أنس
الجزء الثانى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
مكنتش اعرف اسم الشاب ده ساعتها و لا اعرف ايه حصل معاه بعد ما انا جريت و سبته
بس صورته اتحفرت فى دماغى و بقيت احلم بيه يوميا و هو بيدافع عنى
بقيت ادعى ربنا انى اشوفه مره تانيه علشان أشكره على اللى عمله معايا
و فى يوم من الايام كنت خلصت ثانويه عامه و جالى التنسيق بكليه التجاره
دخلت اول يوم الكليه و كنت فرحانه اوى انى اخيرا سبت الثانوى بقرفه و بقيت طالبه فى الجامعه ....
بقيت اتفرج على شكلها و انا مبهوره ...الورد المزروع .. المبانى الحلوه ..الطلبه اللى عمالين يهزروا و يجروا ورى بعض
و فجأه عينى وقعت عليه
ايوا هو ....انا عمرى ما انسي شكله ابدا
صورته محفوره جوايا
لما شفته مقدرتش انزل عينى من عليه
وقفت اتسمرت زى تمثال الشمع
معقول ؟؟ ربنا استجاب لدعائى اخيرا و لقيته ؟؟
طب اروح أكلمه والا لا
طب يا ترى هو فاكرنى و الا الا ؟
طب ايه اللى جايبه هنا ؟؟ يا ترى هو زميل و الا جاى زياره ؟ انا شايفه فى ايده كتب
يا ترى ..يا ترى
فجاه و انا بفكر التفكير ده لقيت ايد اتحطت على كتفى
شهد .....انتى هنا ؟؟
مين ؟ ايمان ؟
ايوا ايمان يا ندله ...مسألتيش عليا و لا مره ؟ مكنتش عشرة تلات سنين فى إعدادى سوا على نفسك الدسك
معلش يا ايمان انتى دخلتى مدرسه غير مدرستى و بعدنا عن بعض
انتى دخلتى هنا معانا ؟؟
ايوا يا ايمان مع انى كنت أتمنى ادخل تربيه
تربيه ايه ووجع دماغ ايه ؟؟ الكليه هنا اخر روقان
و عرفتى منين بقا ؟؟
من ابن خالتى ...ما هو طالب معانا هنا بس فى الفرقه الرابعه ....اهو اللى واقف هناك ده
ببص على اللى بتشاور عليه ايمان لقيته هو ....لا لا ....معقول ؟؟ حسيت أن الدنيا مش سايعانى و انا بسمع ايمان بتنده بإسمه
انس ....انس
اخيرا عرفت اسمه ...ياااا اسمه حلو اوى ..و ملامحه مريحه جدا
انس كان بيقرب بابتسامته الحلوه و انا قلبى بقا يدق يدق لدرجة انى حسيت أن ايمان هتسمعه
قرب انس و بص لى زى ما يكون بيشبه عليا و هو بيقول لايمان
اهلا يا ايمى شرفتى كليتنا المتواضعة
اهلا بيك يا انوس يا ابن خالتى .. فينك يا ابنى من اخر مره اقنعتنى بالكليه دى و انا مشوفتكش
اقنعتك ؟؟؟ دا على اساس انك كنتى جايبه مجموع طب و انا خليتك تدخلى تجاره ؟
لا ...مسمحلكش تتريق عليا و لا على مجموعى انا كنت جايبه رياض اطفال اسيوط و حقوق بنى سويف و كليات كتير اوى بس مرضتش اروح و قولت انفعكم و اشرف كليتكم بدخولى فيها
خلاص خلاص عرفنا انك شرف لينا يا فندم ...مش هتعرفينا على الانسه ؟؟
اه معلش ...دى شهد زميلتى فى الاعدادى
و دا انس اللى قلت لك عليه يا شهد
قلتيلها ايه عليا ؟؟
قلت لها أن دماغك طقه و مش بتاع مذاكره و مقضيها حفلات لأن صوتك حلو اوى و نص بنات الكليه هيموتوا عليك
بقا كدا ؟؟
لا متخافش هى لسه سامعه الكلام ده حالا
تشرفنا يا انسه شهد
اهلا بيك
مش عارف حاسس انى شفتك قبل كدا
ايواااااا اسطوانة الشقط بدأت اهى
لا و الله يا ايمان ...شكلها مش غريب عليا
هو انتى ساكنه فين ؟؟
انا ...ساكنه فى الحى العاشر مدينه نصر
لا و الله ؟؟ ..... انا بروح هناك كتير
عارفه
عارفه ازاى ؟
ليه بتروح هناك ؟؟
صاحبى و انتيمى ساكن هناك
ااه طب استأذن علشان اروح اشوف أسمى و اشوف الجدول و ادفع المصاريف لو فى دفع
انتى مالك جايه حاميه كدا يا بنتى أهدى شويه
بحب اخلص كل حاجه اول بأول ما انتى عارفانى
شكلك مجتهده يا انسه شهد
متشكره اوى ...عن اذنكم
اتفضلى عاوزين نبقى نشوفك بقا
باذن الله
استنى يا شهد ادينى رقم تليفونك عشان ارغى معاكى شويه بالليل
حاضر ...رقمى 01366636663
رقمك سهل اوى ...ماشي استنى منى مكالمه بقا
مستنيه
مشيت و انا عماله الوم فى نفسي ليه استأذنت بسرعه كدا ؟؟
كان ممكن اتكلم معاه
بس اتكسفت اوى ...و مكنتش عاوزه ايمان تعرف الحكايه
يا ترى هشوفه تانى ؟؟ و هل لو شوفته افكره باللى حصل معايا ؟؟ و الا لا ؟؟
مشيت و انا محتاره و لا رحت شفت أسمى و لا دفعت المصاريف و لا حاجه و روحت البيت و انا فكرى شارد و حاسه انى انا مش انا
انس انقذنى فعلا بس لما شفته انهارده حسيت أن فى حاجه شدتنى له اوى
حاسه انى اعرفه عن قرب
حاسه أنه من دمى ...حد من عيلتى
حد قريب اوى اوى فوق ما اتخيل
يا ترى هو حاسس بالإحساس ده زى ما انا حاسه ؟؟
و هيحس ازاى بس ؟ و هو حتى مش فاكر شافنى فين ؟؟
ياااا دماغى هتنفجر من التفكير
يا شهد
نعم يا ماما
تعالى يلا الغدا جاهز
لا يا ماما عندى صداع ...مش هقدر اكل ..هنام شويه
طيب يا بنتى نامى و لما تصحى هتلاقى الاكل على التربيزه
ماشي يا ماما
حطيت دماغى على المخده و غمضت عيوني و صورته قدامى و هو بيضحك و هو بيتكلم و هو بيسلم عليا و ايده بتلمس أديا
يااااا ...هو انا مالى ايه جرالى ؟؟
قعدت على الحال ده ساعه و دماغى مش مبطله تفكير لحد ما جرس تليفونى رن و لقيت رقم غريب
قلت فى نفسي دى اكيد ايمان
رديت بسرعه
الوو ...الووو ...الوووووو
الو
مين معايا ؟؟؟
انا .......
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
قصصك دائما رائعة ومشوقة
ردحذفبالتوفيق🌹🌹🌹