قداره
الجزء الخامس
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
روحى يا توحه حضريلنا انا و خالتك جوهره الفطار
حاضر يا معلمه
ها ....فين الحاجه يا خالتى ؟
اتفضلى
ايه دا ؟؟؟؟؟؟
دا كحل المحبه
نعم يا اختى ؟؟ كحل ايه دا ؟؟؟ ايه يا وليه انتى هتنصبى عليا و الا ايه على الصبح ؟؟
عيب عليكى تقولى الكلام ده ...انتى لسه متعرفنيش
جايبالى ازازة كحل بتتباع على الرصيف بريال و عاوزه فيها الف جنيه ؟؟؟؟!!!
لاااااا دا مش اى كحل
ازاى يعنى ؟؟ كحل من السما ؟؟
حاجه زى كدا ....بصى يا ست الناس الكحل ده عليه شغل مخصوص لكى انتى و المعلم ...هتتكحلى بيه و تروحى محل المعلم دهشان و اول ما يشوفك هتلاقيه مش على بعضه يمكن يطلب الجواز منك فى لحظتها ...بس نصيحه منى اول ما يطلب اوعى تتقلى عليه ....جاوبيه على طول لاحسن يحصل فى الأمور أمور و العمل يفسد
يا سلام ...انتى متأكده يا جوهره ؟؟؟
طبعا متأكده زى ما انا شيفاكى كدا قدامى
نجرب ...بس عارفه لو بتكدبى عليا
و اكدب عليكى ليه بس ؟؟ جربى مش هتخسري حاجه ...قال على رأى المثل الميه تكدب الغطاس
نجرب
استأذن انا بقا يا معلمه
طب و الفطار ؟؟
وقت تانى ... اصل انا منمتش عشان اعمل لك حاجتك سلام يا عروسه
الله يسلمك يا اختى
أمسكت قداره الزجاجه بين يديها تقلبها يمينا و شمالا ...تحدث نفسها
حقا لو طلعتى كدابه ؟؟؟ هجيبك من ودانك يا اللى اسمك جوهره انتى
تناولت قداره طعامها و ارتدت جلبابها البلدى.... وضعت عطرها الفواح .... ارتدت خلخالها و اقراطها و اساورها الذهبيه ...تأنقت كأنها عروس ... اكتحلت من الزجاجه التى اعطتها لها جوهره لتجد عيناها تلمع بشكل عجيب ...كانت تنظر لنفسها بالمرآه باعجاب شديد و كأنها ترى نفسها لاول مره
ذهبت قداره إلى محل المعلم دهشان ...
دهشان فى منتصف الخمسينات ...رجل يظهر عليه اثار النعمه ...وجهه سمين ابيض مشرب بالحمره ...يرتدى الجلباب الصعيدى فوقه العبائه و بيده عصا من الارابيسك المشغول و بيده الأخرى مسبحه من الكريستال
يجلس خلف مكتبه يراجع حساباته بكل جد
المعروف عنه أنه رجل حسن الخلق ، ذو سمعه طيبه ، لا تملأ عينه اى امراه ....حتى زواجه من أخرى كان لظروف مرضيه خاصه بزوجته .
وقفت قداره من بعيد لترمقه من خلف الزجاج و لتستجمع كلماتها ...قررت الدخول
سلام عليكم يا معلم
رد المعلم السلام دون رفع بصره عن اوراقه و لكن بعد لحظه ..و بعد سماع صوتها الساحر و شم رائحتها النفاذه رفع بصره ليري أمامه حوريه من الجنه ...
تسمر المعلم للحظات و لم يستطع انزال نظره و كأنه يرى قداره لاول مره بعمره
اتفضلى يا معلمه ....ياادى النور ...ياادى النور
لاحظت قداره نظرات المعلم المثبته عليها دون أن يرف له جفن و لاحظت فمه المفتوح كأنه لم يراها من قبل بالرغم من معرفته الجيده لها
ايه يا معلم مش هتقولى اقعدى
لا مؤاخذه ....اتفضلى يا قداره ....تشربى ايه ؟؟؟
كل حاجه منك حلوه يا معلم ...شربنى على ذوقك
ان كان عليا انا عاوزك تشربى شربات
شربات ؟؟؟ ليه خير ؟ هو انتوا عندكم مناسبه و الا ايه ؟؟
يعنى
يعنى ايه ؟؟ عندكم و الا معندكمش ؟؟
لو وافقتى هيبقى فيه
وافقت على ايه ؟؟ انا مش فاهمه ايتها حاجه
لو وافقتى على جوازنا
جوازنا ؟؟؟ كدا مره واحده ؟؟؟؟ انت فاجئتنى يا معلم
طب و لو قلت لك إنى انا كمان اتفاجئت مش هتصدقينى
لا ازاى يعنى ...انت هتجننى و الا ايه ؟؟
معرفش يا قداره اول ما شفتك دلوقتى حسيت انى بحبك من زمان اوى ...جتتى قادت نار
الله الله ...فى ايه يا معلم أهدى شويه مش كدا
و الله انا نفسي مش عارف جرالى ايه ؟ و لا بقول كدا ازاى ؟
حاجه غريبه اوى
ها ...قلتى ايه يا قداره ؟؟
انا الصراحه اتفوجئت بالكلام ده
يعنى هتقبلينى و الا لأ؟؟
هو فى واحده فى الدنيا ممكن ترفض المعلم دهشان على سن و رمح ؟؟
يعنى قبلتى ؟ صح ؟؟
مش لما تشوف طلباتى الاول
كل طلباتك مجابه بس نتجوز دلوقتى حالا
بالراحه يا معلم ...انا اول مره اشوفك كدا
طب طلباتك ايه يا ست العرايس
اول شرط... عاوزه مهر مدفعش لاجدع بنت فى الحاره
عاوزه كام يعنى ؟
خمسين الف جنيه
يااااا خمسين ألف جنيه مره واحده ؟؟؟
ايه ؟ خساره فيا ؟؟ مستاهلش ؟؟
لا انتى تستاهلي الدنيا و ما عليها ...انا موافق
تانى شرط ...انا زى الفريك محبش شريك
يعنى ايه ؟؟
يعنى عاوز تتجوزنى يبقى تطلق الجوز اللى على ذمتك
اطلقهم ازاى بس ؟؟ و ذنبهم ايه ؟؟
هو كدا ....و مش هطلب منك اى حاجه بعد كدا ....المأذون اللى يكتب كتابنا يطلقهم الاتنين قبل ما يجوزنا
بس يا قداره .....
مبسش ...دا شرطى
خلاص و انا موافق ...هنكتب انهارده بالليل
طب و المهر ؟؟
هيكون جاهز قبل ما نروح للمأذون باذن الله
تمام ...اروح انا بقى اجهز نفسي علشان لما تفوت عليا اكون على سنجة عشره
و ماله يا حبيبتى ...اتفضلى يا معلمه
خرجت قداره من المحل و هى لا تكاد تصدق نفسها ...كيف يطلب يدها بهذه السرعه ؟؟ لم تتوقع اطلاقا أن تتم العمليه بهذه السهولة و السرعه
يخربيتك يا جوهره انتى سرك باتع صحيح ...كنت فاكراكى نصابه ...انا دلوقتى افوت على سعد و أقوله الفلوس هتبقى جاهزه على اخر النهار علشان يعمل حسابه ....و الله و البليه هتلعب معاكى يا قداره و هيبقى معاكى فلوس زى الرز .
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق