أنس
الجزء الاول
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
دايما بشوف على النت المشاكل و بس
قليل اوى لما الاقى حكايه مفرحه أو مثل يدى للناس امل فى الحياه
الحكايه دى عملت لناس كتير اكتئاب و خلتهم يفقدوا الامل و يشوفوا الدنيا سودا و أن الناس كلها مبقاش فيها اى خير
و عشان كدا فكرت و قلت ليه الناس متنقلش حكاياتها الايجابيه زى ما بتنقل حكاياتها السلبيه للناس ؟؟ ليه دايما نتكلم عن الوحش و منتكلمش عن الحلو ؟
ليه نكره الناس فى عيشتها و نخليهم يتصوروا أن الناس كلها وحوش بره الشاشه الصغيره دى اللى فى اديهم ؟
و عشان كدا انا جايه لكم انهارده احكيلكم حكايتى و اللى كتير منكم هيشوف انها مأساه
لكن انا شايفه غير كدا خالص
انا شايفه أن فى المحن بتظهر المنح
زى قصه سيدنا يوسف بالظبط احنا فى اول الحكايه شفنا ازاى اخواته حقدوا عليه و كرهوه لدرجة أنهم دبروا مكيده لقتله أو إلقائه فى البير
لا و الجبروت أن اخواته رجعوا يعيطوا لابوهم و يكذبوا و يقولوا أن الديب اكله
و اترمى و هو نبى ابن نبى فى البير و اتباع كعبد ...
بعد كدا افترت عليه امراه العزيز و اتسجن سنين طوال بلا ذنب
و فى الاخر ظهرت برائته و مرضيش يرجع أو يطلع من السجن الا اما امراه العزيز و النسوه اللى قطعوا اديهم يشهدوا بالحق
ربنا فى اخر القصه عوض عليه و رفع شأنه و بقى عزيز مصر بعد ما كان عبد
و القصه فيها ملمح تانى جميل اوى هو موقف الاب و أمله فى وجود ابنه و أنه مصدقش لحظه أنه مات و كان عايش على الأمل أنه هيشوفه مره تانيه
و كلمته انما اشكو بثى و حزنى إلى الله و اعلم من الله ما لا تعلمون ...كل ما اقراها ابكى ...ابكى من صبره الجميل و من رجائه و تعلقه بالأمل اللى كتير مننا مفتقده فى حياته
قصه سيدنا يوسف من القصص المفرحه و ربنا بيوصفها انها احسن القصص
من الحكايات اللى بتدينا امل و أن لازم بعد الضلمه نور ...لازم بعد التعب راحه
السوره دى اللى يقرأها ربنا يزيل همه لأنها بتوريلك أن مفيش حاجه مستحيله
و قادر ربك ينشلك من حزنك و يبدلك الفرح ويبدل حالك من الحزن للفرح
و حتى لو استمر الالم فأكيد اكيد دا الخير ليك
معلش دى مقدمه كان لازم اقولها عشان تعرفوا أن عوض ربنا كبير و أن مهما يحصلك فى الدنيا فهو خير
انا شهد 24 سنه مخطوبه لاجمل انسان فى الدنيا ....انس حبيبي 😍
الانسان ده كان طاقه النور بالنسبالى ، و لولاه مكنتش ابقى موجوده دلوقتى ما بينكم و كنت انتحرت من زمان
الانسان ده اللى غير نظرتى للحياه ، و حببنى فيها بعد ما كنت فقدت الامل نهائى
هتقولوا ازاى تقولى كدا و انتى كاتبه مقدمه عن التفاؤل هقولكم أصل اللى انا اتعرضت ليه كان اختبار صعب اوى مفيش واحده فى الدنيا تتحمله و خاصة فى مجتمعنا
لكن وقوف حبيبي جنبى و دعمه ليا خلانى عديت كل الحدود اللى تتخيلوها
قصتى حقيقيه مفيهاش تأليف .... هدفها الامل و أن الخير لسه موجود فى الدنيا
بدأت حكايتى مع انس لما شفته أول مره فى حياتى و كنت ساعتها فى ثانويه عامه و راجعه متأخر من الدرس
مجموعه من الشباب عاكسونى بس انا متلفتش و لا بصيت لهم و فضلت ماشيه فى طريقى بخطوه متسارعه
بعدها بدأوا يلاحقونى و الظاهر انهم مكنوش فى وعيهم أو شاربين حاجه ...
و ابتدوا يلفوا حواليا فى شكل دايره
كنت مرعوبه جدا و ببص حواليا علشان حد ينجدنى مش لاقيه
و بدأ واحد منهم يقول كلام مش كويس
كل اللى كان على لسانى انتوا عاوزين ايه ، ابعدوا عنى ...و بدأت اعيط
دا جرأهم اكتر و بدأ واحد منهم يمد ايده عليا و الكل يشجعه و يقوله ايوا يا خليفه يا رايق
و انا احاول اخبى نفسي ورا كتبى و ابعد عنه بس هما ورايا و قافلين عليا مش مخلينى عارفه اتحرك
الشارع كان هادى و محدش ماشي فيه لأن احنا نعتبر ساكنين فى مكان جديد
و فجاه ظهر انس معرفش ظهر منين .. كأنه ملاك ربنا بعته ليا
قلع حزامه و نزل ضرب فيهم
هما كانوا اربعه ...انا اتسمرت مكانى و معرفتش اعمل ايه
انس صرخ فيا .... أجرى بسرعه
بقيت أجرى بكل قوه زى ما يكون اول ما سمعته بيقول كدا كأنه داس على زرار
مبصتش ورايا وفضلت أجرى لحد ما وصلت البيت
طلعت جرى على اوضتى و قفلت الباب عليا بالمفتاح و حمدت ربنا أن امى مشفتنيش فى الوضع ده
وبقيت اعيط و جسمى كله يترعش من الخوف
بعد ما هديت قمت اتوضيت و صليت و بقيت و انا ساجده اعيط و اشكر ربنا أنه انقذنى من الحيوانات دى و ادعى للشاب اللى ربنا بعته ليا عشان ينقذنى
مكنتش اعرف اسم الشاب ده ساعتها و لا اعرف ايه حصل معاه بعد ما انا جريت و سبته
بس صورته اتحفرت فى دماغى و بقيت احلم بيه يوميا و هو بيدافع عنى
بقيت ادعى ربنا انى اشوفه مره تانيه علشان أشكره على اللى عمله معايا
و فى يوم من الايام .......
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق