك و انا مبحبش الراجل اللى بيرجع فى كلامه
لا مرجعتش و لا حاجه بس اللى بتطلبيه دا صعب اوى ..انا عندى عيال و مقدرش اسيبهم
محدش قالك تسيب عيالك بس انت كدا ضحكت عليا
يا ستى انا مستعد اعمل لك اى حاجه عشان اثبت لك حسن نيتى بس بلاش طلاق انا مبحبش الغدر
خلاص تكتب لى المحل بتاعك اللى فى الحاره
المحل اللى واقف فيه صلاح ابنى ؟؟؟
ايوا
ازاى يا قداره ؟؟؟ دا يعتبر بتاع صلاح
مليش فيه .و بعدين دا حتى محل صغير مطلبتش منك عماره يعنى .و بعدين انا بأمن مستقبلى ...انت لو جرالك حاجه لا قدر الله عيالك هيطلعونى من المولد بلا حمص
منا مديكى مهرك يا قداره
لا مهرى دا ملكش فيه ....دا شرع ربنا
خلاص انا موافق ...بكرا هجيب عقد و اكتبهولك
و ماله ....
يعنى خلاص موافقه ؟؟
طبعا
طب يلا على الشيخ ماذون
لا
لا ليه تانى ؟؟
لما تكتب المحل نبقى نكتب الكتاب
لا خلاص ...تعالى معايا نشترى عقد و امضيلك عليه حالا ...انا مش هقدر استنى لبكرا
و ماله يا معلم نروح نجيبه
انتصرت قداره بجمالها و سحرها على المعلم و ارغمته على قبول طلباتها المبالغ فيها ...فالمحل الذى طلبته منه محل ابوه و جده و لم يكن يتصور ابدا أن يتنازل عنه إلا لابنه
تم المراد و تزوجت قداره من المعلم
توجه المعلم إلى شقته الجديده بإحدى عماراته
انبهرت قداره بما رأت ....الشقه شديدة الاتساع تطل على النيل مباشره ...بها اثاث فاخر كالذى تراه فى الافلام
نورتى بيتك يا عروسه
بنورك يا معلم
انتى متعرفيش انا مبسوط اد ايه ...انا طاير من السعاده ...الدنيا كلها مش سايعانى
ربنا يسعدك يا حبيبي
الله ....قوليها تانى ...حلوه اوى من لسانك اللى زى الشهد ده
حاضر يا حبيبي
يا سلااااام ...امك دعيالك يا دهشان
بس قولى انت حبتنى ازاى بالسرعه دى؟؟
لو قلت لك انك دخلتى فى دماغى من زمان من اول ما شفتك بتتزفى على ضاحى مش هتصدقى
ازاى الكلام ده ؟؟ انت مش قلت انك لما شفتنى الصبح متعرفش جرالك ايه ؟؟
ايوا صح
ايه الفوازير دى بقا ؟؟؟
و لا فوازير و لا حاجه ...انا هفهمك يا ستى
انا لما شفتك فى الفرح قلبى اتحرك و لقيت حاجه جوايا بتقولى انك بتاعتى بس استعذت بالله من الشيطان لانى مبحبش الحرام و لا اسمح لنفسي انى افكر فى واحده على ذمة غيرى
حلو اوى ...طب و بعدين ؟؟؟
لما اتطلقتى من ضاحى و عرفت انا فرحت اوى و اتجدد أملى مره تانيه و فى اليوم اللى كنت جايلك اطلب ايدك فيه عرفت انك اتجوزتى مره تانيه
ها ...و بعدين ؟؟
بعد كدا بقا قررت انى مدورش على اخبارك علشان متعبش و بعدت عن الحاره كلها و مبقتش انزل الا يوم فى الأسبوع
يااا...يعنى انت سبت الحاره بسببي ؟؟
منا قلت لك انا مبحبش الحرام
طب و بعدين ؟؟
واحد صاحبى نصحنى انى اتجوز تانى و خصوصا أن الحاجه تعبانه من سنين و طريحة الفراش ...فكرت كتير ...انا لما حبيت اتجوز تانى كنت عاوزك انتى لانى حبيتك لكن مش عاوز الجواز للجواز نفسه
امال اتجوزت تانى ازاى ؟؟
صاحبى الله قلت لك عليه قعد يزن على دماغى و قالى أن الجديده هتنسينى كل اللى فات ..و فى يوم لقيته داخل بيها عليا
بت يتيمه و منكسره و صغيره فى السن
اتكلمت معاها و لقيتها عاوزه تعيش
رحت لمراتى و قلت لها و هى ممنعتش و قالت لى حقك
ياااا طب و بعدين ؟؟
بعدين بقا انشغلت فى حياتى و خلفت من ثريا عيلين و مبقتش أسأل على اخبارك نهائى لحد ما شفتك انهارده حسيت انى منستكيش لحظه واحده و انى كنت بضحك على نفسي لما قلت انك خلاص انتهيتى من حياتى
ياااا يا معلم ...دا انت شايل فى قلبك كتير اوى
اوى اوى يا قداره ...انتى دعوتى اللى كنت بدعيها فى كل صلاه
انا مش عارفه اقولك ايه
متقوليش ...يلا تعالى لما اوريكى اوضة نومك
يلا يا معلم ...ايه دا ؟؟ مين بيخبط على الباب ؟؟ انت منتظر حد دلوقتى ؟؟
لا ابدا ....هشوف مين و ارجع لك حالا ...اوضة النوم اهى ادخلى غيرى هدومك على ما اجيلك
حاضر
اتجه المعلم للباب ....فتحه ليجد مهدى يقف أمامه يتصبب عرقا
الحق يا معلم ...
فى ايه يا مهدى ؟؟؟
ال........
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق