قداره
الجزء الرابع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
قوليلى بقا حكايه الاخير
تفى من بوقك يا بت اخير مين ؟؟
قصدى حكاية جوزك الاخرانى
اااه دا بقا سعيد ...الحته الطريه ..حبيب القلب ...سعيد بقا كان حنية الدنيا فيه
راجل بجد و بحق و حقيق ...راجل من اللى يتقال عنهم سيد الرجال
كان شاب متعلم و متنور و كان وارث القهوه بتاعتى دى من ابوه الله يرحمه
طب و اتعرفتى عليه ازاى دا يا معلمه ؟؟
فى يوم كنت قاعده فى المحل بتاعى و لقيت واحد زى البدر المنور داخل عليا
سلام عليكم
و عليكم السلام اتفضل ...نقدر نخدمك بايه يا فندى
انا عاوز منك خدمه واحده و لو عملتيهالى هكون اسعد واحد فى الدنيا
خدمة ايه و لا مؤاخذه؟؟
انك تقبلى تتجوزينى
ههههههههه اتجوزك كدا مره واحده ؟؟
ايوا
انت باين عليك تلميذ لسه
لا انا مش تلميذ و لا حاجه أنا مخلص بكالوريوس تجاره من تلات سنين و عندى ٢٥ سنه
يااا ..بس شكلك صغير اوى ...انت كدا أدى فى السن تقريبا
طب قلتى ايه ؟
فى ايه ؟؟
فى طلبى
طلبك ايه يا سيدنا الافندى ؟؟؟ ...انت بتقول معاك بكالرتوس و انا يدوب بفك الخط ..ابويا الله يسامحه طلعنى من سته ابتدائى
طب و ماله ؟؟ الحب ميعرفش اى فروق
و ماله ايه بس ؟ طب ما تروح تشوف لك واحده متعلمه زيك
انتى فى نظرى احسن واحده فى الدنيا
دا حب بقا ؟؟؟
من اول نظره يا قداره
و انت بتشتغل ايه بقا ؟؟
انا بشتغل فى مكتب محاسبه و عندى قهوه كبيره اوى فى شارع السد وارثها عن والدى الله يرحمه بس قافلها
و قافلها ليه بقا ؟؟ دى لو شغلتها تجيب لك دهب
اصلى مش فاضيلها
يا خساره ....دا انا طول عمرى نفسي يكون عندى قهوه كدا و اقعد فيها زى ما بشوف المعلمين فى الافلام
وافقى انتى بس و هقدمهالك مهرك يا عروسه
طب مش لما اشوفها فى الاول ؟؟
تحت امرك اوريهالك ...إن شالله حالا
لا مش بسرعه كدا ...خلينا الاسبوع الجاى
و ليه التأخير بس ؟ خير البر عاجله ..دى هتنور بزيارتك ليها
كلامك حلو يا استاذ ...الا انت مقلتليش اسمك ايه ؟
انا اسف جدا ...لما شفتك نسيت أسمى ...انا سعيد عمران ابو الوفا
كويس انك لسه فاكر اسم جدك
ههههههههه الحمد لله ...اللى يشوفك ينسي نفسه مش اسمه بس
ماشي يا سي سعيد ادينى فرصه افكر
فرصه اد ايه يعنى ؟؟
ما قلنا اسبوع
حاضر ...حاضر يا قداره
و ليه كدا يا معلمه ؟؟؟ ما كنتى توافقى و خلاص و خصوصا انك بتقولى أنه كان زى البدر المنور
يا بت التقل صنعه ...دا جدع أفندى و لو لاقانى وافقت على طول كدا كان قال انى مدلوقه عليه و كمان اكون فى الأسبوع ده سألت عليه و شفت القهوه دى فين ؟ و تستاهل و الا لأ؟؟
يا سلام عليكى يا معلمه مخك يوزن دهب
امال يا بت ...فى هنا مخ مش بطاطا
طب و بعدين يا معلمه ايه اللى حصل بعد كدا ؟؟
بعد كدا بقيت الاقى الراجل بتاع الورد جايبلى ورد كل يوم ...الصراحه الحركه دى عجبتنى اوى و كيفت دماغى و حسيت أن سعيد ده حاجه تانيه غير اى حد اتجوزته
الله يا معلمه ...بحب الراجل اللى بيفهم ده
هو كان بيفهم بس ؟؟ دا كان أبو الذوق كله
لما اتجوزته حسسنى انى ملكه ..بقا يعمل لى اى حاجه نفسي فيها قبل ما اطلبها ، لما طلبت منه افتح القهوه معارضش و نزل بنفسه نضفها و جاب لها الحاجات الناقصه و عمل لى المكتب اللى بقعد عليه ده و غير اسم القهوه من غير ما اطلب منه و عمل يافطه كبيره و سماها " قهوة قداره "
دا انتى ربنا بيحبك أنه رزقك براجل زى ده يا معلمه
طبعا يا بت بيحبنى بس يا خساره الدنيا محبتش انى افرح و بعد ما قلت خلاص استريحت و ده زوج الدنيا و الاخره جه الموت و خطفه منى
مات ازاى يا معلمه ؟؟
الله يرحمه كان عنده صمام فى القلب و كان محتاج عمليه كبيره بس مرضيش يعملها
و مرضيش ليه بس ؟؟
لما سألته السؤال ده لما وقع قالى
العمليه دى فيها نسبه خطوره و انا مش عاوز اخاطر و اموت و اسيبك
بعد الشر عنك يا حبيبي ان شاء الله تعملها و تقوم لى بالسلامه
باذن الله يا حبيبتى
و عمل سعيد العمليه و خرج بالسلامه ..كنت فرحانه و بقول خلاص لكن للاسف مات تانى يوم فى العنايه المركزه
قعدت حزينه عليه فتره طويله و مكنش فى راجل يملى عنيا بعده
الله يرحمه يا معلمه
الله ياخدك يا بعيده قلبتى عليا المواجع ...قومى يلا شيلى الاكل و رصيلى حجر معسل و اعمليلى كوبايه شاى
حاضر ...عنيا
جلست قداره تفكر بسعيد و كيف سولت لها نفسها نسيانه ؟؟ و اخذت تحدث نفسها
الله ..الحى ابقى من الميت يا قداره..ما انتى بقالك سنتين أهو عايشه على ذكراه ...وماله لما تفكرى فى نفسك شويه ؟؟ الجوازه اللى انتى منظره عليها مجرد مصلحه مفيهاش حب ....يعنى كدا انا وفيه لذكراه برده ...و سعيد هيفضل فى القلب ...بس لازم الواحد يشوف حاله
نامت قداره بعد أن سكنت ضميرها بتلك الكلمات و أغمضت عينيها و هى تفكر فى المكاسب التى ستحصل عليها
فى اليوم التالى استيقظت على قرع شديد بالباب
اسرعت توحه لفتح الباب لتجد جوهره أمامها تبتسم ابتسامه عريضه تظهر من خلالها أسنانها شديدة البياض
فين ست الناس ؟؟؟
لسه نايمه ...انتى جايه بدرى اوى ...الناس كلها لسه نايمه
انا بقا منمتش ...روحى يلا صحيهالى
انا صاحيه يا جوهره ....خلصتى المطلوب ؟
طبعا يا ست الناس
روحى يا توحه حضريلنا انا و خالتك جوهره الفطار
حاضر يا معلمه
ها ....فين الحاجه يا خالتى ؟
اتفضلى
ايه دا ؟؟؟؟؟؟
دا ........
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق