قداره
الجزء الثالث
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
دخلت قداره تبحث عن صوره للمعلم دهشان
اخرجت صندوق من الصاج به عدد لا يقل عن الخمسين صوره ...تبحث بلهفه شديده و حرص على إيجاد مبتغاها
بت يا توحه ....يا زفته يا اللى اسمك توحه
نعم ..نعم يا معلمه
فين يا بت صورة فرحى على المعلم ضاحى ؟؟
و انا اعرف منين يا معلمه ؟؟؟
ما تعرفى تاكلى يا بعيده ...هو مين اللى بينضف يا بت و ايده فى كل حته ؟؟
و انا هاخدها اعمل بيها ايه بس ؟؟
و الله معرفش
طب دورى بالراحه ...انتى متعصبه اوى
انتى اللى بارده ...الوليه قاعده مستنيه بره يا عديمة الدم
طب هدور معاكى ...متزعليش .....دى ؟؟؟
لا دى صورتى مع سلامه
طب دى ؟؟؟
لا دى مع سعيد الله يرحمه
طب دى ؟؟؟
لا يا زفته دا ابو الليل ...يعنى متعرفيش ابو الليل
لا معرفوش هعرفه منين بس ؟؟؟ بس يمكن دى الصوره اللى عاوزاها ....استنى ....هو ده المعلم ضاحى ؟
ايواااااا هى صوره واحده معاه ...هى دى اللى انا عاوزاها ...كانت فين دى ؟؟
كانت فى جنب الصندوق
طب خلاص غورى انتى ...قدمتى للوليه حاجه تشربها ؟؟
ايوا عملت لها حلبه
ليه والده ؟؟؟؟ ههههههههه انتى بت مجرمه
هو انتى عاوزاها فى ايه الست دى يا معلمه ؟؟؟
و انتى مال اهلك انتى ....امشي يا بت انجرى و اعمليلى كدا فرخه كبيره محمره اصل نفسي مفتوحه اوى
حاضر ...ربنا يفتح نفسك كمان و كمان
احضرت قداره الصوره و النقود و اعطتهم لجوهره مع التوصيه الشديده باتمام المهمه باسرع وقت
متخافيش يا قداره بكرا الصبح هكون عندك بالمطلوب ...انا هفضل طول الليل اشتغلك
ماشي يا خالتى ...مشربتيش الحلبه ليه ؟؟
نبقى نشربها شربات بقا لما المراد يتم
باذن الله يا خالتى
استاذن انا بقا
مع السلامه
جلست قداره تفكر هل ستنجح جوهره فى جلب قلب دهشان لها ؟؟ و لسان حالها يقول
طب ما انتى يا قداره لو كنتى عاوزه تجبيه كنتى جبتيه ...دا انا قداره اللى ميقدرش عليها حد ...بس الموضوع كان هيطول خصوصا انى مليش اى كلام معاه و مبشوفوش الا كل كام سنه مره
هو اه من الحاره و مراته الاولانيه و عياله هنا بس اللى اسمعه عنه أنه بانى عماره كبيره اوى بره الحاره و قاعد فيها هو و مراته التانيه و مبيجيش هنا الا يوم فى الأسبوع يطل على المحل اللى سايبه لابنه الكبير و يراجع حساباته معاه
الاكل جاهز يا معلمه
يخربيتك سرعتينى
معلش يا معلمه مكنش قصدى
يا بت يا بايخه قلت لك مية مره تبقى تعملى صوت و انتى جايه ...انا بتخض بسرعه
حاضر يا معلمه حقك عليا
طب امشي لمى الصور يلا و حطيهم فى الدولاب
طب ممكن اتفرج عليهم ؟؟ اصل شكلك حلو اوى
روحى هاتيهم و اترزعى جنبى هنا و انتى بتتفرجى
حاضر ...هوا
احضرت توحه الصور و جلست بجانب المعلمه
اخذت المعلمه تلتهم الطعام و تنظر إلى توحه بفخر و هى فى حاله اعجاب شديد بالصور
عارفه الصوره اللى معاكى دى ؟؟
مالها يا معلمه ؟؟
دا كان المعلم سلامه تانى بختى
اه المعلم ضاحى كان أول بختك صح ؟؟
صح بس معمرتش معاه كتير
و ليه بقا ؟؟؟
كان عديم الشخصيه كلمه توديه و كلمه تجيبه و انا بصراحه بكرهه الراجل الودنى
الجوازه دى مطلعتش منها بأى حاجه بس اتعلمت انى بعد كدا اخد حقى من الراجل اللى اتجوزه
ها ....و بعدين يا معلمه
قبل شهور العده ما تخلص كان متقدم لى سلامه ....جدع حلو طول بعرض و كان عنده محل مانى فاتوره و كان دايب فى كعوب رجليا ...شرطت عليه عشان ارضى بيه أنه يكتب لى المحل باسمى
ووافق ؟؟؟؟
طبعا وافق ...هو كان يطول ؟؟ دا كان طاير من الفرحه
قعدت مع سلامه سنتين بس كان فيه عيب وحش اوى
عيب ايه بقا ؟؟
كان غيور غيره عاميه ...مكنش عاوزنى أخرج من باب البيت ...كان يتجنن لو رحت قعدت فى المحل شويه
بس عنده حق الصراحه
كسر حقه ....هو صحيح كان يشوف عيون الرجاله و هى هتاكلنى و كان جسمه يقيد نار......زهقت منه و طردته من المحل بتاعى ...هو انا ناقصه قرف ؟؟
اه صحيح بلا قرف ...و اللى بعده بقا يا معلمه حكايته ايه ؟؟
اللى بعده كان أبو الليل ...كان أكبر جزار فى مصر القديمه شافنى فى يوم كنت رايحه ازور جماعه قرايبي و سأل عنى و عرف انا مين و هوب كنا متجوزين فى أسبوع واحد بعد ما دفع مهرى
و مهرك كان ايه بقا يا معلمه ؟؟
خليته اشترالى دكان جنب دكانى و فتحتهم على بعض و ملاه بضاعه كمان
طب كويس
لا كويس ايه بس ؟؟؟ ابو الليل كان عصبى و دمه حامى زياده عن اللزوم ...فى يوم جاله زبون غتت شويه كلمه فى حدوته قام رازعه سكينه رشقت فى قلبه ...خد خمسه و عشرين سنه سجن مع انها كانت مشاجره يعنى آخرها سبع سنين بس المحامى قدم شهود إن كان فى خلافات سابقه و أن المذكور كان متربص للضحيه و القاضى حكم انها جريمة قتل مع سبق الاصرار و الترصد...طبعا أطلقت منه هو انا هفضل مستنياه ده كله ؟؟
لا طبعا .... قوليلى بقا حكايه الاخير
تفى من بوقك يا بت اخير مين ؟؟
قصدى حكاية جوزك الاخرانى
اااه دا بقا سعيد ...الحته الطريه ..حبيب القلب ...سعيد بقا كان ....
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق